ئه‌ڤرۆ نیوز: ڤه‌ده‌ر ره‌شاڤایی:
شه‌ڤا 22 بۆ 23 یا مه‌ها یازده، سه‌لاحه‌دین ده‌میرتاش هه‌ڤسه‌رۆكێ هه‌ده‌پێ ژ بزاڤه‌كا كوشتنێ یا نێزیك رزگاربوو پشتی ته‌قه لێ هاتیه كرن لێ د سه‌رێ جامێ ترۆمبێلا وی یا دژه‌گوللــه كه‌ڤتی.
ئه‌ڤ یه‌ك ژ ئاليێ میدیا هه‌ده‌پێ ڤه هاته راگه‌هاندن ، هه‌ڤده‌م ده‌میرتاش د ئه‌كاونتا خوه دا لسه‌ر تورا جڤاكیا تویته‌ری نڤیسیه كو مرن بده‌ستێ خۆدێ یه.
ئەڤرۆ نیوز،زنار تۆڤی:
تەلار فائیق رێڤەبەرا فرۆکخانا نێڤدەولەتی یا هەولێرێ دا دیارکرن ئەم ژلایێ بەغداڤە هاتینە هایدارکرن کو بۆ ماوێ 48 دەمژمێران گەشتێن ئەسمانی یێن هەولێر و سلێمانیێ بهێنە راگرتن،ئەڤ چەندە هاتە پێش ژ ئەگەرێ هاڤێژتنا مۆشەکان ژلایێ رووسیاڤە بۆ سەر مولگەهێن داعش ل وەلاتێ سوریێ، كو ل سه‌ر ئاسمانێ كوردستانێ ده‌رباز دبن و پشتی 48 دەمژمێران جارەکادی رەوشا هاتوچوونا فرۆکان دێ ئاسایی بیتەڤە ل هەرێما کوردستانێ.
ئه‌ڤرۆ نیوز، مه‌حمود نهێلى
پشتى ململانیه‌كا زۆر ل گه‌ل نه‌خوشیان و د ته‌مه‌نێ 83 سالیێ دا كه‌ساتى و پێشمه‌رگه و كادرێ شوره‌شا ئیلون و گولانێ (ره‌شید ئه‌حمه‌د ره‌شاڤه‌ى) ل رۆژا ئێك شه‌مبى 22/11/2015 وه غه‌را داویێ كر.
ناڤبرى ژ دایكبوویێ 1932 بوویه و هه‌ر ل ده‌سپێكا ڤه‌گه‌ریانا بارزانى ژ ئێكه‌تیا سوڤیه‌ت ل سالا 1958 په‌یوه‌ندى ب پارتى كربوو و ئێك بوو ژ كادرێن پیشكه‌فتى یێن وى ده‌مى و ل ده‌سپێكا شوره‌شا ئیلونێ په‌یوه‌ندى ب شوره‌شێ كریه و پێشمه‌رگه و كادره‌كى هه‌ره چالاك بوویه ل سه‌ر ده‌مێن هه‌ر دوو شوره‌شێن ئیلون و گولانێ و هه‌روه‌سا به‌شداریه‌كا باش د سه‌رهه‌لدانێ دا كریه و تا هاتیه خانه نشینكرن چه‌كى وى ب ملێ وى ڤه بوویه.
ئەڤرۆ نیوز، ئەیاد بەرواری:
سەرۆکێ وەزیرێن بەلجیکا، شارل میشال، دیارکر کو بریارا بلندکرنا حالەتا ئامادەباشیێ ل بەلجیکا بۆ بلندترین ئاست، یا ھاتیە دان پشتی گەھشتنا پێزانینان ل دۆر مەترسیا ئەنجامدانا ھێرشان ل بەلجیکا کو ھەڤشێوەی ھێرشێن پاریس بن.
شارل میشال، د کۆنگرەکێ رۆژنامەڤانی دا ل برۆکسل پایتەختێ بەلجیکا گوت” مەترسی یا نێزیکە” د ھەمان دەم دا ژی ھوشداریا ئەنجامدانا ھێرشەکێ ب چەکێ و تەقەمەنیان ژی کر و گوت ” ئارمانجێن پێشبینی کری بۆ ھێرشێن تیرۆرستی، جادێن بازرگانی و چالاکی و جھێن ب قەرەبالغ و ھەوێن ڤەگوھاستنێ نە ” گوت ژی” سوباھی رۆژا دو شەمبی دێ قوتابخانە ل بەلجیکا ھێنە داخستن”.
