ئەڤرۆ نیوز، بارزان مزووری:
د فارس بریفکانی، سەروکێ لژنا ساخله‌ميێ ل جڤاتا نوونه‌رێن عێراقێ بۆ ئەڤرۆ نیوز دیار کر کو ئەو نوشدارێن نھا ل بن دەستھەلاتا داعش هه‌كه ل دووڤ وان رێنمایێن وان کار نەکەن دھێنە سزادان ب سزایێ گولەباران کرن یان سێدارەدان تایبەت پارێزگەھا مووسل نھا رێیا وان ھاتیە گرتن کو ژ ناڤ مووسل دەرکەڤن.
ناڤبری دیار کر کو نەخوشخانەیێن مووسل ھەموو یێن بووینە پارە وەکو کلینیکێن ئیڤاریان ب بھایەکێ گران چارەسەریا نەخوشان دکەن رۆژانە ل سەر وان بەرتەنگتر لێ دھێت دەرمان بۆ وان ژ رەقە دهاتن، به‌لێ ئەڤە پتر ژ ھەشت ھەیڤانه دەرمانێن بۆ مووسل دچوون ھاتینە برین.
بريفكانى گۆتژى: “پتریا نوشدارێن وان یێن نھا ل مووسل ژ سوریا ئیناینە، ب تایبەت برینپێچ ئەوێن ل سوریا سەرکردەیێن وان چارەسەردکرن نھا ئیناینە مووسل، ناھێلن نوشدارێن عيراقی وان چارەسەر بکەن”.
ئه‌ڤى نوونه‌رێ جڤاتا نوونه‌رێن عيراقێ دا زانين ژى كو ل بەغدا ژی یا بوویە ئەزمەیەکا مەزن ل سەر نوشدارا یێ دچنه ژ دەرڤەی وەلاتی ئەگەر بەردەوام ب ڤی شێوەی بمینیت دێ بیتە مەزنترین ئالوزی بۆ حوکمەتا بەغدا.
ئەڤرۆ نیوز ، نەوزاد زادە ھلۆری:
فیدراسیوونا رێکخراوێن ناحکومییێن سۆران و سەنتەرێ رەوشەنبیریێ سۆران دێ لرۆژا ئالایێ کوردستانێ وەکو رێزگرتنەک بو پێشمەرگەیان دێ ب شەڤ ل چیایێ ھندرین مینن.
دڤی واریدا مەعاف بارزانی سەرپەرشتێ چالاکیێ و ئەندامێ فیدراسیوونا رێکخراوێن ناحکومیێن قەزا سۆران بو ئەڤرۆ گۆت : ( ئەم وەکو فیدراسیوونا رێکخراوێن ناحکومییێن قەزا سۆران بو بلند ڕاگرتنا رۆژی ئالایێ کوردستانێ مە بریاریادایی کو ئێڤاریا رۆژا ئالایێ کوردستانێ ب شەڤ بەر ب چیایێ ھندرین کو دکەڤیتە دناڤبەرا قەزا سوران و قەزا رەواندوز بچین و ھەتا سپێدێ ل چیایی بمینین ).
زێدەتر گۆت : ( مەرەم ژ ڤێ یەکێ ئەو کو خەلکێ کوردستانێ ب چاڤ ماندوبون و نەخوشیێن پێشمەرگێن قارەمان ببینن ، و بو ڤێ مەرەمێ ژی سەرجەم دام و دەزگەھێن حکومی و حزبی و رێکخراو و ھژمارەکا زوریا خەلکێ قەزا سوران و دەوربەر دێ پشکداریێ دڤێ یەکێ دا کەن ).
سەرپەرشتێ چالاکیێ دیارکر ژی کو ھژمارەکا ئافرەتان ژی بریار دایە کو پشکداریێ دڤێ یەکێ دا بکەن و گۆت ژی: (ئەو کەسانێن کو دێ پشکداربن چوو تشان دگەل خوە نائینن وەکو بەتانی و نڤیینک داکو پتر ھەست ب قارەمانیا پێشمەرگەی ل سەنگەرێن بەرگریێ بکەن ).
فیدراسیوونا رێکخراوێن ناحکومی ل دەڤەرا سوران ژ 20 رێکخراو و سازیێن جودا جودا پێکدھێت.
