ئه‌ڤرۆ نیوز، زه‌رى نه‌وزاد:
نمایشكارا جلوبه‌رگان و وه‌سیفا ئێكێ یا شاهجوانا به‌رازیلێ راكیل سانتوس یا 28 سالى پشتى ئه‌نجامدانا نشته‌گه‌ریه‌كا جوانكارییێ ئێكسه‌ر گیانێ خوه ژ ده‌ست دا .
مالپه‌رێ دیلى میل یێ بریتانى ئاماژه ب وێ چه‌ندێ كریه كو نمایشكارا به‌رنیاس یا جلوبه‌رگان نشته‌گه‌ریه‌كا جوانكاریێ بو دێمێ خوه كریه و دئه‌نجامدا گیانێ خوه ژ ده‌ست دا.
ئاكرێ ، نه‌وزاد زاده هلۆرى:
په‌یمانگه‌ها ته‌كنیكى یا ئاكرێ ده‌لیڤا خواندنێ بو ده‌رچوویێن هه‌رێما كوردستانێ ئه‌ڤێت كو هه‌تا نها ناڤێت وان ل چوو زانكو و په‌یمانگه‌هاتین هه‌یه رادگه‌هینت كو دكارن فورما وه‌رگرتنێ پێشكێشى په‌یمانگه‌ها ته‌كنیكى یا ئاكرێ پشكا ئێڤاران بكه‌ن.
په‌یمانگه‌ها ته‌كنیكى یا ئاكرێ لسه‌ر لاپه‌رێ تایبه‌تى َخوه‌یێ فه‌یس بووكێ راگه‌یاندیه كو قوتابى دكارن لرۆژا شه‌مبى 16/1/2016 وێڤه داخوازیا وه‌رگرتنێ بو خواندنێ ل په‌یمانگه‌ها وان پێشكێش بكه‌ن و گۆت : ( قوتابیێن هه‌ردوو پشكێن زانستى و وێژه‌یى دكارن داخوازیا وه‌رگرتن و درێژه‌دان ب خواندنێ بو په‌یمانگه‌ها ئاكرێ بلند بكه‌ن كو ژ ئه‌ڤان پشكان پێكدهێتپشكا كارگێرى یاسا ، پشكا ره‌زگه‌رى ، پشكا روپیوان ، پشكا زانستێITو پشكا ته‌كنه‌لوژیا زانیارین )
ئه‌ڤرۆ نيوز:
پشتى دوهى محه‌مه‌د حاجى رێكخه‌رێ ژوورا په‌يوه‌نديێن سياسى يێ بزاڤا گۆران ده‌ست ژ كار كێشاى، ئه‌ڤرۆ
د كۆنگره‌يه‌كێ رۆژنامه‌ڤانى دا ئه‌گه‌رێن ده‌ست ژ كاركێشانا خوه راگه‌هاند و گوت: چاره‌نڤيسێ گۆران يێ كه‌تيه دده‌ستێ هنده‌ك سنيێلان دا.
محه‌مه‌د حاجى رێكخه‌رێ ژوورا په‌يوه‌نديێن سياسى يێ بزاڤا گۆران ئاماژه ب وێ يه‌كێ ژى كر كو بزاڤا گۆران ناوچه‌گه‌ريێ دكه‌ت و گرنگيێ ب بادينان و كه‌ركووكێ ناده‌ت.
ئه‌ڤرۆنیۆز، ئه‌یاد به‌رواری
سایتێ (ئویل پرایس) یێ ئه‌مریكی به‌لاڤكر، هه‌كه شه‌ڕ د ناڤبه‌را ئیرانێ و سعودیێ روودا، دێ بهایێن په‌ترۆلێ ل بازارێن جیهانی گه‌هنه 250 دۆلاران بۆ هه‌ر به‌رمیله‌كێ.
سایتێ ئه‌مریكی، ل دووڤ رۆژناما الدیار یا لوبنانی، دیاركر كو ناكۆكی د ناڤبه‌را ئیرانێ و سعودیێ پتر لێهاتینه ونوكه په‌یوه‌ندیێن وان هه‌ردو وه‌لاتان گه‌هشتینه ئاسته‌كێ خراب كو ب درێژیا چه‌ندین سالێن بۆری دا نه‌گه‌هشتبوونه وی ئاستی و هژماره‌كا وه‌لاتێن كه‌نداڤی یێن هه‌ڤپه‌یمانێن سعودیێ په‌یوه‌ندیێن خوه ییچن دبلوماسی ل گه‌ل ئیرانێ كێمكرن و به‌حرێنێ وه‌كو سعودیێ، ئه‌و په‌یوه‌ندیه ژی بڕین.
