ئەڤرۆ نیوز:
کەنالێ (CNN) یێ ئەمریکی بەلاڤکر کو ھێزەکا تایبەت یا ئەمریکی دکریارەکا لەشکری یا نھێنی دا، ئێکەمین سەرکردێ پلە بلندێ داعشێ ل عیراقێ دەستەسەرکر، خویاکر ژی کو ھێزا دەلتا یا ئەمریکی یا تایبەت ئەو پرۆسە ل باکورێ عیراقێ ئەنجامدایە.
کەنالێ ناڤبری ل گۆڕ ژێدەرێن وی، گۆت” کەسێ ھاتیە گرتن ژ سەرکردێن پلە بلندێن داعشێ یە، بەلێ ناسناما وی و ڕۆلێ وی یێ پڕاکتیکی دناڤ داعشێ دا دیار نەکر، ژبەر ھەستیاریا پلەیا وی دناڤ بلندترین جە و پۆستێ رێکخستنا تیرۆرستی یا داعشێ دا، ئاماژە دا ھندێ ژی، نوکە ئەو سەرکردێ داعشێ یێ ددەستێن ھێزێن ئەمریکی دا.
ئەو پرۆسا لەشکری یا ھاتیە ئەنجامدان، پشتی بڕیارا ھنارتنا ھێزەکا تایبەت یا ئەمریکی ل عیراقی ھاتیە دان، ب مەرەما ئەنجامدانا کارێن لەشکری یێن تایبەت ل باکورێ عیراقێ ب تایبەتی ل باژێرێ مووسلێ ب مەرەما دەستەسەکرنا سەرکردێن داعشێ ل عیراقێ.
کەنالێ ئەمریکی ھەروەسا دیارکر، ستراتیژیا ئەمریکی ل سەر بناغێ پەیداکرن و مفا وەرگرتنە ژ پێزانینێن نوو ل دۆر دەستەسەرکرنا سەرکردێن داعشێ بۆ پێشڤەبرنا ھێرشێن ئەسمانی و کاریگەریا وان.
ھێزا دەلتا یا تایبەتیا ئەمریکی ل سالا 2015 د کریارەکێ دا ل سووریێ، پشتی (ئەبو سەیاف) کو دھێتە ھژمارتن ئێک ژ بەرپرسێن گرنگ یێن داعشێ کوشتی، ھەڤژینا وی ژی د ھەمان کریارێ دا دەستەسەر کربوو.

ئەڤرۆ نیوز:

کونترۆلکرنا مووسل یا نێزیک دبیت و عیراقێ دڤێت پشتێ وێ پرۆسێ، کێشە ل سنورێن ھەرێما کوردستانێ د بەردەوام بن، بۆ وێ چەندێ ژی پێداگیریێ ل سەر پشکداریا حەشد شەعبی د پرۆسا ئازادکرنا مووسلێ دا دکەت، ئەو ھێزا پەکەکێ ژی ل وان دەڤەران ب ھاریکاریا حوکمەتا عیراقێ دروست کری، ھەمان ئەجیندە و کار یێ ھەی.
بەری چەند ڕۆژن ئەندامێ جڤاتا نوونەرێن عیراقێ ژ فڕاکسیۆنا دەولەتا قانوونێ بۆ دەزگەھێن راگەھاندنێ یێن عیراقی گۆتبوو” پشکداریا ھێزێن حەشد شەعبی د پرۆسا ئازادکرنا مووسلێ دا بڕیارەکا ڤەبڕە ودێ ھێتە بجھئینان”.
ژلایەکێ دی ڤە بەحسێ وێ چەندێ یێ ھەی کو ھژمارەکا چەکدارێن حەشد شەعبی دخوازن ل گەل دەستپێکا کونترۆلکرنا مووسلێ، ئەوژی ب جلکێن لەشکرێ عیراقێ خوە بگەھینن سنورێن دەڤەرێن کوردستانی.
ژێدەرەکێ ئاگەھدار ژی بۆ ڕۆژناما باس گۆتبوو، ئەو چەکدارێن ژلایێ پارتیا کارکەرێن کوردستانێ (پەکەکێ) ڤە، ب ھاریکاریا حوکمەتا عیراقێ ل شنگالێ و دەڤەرێن سنوری کو ژ ھژمارەکا ئێزدی و شەبەک و شیعەیێن تلەعفەرێ ھاتینە پێکئینان، کار بۆ وێ چەندێ دھێتە کرن کو ھژمارا وان بھێنە زێدەکرن و ل سنورێن وان دەڤەران دا بھێنە بەلاڤکرن، ب وێ یەکێ ژی دێ دوبارە کێشە بۆ ھەرێما کوردستانێ دروست بن کو نوکە ب تمامی دبن کونترۆلا ھێزا پێشمەرگێ کوردستانێ دانە.
