ئەڤرۆ،ھەژار مەعروف:
راھێنەرێ یانا پێشمەرگا ھەولێرێ سەمیر بابو ئەوێ ل وەرزێ ئەڤ سالە شیای ل گەل یانا خوە رێزا دوێ ل سەر ئاستێ خولا ھەرێما کوردستانێ ب دەستخوڤە بینت د دیدارەکێ دا ل گەل رۆژناما ئەڤرۆ دیارکر چەند یانێن ھەرێما کوردستانێ پەیوەندی ب وی کریە بۆ وەرگرتنا ئەرکێ راھێنەریا تیما ئەوان ل وەرزێ بھێت و ھەتا نوکە ئەوی چو بریار ل سەر ئەوان داخوازیێن ئەوان یانە نەداینە.
زێدەتر سەمیر بابوی گوت: پشتی یاریێن خولا ھەرێما کوردستانێ ب دووماھی ھاتین سێ یانێن ھەرێما کوردستانێ ب فەرمی پەیوەندی ب من کریە کو دو ژ پارێزگەھا ھەولێرێ بوون و یانەکا پارێزگەھا دھۆکێ یە لێ ھەتا نوکە من چو بریار ل سەر داخوازین ئەوان یانە نەداینە ژبەرکو ئەز گرێدای یانا پێشمەرگا ھەولێرێ مە و ھەکە یانا پێشمەرگە ئەو داخوازی و ماڤێ یاریکەران یێ وەرزێ بوری پێشکێشی یاریکەران کر وی دەمی بێ گومان دێ مینم ل گەل یانا پێشمەرگە بۆ سالەکا دی ژی.
سەمیر بابوی ئاماژە ب وێ چەندێ ژی کر یانا پێشمەرگە دێ چارەنڤێسێ خوە ل چەند رۆژێن بھێت زانیت وەکو کارگێریا یانێ بۆ دیارکری و ھەر دەمێ یانا پێشمەرگە خوە ڤەکێشا یان ژی بریارا دەست بەردانا تیمێ دا وی دەمی دێ ھزر ل یانەکا دی کەم و دبیت پتر نێزیکی وێ یانا پارێزگەھا دھۆکێ بەم ژبەرکو وێ یانێ دیارکری یە دێ ھەمی خالێن تە ب جھـ ئینن و شیانێن وێ یانێ دا ھەیە بشێت ھەڤرکیا ناسناڤێ خولێ بکەت.

ئەڤرۆ نیوز:
پشتی یاریێن گەرا شەشێ و بەری دووماھیێ ژ خولا بژارە یا عیراقێ یا تەپا پێ بۆ وەرزێ ئەڤ سالە ب دووماھی ھاتین و بتنێ ھەڤرکی دناڤبەرا دو یانە دا مایە و شەش یانێن دی ھیڤێن برنا ناسناڤی و رێزا دوێ ژ دەستدایە .
ھەردو یانێن زەورا و نەفت وەست رێزێن ئێکێ و دوێ مسوگەر کرن ھەردیسان ھەردو پلێتێن دەربازبوونێ بۆ قارەمانیا کاسا ئێکەتیا ئاسیا یا تەپا پێ بۆ وەرزێ ٢٠١٦-٢٠١٧ مسوگەر کرن، تیما زەورا پشتی شیای وێ سەرکەفتنا مەزن ل سەر مینا ب پێنج گولان بەرامبەر گولەکێ سەرێ لیسەیا خولا بژارە یا عیراقێ پاراست ب ١٤ خالان و بۆ یاریا ٢٤ ل وەرزێ ئەڤ سالە توشی خوسارەتی نەبووی و تیما نەفت وەست ھەلگرا وەرزێ بوری رێزا دوێ پاراست پشتی شیای ل یاریگەھا شەعب سەرکەفتنەکا مەزن ل سەر جەویە توماربکەت ب سێ گولان بێ بەرامبەر و خالێن خوە گەھاندنە ١٣ خالان و تەلەبە ب ٩ خالان رێزا سیێ دھێت نەفت ب ھەشت خالان رێزا چارێ دھێت.
ل یاریێن حەفتیا دووماھیێ ھەتا رادەکی ئەرکێن ھەردو یانێن نەفت وەست و زەورا یێ ب زحمەت نابن تیما زەورا سەرکێشا خولێ دێ ل گەل یانا نەفت کەت ل یاریگەھا شەعب و نەفت وەست دێ ل باژێرێ بەغدا ھەمبەری یانا مینا کەت .

