شێلادزێ ، نه‌وزاد زاده‌ هلورى:
په‌یكه‌ره‌ك دێ بوو شه‌هید ” كازم بێزه‌لى ” ل ناحیا شێلادزێ هێته‌ درۆستكرن ئه‌و پێشمه‌رگێ كو ب ده‌ستێن داعش ب ره‌نگه‌كێ درندانه‌ هاتیه‌ شه‌هید كرن.
ئه‌یسه‌ر جه‌رگیس رێڤه‌به‌رێ ناحیا شێلادزێ دیاركر : شه‌هیدێ قاره‌مان كازم بێزه‌لى كو ب شێوه‌یه‌كێ زور درندانه‌ ب ده‌ستێن چه‌په‌لێن داعش هاته‌ شه‌هیدكرن له‌وما په‌یكه‌ره‌ك دێ ژلایێ لیژنا ناوچا پارتى ل شێلادزێ ب هه‌ڤكاریا لقێ 18 بوو شه‌هید كازم بێزه‌لى هێته‌ چێكرن )
زێده‌تر گۆت : ( نها به‌رهه‌ڤى بوو دانان و چێكرنا په‌یكه‌رى دهێنه‌كرن و په‌یكه‌ر ژى دێ دناڤ جهێ ڤه‌حه‌ویانێ لسه‌ر پرا نێزیك لیژنا ناوچا پارتى هێته‌ چێكرن ژبه‌ركو ئه‌و جه جهه‌كێ سراتیجى و جوانه‌ و به‌رفره‌هه‌ )
دهێته‌ زانین پشتى كو پێشمه‌رگێن قاره‌مان ئوپه‌راسیوونه‌كا به‌رفره‌ه بوو باشوورێ كه‌ركوكێ برى و سه‌ركه‌فتنه‌كا مه‌زن ئینایى وه‌كو به‌رسڤه‌ك بوو شكه‌ستنێن خوه‌ و سه‌ركه‌فتنێن پێشمه‌رگه‌ى داعشێ 12 پێشمه‌رگه‌ ب شێوه‌یه‌كى َزور درندانه‌ شه‌هیدكرن كو ئێك ژ وان شه‌هید كازم بێزه‌لى بوو.

ئه‌ڤرۆنیۆز، ئه‌یاد به‌رواری
ئاژانسه‌كا ده‌نگوباسان یا عیراقی ل دووڤ هنده‌ك ژێده‌ران به‌لاڤكریه‌ كو چار برایێن ئه‌ندامه‌كێ جڤاتا نوونه‌رێن عیراقێ چه‌كدارێن رێكخستیا داعش یا تیرۆرستی نه‌ و دو ژ برایێن وی یێن هاتینه‌ كوشتن و هه‌ر دو برایێن وی یێن دی ژی هه‌تانوكه‌ یێن دناڤ رێزێن تیرۆرستێن داعشێ دا ماین.
ل دووڤ ئاژانسا (خه‌به‌ر) یا ده‌نگوباسان یا عیراقی، چار برایێن ئه‌ندامێ جڤاتا نوونه‌رێن عیراقێ ژ فراكسیۆنا ئێكه‌تیا هێزێن دیموكراتی یا سونی (زاهد محه‌مه‌د سولتان ئه‌لخاتونی) گه‌هشتبوونه‌ رێزێن چه‌كدارێن تیرۆرستێن داعشێ كو ئێك ژ وان ب ناڤێ (عه‌دای محه‌مه‌د سولتان ئه‌لخاتونی) كو سه‌ركرده‌كێ داعشێ بوو، ل ڤێ دووماهیێ د شه‌ڕه‌كی دا ل گه‌ل هێزێن (سووریا دیموكراتی) ل ناحیا (ئه‌لهول) ل پارێزگه‌ها حه‌سه‌كه‌ یا سووری یێ هاتیه‌ كوشتن و تیرۆرستێن داعشێ ته‌رمی وی ل قه‌زا به‌عاج یا ب سه‌ر پارێزگه‌ها نه‌ینه‌وا ڤه‌ یێ ڤه‌شارتی.
دیسا خویاكریه‌ ژی كو برایه‌كێ دی یێ وی په‌رله‌مانتاری ل ده‌مێ دروستكرنا بۆمبان هاتبوو كوشتن ل سالا 2012 ێ پشتی بۆمبه‌ك پێڤه‌ په‌قی، به‌لێ هه‌تا نوكه‌ هه‌ردو برایێن وی یێن دی ب ناڤێن (سه‌فوك و كامل) یێن دناڤ رێزێن چه‌كدارێن تیرۆرستێن داعشێ دا.

