ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 13ى نيسانا 2016ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1290 |
| 1 يۆرۆيێ ئه‌ورۆپى | 1460 |
| 1 ليرێ توركى | 450 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئه‌ڤرۆ نيوز:
مه‌سعود بارزانى سه‌رۆكێ هه‌رێما كوردستانێ ل گه‌ل رابه‌رێ بزاڤا ئيسلامى يا كوردستانێ كۆمبوو.
به‌رى نيڤرۆيا ئه‌ڤرۆ رۆژا چارشه‌مبى رێكه‌فتى 13ى نيسانا 2016ێ ل پيرمام، عيرفان عه‌لى عه‌بدولعه‌زيز، رابه‌رێ بزاڤا ئيسلامى كوردستان و عه‌بدولا وه‌رتى ئاخفتنكه‌رێ ب ناڤێ حزبێ ل گه‌ل مه‌سعود بارزانى سه‌رۆكێ هه‌رێما كوردستانێ و سه‌رۆكێ پارتى ديموكراتى كوردستان كۆمبوون.
محه‌مه‌د خۆشناو، ئه‌ندامێ سه‌ركرداتيا بزاڤا ئيسلامى بۆ رووداو گۆت: “عيرفان عه‌لى عه‌بدولعه‌زيز و عه‌بدولا وه‌رتى ل سه‌ر كاودانێن سياسى يێن كوردستانێ و چه‌ند پرسێن دى يێن د ناڤبه‌را پارتى ديموكراتى كوردستان دا هه‌ين ل گه‌ل بارزانى گه‌نگه‌شه كرن.
بزاڤا ئيسلامى كه‌ڤنترين حزبا ئيسلامى يه ل باشوورێ كوردستانێ، به‌لێ هه‌ڤبه‌ركى ل گه‌ل هه‌ردو حزبێن دى “كۆمه‌ل و ئێكگرتوو” پێگه‌هێ جه‌ماوه‌رى كێمتره ژ وان هه‌ردويان و ل په‌رله‌مانێ كوردستانێ خودانا ئێك كورسيه و پشكدارى كابينا هه‌شتێ يا حوكمه‌تا هه‌رێما كوردستانێ نه‌كريه.
بزاڤا ئيسلامى ل سالا 1987 ژ لايێ كۆمه‌كا زه‌لامێن ئاينى ب سه‌ركرداتيا مه‌لا عوسمان عه‌بدولعه‌زيز ل ئيرانێ هاتيه راگه‌هاندن، بزاڤا ئيسلامى حزبا ئێكانه‌يا ئيسلامى سياسى چه‌كداره ل باشوورێ كوردستانێ هاتيه راگه‌هاندن ب ره‌نگه‌كێ فه‌رمى.
ھەولێر، قائید میرۆ:
بەرەیێ تورکومانی ھەلویستێ خوە ل دۆر کابینا تەکنۆکرات ئاشکراکر و راگەھاند، ئەگەر چو وەزارەت بەر ب تورکومانا نەکەڤن دەنگی بۆ نادەن.
ئایدن مەعرۆف، ئەندامێ مەکتەبا سیاسیا بەرەیێ تورکومانی بۆ ئەڤرۆ نیۆز گۆت: “حەیدەر عەبادی سەرۆک وەزیرێن عێراقێ چو کەسێن تورکومان بۆ کابینا تەکنۆکرات بەربژێر نەکرینە و پێکھاتا تورکومان ل عيراقێ بەرچاڤ نەھاتیە وەرگرتن، لەوڕا ئەم دژی ئەڤێ کابینا نووینە ل عێراقێ”.
ئایدنی خۆياكر كو هه‌كه بھێت و عەبادی یێ رژدبیت ل سەر ڤێ چەندێ چو پۆستێن وەزاری نەدەتە مللەتێ تورکومان ئەڤە بێگومان پەرلەمانتارێن تورکومان دەنگی بۆ کابینا تەکنۆکرات نادەن، کو ھژمارا وان 12 پەرلەمانتارن.
ئەڤرۆ نیۆز، قائید میرۆ
ھێشتا حوکمەتا ھەرێما کوردستانێ سۆزا خوە بۆ دامەزراندنا قوتابیێن ئێکێ ل سەر ئاستێ زانکۆ و پەیمانگەھا بجهـ نە ئینایە و خواندنا بلند ژی دبێژیت: “ناڤێن وان چووینە جڤاتا وەزیران”.
