ئەڤرۆ نیوز:
لقێن رێکخستنێن پارتی دیموکراتی کوردستان ھژمارەکا ڕاپۆرتان ل دۆر گەندەلیێ بۆ سەرۆک مەسعود بارزانی دھنێرن، ئە ژی 21 بادەکان ژ وان د دەتە دەستەیا دەستپاکیێ یا ھەرێما کوردستانێ، ئەندامەکێ سەرکردایەتیا پارتی ژی دبێژیت: “بارزانی گۆتیە مە، ھەکەر دەستەیا دەستپاکیێ ناڤێ وان کەسان ئاشکرا نەکەت، وی دەمی ئەز بخوە دێ ناڤان ئاشکرا کەم”.
ھەیڤا شواتا بۆری، مەسعود بارزانی، سەرۆکێ ھەرێما کوردستانێ ڕاگەھاندبوو کو ئەو دێ چاکسازیان د ناڤ حوکمەتا ھەرێما کوردستانێ و حزب خوە دا کەت و ژ خوە و بنەمالا خوە دێ دەست پێ کەت، پاشی داخواز ژ ھەموو لقێن پارتی کر، د ڤی واری دا ڕاپۆرتان بۆ فرێکەن ل سەر ھەر کەسەکی ھەبیت کو گۆمان ل سەر ھەبیت دەست د کارێ گەندەلیێ دا ھەبیت.
سەربەست لەزگین، ئەندامێ سەرکردایەتیا پارتی و بەرپرسێ لقێ ھەشت یێ وێ حزبێ ل زاخۆ دیار کر کو ڕاپۆرتێن ھەموو لقان گەھشتینە پیرمام و بۆ رووداو گۆت: “سەرۆک بارزانی دووڤچوون بۆ وان ڕاپۆرتان کریە، ھەروەسا چەندین کۆمبوون دەربارەی وان ڕاپۆرتان ل گەل لایەنێن پەیوەندیدار کرینە، ب رێیا نڤێسینگەھا خوە بەردەوام دووڤچوونێ بۆ وان ناڤان دکەت یێن د ڕاپۆرتێن لقێن پارتی دا ناڤێن وان ھاتین”.
بەرپرسێ لقێ ھەشت یێ پارتی ل زاخۆ، لقێ ھەشت ب نموونە دئینیت و دبێژیت: “گەلەک جاران نڤێسینگەھا سەرۆک بارزانی ل سەر وان ناڤێن د ڕاپۆرتێن مە دا ھاتین پەیوەندی ب مە کرینە و داخوازا پێزانینێن زێدەتر کریە”.
سەربەست لەزگین ناڤێ چو ژ وان کەسان ئاشکرا نەکرن یێن د ڕاپۆرتێن وان دا ھاتین، لێ د گەل ھندێ ژی دا ھندەک نموونە بەحسکرن و گۆت: “کەس ھەنە ب دەھان دۆنەمێن ئەردی بناڤێ دامەزراندنا کۆمپانیێ وەرگرتیە، لێ د بنیات دا کۆمپانی نەبوویە و پاشی ئەو ئەردە فرۆتیە”.
د چەند رۆژێن بۆری دا فەرمانا دەستەسەرکرنێ بۆ چەند کەسەکان دەرکەفت، ژ وان ژی سەرۆکێ بانکا ناڤەندی یا ھەرێما کوردستانێ و جێگرێ وی و ھژمارەکا فەرمانبەرێن وێ بانکێ ب تۆمەتا وێ چەندێ کو چەکێ پارەی مەزاختیە، ئەڤە د دەمەکی دایە کو ب بڕیارا جڤاتا وەزیرێن ھەرێما کوردستانێ مەزاختنا چەکان ھاتیە ڕاگرتن.
بەرپرسێ لقێ ھەشت یێ پارتی ل زاخۆ خویا کر، سەرۆک بارزانی 21 بادەکێن گەندەلیێ ئاراستەی دەستەیا دەستپاکیێ یا ھەرێما کوردستانێ کرینە بۆ ھندێ ڤەکۆلین تێدا بھێتەکرن و ئەو بخوە کو ئاگەھداری وان 21 بادەکێن گەندەلیێ یە گۆت: “سەرۆک بارزانی گەلەک یێ رژدە ل سەر ئەنجامدانا چاکسازیێ و وی گۆتیە، ھەکەر دەستەیا دەستپاکیێ وان 21 بادەکان ئاشکرا نەکەت، ئەز بخوە دێ ناڤان ئاشکرا کەم”.
