ئه‌ڤرۆ نیوز:
سه‌رۆكێ زانكۆیا سه‌لاحه‌دین دیار كر كو  وى دوسیه‌ك ژ په‌رله‌مانتاره‌كێ گۆڕان بریه‌، كو دادگه‌ها به‌رایی یا هه‌ولێرێ بڕیار دا شێركۆ حه‌مه‌ ئه‌مین په‌رله‌مانتارێ فراكسیۆنا گۆڕان ب 10 ملیۆن دیناران بهێته‌ سزاكرن.
ئه‌حمه‌د دزه‌یی سه‌رۆكێ زانكۆیا سه‌لاحه‌دین گۆت “د كۆمبوونه‌كا لیژنا خواندنا بلند و ئه‌نجومه‌نێ وه‌زاره‌تا خواندنا بلند و سه‌رۆكێن زانكۆیان، شێركۆ حه‌مه‌ ئه‌مین سڤكاتى ب من كر، له‌ورا من سكالا ل سه‌ر تۆمار كربوو، دادگه‌هێ ژی بریار دا كو ئه‌و ب 10 ملیۆن دیناران من قه‌ره‌بوو بكه‌ت”.
ئه‌حمه‌د دزه‌یی گۆت ژی “من بۆ پاره‌ی سكالا نه‌ كربوو، به‌لكو من ڤیا دادگه‌ه ببیته‌ جهێ ئێكلاكرنا ئاریشان و نوكه‌ تنێ دادگه‌ها ته‌میزی مایه‌”.

ئه‌ڤرۆ نیوز:
ل دووڤ ئامارێن سه‌نته‌رێ میترۆ ل سالا بۆرى پتر ژ 173 پێشێلكاریان ل هه‌مبه‌ر رۆژنامه‌ڤانان یێن هاتینه‌ ئه‌نجامدان.
ره‌حمان غه‌ریب رێكخه‌رێ سه‌نته‌رێ میترۆ د رێوره‌سمێن رێزلێنانا رۆژا جیهانى یا ئازادیا رۆژنامه‌ڤانیێ دا راگه‌هاند، قانوونه‌كا پێشكه‌فتى ل هه‌رێما كوردستانێ یا هه‌ى، لێ وه‌كو پێدڤى سه‌ره‌ده‌رى ل گه‌ل ناهێته‌ كرن.
ژ ئالیێ خوه‌ ڤه‌، سه‌فین دزه‌یى په‌یڤدارێ حوكمه‌تا هه‌رێمێ راگه‌هاند، كو پێدڤیه‌ دووڤچوونا رژد بۆ چاره‌كرنا گرفتان بهێته‌ كرن و كارێ رۆژنامه‌ڤانیێ ل هه‌رێمێ ل دووڤ قانوونێ سه‌ره‌ده‌رى ل گه‌ل بهێته‌ كرن.

ئه‌ڤرۆ نیوز:
مه‌سرور بارزانى شیره‌تكارێ ئه‌نجومه‌نێ ئاسایشا هه‌رێمێ پێشوازیا عه‌باس ئه‌لمه‌عمورى سه‌رۆكێ كومه‌لا هه‌یڤا سور یا عیراقێ و هاورێ ئیحسان سادق سه‌رۆكێ لقا هه‌ولێر یا هه‌یڤا سورا عیراقێ و موسا ئه‌حمه‌د جێگرێ سه‌رۆكێ ده‌زگه‌هێ خێرخوازیێ بارزانى كر.
هه‌ردو ئالیان به‌حسێ وان به‌رهه‌ڤییان كر كو ل ده‌مێ كونترۆلكرنا مووسل ، دێ شه‌پوله‌كا دى خه‌لكێ مووسل ئاواره‌ بیت و بۆ ڤێ پرسێ بریاره‌ هه‌یڤا سوریا عیراقێ ب هه‌ڤكارى ل گه‌ل ده‌زگه‌هێ خێرخوازیێ بارزانى و دام و ده‌زگه‌هێن حكومى پلانه‌كا پێشوه‌خت هه‌بیت و پێدڤیان دابین بكه‌ن.

ئه‌ڤرۆ نیوز:
سه‌رۆك بارزانى د په‌یامه‌كێ دا ب هه‌لكه‌فتا سه‌ركه‌فتنا دوهى یا پێشمه‌رگه‌ى ل سه‌ر تیرورستێن داعش ل باكوورێ موسل، ده‌ستخوشى ل هه‌موو وان هێزێن پێشمه‌رگه‌ى كریه‌ كو به‌رسینگا هێرشا داعش گرتن و دیاركریه‌ كو پێشمه‌رگه‌ى ب خوونا خوه‌ به‌ره‌ڤانى ژ ئاخا كوردستانێ كر و دوژمن تووشى شكه‌ستنه‌كا مه‌زن كر و زیانه‌كا مه‌زن پێ گه‌هاند.
بارزانى سه‌ره‌خوشى ل خێزانێن وان پێشمه‌رگان كر كو ل شه‌رێ دوهى دا گیانێ خوه‌ فیداى نیشتمانى كری و هیڤیا له‌شساخیێ بۆ برینداران خواست.

فوتو، بارزان مزوورى، میحوه‌رێ تلسقوف:

تلسقوف، بارزان مزووری:
عه‌مید مه‌رعان مه‌رعان، ژ هه‌والگێریا فه‌رمانده‌یا سپیلكى ل میحوه‌رێ تللسقوف بو روژناما ئه‌ڤرو دیار كر كو ئه‌ڤرۆ ل ده‌مژمێر 4 سپێدێ چه‌كدارێن تیرورستێن داعش ب چه‌كێ گران و خوكوژ و ترومبێلێن تێنتى كرى ب دوو لایان ڤه‌ هێرش كره‌ سه‌ر سه‌نگه‌رێن پێشمه‌رگه‌ى یێن میحوه‌رێ تللسقوف بو ماوێ پتر ژ هه‌شت ده‌مژمێرا شه‌ر دناڤبه‌را هێزێن پێشمه‌رگه‌ى و داعش به‌رده‌وام بو و هێزێن پێشمه‌رگه‌ى ب پشته‌ڤانیا هێزێن هه‌ڤپه‌یمانا ئه‌و داعشێن هێرش كرین هه‌موو كوشتن و ل سه‌دان ته‌رمێن وان یێن كه‌فتینه‌ ده‌ستێن پێشمه‌رگه‌ى و چه‌ندین ترومبێل و چه‌ك كه‌فتینه‌ ده‌ستێن پێشمه‌رگه‌ى.
ناڤبرى دیار كر كو پتر ژ ده‌هان ترومبێلێن ژ بارهه‌لگر و هه‌مه‌ر هات بونه‌ تێنتى كرن به‌رى بگه‌هنه‌ هێزێن پێشمه‌رگه‌ى به‌لێ ب چه‌كێ میلانو ژلایێ پێشمه‌رگه‌ى هاتن ژناڤ برن .
ناڤبرى گوت ژى: ئه‌ڤه‌ مه‌زنترین هێرش بو د ڤان هه‌یاماندا یا داعش ئه‌نجامداى و هاتیه‌ تێك شكاندن چونكو گه‌له‌ك چه‌كداربوون پتریا وان چه‌كدارا خو كوژ بوون .
ناڤبرى زێده‌تر گوت كو هه‌ر جهه‌كێ داعش هێرش كریه‌ سه‌ر نها ره‌وشا وى جهى یا ئارامه‌ و هه‌موو ب ئێكجارى كه‌فتینه‌ ده‌ستێن پێشمه‌رگه‌ى.