عەباس ئەکرەم، پەیڤدارێ وەزارەتا خواندنا بلندو ڤەکۆلینێن زانستی بۆ ئەڤرۆ نیۆز گۆت: “قوتابیێن ئێکێ ل زانکۆ و پەیمانگەھێن ھەرێما کوردستانێ نەھاتینە دامەزراندن و وەزارەتا خواندنا بلند ناڤێن وان قوتابیا بلند کرینە بۆ سەرۆکایەتیا جڤاتا وەزیران، بەلێ جڤاتا وەزیران ئەف قوتابیێن ل پلا ئێکێ ھەتا سیێ ب دەستڤە ئینای دانەمەزراندينه”.
ل دۆر دەرمالێ قوتابیێن زانکۆ و پەیمانگەھان عەباس گۆت: “راستە چەند ھەیڤە دەرمالە بۆ قوتابیا نەھاتیە مەزاختن، لێ ئاریشە د ناڤبەرا زانکۆ و وەزارەتا دارایی دایە و خواندنا بلند ژێ بەرپرس نینە”.
ئه‌ڤرۆ نيوز:
ل سه‌ر داخوازا 61 نوونه‌ران ئه‌ڤرۆ رۆژا چارشه‌مبى كۆمبوونا نه‌ئاسايى يا جڤاتا نوونه‌رێن عيراقێ دێ هێته ئه‌نجام دان و هه‌ڤپه‌يمانيا ئه‌حرار ژى رادگه‌هينيت كو دێ داخوازا ڤه‌كێشانا باوه‌رێ ژ هه‌رسێ سه‌رۆكاتيان هێته كرن.
بڕياره ئه‌ڤرۆ ده‌مژمێرى 13:00 جڤاتا نوونه‌رێن عيراقێ ل سه‌ر داخوازا 61 نوونه‌ران، روونشتنه‌كا نه‌سايى يا جڤاتا نوونه‌رێن عيراقێ كۆم ببيت و و تێدا دانوستاندن ل سه‌ر كاودانێن نوكه يێن عيراقێ و جڤاتا نوونه‌رێن عيراقێ بهێته كرن.
ئيقبال غورابى، ئه‌ندامێ جڤاتا نوونه‌ران ل سه‌ر هه‌ڤپه‌يمانيا ئه‌حرار د به‌ياننامه‌كێ دا راگه‌هاند كو د كۆمبوونا ئه‌ڤرۆ يا نه‌ئاسايى دا ئه‌و دێ داخوازا ده‌ست ژ كاركێشانا سه‌رۆكاتيا جڤاتا نوونه‌رێن عيراقێ و جڤاتا وه‌زيران و سه‌رۆك كۆمارێ عيراقێ كه‌ن.
هه‌ر د ڤێ به‌ياننامێ دا دايه زانين ژى كو مانگرتنا ئه‌ندامێن جڤاتا نوونه‌ران يێن هه‌ڤپه‌يمانيا ئه‌حرار ئه‌وا دوهى ده‌سپێكرى دێ يا به‌رده‌وام بيت هه‌تا پرۆسا ده‌ست ژ كاركێشانێ ئێك ب ئێك دهێنه ئه‌نجام دان.
ئەڤرۆ نيوز:
سەرۆکێ ئێکەتیا مامۆستایێن کوردستانێ ئاشکرا کر کو د کۆمبوونا 22/2/2016 یا ل گەل نیچیرڤان بارزانی، سەرۆکێ حوکمەتا ھەرێما کوردستانێ و قوباد تەلەبانی، جێگرێ سەرۆکێ حوکمەتا ھەرێمێ ئەنجامدای سۆز ب وان ھاتەدان کو د ڤێ ھەیڤێ نیڤ مووچێ ھەیڤا نەھا یا سالا بۆری یێ مامۆستایان دێ ھێتە بەلاڤکرن.