بەلجیکا چەندین پێرابوونێن دی ژی وەرگرتینە وەکو داخستنا وێستگەھێن میترۆیێ ل بروکسلێ ل رۆژا شەمبی ھەتا رۆژا دوشەمبی و دو ئاھەنگێن موزیکی ژی ھەلوەشاندن و چەندین مۆلێن بازرگانی و موزەخانە و ھۆلێن سینەمایێ داخستن، بەلێ ڕێ ل ئەنجامدانا یاریێن تەپا پێی ل خولا بەلجیکی نەگرت.
ئەڤرۆ نیوز، ئەیاد بەرواری:
رۆژناما (ئیندبندنت) یا بریتانی بەلاڤکر بۆ شکاندنا رێکخستیا دەولەتا ئیسلامی (داعش) یا تیرۆرستی، پێدڤیە ھەڤپەیمانەکێ ناڤخوەیی ھەبیت و دیارکر کو رەوشا سیاسی یا نوکە یا گونجایە بۆ حوکمەتا بریتانی بۆ بریاردانێ ل سەر پشکداریێ د شەڕێ دژی داعشێ دا ل سووریێ، ب تایبەتی پشتی ھێرشێن تیرۆرستی ل پاریس.
خویا ژی دکەت” ئەمریکا و ھەڤپەیمانیا نێڤدەولەتی دژی داعشێ ھەشت ھزار ھێرشێن ئەسمانی یێن دژی داعشێ ئەنجامداین و ھەتا نوکە نەشیاینە نوکە ژناڤببەن، بەلکو بەرۆڤاژی، داعشێ ھێرشێن خوە ل دەرڤە دژوارتر لێکرینە و پەقینێن ئەنقەرە و بەیروت و بەغدا و سینا و پاریس پەیدابوون”.
رۆژناما بریتانی ئاشکرا دکەت، نوکە دانوستاندن ل سەر گەلەک پێشنیازان دھێتە کرن وەکو ھنارتنا ھێزێن لەشکری یێن ئەردی یێن ئەمریکی و بریتانی و فرەنسی، لێ دبیت رازیبوونا مللی ل سەر ھنارتنا وان ھێزان بۆ رۆژھەلاتا ناڤین نەبیت، لەوما سیناریۆیا ب ھێز ئەوە کو فرۆکێن بێ فرۆکەڤان بھێنە بکارئینان، زێدەباری کریارێن کوشتنا سەرکردێن داعشێ”.
دبێژیت ژی، ھەکە چو ھێزێن ئەردی نەھێنە ھنارتن و پشتبەستن ژی ب ھەڤپەیمانەکێ ناڤخوەیی یێ ب ھێز نەھێتە کرن، ھێرشێن ئەسمانی ب تنێ چو ئەنجام بۆ نابن.
ب دیتنا ڤێ رۆژناما بریتانی” لەشکرێ عیراقی، سەرەرای وان ھەموو میلیشیێن شیعی ئەوێن ھاریکاریا وی دکەن، نەشیاینە داعشێ ژ فەلوجە دەربێخن کو تنێ 40 کیلۆمەتران ژ بەغدا یا دوورە و ھەتا نوکە لەشکرێ عیراقێ نەھاتیە سەر خوە پشتی شکەستنێن ل سەر دەستێ داعشێ خارین و ئەوا ل شنگالێ ژی پەیدابووی ب ڕێیا پێشمەرگان بوو ب پشتەڤانیا ئەسمانی یا مەزن ژ لایێ ھەڤپەیمانیا نێڤدەولەتی ڤە”.
ئەڤرۆ نیوز، ئەیاد بەرواری:
ژێدەرێن ئەمنی ل پارێزگەھا نەینەوا راگەھاندن، رێکخستیا داعش یا تیرۆرستی ئەڤرۆ ئێکشەمبی 12 قوتابیێن زانکۆیێ ژ ئاکنجیێن مووسلێ گوللە بارانکرن ژبەر رەخنێن وان ل داعشێ ل سەر فیسبووکی.
