ئەڤرۆ نيوز:

ل تورکیا سەرۆک وەزیرێن نوو یێ حوکمەتێ و سەرۆکێ گشتی یێ ئاکپارتی دیار دبیت و د رۆژا یەکێ یا گەنگەشا د ناڤبەرا جڤاتا سەرکردایەتیا ئاکپارتی و سەرۆکێن لقێن ئاکپارتی یێن ل ھەموو باژێرێن تورکیا ھزرێن خوە بۆ دیارکرنا سەرۆک وەزیرێن نوو دا دیار کرن و ل دووڤ ئەنجامان پرانیا سەرۆکێن لقان دخوازن بینالی یلدرم ببیتە سەرۆک وەزیرێن نوو.
پشتی کو ئەحمەد داوود ئوگلۆ ل سەر داخوازا سەرۆک کۆمارێ تورکیا رەجەب تەیب ئەردۆگانی راگەھاند کو ئەو خوە د کۆنگرێ ئاکپارتی دا وەک سەرۆکێ گشتی بەربژێر ناکەت د ناڤ رێزێن ئاکپارتی لێگەرینا ل سەرۆکێ نوو بەردەوام دکەت و ل دووڤ زانیاریێن تایبەت و ئاخڤتنێن زانایێن سیاسەتێ ب فەرمانا ئەردۆگانی جڤاتا سەرکردایەتیا یا ئاکپارتی و سەرۆکێ لقێن ٨١ باژێرێن تورکیا یێن ئاکپارتی ھزرێن خوە ل سەر ھەرسێ بەربژێران ئاشکرا کرینە و د رەوشا نھا دا بینالی یلدرم وەزیرێ بەرێ یێ حوکمەتا ئاکپارتی دەنگێ ھەری زێدە ب دەست خستیە.
د ڤێ دەربارێ دا رۆژنامەڤان رەمەزان دەمیر ل ئەنقەرە راگەھاند کو جڤاتا سەرکردایەتیا یا ئاکپارتی و ٨١ سەرۆکێن لقێن ڤێ پارتێ کۆمبوونەک تایبەت سازکرن و کۆمبوون ژ ئالیێ بەرپرسێ رێکخستنێن ئاکپارتی مستەفا ئاتاش ڤە ھاتە برێڤە برن و ئاتاش راگەھاند کو ئەو دخوازن سەرۆکێ نوو ل سەر داخوازا ھەموو رێکخستنێن وان بیت و بۆ ڤێ چەندێ ژی ھزرا ھەموویان بۆ وان گەلەک گرنگە و گۆت: (ئەم دخوازین کادرێن پاشەرۆژێ یێن رێڤەبەریێ دەستنیشان بکەین و کەسەکی زانا و خوەدان شیان وەک سەرۆکێ ھەلبژێرین دا کۆ د ھەر واری دا وەلات گەشە بکەت).
ل دووڤ ھندەک زانیاریان ئەردۆگانێ سەرۆک کۆمار ناڤێن نومان کورتولموش جێگرێ سەرۆک وەزیران، بەکیر بۆزداخێ وەزیرێ دادێ و بینالی یلدرمێ وەزیرێ بەرێ وەک سێ بەربژێر دەستنیشان کریە و داخواز ژ جڤاتا سەرکردایەتی و لقێن ئاکپارتی کریە کو ھزرێن خوە د دەربارێ ھەرسێ بەربژێران دا ئاشکرا بکەن و وەسا خوەیا دکەت بینالی یلدرم کو ھەڤالێ نێزیک یێ سەرۆک کۆمار ئەردۆگانە وەک سەرۆک وەزیرێن نوو بھێتە دەستنیشان کرن.
کۆنگرێ ئاکپارتی دێ رۆژا ئێکشەمبیا بھێت ل باژێرێ ئەنقەرە یێ پایتەختا تورکیا برێڤە چیت و د کۆنگرێ دا دێ یەک بەربژێر ب تنێ خوە بۆ پۆستا سەرۆکێ ئاکپارتی دەستنیشان بکەت و ئەڤ کەس ژی بینالی یلدرمە.