عەبدولواحد محەمەد، سەرۆکێ ئێکەتیا مامۆستایێن کوردستانێ بۆ خەلک دیار کر کو ل مەھا نەە یا سالا بۆری مامۆستایان نیڤ مووچە وەرگرتبوو و ئەو دێ ل ھیڤیا وێ سۆزێ بن یا سەرۆکێ حوکمەتێ و جێگرێ وی دایە وان کو د ڤێ ھەیڤێ دا دێ ئەو نیڤ مووچێ مای ل سەر مامۆستایان ھێتە بەلاڤکرن.
ناڤھاتی نەدا زانین ھەکە نیڤ مووچێ مامۆستایان یێ ھەیڤا نەە یا سالا بۆری د ڤێ ھەیڤێ دا نەھاتە بەلاڤکرن دێ ھەلویستێ وان چو بیت.
ئه‌ڤرۆ نيوز:
رێڤه‌به‌رێ كاروبارێن ئيسلامى و خێرخوازى ل دوبه‌ى د فه‌توايه‌كێ راگه‌هاند: بێ ده‌ستوورى بكارئينانا واى فاى حه‌رامه، چونكو دزيه.
ئه‌حمه‌د عه‌بدولعه‌زيز، رێڤه‌به‌رێ كاروبارێن ئيسلامى و خێرخوازى ل دوبه‌ى، بۆ رۆژنامه‌ما ئيماراتى گۆت: “نابيت هێلا ئه‌نترنێتێ بهێته بكارئينان هه‌كه يێ هه‌ڤپشك نه‌بى ل گه‌ل تۆڕێ، چونكو ئه‌ڤێ خزمه‌تێ مفايه‌ك يێ تێدا هه‌ى و خودان يێ هه‌ى و نابيت بێ ده‌ستوورى وه‌رگرتن ژ خودانى بكاربينى”.
زێده‌تر گۆت: “دزينا واى فاى وه‌كو هه‌ر دزيه‌كا دى يا حه‌رامه، دبيت گونه‌هه‌كا مه‌زن ژى هه‌بيت، ژ ئه‌گه‌رێ ئه‌وێ كارتێكرنا ل سه‌ر خودانێ راسته‌قينه يێ هێلا ئه‌نترنێتێ”.
رێڤه‌به‌رێ كاروبارێن ئيسلامى و خێرخوازى ل دوبه‌ى ئاماژه ب وێ چه‌ندێ ژى دكه‌ت كو ئه‌و كه‌سێ واى فاى ددزيت دڤێت خوه ل جهێ خودانێ راسته‌قينه يێ هێلا ئه‌نترنێتێ ب دانيت، ديسا خودانێ راسته‌قينه يێ ئه‌نترنێتێ مافێ هه‌ى ژى لايه‌نێن ئه‌منى ئاگه‌هدار بكه‌ت هه‌كه بێ ى موله‌تا وى بكارئينا و هيڤى ژى خواست كو “ژ ترسا خودێ خوه ژ وى كارى دوور بێخن”.
ئەڤرۆ نیوز:
پشتی زێدەکرنا سەرپێچی و رسۆماتێن ھاتنوچوونێ ل سەر شۆفێر و معاملێن وەلاتیان، ب رێیا پەرلەمانتارەکێ پارتی، وەزارەتا داد یا حوکمەتا ھەرێما کوردستانێ ھۆشداریەکێ ددەتە سەرۆکاتیا جڤاتا وەزیران و وەزارەتا ناڤخوە و وەزارەتا دارایی و پۆلیسێن ھاتنوچوونێ، ئەو پەرلەمانتارە ژی رەخنێ ل لژنا چاکسازیێ یا حوکمەتێ دگریت.
دلشاد شەعبان، ئەندامێ پەرلەمانێ کوردستانێ ل سەر فراکسیۆنا پارتی، سکالایەک نڤیسیە و ژ لایێ وەزارەتا داد ڤە گەھاندیە جھێن پەیوەندیدار و دیار کر، مەرەما وی ژ وێ سکالایێ بەرەڤانیکرنە ژ وەلاتیان و بۆ رۆژناما ئەڤرۆ گۆت: “مەرەما من ژ تۆمارکرنا وێ سکالایێ بەرەڤانیکرنە ژ وەلاتیان و سەرۆک وەزیرێن ھەرێمێ، ژ بەرکو ئەو لژنا چاکسازیێ یا پێشنیاران ب مەرەما چاکسازیێ بۆ جڤاتا وەزیران دکەت، چ شارەزایی د وارێ چاکسازیا کارگێری و دارایی و ئابووری دا نینە، دیسا ھەر پێشنیارەکا ھەتا نوکە وێ لژنێ بۆ جڤاتا وەزیرێن ھەرێما کوردستانێ کری، بەروڤاژی رەوشا نوکە یا ھەرێمێ یە”.