وان ژێدەران، ل دووڤ شەفەق نیۆز، دیارکرن کو وان 12 قوتابیان رەخنە ل داعشێ دگرتن و گۆتارێن دژی وێ ل فیسبووکێن خوە بەلاڤ دکرن و ھندەک ژ وان ناڤێن نھێنی بکاردئینان، بەلێ داعشێ شیا وان دەستەسەر بکەت”.
خویاکرن ژی کو تەرمێن وان قوتابیان یێن ھاتینە ھنارتن بۆ نوژداریا دادی ل مووسلێ کو شوونوارێن گوللەیان ل سەرێ وان ھەبوو.
ئەڤرۆ نیوز، ئەیاد بەرواری:
سەرۆکێ رێکخراوا نێڤدەولەتی بۆ ھەڤکاریێ د ناڤبەرا دەزگەھێن پۆلیسان (ئەنتربۆل) راگەھاند، مە وەکو ئەنتربۆل ناسنامێن زێدەتر ژ پێنج ھزار و ٨٠٠ توندرەوێن بیانی دەستنیشان کرینە ژ سەرجەمێ ٢٥ ھزاران کو گەھشتینە گرۆپێن توندرەو ل سووریێ و عیراقێ و ھندەک وەلاتێن دی.
جورجن ستوک سەرۆکێ ئەنتربۆلێ ل کۆنگرەکێ تایبەت ل سەر بەھنگاریا تیرۆرێ ل باژێرێ ئەشبیلیا یێ ئیسپانی گوت” ئەو پێنج ھزار و ٨٠٠ توندرەو ژ ٥٠ وەلاتانە و داخواز ژ وەلاتان کر پتر د ھەڤکاربن ژبۆ دەستنیشانکرنا ناسناما ھەموو توندرەوێن بیانی”.
کونگرێ بەرھنگاریا تیرۆرێ ل ئیسپانیا بۆ دەمێ سێ رۆژان ھاتە گرێدان و تێدا بسپۆرێن ھێزێن ئەمنی ل جیھانێ پشکداری تێداکر و دانوستاندن ل سەر ئالوگۆرکرنا پێزانینان ل دۆر بەھنگاریا تیرۆرێ ھاتنە کرن.
ئه‌ڤرۆ نیوز : ڤه‌ده‌ر ره‌شاڤایی:
ئیسمائیل كاهرامان به‌ربژێرێ پارتا داد و گه‌شه‌پێدانێ (ئاكه‌پێ) ب ده‌ستڤه‌ئینانا 316 ده‌نگان وه‌ك سه‌رۆكێ نوو یێ په‌رله‌مانێ توركیا هاته هه‌لبژارتن.
به‌ربژێرێن دی ئایشا بیلگه‌هان ژ (جه‌هه‌پێ) 127 ده‌نگ بده‌ستڤه‌ئینان، ده‌نگیر میر محه‌مه‌د فرات ژ پارتا گه‌لێن دیمۆكرات (هه‌ده‌پێ) 41 ده‌نگ بده‌ستڤه‌ئینان.
ئاكه‌پێ 317 كورسی و جه‌هه‌پێ 134 كورسی و هه‌ده‌پێ 59 كورسی و مه‌هه‌پێ 40 كورسی د په‌رله‌مانێ توركيا دا هه‌نه.
ئه‌ڤرۆ نیوز: ڤه‌ده‌ر ره‌شاڤایی:
روانگه‌ها سوری بۆ مافێن مرۆڤی خویاكر كو كه‌سه‌كێ ب ماتۆرسكله‌كێ خوه ب خاله‌كا پشكنینا یه‌په‌گێ ل گرێ سپی ل رۆژئاڤا كوردستانێ نێزیك سنۆرێ توركیا په‌قاند و د ئه‌نجام دا 3 كه‌سان گیانێ خوه ژ ده‌ست دا و 20 كه‌س برینداربوون.
سه‌ره‌رای كۆنترۆلكرنا گرێ سپی ژ ئالیێ هێزێن كوردی ڤه لێ داعش ب به‌رده‌وام په‌قینان و بۆسان به‌رامبه‌ر هێزێن كوردی ل وێ ده‌ڤه‌رێ بكاردئینیت.
نيشاندان