وی سایتی ژ زارده‌ڤێ دكتۆر حسێن عه‌سكه‌ری مامۆستایێ زانكۆیا (جۆرج واشنتۆن) یا ئه‌مریكی به‌لاڤكر “هه‌كه شه‌ڕ د ناڤبه‌را وان هه‌ردو وه‌لاتان دا روودا، دبیت بهایێن په‌ترۆلێ بلند ببن و بگه‌هنه 250 دۆلاران بۆ هه‌ر به‌رمیله‌كێ و پاشی دوباره دێ بها هێنه خوار هه‌تا ل ئاستێ 100 دۆلاران بۆ هه‌ر به‌رمیله‌كێ ب راوه‌ستیت، به‌لێ هه‌كه سعودیه و ئیران هێرشان بكه‌نه ده‌زگه‌هێن په‌ترۆلێ یێن هه‌ڤدو، دبیت بهایێ ئێك به‌رمیلا په‌ترۆلێ بگه‌هیته 500 دۆلاران و بۆ ده‌مه‌كی ل وی ئاسی بمینیت و نزمبوونا بهای دێ ل سه‌ر ئاستێ ژناڤبرنا ده‌زگه‌هێن په‌ترۆلی یێن هه‌ردو وه‌لاتان مینیت.
ئه‌ڤرۆنیۆز، ئه‌یاد به‌رواری
سه‌رۆكێ كۆمه‌لا ئورۆپی بۆ ئازادیا عیراقێ راگه‌هاند، میلیشیێن حه‌شد شه‌عبی و یێن ئیرانی كوشتار و ده‌ربه‌ده‌ركرنا ب زۆری دژی سونه‌یێن پارێزگه‌ها دیالا ئه‌نجام دده‌ن و داخواز ژ سه‌رۆك وه‌زیرێن عیراقێ و ئه‌مریكا و جڤاتا ئاسایشا نێڤده‌وله‌تی دكه‌ت وان تاوانێن دژی مرۆڤایه‌تیێ ل پارێزگه‌ها دیالا راوه‌ستینن.
ئیسترون ئیستیفنسون سه‌رۆكێ كۆمه‌لا ئورۆپی بۆ ئازادیا عیراقێ د په‌یچێ كۆمه‌لێ دا دبێژیت” راپۆرتێن ب ترس ل دۆر كارێن قركرنێ و كوشتارێن ڕێكخستی و كوشتنا وه‌لاتیێن سونه ل پارێزگه‌ها دیالا و په‌قاندنا مزگه‌فتێن سونی، ب تایبه‌ت ل قه‌زا میقدادیێ، دگه‌هنه ده‌رڤه‌ی عیراقێ، مخابن حوكمه‌تا عیراقێ و ئیدارا ئه‌مریكی دبێ ده‌نگن به‌رامبه‌ر ڤان تاوانێن وه‌حشیانه یێن كو میلیشیێن ب سه‌ر ئیرانێ ڤه (حه‌شد شه‌عبی) ب سه‌ركردایه‌تیا (هادی عامری) ئه‌نجام دده‌ن”.
ناڤبری ئاشكراكر” ل دووڤ راپۆرتێن ناڤخوه‌یی، كو چه‌ندین ژێده‌رێن عیراقی و هه‌رێمێ پشت راستكرین، میلیشیێن شیعی ده‌رفه‌ته‌ك یا دایه ئاكنجیێن سونی ل باژێرێ میقدادیێ كو ئیٍَكسه‌ر باژێری چۆل بكه‌ن، هه‌كه نه، هه‌كه نه، دێ هێنه كوشتن، ئه‌ڤه ژی تاوانه‌كه دژی مرۆڤایه‌تیێ”.