ناڤبری خویا ژی کر، لژنا چاکسازیێ بێ رەوشا ئابووری یا وەلاتیان ل بەرچاڤ بگریت، پێشنیاران ددەتە جڤاتا وەزیران و گۆت: “لژنە ھندەک کەسن کو ب تنێ رەوشا حوکمەتێ ل بەرچاڤ دگرن، گرنگیێ ب قانوون و ئابووریێ نادەن و رەوشا وەلاتیان ژی ل بەرچاڤ ناگرن، بۆ نموونە: پێشنیارا ھەلگرتنا مووچەی، سەرئێشیەکا زۆر بۆ سەرۆکێ حوکمەتێ دروستکریە، لەو داخوازکریە، پێداچوونەکا دی ب وێ پێشنیارێ دا بھێتە کرن، بۆ ھندێ پتر دادپەروەری تێدا بیت”.
دلشاد شەعبان دا زانین، ئەو پێشنیارا لژنا چاکسازیێ یا جڤاتا وەزیران بۆ زێدەکرنا سزا و سەرپێچی و رسۆماتێن ھاتنوچوونێ دای نە یا دروستە و گۆت: “دەرخستنا بڕیارا ھژمار 79 ل رۆژا 3/2/2016 خەلەتیەکا دی یا قانوونی و ئابووری یا وێ لژنێ یە، ژ بلی لایەنێ وێ یێ نەقانوونی کو من دسکالا خوە دا ئاماژە پێ کریە، ژ لایێ ئابووری ژی ڤە، زیانەکا مەزن ھەیە، نوکە ئابوورێ ھەرێمێ د حالەتێ قەیران و لاوازیێ دایە، داخوازی ل سەر کەلوپەلان یا کێمە، د رەوشەکا ھوسا دا، دڤێت حوکمەت باج و رسۆماتان کێم بکەت، بۆ ھندێ خەلکی شیانێن کڕین و فرۆتنێ ھەبیت، ئەگەر ب ڤێ بڕیارا زێدەکرنا باج و رسۆماتان چەند ملیۆن دۆلارەک بۆ حوکمەتێ زێدە بن، لێ ئارێشێن دی یێن دارایی دێ ژێ دروست بن و پاشی چارەکرنا وان دێ یا ب زەحمەت بیت”.
ئەو پەرلەمانتارێ پارتی ئاماژە ب گۆتنەکا نێچیرڤان بارزانی، سەرۆک وەزیرێن ھەرێما کوردستانێ دکەت کو د کۆمبوونەکێ دا د گەل فراکسیۆنا پارتی ل پەرلەمانێ کوردستانێ گۆتیە، دەمێ دبێژیت: “مە دڤێت ھوون بەری ھەر لایەنەکی دەستپێشخەریان بکەن، ھەر خەلەتیەکا حوکمەتێ ببینن لێ بێدەنگ نەبن، ژ بەرکو ئەم مرۆڤین و توشی خەلەتیان دبین و دڤێت ھوون مە راست بکەن، چونکو مە دڤێت د ڤان چار سالان دا چاکسازیان بکەین”.
دلشاد گۆتژی: “لەو دبێژمە حوکمەتێ د ڤان بڕیارێن خوە دا، ھەوە خەلەتی کریە و دڤێت ڕاست بکەن، پێدڤیە بۆ پێشکێشکرنا بڕیارێن ڕاست و دروست کو د خزمەتا وەلاتیان و حوکمەتێ دا بن، ئەم ھەموو پێکڤە د ھاریکار بین، ب شیرەتکاریا سەرۆکێ ھەرێمێ و سەرۆکێ جڤاتا وەزیران، پێخەمەت چاکسازیکرنا ڕاستەقینە”.
وی پەرلەمانتارێ پارتی خویا ژی کر، ئەگەر حوکمەت د دەمێ 15 رۆژان دا وێ بڕیارێ ھەانەوەشینیت، وی دەمی دادگەە دێ رۆلێ خوە گێریت و دێ ئینیتە بەردەم قانوونێ.