دادوەر سدقی سەلیمخان، دادوەرێ دەستەیا دەستپاکیێ ل دھۆک چەند پێزانین ل سەر چەوانیا ئێکلاکرنا وان 21 بادەکان ئاشکرا کرن و بۆ رووداو گۆت: “دەستەیا دەستپاکیێ ل ھەولێرێ، ل دۆر وان 21 بادەکان پەیوەندی ب من کریە، نوکە ئەم یێ کار ل سەر ئێکلاکرنا وان بادەکان دکەین، ل ھەموو پارێزگەھێن ھەرێمێ ناڤ د ناڤ وێ لیستێ دا ھەنە، ئەو بادەک ل دووڤ جھێ وان ل سەر رێڤەبەریێن سەر ب دەستەیا دەستپاکیێ ڤە ھاتینە پارڤەکرن”.
دادوەر سدقی گۆتژی: “بەری نوکە ئێکلاکرنا بادەکێن گەندەلیێ گەلەک یا ب زەحمەت بوو، چونکو قانوونێن گەندەلیێ گەلەک دئاشکرا نەبوون، بەلێ نوکە قانوونێن گەلەک رۆن ھەنە و ھندەک بادەک ب دەمەکێ کێم دێ ھێنە ئێکلاکرن و ھندەک ژی دێ چەندەکێ گیرۆ بن و پێدڤی ب ڤەکۆلینەکا زێدەتر ھەنە”.

ئەڤرۆ نیوز:
ئەنجومەنێ پارێزگەھا دھۆکێ دوھی 18-4-2016 د کۆمبوونا خوە یا 71 دا رێڤەبەرێ تاپۆیا دھۆکێ و رێڤەبەرێ ھاتنوچوونێ ل دۆر بریارێن زێدەکرنا سزایێن دارایی و باج و رسومێن خانی و ئەرد و یێن ھاتنوچوونێ مێڤان کرن کو ئالیێ ئەنجومەنێ وەزیران ڤە ھاتینە دەرکرن و ل دووماھیێ وەکو ھەلویست ل دۆر بابەتی ئەنجومەن گەھشتە وێ باوەریێ کو یاداشتەکا رەسمی ئاراستەی سەرۆکاتیا حوکمەتا ھەرێما کوردستانێ بکەت و تێدا داخوازا پێداچوونا وان بریاران بکەت، یان بۆ دەمەکێ گونجایتر بھێنە راگرتن.
کۆمبوونا ئەنجومەنێ پارێزگەھا دھۆکێ ژ سێ تەوەران پێک دھات، تەوەرێ ئێکێ روونشتن دگەل رێڤەبەرێ تاپۆیا دھۆکێ و ژمارەکا نوونەرێن نڤیسینگەھێن ئەرد و خانیان و تەوەرێ دویێ روونشتن دگەل رێڤەبەرێ ھاتنوچوونێ و پشتی جودا جودا دگەل وان رێڤەبەران روونشتین و گەنگشە و دانوستاند ل سەر بابەتێ زێدەکرنا سزایێن دارایی و باج و رسومێن تاپۆیێ و ھاتنوچوونێ ھاتینە کرن، د تەوەرێ سیێ دا ئەنجومەن روونشتە خارێ ژ بۆ گەنگەشەکرنا دانوستاندنێن ھەر دو رێڤەبەران، ل دووماھیێ گەھشتە وێ باوەریێ کو ھەلویستەکی وەرگرن و ب پڕانیا دەنگان، دەنگدان ل سەر ھاتە کرن و ل دووماھیێ د پرێس کۆنفرانسەکی دا ھەلویستێ ئەنجومەنی ژ ئالیێ ھشیار فەریق سەرۆکێ فراکسیۆنا پارتی ڤە ل ئەنجومەنی ھاتە راگەھاندن.

ھشیار فەریق سەرۆکێ فراکسیۆنا پارتی ڤە ل ئەنجومەنی د پرێس کۆنفرانسی دا دیار کر پشتی کو ئەنجومەن د کۆمبوونا ئەڤرۆ دا دگەل رێڤەبەرێ تاپۆیا دھۆکێ و رێڤەبەرێ ھاتنوچوونێ ل دۆر زێدەکرنا سزایێن دارایی و باج و رسومێن ئەرد و خانیان و ھاتنوچوونێ روونشتی کو ھەیامەکە ئەنجومەنێ وەزیران بریارێن زێدەکرنێ دەرکرینە، ئەنجومەن ب پڕانیا دەنگان گەھشتە وێ باوەریێ کو یاداشتەکا رەسمی ئاراستەی سەرۆکاتیا حوکمەتا ھەرێما کوردستانێ بکەت و تێدا داخوازا پێداچوونا وان بریاران بکەن کو بھێنە ھەلوەشاندن یان بۆ دەمەکێ گونجایتر بھێنە راگرتن.
ھەژی گۆتنێ یە کو ئەنجومەنێ پارێزگەھا سلێمانیێ ئەو بریار و رێنمایێن حوکمەتێ ب ئێکجاری رەت کرینە.

