ئەڤرۆ نیوز:
پشتی کو بۆ ماوەیەکێ درێژ ژ بەر رەوشا ئێمناھیێ دەرگەھێ سنۆری یێ ئیبراھیم خەلیل ھاتبوو داخستن و دو رۆژ بەری نھا ژی ھاتە ڤەکرن رێکخستنا دیموکراتیک یا گەل یا بۆتانێ کو وەک سازیەکا سەر ب PKK دھێتە نیاسین گەف ل وان کەسان کرن کو دەرگەھێ سنۆری بکار بینن و ل ھەمبەر وێ یەکێ ژی گەلەک ھێز و ئالیێن سیاسی یێن کوردستانێ نەرازیبوونا خوە دیار کرن و راگەھاندن کو PKK دخوازیت دۆرپێچا ئابووری یا ل سەر ھەرێما کوردستانێ دژوارتر بیت.
ئینسیاتیفا دیموکراتیک یا گەل ل بۆتانێ کو وەک سازیەکا سەر ب PKK دھێتە نیاسین ب داخۆیانیەکێ گەف ل وان کەسان کرن کو دەرگەھێ سنۆری یێ ئیبراھیم خەلیلی بکار بینن و راگەھاند کو یێن دەرگەھی بکار بینن دێ ببنە ئارمانجا ھێرشێن مە و پشتی وێ داخۆیانیێ ژی گەلەک پارت و ئالیێن سیاسی یێن کوردستانێ نەرازیبوونا خوە ل ھەمبەر PKK راگەھاندن و داخواز کرن کو ئێدی دەستان ژ دژبەراتی کرنا ھەرێما کوردستانێ بەردەت، چونکو یا نھا ئەو دخوازن بکەن دژوارترکرنا دۆرپێچا ئابووری یە کو چەند سالن حوکمەتا ناڤەندی یا عیراقێ ل سەر ھەرێما کوردستانێ سەپاندیە و دخوازیت ھەرێما کوردستانێ داخوازیێن بەغدایێ قەبوول بکەت، لێ خەلکێ کوردستانێ ئەو یەک رەد کریە و ل ھەمبەر بەغدا بەرخوەدانیێ دکەت و ژ بەر ھندێ ژی دەرگەھێ سنۆری یێ ئیبراھیم خەلیل کو نھا دەرگەھەکێ گرنگە بۆ گەشەکرنا بارێ ئابووری یێ ھەرێما کوردستانێ و دڤێت ئەو ھاریکاریا ھەرێما کوردستانێ بکەن نە کو ئالۆزیان دروست بکەن.
گەلەک رەوشەنبیرێن کورد یێن ژ ھەر چار پارچێن کوردستانێ ژی ب رێیا مالپەرێن جڤاکی وەک فەیسبووک و تویتەر دژبەریا خوە ل ھەمبەر داخۆیانیا وێ سازیێ و گەفێن وێ دیار کرن و راگەھاندن کو نابیت پارتەکا کو دبێژیت بۆ گەلێ کوردستانێ خەباتێ دکەت دەست ب کارەکێ وەسا ب مەترسی بکەت، چونکو دوژمنێن کوردستانێ یێ بزاڤا دکەن ھەموو دەرگەھێن ژیانێ و پێشڤەچوونێ ل سەر ھەرێما کوردستانێ دائێخن نابیت PKK و رێکخراوێن سەر ب وێ ڤە کارەکێ بکەن کو د بەرژەوەندیا دوژمنێن کورد و کوردستانێ دا بیت.
گەلەک کەسایەتی و رێکخراوێن باکورێ کوردستانێ ژی نەرازیبوونا خوە ل ھەمبەر بریارا وێ رێکخراوا سەر ب PKK دیار کرن و داخواز کرن کو بەرپرسێن PKK ھۆشداریا بدەنە وان دا کو ئەو دەست ب کارەکێ وەسا مەترسی نەکەن. چونکو ھەرێما کوردستانێ نەچارە د رەوشا نھا یا خراب یا ئابووری دا پەیوەندیێن خوە ل گەل تورکیا و ئیرانێ و ھەر وەلاتەکێ دی ب ھێز کەت و ئەو یەک ل دژی چو ھێزەکێ نینە و گەفێن ب وی رەنگی ژی تنێ دێ زیانێ گەھیننە ژیارا خەلکێ ھەرێما کوردستانێ و ئەو یەک مەترسیەکا مەزنە و دڤێت ئەو دەست ژ کارێن وەسا بەردەن.