ئه‌ڤرۆ نیوز:
رێڤه‌به‌ريا كه‌شناسى و بيڤه‌له‌رزێ ل دهۆكێ راگه‌هاند كو سوبه‌هى رۆژا سێشه‌مبى رێكه‌فتى 15ى كانوونا ئێكێ يا 2015 ئه‌سمانێ دهۆكێ دێ يێ نيڤ ئه‌ورى بيت.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ هاتنا فشارێن بلندێن وه‌لاتێ توركيا بۆ سه‌ر هه‌رێما كوردستانێ دهێته پێشبينيكرن ئه‌سمانى دهۆكێ دێ يێ نيڤ ئه‌ورى بيت.
پشكا پێشبينيان دايه زايه زانين كو دێ ئاراستێ باى ژى دێ باشوورێ رۆژئاڤا بيت ب ره‌نگه‌كى د ناڤبه‌را 5 هه‌تا 15 كم دا و ماوێ ديتنێ ژى 9 بۆ 10 كم بيت و پلێن گه‌رمێ ژى دێ د ناڤبه‌را 11 بۆ 16 پلان دا بيت.
ئه‌ڤرۆ نیوز، له‌زگین جۆقى
به هه‌لكه‌فتا رۆژا جیهانى یا خۆدان پێدڤیێن تایبه‌ت ئه‌ڤرۆ 14/12/2015 ساخله‌میا پارێزگه‌ها دهۆكێ ئاهه‌نگه‌كا رێزگرتنێ بۆ هژماره‌كا خۆدان پێدڤیێن تایبه‌ت ئه‌نجامدا و 10 ژ وان خه‌لاتكرن .
د. هشیار موسى رێڤه‌به‌رێ گشتیى ساخله‌میا پارێزگه‌ها دهۆكێ ب وه‌كاله‌ت دیاركرك و ساخله‌میا دهۆكێ یا به‌رده‌وامه ل سه‌ر پێشكێشكرنا خزمه‌تێن خوه بۆ هه‌موو خۆدان پێدڤیێن تایبه‌ت وپشته‌ڤانیا پرۆگرامێن هشیاركرنێ ژ خوه پاراستنى ژ نه‌خۆشیێن كو دبنه ئه‌گه‌رێ په‌كه‌ڤتنێ وهه‌لسه‌نگاندنا خزمه‌تێن شیاندنا نوشدارى و زێده‌كرنا شیانێن كارمه‌ندێن ساخله‌میێ ودروستكرنا پرۆتوگولێن كارى ودابینكرنا ده‌رمان و پێدڤیێن نوشدارى وئامیرێن نوشدارى.
پتر ژ چار هزار خوادن پێدڤیێن تایبه‌ت ل سه‌نته‌رێ نه‌خوشیێن كه‌هان و ڤه‌ژاندنا نوشداریا دهۆك هاتینه توماركرن.
ئه‌ڤرۆ نيوز:
ب ئامادەبوونا وەزیرێ پەروەردا حوکمەتا ھەرێما کوردستانێ د. پشتیوان صادق و رێڤەبەرێ گشتیێ چالاکیێن وەرزشی و ھۆنەری رێورەسمێن خەلاتکرنا قارەمانێن قارەمانیا شەترەنجێ ل ژێر درويشمێ ئەم ھەمی پشتەڤانیێن پێشمەرگەی نە ل سەر ئاستێ رێڤەبەریێن گشتی سەر ب وەزارەتا پەروەردێ ڤە (دھۆک، ھەولێر، سلێمانی، کەرکوک، گەرمیان، حەلەبچە) یا کوران و کچان کو یاریێن وێ ل ھولا یانا شەترەنجێ خانزاد ل ھەولێرێ د ناڤبەرا 10 هه‌تا 13/12/2015 برێڤەدچوون .
ئه‌حمه‌د عه‌بدولا زۆبێر به‌رپرسێ راگه‌هاندنێ ل رێڤه‌به‌ريا گشتيا په‌روه‌ردا پارێزگه‌ها دهۆكێ بۆ ئه‌ڤرۆ نيوز گۆت: “دڤێ قارەمانیێ دا تیما کچان یا رێڤەبەریا گشتی یا پەروەردا پارێزگەھا دھۆکێ شیا ناسناڤێ ھەرێما کوردستانێ ب دەست خوه ڤە بینیت”.