زاخۆ,ھشیار دوبانکی:
ژ بۆ پتر خزمەتکرنا ئاستێ راگەھاندنێ ل باژێرێ زاخۆ راگەھاندنا یانا زاخۆ دی خولەکێ بۆ رۆژنامەڤان وفوتوگرافێن باژێرێ زاخۆ رێکئخیت،ئەڤ خولە دێ بۆ ماوێ پێنج رۆژان ڤەکێشیت.
محەمەد سەدیق بەرپرسێ راگەھاندنا یانا زاخۆ بۆ رۆژناما ئەڤرۆ گوت :بۆ پتر مفا وەرگرتن ژ وی دەمێ راوستای یێ چالاکیێن وەرزشی تایبەت خولێن کوردستانێ و عیراقێ مە ھزر ل ڤێ چەندێ کریە کو خولەکا ھێزکرنێ بۆ رۆژنامەڤان و فوتوگرافێن رێکبێخین و دڤێ خولێ دا دێ ماموستایێن پشکا راگەھاندنا پەیمانگەھا تەکنیکی وانا بێژنە پشکدارە و ھەردیسان ماموستایێن تایبەت ب بەشێ راگەھاندنێ ڤە دێ ل خولێ ئامادەبن بۆ وانا.
ل دووماھیێ بەرپرسێ راگەھاندنا یانا زاخۆ دیارکر ئەڤ خولە دێ بۆ ماوێ پێنج رۆژان ڤەکێشیت و دێ ل ھولا گونگران یا یانا زاخۆ یا نیڤدەولی ھێتەڤەکرن و ل دووماھیێ دێ باوەرنامە ل سەر پشکداران ھێنە بەلاڤەکرن.

ئەڤرۆ:
بەرنامەیەکێ وەرزشی ل سەر تلەفزونەکا ئیسپانی دیارکری یە سەروکێ یانا ریال مەدرید دڤێت ب ھەر حالەکێ ھەبیت ناسناڤێ خولا چامپیونس لیگ ب دەستخوڤە بینت بۆ جارا پازدێ و سوز دایە یاریکەرێن خوە ئەگەر بشێن سەرکەفتنێ ل سەر ئەتلەتیکو مەدرید توماربکەن ل یاریا دووماھیێ ئەو دێ پاداشێن مەزن دەتە ئەوان.
ئەوی بەرنامەی دیارکریە ژی فلورتینو پێریز سەروکێ یانا ریال مەدرید بۆ یاریکەرێن خوە دیارکری یە ھەکە ئەو شیان سەرکەفتنێ ل یاریا دووماھیا قارەمانیا یانێن ئورۆپا قارەمانێن خولا ل سەر یانا ئەتلەتیکو مەدرید توماربکەن دێ ھەر یاریکەرەکی ٧٠٠٠٠ ھەزار یوریان دەتە یاریکەران وەکو پاداش .
سەروکێ ریال بۆ زێدان دیارکری یە ھەکە ب ناسناڤێ قارەمانیێ ڤەگەرانە مەدرید ئەو دێ وی دەمی ١٤٠٠٠٠٠ ئێک ملیون و چارسەد ھەزار یوریان دەتە زێدان وەکو پاداش.
ھەژی گوتنێ یە یاریا دووماھیا قارەمانیا چامپیونس لیگ یا ئەڤ سالە بریارە ل ٢٥-٥-٢٠١٦ ل یاریگەھا سەنسێرو ل ئیتالیا دناڤبەرا ریال مەدرید و ئەتلەتیکو مەدرید بھێتەکرن.