ئه‌ڤرۆنیۆز، ئه‌یاد به‌رواری
پێكئینانا (هێزێن سووریا دیموكراتی) ل 10 مه‌ها بۆری د چارچۆڤێ پلانه‌كا ئه‌مریكیبوو بۆ پێكئینانا هێزه‌كا عه‌ره‌بی- كوردی یا هه‌ڤپشك كو ببیته‌ ده‌ستپێكه‌ك بۆ ئازادكرنا پارێزگه‌ها ره‌قه‌ ژ ده‌ستێ داعشێ.
سایتێ (روسیا الیوم) د راپۆرته‌كا خوه‌دا به‌لاڤكر كو ده‌زگه‌هێن راگه‌هاندنێ ل ئه‌مریكا به‌حسێ شه‌ڕێ بهێته‌ یێ ره‌قه‌ دكر د چارچۆڤێ پلانه‌كا ئه‌مریكی بۆ قوتكرنا وێ پارێزگه‌هێ ژ هێلێن هاریكاریان ل باكوورێ ل گه‌ل توركیا و ل رۆژهه‌لاتی ل گه‌ل عیراقێ، به‌لێ ئه‌و پلان زوو هاته‌ گوهۆرین و هێزێن سووریا دیموكراتی به‌ر ب باكوورێ رۆژهه‌لاتا سووریێ ل پارێزگه‌ها حه‌سه‌كه‌ ڤه‌ چوون بۆ شه‌ڕێ داعشێ ل وێرێ.
ل دووڤ (روسیا الیوم)، روودانێن پاریس، دوباره‌ رۆناهی خسته‌ سه‌ر ره‌قه‌ كو (پایته‌ختا ده‌وله‌تا ئیسلامی – داعشێ- یه‌) و ل گه‌ل بزاڤێن جڤاكێ نێڤده‌وله‌تی بۆ ژناڤبرنا داعشێ، ڤان رۆژێن دووماهیێ پرۆسێن توپبارانكرنا ئه‌سمانی ژلایێ هه‌ڤپه‌یمانیا نێڤده‌وله‌تی و روسیا و فره‌نسا پێكڤه‌.
لێ شه‌ڕێ وێ رێكخستیا تیرۆرستی ل ره‌قه‌ هنده‌ك دیتنێن دی بۆ دڤێن و هێرشێن ئه‌سمانی ب تنێ به‌س نینن و كورد ب تنێ ژی نه‌شێن وی شه‌ڕی بكه‌ن هه‌چه‌نده‌ خوه‌ نێزیكی ره‌قه‌ ژی ببن.
ئه‌مریكا ژلایێ خوه‌ڤه‌ بزاڤا به‌رفره‌هكرنا بازنێ شه‌ڕكه‌رێن عه‌ره‌ب دكه‌ت كو هنده‌ك گرۆپێن دی ژی بهێن شه‌ڕێ داعشێ بكه‌ن وه‌كو ( له‌شكرێ شورشگێر ل ره‌قه‌) و هنده‌ك عه‌شیره‌تێن عه‌ره‌ب، زێده‌باری هنده‌ك هێزێن كوردی یێ ژ ده‌رڤه‌ی ( یه‌كینه‌یێن پاراستنا گه‌لێ كورد – یه‌په‌كه‌) وه‌كو پێشمه‌رگێن رۆژئاڤا یێن كو ل هه‌رێما كوردستانێ هاتینه‌ مه‌شقدان.
ئارمانجا واشنتۆن و ئه‌نقه‌رێ ژ ڤێ پێنگاڤێ ئه‌وه‌ كو نه‌ تنێ (یه‌كینه‌یێن پاراستنا گه‌لێ كورد یه‌په‌كه‌) كو بالێ له‌شكریێ حزبا ئێكه‌تیا دیموكراتی یه‌ ( په‌یه‌ده‌)، هه‌بوونا له‌شكری هه‌بیت، به‌لكو ئه‌و دخوازن كونترۆل ل باكووری و باكوورێ رۆژهه‌لاتا سووریێ ب ده‌ستێن گه‌له‌ك لایه‌نان دا بیت كو ژ عه‌ره‌ب و مه‌ره‌م ژ وێ چه‌ندێ ژی دێ ئه‌و بیت كو كورد ل بن ده‌ستهه‌لاتا ئێك هێز دا نه‌بن كو كونترۆلا بریارا كوردی بكه‌ت و سیاسه‌تا خوه‌ یا به‌رته‌نگ بكاربینیت، دیسا هه‌تاكو هێزێن كوردی ب تنێ ل مه‌یدانێ نه‌بن، ب ڤێ چه‌ندێ ژی هێزێن كوردی دێ شێن رێگریێ ل هێزێن عه‌ره‌بی كه‌ن هه‌كه‌ هات و ژ هێلا ئارمانجا ئه‌مریكی ده‌ركه‌فتن.