سه‌رۆكێ به‌رێ یێ لژنا ئه‌منی ل پارێزگه‌ها دیالا (حسێن زوبێدی) بۆ كه‌نالێ الجزیره ل 10 ڤێ مه‌هێ گوتبوو” كوشتنا وه‌لاتیان ل مێقدادیێ، پلانه‌كا پێشوه‌خت بوو و پشتی په‌قینا مزگه‌فته‌كێ كو ئه‌و كاره ل سه‌ر داعشێ هاتبوو هژمارتن، میلیشیێن هادی عامری یێن كو به‌ری وێ چه‌ندێ هاتبوونه به‌رهه‌ڤكرن، به‌ر ب بنگه‌هێ پۆلیسان چوون و كونترۆلكر و ده‌ست ب كوشتارێن خوه ل پارێزگه‌ها دیالاكرن”.
پارێزگه‌رێ به‌رێ یێ دیالا (حسێن حمیری) بۆ كه‌نالێ الجزیره ل 12 ڤێ مه‌هێ گوتبوو” 90 گه‌نجێن هه‌ردو تاخێن (عروبه و هه‌ڤچه‌رخ) ل باژێرێ میقدادیێ، ژلایێ میلیشیێن حه‌شد شه‌عبی ڤه هاتبوونه كوشتن و مزگه‌فت ژی ل به‌رچاڤێن پۆلیسان سۆتن و ئه‌و میلیشیاته دچنه دخانیان ڤه و خه‌لكێ سونه دكوژن و هه‌تا نوكه 10 مزگه‌فتێن سونان ل قه‌زا میقدادیێ یێن هاتینه په‌قاندن” . ناڤبری هه‌ر ئێك ژ رێكخراوا به‌در كو (هادی عامری) سه‌رۆكێ وێ یه و ئه‌و رێكخراوه سه‌ر ب فه‌یله‌قا قودس یا ئیرانی ڤه‌یه، ، و پارێزگه‌رێ دیالا یێ سه‌ر ب وێ رێكخراوێ ڤه، ب به‌رپرسیار زانین ژوان كوشتاران.
ئیستیفنسونی، ئیران تومه‌تباركر كو ل دووڤ ڤان كوشتارانه و خویاكر” ئه‌ڤ كارێن ئیران ل عیراقێ دكه‌ت، دبنه ئه‌گه‌رێ به‌رده‌وامبوونا داعشێ، و داخوازكر هه‌ڤپه‌یمانیا نێڤده‌وله‌تی ب سه‌ركێشیا ئه‌مریكا و جڤاتا ئاسایشا نێڤدوله‌تی و وه‌لاتێن ده‌ڤه‌رێ، پێرابوونێن ڤه‌بر بگرنه به‌ر بۆ راوه‌ستاندنا مایتێكرنا ئیرانێ د عیراقێ دا و هنارتنا باده‌كا مایتێكرنێن ئیرانێ د عیراقێ دا بۆ جڤاتا ئاسایشا نێڤده‌وله‌تی و دادگه‌هێن نێڤده‌وله‌تی یێن تاوانان.
ئیسترون ئیستیفنسون سه‌رۆكێ كۆمه‌لا ئورۆپی بۆ ئازادیا عیراقێ، به‌ری نوكه ئه‌ندامێ په‌رله‌مانێ ئورۆپی بوو، د ناڤبه‌را سالێن 2009- 2014 ێ، سه‌رۆكێ لژنا په‌یوه‌ندیان بوو ل گه‌ل عیراقێ یا سه‌ر ب په‌رله‌مانێ ئورۆپی ڤه.
ئه‌ڤرۆنیۆز، ئه‌یاد به‌رواری
گوڤاره‌كا ئه‌لمانی د بیاڤێ ساخله‌میێ دا به‌لاڤكر كو چه‌ندین ئه‌گه‌ر بۆ سووربوونا چاڤان یێن هه‌ین وه‌كو مانا مرۆڤی بۆ ده‌مه‌كێ درێژ ل سه‌ر شاشان، یان ژی بایێ سار ده‌مێ هاژۆتنا ترومبێلێ، یان ژی ده‌مێ رهه‌كا خوینێ یا بچووك د بچیت ده‌مێ كوخكی.
گوڤارا (سنیۆرین راتغییر) یا ئه‌لمانی دیاركر ژی كو قه‌تره‌كا چاڤان كو (هیالۆرونیك) تێدا بیت و چو كه‌ره‌ستێن پارێزگه‌ریێ تێدا نه‌بن، ئێك ژ چاره‌سه‌ریانه بۆ سووربوونا چاڤان، به‌لێ هه‌كه پشتی دو رۆژان ژ بكارئینانا وێ قه‌ترێ، پێدڤیه سه‌ره‌دانا نوژدارێ چاڤان بهێته كرن.