ئه‌ڤرۆنیۆز، ئه‌یاد به‌رواری
نه‌ته‌وێن ئێكگرتی راگه‌هاند ئه‌و یا به‌رهه‌ڤه‌ بۆ ئاواره‌بوونه‌كا ب كۆم ژ باژێرێ مووسلێ به‌رێ پرۆسا ئازادكرنا وێ ژ ده‌ستێن رێكخستیا ده‌وله‌تا ئیسلامی (داعش) یا تیرۆرستی.
نوونه‌رێ كۆمسیۆنا نه‌ته‌وێن ئێكگرتی بۆ كاروبارێن ئاواران (برونۆ جیدۆ) بۆ ئاژانسا (رویته‌رز) گوت” كۆمسیۆنا مه‌ یا به‌رهه‌ڤیان دكه‌ت بۆ پێشكه‌شكرنا هاریكاریان بۆ وان كه‌سێن ژ باژێرێ مووسلێ دره‌ڤن و هنده‌ك جه یێن هاتینه‌ پێشنیاركرن بۆ دروستكرنا كه‌مپێن نوو” لێ ئاشكرا ژی كر ” سه‌ره‌رای ڤێ چه‌ندێ ژی، جه بۆ هه‌موویان نابیت”.
برونۆ زێده‌تر گوت” ڤێ جارێ چو به‌هانه‌ بۆ جڤاكێ مرۆڤایه‌تیێ نابن كو بێژن ئه‌ڤه‌ ژ نشكه‌كێ ڤه‌ په‌یدابوو و ب چو شێوه‌كی ئه‌م د به‌رهه‌ڤ نه‌بووین، ژ به‌ر كو د ئه‌نجامێ وێ پرۆسێ دا، دێ هژماره‌كا مه‌زن یا وه‌لاتیێن سڤیل ئاواره‌ بن”.
ب دیتنا وی به‌رپرسێ نه‌ته‌وێن ئێكگرتی” له‌زكرن د ڤه‌گه‌راندنا ئاواران دا بۆ ده‌ڤه‌رێن وان یێن هاتینه‌ ئازادكرن، دبیت ئه‌نجامێن به‌رۆڤاژی بۆ هه‌بن”.
خویاكر ژی” كارێ سه‌ره‌كی دێ به‌رهه‌ڤی بن بۆ وه‌رزێ زڤستانێ، به‌لێ د هه‌مان ده‌م دا فشار یێن ل سه‌ر پرۆسێن هاوارهاتنا مرۆڤایه‌تی یێن هه‌ین ژ ئه‌گه‌رێ كێمیا دراڤی”.
ب ئاواره‌بوونه‌كا ب كۆم یا وه‌لاتیێن ئاكنجی ل باژێرێ مووسلێ، دێ گرفتێن ئاواران و پرسا ئاواره‌بوونێ مه‌زنتر لێهن، ژ به‌ر كو هژمارا ئاوارێن ناڤخوه‌یی یێن گه‌هشتینه‌ سێ ملیۆن و 200 هزار كه‌سان، ئانكو رێژه‌یا 10% ژ وه‌لاتیێن عیراقێ یێن ئاواره‌ بووین.

ئه‌ڤرۆنیۆز، ئه‌یاد به‌رواری
سیاسه‌تمه‌دارێ عیراقی عه‌دنان باچه‌چی ئه‌ڤرۆ ل دوبه‌ی د ژیێ 92 سالیێ دا وه‌غه‌ركر.
ژێده‌ره‌كی نێزیك ژ خێزانا باچه‌چی بۆ ده‌زگه‌هێن راگه‌هاندنێ وه‌غه‌ركرنا باچه‌چی راگه‌هاند، عه‌دنان باچه‌چی ل 1923 ژ دایكبوویه‌ و ل سه‌رده‌مێ عه‌بدولكه‌ریم قاسمی نوونه‌رێ عیراقێ بوو ل نه‌ته‌وێن ئێكگرتی و ل سه‌رده‌مێ عه‌بدولسه‌لام عارفی وه‌زیرێ ده‌رڤه‌یێ عیراقێ بوو، به‌ری ئه‌نجامدانا كوده‌تایا حزبا به‌عس ل سالا 1968 ، باچه‌چی ل ده‌رڤه‌ی عیراقێ بوو و قه‌بوول نه‌كر بزڤریت و چو ئیماراتێ و به‌رهه‌ڤ بوو ل كۆمبوونا دامه‌زراندنا وه‌لاتێ ئیماراتێ ل ده‌ستپێكا سالێن حه‌فتیان و بوو شیره‌تكارێ سه‌رۆكێ ئیماراتێ بۆ كاروبارێن ده‌رڤه‌، پشتى ژناڤبرنا رژێما به‌عس ل 2003 ێ، عه‌دنان پاچه‌چی ڤه‌گه‌ریا عیراقێ و ئێك بوو ژ ئه‌ندامێن جڤاتا حوكمڕانیێ ل عیراقێ و پاشی دوباره‌ ڤه‌گه‌ریا بوو وه‌لاتێ ئیماراتێ كو هه‌لگرێ ره‌گه‌زناما ئیماراتی بوو.