ئه‌ڤرۆ نيوز:
ئه‌ڤرۆ سپێدێ و ره‌نگه‌كێ نه‌چاڤه‌رێكرى دا، سه‌رۆكێ ته‌ڤگه‌را سه‌در، موقته‌دا سه‌در، عيراق ب جهـ هێلا و به‌ر ب لوبنان ب رێ كه‌فت، بڕياره ده‌مژمێر 6:00ى ئێڤارى ژى خونيشادانێن به‌فره‌هـ ده‌ست پێ بكه‌ن.
ب گۆره‌ى راگه‌هاندنێن عيراقى، ئه‌ڤرۆ رۆژا چارشه‌مبى رێكه‌فتى 13ى نيسانا 2016ێ دێ خوه‌نيشادانێن به‌رفره‌هـ ژ لايێ لايه‌نگرێن سه‌درى ل عيراقێ هێنه كرن وه‌كو نه‌رازيبوونا به‌رامبه‌ر حوكمه‌تا ته‌كنوكرات يا عه‌بادى ب به‌هانه‌يا وێ چه‌ندێ كو حوكمه‌تا نوو نه‌بوو چاكسازيێ يه، به‌لكو ب تنێ بۆ رازيكرنا وايه.
دوهى ژى د كۆمبوونا جڤاتا نوونه‌رێن عيراقێ دا، كوتلا ئه‌حرار يا سه‌ر ب ته‌ڤگه‌را سه‌در ڤه، بايكوتا روونشتنا جڤاتێ كر وه‌كو نه‌رازيبوون هه‌مبه‌ر ناڤێ كابينا نوو يێن حوكمه‌تا ته‌كنوكرات ب سه‌رۆكاتيا عه‌بادى.
ئه‌ڤرۆ ژى د سه‌ره‌دانه‌كا نه‌چاڤه‌رێ كرى دا، سه‌رۆكێ ته‌ڤگه‌را سه‌در موقته‌دا سه‌در ب رێيا فرۆكخانا نه‌جه‌ف به‌ر ب وه‌لاتێ لوبنانێ ب رێ كه‌فت بێى كو مه‌ره‌ما سه‌ره‌دانێ بهێته دياركرن يان ژى پێشوه‌خت بهێته راگه‌هاندن.
ئەڤرۆ نیوز:
سەرۆکێ فراکسیۆنا ئێکگرتوو ئیسلامی کوردستان ل جڤاتا پارێزگەھا دھۆکێ دیارکر کو ھەتا نوکە 16 پوستێن ئێکگرتوو ل پارێزگەھا دھۆکێ نەھاتینە پڕکرن و ب تنێ (9) پۆست ژ سەرجەمێ (23) پۆستان ھاتینە پڕکرن. سەرۆکێ فراکسیۆنا پارتی ژی دبێژیت ئەگەرێ ڤێ چەندێ تنێ ھۆکارەکێ کارگێری یە.
سەباح بابیری، سەرۆکێ فراکسیۆنا ئێکگرتوو ئیسلامی کوردستان ل جڤاتا پارێزگەھا دھۆکێ بۆ رۆژناما ئەڤرۆ گۆت” گیرۆبوون ل سەر پڕکرنا پۆستان یا مەعقول نینە و دبینین ئەڤ گیرۆبوونە ھندەک کارێن ئیداری نە، چونکی ھندەک ژنوو دێ ھێنە دامەزراندن و ئەڤە ژی ئێک ژ ئەگەرانە کو ھەتا نوکە ئەڤ پۆستێن ماین نەھاتینە پڕکرن، دووماھی پێزانین ل سەر بابەتی بەری چەند ڕۆژان دیاربوویە کو فەرمانێن دەست ب کاربوونێ یێن ھاتینە ئیمزاکرن و دبیت دڕۆژێن بھێت دا دەست بکاربن”.