ئه‌ڤرۆنیۆز، ئه‌یاد به‌رواری
رۆژنامه‌كا بریتانی به‌لاڤكر كو ل گه‌ل به‌رده‌وامبوونا هاتنا خوار یا بهایێن په‌ترۆلێ ل باژارێن جیهانی، بهایێن پانزینێ ژی دێ هێنه خوار و دێ ژ ئاڤێ ئرزانتر بیت.
رۆژناما (ئیندبندنت) یا بریتانی ئه‌ڤرۆ پێنج شه‌مبی ژ كۆمپانیه‌كا تایبه‌تمه‌ند ب ترومبێلان و ته‌ئمینكرنا وان ڤه‌گوهاست “هه‌كه بهایێن په‌ترۆلێ گه‌هشته 20 دۆلار بۆ هه‌ر به‌رمیله‌كێ، دێ بهایێن پانزینێ ئه‌زانبن و گه‌هنه 90 بنسێن ئیسترلینی بۆ هه‌ر لتره‌كا پانزینێ و هه‌كه بهایێن په‌ترۆلێ گه‌هشنه 10 دۆلاران بۆ هه‌ر به‌رمیله‌كێ، بهایێ لتره‌كا پانزینێ دێ بیته 86 بنس”.
بهایێن په‌ترۆلێ ژ ناڤه‌راستا 2014 ێ وه‌ره 60% یێن هاتینه خوار و ئه‌ڤرۆ پێنجشه‌مبی په‌ترۆلا (برنت) یا جیهانی چو دبن 30 دۆلاران دا بۆ ئێك به‌رمیلێ كو كێمترین بهایه د 12 سالێن بۆری دا دهێته توماركرن.
بهایێن په‌ترۆلێ ب شێوه‌كێ به‌رچاڤ هاتنه خوار ژ ئه‌گه‌رێ هه‌بوونا رێژه‌كا مه‌زن یا په‌ترۆلێ ل بازارێن جیهانی و كێمبوونا داخوازیێ ل سه‌ر و دلته‌نگی ژبه‌ر لاوازبوونا ئابوورێ چینێ كو دهێته هژمارتن وه‌لاتێ دویێ ل جیهانێ د كارئینانا په‌ترۆلێ دا، دیسا وه‌به‌رهێنه‌ر پێشبینیا گه‌هشتنا په‌ترۆلا ئیرانی بۆ بازارێن جیهانی ل ده‌مه‌كێ نێزیك، پشتی سزا ل سه‌ر ئیرانێ هاتینه ڕاكرن ل دووڤ ڕێككه‌فتنا ئه‌تۆمی ئه‌وا ل سالا 2015 ێ هاتیه ئیمزاكرن و ئه‌ڤه ژی وێ چه‌ندێ دگه‌هینیت كو دێ رۆژانه ملیۆن به‌رمیلێن دی یێن په‌ترۆلێ هیچنه دناڤ بازارێن جیهانێ دا، كو ب خوه رێژه‌كا مه‌زن یا په‌ترۆلێ ل وان بازاران یا هه‌ی، شرۆڤه‌كارێن ئابووری ژی دبینن كو بهایێن په‌ترۆلێ دێ د نه جێگیر بن هندی په‌ترۆلا زێده ل بازاریچن جیهانی هه‌بیت و داخوازی ل سه‌ر یا كێم بیت.
ئه‌ڤرۆنیۆز:
پشتی جڤاتا پارێزگه‌ها دهۆكێ ل 28 مه‌ها بۆری بریارا داخستنا هۆلێن قومارا كینۆیێ ده‌ركری، ئه‌و بریاره كه‌فته د وارێ بجهئینانێ دا.
هێمن سلێمان په‌یڤدارێ رێڤه‌به‌ریا پۆلیسێن دهۆكێ دیاركر” پشتی نڤیسارا فه‌رمی ژلایێ كارگێریا پارێزگه‌ها دهۆكێ و جڤاتا پارێزگه‌ها دهۆكێ بۆ رێڤه‌به‌ریا پۆلیسان هاتی، دوهی رێڤه‌به‌رێ پۆلیسێن دهۆكێ ل گه‌ل هه‌موو رێڤه‌به‌رێن پشكان ل ناڤ باژێرێ دهۆكێ و هه‌موو قه‌زا و ناحیێن ب سه‌ر پارێزگه‌ها دهۆكێ ڤه كۆمبوو و بریارا قه‌ده‌غه‌كرنێ چوویه د وارێ بجهئینانێ دا.
