ئەڤرۆ نیوز:
ماموستایەکا قوتابخانا ئەکەد یا سریانی خوەیا دکەت کو وێ پشکداری د فەرھەنگا نابیستان یا کەر و لالان دا کریە و ھندەک ماموستایێن دی ھەبووینە کار د وێ فەرھەنگێ دا نەکریە، بەلێ غەدر ل ھندەک ماموستایان ھاتیە کرن و گۆت: ژ بەر ڤێ چەندێ من دو سکالا ل سەر رێڤەبەرێ پەیمانگەھێ تومارکرینە.
سوھام قەیسەر میکائیل، ماموستایا قوتابخانا ئەکەد یا سریانی یا بنەرەت بۆ ماوێ 20 سالان وەکو ماموستا زمانێ عەرەبی ل پەیمانگەھا ھیوا یا کەرولالان دەوام کریە و بۆ ئەڤرۆ گۆت: رێڤەبەرێ پەیمانگەھێ ئەم ماموستا ئاگەھدارکرین کو پەیڤ و ھێمایان ب دانین بۆ فەرھەنگا نوو یا کەرولالان من ژی گەلەک پەیڤێن ب زمانێ عەرەبی درۆست کرن، بەلێ ماموستایێن دی درۆست نە کرن و گەلەک خول ل ھەولێرێ و سلێمانیێ ھاتنە ڤەکرن و ئەز ئاگەھدار نەکرم، ئەو ماموستایێن کار نەکرین ناڤێن وان دانابوونە دەستپێکێ و ناڤێ من ل دووماھیێ دانابوو، ئەز ژی ل سەر ڤێ چەندێ رازی نەبووم، رێڤەبەری پەیمانگەھێ گۆتە من ئەو ماموستا ژ تە باشترن، لەورا ب تۆرەیی ڤە من گۆتە رێڤەبەری حەزدکەم ناڤێ من ژ فەرھەنگێ بینیەدەری، ئەو ژی ل سەر ڤێ چەندێ رازی بوو.
زێدەتر دبێژیت: پشتی ئەو فەرھەنگ ھاتیە چاپکرن و ل سەر قوتابیان بەلاڤ بووی و من تەماشەی ناڤێن وان کەسان کری یێ کو ئەڤ فەرھەنگە درۆستکری ناڤێ من د ناڤ دا نینە و گەلەک ھێمایێن وێ فەرھەنگێ من داناینە و ئەو ماموستایێن کارنەکرین ناڤێ وان ل دەستپێکێ نەن لەورا تۆرە بووم، من دو سکالا ل سەر رێڤەبەرێ پەیمانگەھێ تومارکرن، لێ ھەر چو پێڤە نەھات، لەورا ناچار بووم من خوە ڤەگوھاستە قوتابخانا ئەکەد و گەلەک حەزدکەم جارەکا دی ب زڤرمە پەیمانگەھا ھیوا یا کەرولالان، ئەگەر رێڤەبەریا پەیمانگەھێ ھەموو بھێتە گوھارتن.
سەلام حەجی عومەر رێڤەبەری پەیمانگەھا ھیوا یا نابیستان گۆت: بەری نوکە مە فەرھەنگەک چێکریە ل سەر ئاستێ سەرەتایی و ئەڤ فەرھەنگە ھەموو بابەتان ب خوەڤە دگریت، ئەڤ فەرھەنگە ل سالا 2000 ھاتیە چێکرن و لیژنەکێ ژ لایێ ماموستایێن پەیمانگەھا مە ھاتیە درۆست کرن ل گەل ماموستایێن ھەولێری و سلێمانیێ و ل گەل کۆمەلا کەرولالان ل دھوکێ و ئەڤ فەرھەنگە ب زمانێ ئاماژە بۆ قوتابیێن کەرولالان دا کو مالێن وان قوتابیان ژی مفای ژێ وەبگرن و بزانن سەرەدەریێ ل گەل زارۆیێن خوە بکەن.
ناڤھاتی ھێشتا گۆت ژی: ئەو فەرھەنگا ل دەستپێکێ ھاتیە چێکرن ھەموو ھێما تێدا نەبوون، لەورا ناچاربووین ھندەک فەرھەنگێن نوو بھێنە چێکرن ل سەر بابەتان و مە وەک رێڤەبەریا پەیمانگەھا ھیوا ماموستایێن خوە یێن خودان سەربۆر و شارەزا ئاگەھدارکرن و مە لیژنەک پێکئینا ل گەل ماموستایێن ھەولێر و سلێمانیێ چەندین جارا دان و ستاندن ھاتنە کرن و ھەتا رادەکی ماموستایێن مە د مفادارن و ڤێ فەرھەنگێ ب کار دئینن وەکو ماموستا فەریدا و دلبەر و شوکوریا و ئەحمەد و سوھام قەیسەر، ھەروەسا ب سەرپەرشتیا من ژی دگەل کۆمەلا نابیستان و ھەماھەنگی ل گەل ھاریکاریێن وان و دیسان ھاریکاریێن مە ژی وەکو (کاروان وسالح) پشکداری ڤێ فەرھەنگێ بووینە و ب ھێمایا پشکداربووینە ویێنەیێن وان د ناڤ فەرھەنگێ دانە.