زێده‌تر گۆت: “د ڤان رێورەسمان دا وەزیرێ پەروەردێ خەلات و دیاری ل سەر قارەمانێن قارەمانیا شەترەنجێ بەلاڤکرن”.
ئەڤرۆ نیوز ، لەزگین جۆقی:
سەرۆکێ قەوالێن ئیزدیان بۆ ئەڤرۆ نیوز دیارکر کو سوبەھێ رۆژا سێشەمبی 15/12/2015 دێ رۆژیێن ئێزدیان دەست پێ کەن و ھەر کەسەکێ ئێزدی بیت پێدڤیە ھەر سی رۆژیان بگرت ل رۆژا 18/12 دێ بیتە رۆژا جەژنا رۆژیێن ئێزی د ناڤ ئێزدیان دا.
بەھزاد سلێمان سڤۆ سەرۆکێ قەوالێن ئێزدیان دیارکر کو رۆژا سێ شەمبی دێ رۆژا ئێکی یا ئیزدیان بیت و رۆژا چوار شەمبیی و پینچ شەمبیی ژی ئێزدی دێ ب رۆژی بن، ئانکو ل رۆژا 15 و 16 و 17/12 و ل رۆژا ئەینی 18/12 دێ بیتە جەژن لێ ئەڤ سالە ژی ئیزدی ب تنی دێ رۆژیان گرن و رێورەسمێن جەژنێ وەکو جاران ناھێنە گێران ژ بەر ئاوارەبوونا خەلکێ مە و گۆتژی: “خەلکێ شنگال و باشیکێ و بەحزانی ھەموو ئاوارە نە دبن خیڤەتان دا دژین نەشێن رێورەسمێن جەژنی بگێرن”.
ئەڤرۆ نیۆز، قائید میرۆ:
سپێدەھیا ئەڤرۆ رۆژا دوشه‌مبى رێكه‌فتى 14ى كانوونا دويێ تیرۆرستێن داعش ب تڕۆمبێلەکا بۆمبەکری ھێرشی سەر ھێزێن پێشمەرگەی کر و ھاتە پەقاندن.
ژێدەرەکێ له‌شكرى بۆ ئەڤرۆ نیوز گۆت: “سپێدەھیا ئەڤرۆ ل گوندێ حاجی فازل یێ سەر ب ناحیا عیازیە یا قەزا تلەعفەر تڕۆمبێلەکا بۆمبڕێژکری ھێرشی سەنگەرێن پێشمەرگەی کر، بەلێ ژ لایێ پێشمەرگەی ڤه ب چەکێ گران ھاتە ژناڤبرن”.
ژێدەرێ کو نەڤیاى ناڤێ وى بھێتە بەلافکرن گۆتژی: “چەکدارەکێ خوەکوژێ داعش د ناڤ ترۆمبێلێ دا ھاتیە کوشتن و چو زیان نەگەھاندینە ھێزێن پێشمەرگەی ل دەڤەرێ”.
ئەڤرۆ، قائید میرۆ:
ئەندامەکێ لیژنا نەزاھێ رەتکر، حوکمەتا ھەرێما کوردستانێ لیژنەک بۆ پڕۆسا چاکسازیێ پێک ئینابیت و ئاشکراکر، نابیت پەرلەمانتار ئەندامێ لیژنێن حوکمەتێ بن.
دکتۆر فرسەت سۆفی، ئەندامێ لیژنا نەزاھێ یا پەرلەمانێ کوردستانێ بۆ ئەڤرۆ نیۆز راگەھاند” ئەف زانیاریێن بەحسێ پێک ئینانا لیژنەیەکێ بۆ چاکسازیێ دھێنە بەلافکرن و راستی بۆنینە و نە حوکمەتێ چو لیژنە پێک ئیناینە و نە ئەزژی تێدا ئەندامم، چونکو ژلایێ قانوونی ڤە نابیت ئەندامێ چو لیژنەیەکا بجە ئینانێ بم.
سۆفی دیارکر، تنێ من و پەرلەمانتار گۆران ئازد راپۆرت پێشکەشی حوکمەتێ کریە و سەرۆکایەتیا جڤاتا وەزیرانژی ژبلی دەستخۆشیێ ب گرنگیڤە بەرچاڤ وەرگرتیە.
نيشاندان