سەرۆکێ فراکسیۆنا ئێکگرتوو ئیسلامی کوردستان ل جڤاتا پارێزگەھا دھۆکێ گۆت ژی” ھەر سێ ڕێڤەبەرێن ناحیان ل گەل جێگرێ پارێزگەرێ دھۆکێ و سکرتێرێ جڤاتا پارێزگەھێ ل گەل ھەر دو پۆستێن ڕێڤەبەرێن کارەبێ ل ئامێدیێ و ئاکرێ وڕێڤەبەرێ سۆلینان ل دھۆکێ یێن ب دەست ب کاربووین”.
ھێشتا گۆت”ڕێککەفتن ل گەل پارتی دیموکراتی کوردستان ل سەر ئەڤان پۆستان ھاتیەکرن، ھەکە ڕێڤەبەریەک بھێتە لێکدان یان بھێتە ھەلوەشاندن، پێدڤیە ڕێژا ئێکگرتوو د ھەلبژارتنان دا ل بەرچاڤ بھێتە وەرگرتن و نە ل سەر کیستێ ئێکگرتوو بیت، ھەکە ھەتا ڕێڤەبەریەک بھێتە ھەلوەشاندن یان لێکدان ل گەل ڕێڤەبەریەکا دی، دڤێت ئێکگرتوو ئیسلامی کوردستان ب رێڤەبەریەکا نوو بھێتە قەرەبووکرن”.
سەباح بابیری خویاکر ژی” ھەتا نوکە پارتی دیموکراتی کوردستان چو تێبینی ل سەر بەربژارێن ئێکگرتوو نینە و پرۆسە ب باشی یا ب ڕێڤە دچیت”.
گۆت ژی” چار ھەیڤ ل سەر ڕێککەفتنا پارتی دیموکراتی کوردستان و ئێکگرتوو ئیسلامی دەربازبوون و پێدڤی بوو بەربژارێن مە بۆ پۆستان دەست ب کارببان، بەلێ دئاگەھدارین کو ل ئەو پۆستێن ماین ژی دێ ل ڕۆژێن بھێت دەست ب کاربن”.
ل دۆر گیرۆبوونا پۆستێن ئێکگرتوو، ھشیار فەریق سەرۆکێ فراکسیۆنا پارتی دیموکراتی کوردستان ل جڤاتا پارێزگەھا دھۆکێ بۆ ئەڤرۆ گۆت” ھندەک بەربژارێن ئێکگرتوو بۆ پۆستێن ئیداری یێن دەست ب کاربووین و ھندەک ھێشتا ماینە و دەست ب کار نەبووینە، ئەگەرێ نە دەست ب کاربوونا وان ھۆکارەکێ کارگێریە و چو ھۆکارین سیاسی نەبووینە”.
ھشیاری گۆت ژی” گەلەک ژ بەربژارێن ئێکگرتوو بۆ پۆستێن ماین ل سەر میلاکێ وەزارەتەکێ دێ ھێنە ڤەگوھاستن بۆ وەزارەتەکا دی، پێدڤیە بھێتە ڤەگۆھاستن و پاشی دێ ھێنە دانان وەکو ڕێڤەبەر، دیسان ھندەک ژوان فەرمانبەر نینن و دێ ژنوو ھێنە دامەزراندن و دێ دەست ب کاربن وەک ڕێڤەبەر بۆ وی جھێ بۆ ھاتیە دەستنیشانکرن، ب ھیڤی نە ل دەمەکێ نێزیک دێ بڕیار دەرکەڤن و دێ دەست ب کاربن”.
سەرۆکێ فراکسیۆنا پارتی دیموکراتی کوردستان ل جڤاتا پارێزگەھا دھۆکێ گۆت ژی” جێگرێ پارێزگەرێ دھۆک و سێ ڕێڤەبەرێن ناحیان و رێڤەبەرەکێ گشتی کو ل دووڤ قانوونێ جڤاتێ دەنگ ل سەر دایە، یێن دەست ب کاربووین، دیسا ل دووڤ قانوونێ پێدڤی بوو کا چاوان ل جڤاتێ دەنگ ل سەر ھاتیەدان، ب وی ڕەنگی ل جڤاتێن قایمقامی و ناحیان ھاتبانە ھەلبژارتن، بەلێ پەرلەمانێ کوردستانێ ڕێ چارەک دیتیە ب ڕێیا بڕیارەکێ و ڕێ دایە جڤاتێ کو ل جڤاتێ بھێنە ھەلبژارتن”.
نيشاندان