به‌ری چه‌ند رۆژان وه‌زیرێ به‌رگریێ فره‌نسی (جان ئیف لودریان) ژ سه‌رۆكێ هه‌رێما كوردستانێ (مه‌سعود بارزانی) ڤه‌گوهاستبوو كو ئه‌و یێ به‌رهه‌ڤه‌ شه‌ڕێ ل ره‌قه‌ بكه‌ت، ژلایێ خوه‌ڤه‌ (كیفاح مه‌حموود) شیره‌تكارێ راگه‌هاندنێ یێ سه‌رۆكێ هه‌رێمێ دیاركربوو كو دانوستاندن د ناڤبه‌را ئه‌مریكا و هه‌رێما كوردستانێ دا یێن هه‌ین ژبۆ پشكداریكرنا هێزێن پێشمه‌رگه‌ی د شه‌ڕێ ئازادكرنا ره‌قه‌ دا.
ل دووڤ (روسیا الیوم) ئه‌ڤ پێنگاڤه‌ دێ بیته‌ ئاریشێ د ناڤبه‌را پێكهاتێن كوردی دا دروست كه‌ت، چونكی پێشمه‌رگێن رۆژئاڤا ب سه‌ر جڤاتا نیشتمانی یا كوردی ڤه‌نه‌ كو ژلایێ هه‌رێما كوردستانێ ڤه‌ دهێنه‌ پشته‌ڤانیكرن و په‌یوه‌ندیێن باش ل گه‌ل توركیا یێن هه‌ین، یه‌كینه‌یێن پاراستنا گه‌لێ كورد و بزاڤا جڤاكی دیموكراتیێ كوردی به‌ری نوكه‌ گه‌ف كربوون كو هه‌كه‌ پێشمه‌رگێن رۆژئاڤا هاتنه‌ دناڤ سووریێ دا، ئه‌و دێ ده‌سته‌سه‌ركه‌ن، یه‌كینه‌یێن پاراستنا گه‌ل ژی هه‌بوونا هه‌ر هێزه‌كا كوردی كو دووری ده‌ستهه‌لاتا وان بیت، ره‌ت دكه‌ن.
ڤان هه‌موو كێشان، شه‌ڕێ ئازادكرنا ره‌قه‌ ل مه‌ها بۆری گیرۆكربوو و هه‌ر ئه‌و ب خوه‌ ژی دێ بنه‌ ئه‌گه‌رێ گوهۆرینان د هه‌ڤپه‌یمانیێن كوردی ل گه‌ل هێزێن هه‌رێمایه‌تی و نێڤده‌وله‌تی، ژ به‌ر كو ره‌قه‌ كو دكه‌ڤیته‌ د ناڤبه‌را حه‌سه‌كه‌ ل رۆژهه‌لاتی و حه‌له‌ب ل رۆژئاڤای، دهێته‌ هژمارتن كاگلكا ده‌ڤه‌را باكووری و ڕێیا سه‌ره‌كی بۆ گه‌هاندنێ كوردی ل سووریێ.

ئه‌ڤرو نیوز،بارزان مزوورى
ل ده‌ست پێكا هاتنا چه‌كدارێن تیرورستێن داعش بو ده‌ڤه‌رێن ده‌رڤه‌ى هه‌رێما كوردستانێ نها ئه‌و ده‌ڤه‌ر پتریا وان هاتینه‌ رزگاركرن و كه‌فتینه‌ ل بن كونترولا پێشمه‌رگه‌ى لدوڤ ئاماره‌كا فه‌رمى كو ل وان ده‌ڤه‌را 70 بنگه‌هێن ساخله‌مى هاتینه‌ تێك دان و خرابكرن داخاز هاتیه‌ كرن كو بودجه‌یه‌كا تایبه‌ت بو بێته‌ دابین كرن بو دوباره‌ ئاڤاكرنا وان بنگه‌هێن ساخله‌مى .
د فارس بریفكانى، سه‌روكێ لژنا ته‌ندروستى حكومه‌تا عێراقێ بو مالپه‌رێ ئه‌ڤرو نیوز ئاشكرا كر كو ل ده‌ڤه‌رێن كوردستانى ئه‌وێن هاتینه‌ رزگاركرن نها ل بن كونترولا پێشمه‌رگه‌ى زومار و شه‌نگال و ئاسكى مووسل و كه‌سكێ و ل دوڤ ئاماره‌كا فه‌رمى ل وان ده‌ڤه‌را 70 بنگه‌هێن ساخله‌میێ هاتینه‌ خراب كرن و تێك دان و پێتڤى ب دوباره‌ ئاڤاكرنا وانن ،
ناڤبرى دیار كر كو هنده‌ك ژوان ئاڤاهى گه‌هشتیه‌ وى راده‌ى كو ب كێر نوێژه‌نكرنێ ژى ناهێن و پێدڤى ب دوباره‌ ب ئاڤاكرنێ یه‌.
ناڤبرى گوت كو د كومبونا په‌رله‌مانێ عێراقێ دا ئێك ژ برگێن كومبونێ ئه‌و بو كو بودجه‌یه‌ك بهێته‌ دابین كرن ژبو دوباره‌ ئاڤاكرنا وان بنگه‌هێن ته‌ندروستى .