شاخەوان عەبدوللا بڕیاردەرێ لژنا ئاسایش و بەرگریێ ل جڤاتا نوونەرێن عیراقێ ژ فراکسیۆنا پارتی بۆ باس دبێژیت” سەرۆکاتیا ھەرێما کوردستانێ، حوکمەتا عیراقێ یا ئاگەھدارکری کو ژبلی لەشکرێ عیراقێ و ھێزێن وەزارەتا ناڤخوەیی، چو ھێزەکا دی ل دەف وان یا فەرمی نینە”. گوت ژی” د وی حالەتی دا، ھێزا پێشمەرگێ کوردستانێ ڕێ نادەت حەشد شەعبی بھێتە وان دڤەران، بەلکو تنێ دێ ڕێ ب لەشکرێ عیراقێ ھێتە دان کو ھێزەکا وی لەشکری یا ھاتیە مەخموورێ”.
شاخەوانی ئاماژە ب وێ چەندێ ژی دا، بابەت ھەر تنێ ھەرێما کوردستانێ نینە و خەلکێ دەڤەرێن سونی ب کورد و سونەڤە ل گەل پشکداریا حەشد شەعبی د کونترۆلکرنا مووسلێ دا نینن، چونکی حەشد شەعبی یا فەرمی نینە و بۆ ئەجندەکا تایبەت یا ل دەڤەرێ، خویاکر ژی، ھەتا نوکە دیار نەبوویە کو چەکدارەکێ حەشد شەعبی ب جلکێ لەشکرێ عیراقێ ھاتبیت، چونکی ئەو کارە وەسا یێ ب ساناھی نینە کو ئەو چەکدارە بکەن.
بڕیاردەرێ لژنا ئاسایش و بەرگریێ ھێشتا گۆت ژی” ھەر ھێزەک ژبلی ھێزا پێشمەرگێ کوردستانێ و دەزگەھێن ئەمنی، یا مەترسیدارە، ئەو ھێزێن پەکەکێ و عیراقێ ل شنگالێ و وان دەڤەران دروست کرین، چو جاران شیانێن وێ چەندێ نینن بۆ چەند خولەکەکان ڕوو ب ڕوویێ پێشمەرگەی ببن، بەلێ ل گەل ڤێ چەندێ ژی دا، دشێن دژایەتیا ڕیفراندۆمێ و خەلکێ کوردستانێ بکەن و ببنە سەرئێش ل وان دەڤەران، کو ھەر بۆ وێ مەرەمێ ژی یێن ھاتینە ھنارتن، لەوما دشیان دایە ھەر ھێزەک ژ دەرڤەی وەزارەتا پێشمەرگەی ل وان دەڤەران ھەبیت، ھێزا پێشمەرگەی وان دەربکەت”.
شاخەوانی ئاشکراکر ی” ئەو ھێزا ژلایێ پەکەکێ ڤە ل وان دەڤەران ھاتیە پێکئینان، ھژمارا وێ ھند نینە کو بەحس ل زێدەتر ژ دو ھزار چەکداران دھێتە کرن، بەلکو ئەو لیستە ناڤە بۆ بەغدایە و مووچە ب ناڤێن وان دھێتە وەرگرتن، د ڕاستی دا ئەو ھێزە تنێ 500 کەسن کو ژلایێ پەکەکێ ڤە ھاتیە پێکئینان و ب سەر حەشد شەعبی ڤەیە و مووچێن وان ژ بەغدا بۆ دھێنە وەرگرتن، یێن دی ناھێتە زانین کا کینە و پارێ وان دچیتە بەریکا کێ کو ھەیڤانە دھێتە وەرگرتن”.
ژلایێ خوەڤە مەحما خەلیل، قایمقامێ قەزا شنگالێ راگەھاند” تنێ ھێزا پێشمەرگێ کورستانێ و لەشکرێ عیراقێ دشێن پشکداریێ د ئازادکرنا مووسلێ دا بکەن، ئەو ھێزێن دی یێن حەشد شەعبی، چ یێن ل ڤێرێ پەکەکێ دروست کرین، یان ئەوێن عیراق دخوازیت بھنێریت، دێ بنە مەترسی ل سەر سنوران و ھاتنا وان تنێ بۆ دروستکرنا کێشانە”.