هێمنی گوت ژی” هه‌ر جهه‌كێ قومار لێ بهێته كرن، چ قومارا ئه‌لكترۆنی بیت ( كینۆ، لۆتۆ) ، یان هه‌ر جۆره‌كێ دی یێ قومارێ بیت، دده‌مێ 24 ده‌مژمێراندا دێ هێته گرتن و هه‌ر كه‌سێ پێگیریێ پێ نه‌كه‌ت، دێ ل دووڤ به‌ندێ 389 ژ قانوونا سزایان هێته سزادان.
ئه‌ڤرۆنیۆز، ئه‌یاد به‌رواری
میلیشیێن شیعی ل پارێزگه‌ها بابل بۆ ده‌مه‌كی وه‌زیرێ ناڤخوه‌یێ عیراقێ ده‌سته‌سه‌ركر، پشتی وی فه‌رمانا ده‌سته‌سه‌ركرنا چه‌كداره‌كێ حه‌شد شه‌عبی ب تۆمه‌تا په‌قاندنا چه‌ند مزگه‌فتێن سونه‌یان ل بابل، ده‌ركری.
ل دووڤ ئاژانسا (ئیرم) یا ده‌نگوباسان، محه‌مه‌د غه‌بان دسه‌ره‌دانه‌كا خوه‌دا بۆ پارێزگه‌ها بابل به‌ری دۆ رۆژان، ل گه‌ل فه‌رماندێ پۆلیسێن پارێزگه‌ها بابل به‌ر ب ناحیا (ئه‌بو غه‌ره‌ق) چو بۆ سه‌ره‌دانا باره‌گایێ فه‌وجا ل ناحیێ ب مه‌به‌ستا ئه‌نجامدانا ڤه‌كۆلینێ د كێشا په‌قاندنا چه‌ند مزگه‌فتێن سونی ل بابل وه‌كو تۆلڤه‌كرن بۆ سێداره‌دانا كه‌سایه‌تیێ شیعیێ سعودی (نه‌مر ئه‌لنه‌مر) ژلایێ حوكمه‌تا سعودیێ ڤه، كو میلیشیه‌كا ب سه‌ر حه‌شد شه‌عبی ڤه دباره‌گایێ وێ فه‌وجێ ڤه‌بوو”.
ل دووڤ ژێده‌رێن بۆ وێ ئاژانسێ دیاركری، پشتی ڤه‌كۆلینێ، فه‌رمانا ده‌سته‌سه‌ركرنا چه‌كداره‌كێ وێ میلیشیا ب سه‌ر حه‌شد شه‌عبی ڤه هاته ده‌ركرن ب مه‌ره‌ما ئه‌نجامدانا ڤه‌كۆلینێن هوورتر دگه‌لدا و پشتی پۆلیسێن ل گه‌ل وه‌زیری، ئه‌و چه‌كدارێ حه‌شد شه‌عبی یێ ده‌سته‌سه‌ركری كریه د ترۆمبێله‌كا پۆلیسان دا ژبۆ ڤه‌گوهاستنا وی بۆ به‌غدا، میلیشیا حه‌شد شه‌عبی ئه‌و چه‌نده قه‌بوول نه‌كر و شه‌ڕه ده‌ڤ دناڤبه‌را وان و پۆلیسان روودا و به‌ری په‌نا بۆ چه‌كی بهێته برن، هنده‌ك چه‌كدارێن حه‌شد شه‌عبی وه‌زیرێ ناڤخوه‌یێ عیراقێ ده‌سته‌سه‌ركر وه‌كو بارمته هه‌تاكو ئه‌و چه‌كدار تۆمه‌تبار ب پاقاندنا مزگه‌فتێن سونی دهێته ئازادكرن و پشتی لیوا (ریاز خیكانی) فه‌رماندێ ئۆپه‌راسیۆنان ل بابل هاتیه مایێ خوه د وێ كێشێ دا كری، وه‌زیرێ ناڤخوه‌یی هاته ئازادكرن به‌رامبه‌ر ئازادكرنا وی چه‌كدارێ ته‌مه‌تبار یێ حه‌شد شه‌عبی و وه‌زیر زڤری ڤه بۆ به‌غدا”.
نيشاندان