ئه‌ڤرۆ نيوز:
بەرپرسەکێ پارتی دیموکراتی کوردستان ڕاگەھاند، پارتی بەرھەڤیا خوە یا دیارکری کو ل گەل بزاڤا گۆڕان کۆمبیت و ئاریشەیێن د ناڤبەرا وان دا ب ڕێیا دانوستاندنان چارەسەربکەت، ھەروەسا دیارکر، سیاسەتا پارتی ئەوە ڕێککەفتنەکا نوو ل گەل گۆڕان بھێتەکرن و ب گۆرەی وێ ڕێککەفتنا نوو، سەرەدەری ل گەل بزاڤا گۆڕان بھێتەکرن، کو ڤێ جارێ سەرۆکێ پەرلەمانی نادەینە گۆڕان.
ئەکبەر حەیدەر، کادرێ پێشکەفتیێ پارتی دیموکراتی کوردستان و جێگرێ بەرپرسێ لقا پازدە بۆ ڕۆژناما ئەڤرۆ گۆت” ھەر ل دەستپێکا ئالۆزیێن ھەرێما کوردستانێ، پارتی دەرگەھێ دانوستاندنان ل ھەمبەر چو ھێز و لایەنەکی نەگرتیە و لایەنێن دی ژی ب ھەمان شێوە بزاڤێن چارەسەرکرنا ئاریشەیێن د ناڤبەر خوە کرینە، بێگومان ھندەک جاران دانوستاندن ھاتبنە ڕاگرتن و زۆر جاران ژی کۆمبوونێن بەردەوام ھەبووینە، ئەم وەکی پارتی ھەر ل دەستپێکێ دەستپێشخەر بووینە بۆ وێ چەندێ کو ب ڕێیا لێک تێگەھشتنێ و دانوستاندنێ ئاریشەیان ئێکلا بکەین، ئەو ڕێککەفتنا د ناڤبەرا پارتی و گۆڕان دا ھەی، ژلایێ بزاڤا گۆڕان ڤە دووماھی ب وێ ڕێککەفتنێ ھاتیە و گەلەک لایەنێن ناڤخوەیی و دەرڤە ژی خوازیار بووینە کو ئالۆزی چێنەبیت و لایەنێن سیاسی یێن سەرەکی ل ھەرێما کوردستانێ ل سەر ھەر ئاریشەیەکێ نەگەھیتە ڕادەیەکی کو شەڕ و گرژی پەیداببیت و ئالۆزی ژی ب ڕێککەفتن بھێنە چارەسەرکرن، بەلێ ڕێککەفتن و دانوستاندن تنێ ب لایەنەکێ وەکی پارتی چێنابیت و ڕەوش وەک بەرێ ناڤەگەریت، پێدڤیە ھەموو لایەنێن سیاسی ئەو ئیرادەیە ھەبیت بۆ ئێکلاکرنا پرسێن کو ناکۆکی ل سەر ھەی، مە وەکی پارتی دیموکراتی کوردستان بەرھەڤی ھەبوویە بۆ چارەسەرکرنا ئاریشەیان، ھەتا مە داخوازکریە، ل گەل بزاڤا گۆڕان ب تنێ دانوستاندنان بکەین و بگەھینە ئەنجامەکی”.
ئەکبەری گۆت ژی” نوکە ژی ئەم داخوازێ ژ بزاڤا گۆڕان دکەین بلا بھێن دەست ب دانوستاندنان بکەین و ب فەرمی ژی مە ئەڤ داخوازیە ژ برادەرێن گۆڕان کریە، بەلێ ئەوا بۆری ئەم ناھێلین دووبارە ببیت و جارەکادی پێیەکێ گۆڕان دناڤ حوکمەتێ دا بیت و پێ دی ژی ژ دەرڤەی حوکمەتێ بیت، پارتی ئەڤێ چەندێ قەبوول ناکەت، مەرج ژی نینە جارەکادی گۆڕان بھێتە دناڤ حوکمەتێ دا و ھەمان پۆستان وەربگریت، دڤێت ڕێککەفتنەکا نوو د ناڤبەرا پارتی و گۆڕان دا بھێتە کرن و پۆستێ سەرۆکێ پەرلەمانی نادەینە بزاڤا گۆڕان، سیاسەتا پارتی ئەوە کو ئەو ڕێککەفتنا بەرێ ل گەل گۆڕان نەمایە ودڤێت ڕێککەفتنەکا دی بھێتە ئەنجامدان و ب گۆرەی وێ ڕێککەفتنا نوو، ئەم دبەرھەڤین ل گەل گۆڕان بگەھینە چارەسەریەکێ و ڕەوشا نوکە بھێتە دەربازکرن”.