ئه‌ڤرۆ نیوز:
نوونه‌رێ حوكمه‌تا هه‌رێما كوردستانێ ل ئیرانێ راگه‌هاند، ل ده‌ستپێكا ڤێ حه‌فتیێ شانده‌كێ وه‌زاره‌تا سامانێن سروشتى یا هه‌رێمێ سه‌ره‌دانا ئیرانێ كریه‌ و هه‌تا نوكه‌ یێ ل ئیرانێ و رێككه‌فتنه‌ك ل دۆر هنارتنا په‌ترۆلا هه‌رێمێ بۆ ئیرانێ ئیمزا كریه‌.
نازم ده‌باغ ناڤه‌رۆكا رێككه‌فتنێ بۆ دوارۆژ ئاشكرا كر و گۆت:(د قۆناغا ئێكێ یا رێككه‌فتنێ دا حوكمه‌تا هه‌رێمێ رۆژانه‌ دێ 30 به‌رمیلێن په‌ترۆلێ ب رێیا تانكه‌ران بۆ پارزینگه‌ها كرماشان و ته‌ورێز هنێریت و د هه‌مبه‌ر دا دێ پاره‌ى یان به‌رهه‌مێ په‌ترۆلێ وه‌رگریت و د قۆناغا دویێ ژى دا، بۆریا په‌ترۆلێ د ناڤبه‌را هه‌رێمێ و ئیرانێ دا دێ هێته‌ راكێشان و پاشى دێ په‌حسێ مه‌زاختیان هێته‌ كرن كا دێ ب چ شێوه‌ى بیت).
ده‌باغى ئاماژه‌ ب وێ چه‌ندێ ژى كر، كو نوكه‌ حوكمه‌تا هه‌رێمێ دێ ب رێیا ده‌رگه‌هێن سنوورى یێن حاجى ئۆمه‌ران و باشماخ ب تانكه‌ران په‌ترۆلێ بۆ ئیرانێ هنێریت، لێ هنارتنا وێ دێ یا قانوونى بیت.

ئه‌ڤرۆ نیوز:
وه‌زاره‌تا خواندنا بلند و ڤه‌كۆلینێن زانستى یا حوكمه‌تا هه‌رێمێ مه‌رجا بۆ وان قوتابیان ددانیت یێن كو بۆ خواندنا به‌كالۆریۆسێ ل ده‌رڤه‌ى هه‌رێمێ دخوینن.
ل دووڤ نڤیسارا هه‌ژماره‌ 344 رێكه‌فتى 30/3/2016 ده‌ركه‌فتیه‌ و ئیمزا یوسف گۆڕان وه‌زیرێ خاندنا بلند و ڤه‌كۆلینێن زانستى ل سه‌ره‌، تێدا مه‌رجێ سه‌رجه‌مێ نمرا كریه‌ پیڤه‌ر بۆ وان قوتابیێن ژ ده‌رڤه‌ى هه‌رێمێ دخوینن.
دیسا د نڤیسارێ دا هاتیه‌، بۆ خواندنا پشكا نۆشدارى سه‌رجه‌مێ نمرێن قوتابى ژ 85% كێمتر نه‌بیت، بۆ خواندنا نۆشداریا دانان و ده‌رمانسازى سه‌رجه‌مێ نمرێن قوتابى ژ 80% كێمتر نه‌بیت و بۆ خواندنا پشكێن ئه‌ندازیارى ژى دڤێت سه‌رجه‌مێ نمران ژ 75% كێمتر نه‌بیت.
د پشكه‌كا دى یا نڤیسارا وه‌زاره‌تا خواندنا بلند هاتیه‌، پێدڤیه‌ هه‌موو قوتابى به‌رى بچیته‌ ده‌رڤه‌ بۆ خواندنێ باده‌كه‌كێ ل وه‌زاره‌تا ناڤبرى ڤه‌كه‌ت.

ئه‌ڤرۆ نيوز:
حوكمه‌تا هه‌رێما كوردستانێ بڕیار دا كار ب سیسته‌مێ ئه‌لكترۆنى یێ مووچه‌ى بكه‌ت و ل دووڤ بڕیارێ دێ ب رێیا حسابا به‌نكى، فه‌رمانبه‌ر مووچێ خوه‌ وه‌رگرن.
د كومبوونا دوهى یا لژنا بلندا روو ب رووبوونا قه‌یرانا دارایى ل جڤاتا وه‌زیرێن هه‌رێمێ، بڕیار هاته‌ دان كو سیسته‌مێ ئه‌لكترۆنى بۆ پێداچوونا مووچه‌ى بكه‌ڤیته‌ كارى و ل دووڤ بڕیارى ئێدێ هه‌موو فه‌رمانبه‌ر ب رێیا بانكێ مووچێ خوه‌ وه‌رگرن.
هیوا ئه‌فه‌ندى سه‌رۆكێ فه‌رمانگه‌ها ته‌كنولوژیا پێزانینان دیاركر كو ب ئه‌لكترونیكرنا مووچێ فه‌رمانبه‌ران دێ ب دو قوناغان بیت، كو پێدڤیه‌ ئێكه‌م جار كارتا ئه‌لكترونى بهێته‌ دروستكرن، پاشان بڕیار وه‌رگرتنا ئه‌لكترونى دێ هێته‌ بجهئینان.
ژ به‌ر قه‌یرانا داراییا هه‌رێم ڤه‌گرتى، حكومه‌تا هه‌رێمێ بڕیاردا د سالا 2016 دا كار ب سیسته‌مێ پاشخستنا مووچان بكه‌ت.