سەلام حەجی رێڤەبەری پەیمانگەھا ھیوا یا نابیستانان عومەر دیار کر ژی، ئەڤ چالاکیێن ھاتینە ئەنجامدان ل وەرزی ھاڤینێ و دەمێ دەوامێ دا ھاتینە ئەنجامدان و ژوورەک بۆ ھاتیە دەست نیشانکرن کار دناڤ دا دکر.

ئەڤرۆ نیوز:
پارێزەرەکی دیار کر پشتی نێزیکی حەفت سالێن پێکڤەژیانەکا بێ ئاریشە، ژ نیشکەکێ ڤە ژنەکێ گومان ژ زەلامێ خوە برن کو خیانەتێ لێ دکەت و پشتی چاڤدێریا وی کری گومانا وێ دروست دەرکەفت و گۆت “ئاریشێن وان دەست پێ کرن، ھەتا کو گەھشتیە وی رادێ کو زلام توندوتیژیێ بکار بینیت و پرسا وان گەھشتیە دادگەھێ، لێ خێزانێن وان ژبەر شەرما جڤاکی رازی نەبوون ژێک جودا ببن”.
پارێزەر مەردان تاھر ل دادگەھا زاخۆ بۆ ئەڤرۆ دیار کر کو کێشەکا دو ھەڤژینان ل دۆر خیانەتا ھەڤژینیێ توندوتیژیێ ل دادگەھا زاخۆ ھاتە تۆمارکرن و گۆت “ل دەستپێکێ ژنکێ چ گومان ژ زەلامێ خوە نەدبرن، لێ پشتی تێبینی کری کو ھەڤژینێ وێ کرێکارە و دەرکەتنێن وی بۆ تورکیا زێدە بووینە گومان ژێ برن و ھێدی ھێدی چاڤدێریا وی کر و ھەتا جارەکێ بەرێ خوە ددەتە موبایلەکا وی و ھندەک وێنێن ژنەکێ تێدا دیتن، لەورا گومانا زێدەتر بەر ب راستیێ چوو و پتر دووڤچوونا وی کر، پاشی بۆ دیار بوو کو زەلامێ وێ عاشقێ ژنەکا بەردایە دی و ئەو ژن بەری وی دچیتە تورکیا و ئەو ژی د دووڤ دا دچیت”.
پارێزەری زێدەتر بەحسێ چیرۆکا ھەردو ھەڤژینان کر کو ل دووڤ گۆتنێن ژنکێ زەلامێ وێ دا چیتە دسەرشوویێ ڤە و ب موبایلا خوە وێنە دگرتن و بۆ ئەڤیندارا خوە فرێ دکرن، ھەروەسا چەندین نامێن ئەڤیندارا زەلامێ خوە ژی دیتن کو ھەمی ب دەستی ھاتینە نڤیسین و بەردەوام دچوو ژ دەرڤەی مال پەیوەندی ب تەلەفونێ ل گەل دکر و پەیڤێن ئەڤینی ل گەل ئێک دگۆتن.
مەردانی ئاشکرا ژی کر پشتی ڤێ ھەمی بێدەنگیێ ژ نوو ژن رراستی ھەڤژینێ خوە بوو و گۆتێ تو خیانەتێ ل من دکەی و شەڕەدەڤ د ناڤبەرا وان دا روو دا و گەھشتە رادێ توندوتیژیێ، ب ئاوایەکی گۆلدانکەک د ژوورا وان ڤە ھەبوو شووشە بوو، زەلام رابوو ددانیتە سەرێ وێ و ئێکسەر دپەقینیت و دێمێ وێ ب بۆکسا رەش و شین دکەت و گۆت “کێشە ل دادگەھێ ھاتە تۆمارکرن و ئەو ھەموو بوونە گرۆڤە بۆ ژنێ دگەل راپۆرتا پزیشکی، لەورا زەلام ھاتە زیندانکرن و پاشان سکالا جەزایی لێ ھاتەکرن کو بھێتە بەردان ژی، بەلێ ھەردو بنەمالان سکالا بەردانێ رەت کر ژبەر شەرما جڤاکی و گۆتن ئەڤ کێشە دووبارە نابیتەڤە و زەلامی ژی سۆزنامەک ل دادگەھێ چێکر کو جارەکا دی توندوتیژیێ ل گەل ھەڤژینا خوە بکار نەئینیت”.
ھەژی گۆتنێ یە بەری پێکئینانا ھەڤژینیێ کوڕکی ل دەف بابێ کچێ کار دکر و ژبەر ھەژاری و باوەریا وی کچا خوە دایێ و دو زارۆک ھەنە.