ئەڤرۆ نیوز:
دقانوونا بودجا عیراقێ یا سالا 2016 دا ھاتیە کو داھاتیێن خالێن سنوری یێن ھەر پارێزگەھەکا عیراقێ دێ 50% بۆ وێ پارێزگەھێ بیت و دێ جڤاتێن پارێزگەھان چاڤدێریا وێ بابەتی کەن، بەلێ ل دووڤ قانوونا جڤاتێن پارێزگەھان ل ھەرێما کوردستانێ، ڕێ نەدایە چو جڤاتان کو ل سەر داھاتیێن خالێن سنوری کار بکەن، بەلکو ب حوکمەتێ ڤە یا گرێدای.
سەرحان ئەحمەد ئەندامێ لژنا دارایی ل جڤاتا نونەرێن عیراقێ ژ فراکسیۆنا پارتی بۆ رۆژناما ئەڤرۆ دیارکر” د قانوونا بۆدجا عێراقێ یا سالا 2016 دا ھاتیە ھەر خالەکا سنوری ل پارێزگەھەکا عیراقێ، دێ 50% ژ داھاتێ وێ خالا سنوری دێ بۆ وێ پارێزگەھێ بیت، ئانکو ل سنورێ ھەر پارێزگەھەکا عیراقێ، ھەکە خالەکا سنوری، یان دەرگەھەکێ سنوری تێدا ھەبیت، دێ نیڤا وی داھاتی بۆ وێ پارێزگەھێ بیت” .
سەرحانی زێدەتر گوت” ئەو داھات دێ ل پێدڤیێن پارێزگەھێ ژ پرۆژێن بەردەوام یان خزمەتگوزاری مینا باژێرڤانی و ساخلەمی ھێنە مەزاختن، ئەو مەزاختنە ژی دێ ل گۆری پێدڤیا پارێزگەھێ بیت و ئەرکێ جڤاتێن پارێزگەھانە میکانزمەکێ دانن کو چاوانیا مەزاختنا وی داھاتێ خالێن سنوری یێن ھەر پارێزگەھەکا ھەرێما کوردستانێ دا دیار بکەن”.
یونس رەمەزان سەرۆکێ لژنا دارایی و ئابووری ل جڤاتا پارێزگەھا دھۆکێ بۆ ئەڤرۆ گوت” ل گۆرەی قانوونا جڤاتێن پارێزگەھێن ھەرێما کوردستانێ، ڕێ ب جڤاتان نەھاتیە دان کو ل سەر داھاتێ خالێن سنوری کار بکەن، بەلکو ھەر ب داھاتەکێ ناڤەندی و ئێکگرتی ھاتیە دانان و ھەمو دچیتە وەزارەتا دارایی ل ھەولێرێ” .
یونسی ئەو چەندە ژی دیارکر” قانوونا جڤاتێن پارێزگەھان دەسەلات نەدایە مە ب شیێن ل سەر بابەتێ خالێن سنوری و ھێزێن ناڤخوەیی و زانکۆیان دا بکەین، بەلکو ئەو ژ دەرڤەی دەستھەلاتێن مەدایە و ھەر تشتەک ل دەستھەلاتێن مەدا نەبیت، ب قانوونێ دێ پیتە سەرپێچیکرن ل سەر زێدەروویی ل دەستھەلاتان دا”.
ناڤبری خویاکر ژی” ئەم ل گۆرەی قانوونێن ھەرێمێ کار دکەین و دبیت ھندەک قانوون ل عیراقێ دەرکەڤن، بەلێ دبیت بکارئینانا وان ل ھەرێمێ د ئاستێ پێدڤی دا نەبیت، ھەکە ڕاستڤەکرن ل قانوونا جڤاتێن پارێزگەھاندا بھێتە کرن و ئەو دەسەلات ب مە بھێتە دان، دێ دووڤچوونا ئەوی بابەتی ژی کەین، داکو ئاستێ خزمەتگوزاری و پێدڤیێن پارێزگەھێ پتر بھێنە باشکرن”.

ئەڤرۆ نیوز:
قەیرانا دارایی کارتێکرن ل ھاتنا خوار یا بھایێ مریشکێن پرۆژێن مریشکان ل ھەرێما کوردستانێ ژی یا کری و چەندین پرۆژێن خودانکرنا مریشکان ل کوردستانێ یێن ھاتینە داخستن.
عەقید عومەر، خودانێ پرۆژەکێ پەلەوەران بۆ روژناما ئەڤرو دیارکر کو ئەو قەیرانا ب سەر ھەرێمێ داھاتی کارتێکرنەکا مەزن ل سەر پروژێن پەلەوەران کریە و بھایێ مریشکێ گەلەک یێ ھاتیە خوار و بھایێن عەلەفی و پێدڤییچن خودانکرنا مریشکێ یێن گران بوین و ئەم ب ڤی شێوەی دزیاندارین و ئەڤە دو جاران ئەڤ مریشکە ب ئەرزان ھاتن فرۆتن و پارێ وان ھەردو گەران تێرا مەزاختیێن ئێک گەر دەرنەکەفتن.
دیار کر ژی، ھەکە بھایێن مریشکان ب ڤی ڕەنگی بیت، ھەموو پرۆژە دێ ھێنە داخستن و پێدڤیە چارەک بۆ بھێتە دیتن بۆ ھنارتنا بەرھەمێ کوردستانێ بۆ باژێرێن عیراقێ و حوکمەتا ھەرێمێ دووڤچوونا بھایێ عەلەفی و پێدڤیێن خودانکرنا مریشکان بکەت و ئەرزان بکەت، ھەتاکو خودانێ پرۆژێ پەلەوەران بشێت بەردەوامیێ بدەتە پرۆژێ خوە.
سامان محەمەد، رێڤەبەرێ سامانێن ئاژەلی ل وەزارەتا چاندنێ بۆ رۆژناما ئەڤرۆ گوت” ھەتا نوکە ئامارا دروست نەگەھشتیە بەردەستێن مە، بەلێ پتریا پرۆژێن مریشکان ل ھەرێما کوردستانێ یێن ھاتینە داخستن”.
ناڤبری دیار کر کو 1264 پرۆژێن خودانکرنا مریشکان ل ھەرێما کوردستانێ یێن ھەین و 70% ژوان پرۆژان بەری قەیرانێ دەست ب کاری کربوو، بەلێ پشتی قەیرانێ دەستپێکری پتریا وان پرۆژان یێن ھاتینە داخستن”.
عبدولستار مەجید، وەزیرێ چاندنێ بۆ رۆژناما ئەڤرۆ دیار کر کو پتر ژ شەش ھزار کرێکاران ژیارا وان ل سەر وان پرۆژان بوو، دیسا گوت” ئەڤە دەمەکە حوکمەتا عیراقێ ڕێ ل ھنارتنا بەرھەمێ مریشک و ھێک و عەلەفی ژ ھەرێمێ بۆ باژێرێن عیراقێ گرتیە ب بھانەیا ھەبوونا نەخوەشیا (پەرسیڤا بالندان) ، بەلێ پشکنین بۆ ھەموو پرۆژێن مریشکان ل کوردستانێ یێن ھاتینە ئەنجامدان و چو حالەتێن نەخوەشیا پەرسیڤا بالندان ل ھەرێمێ دیار نەبوویە.

ئەڤرۆ نیوز:
سکرتێرێ ئەنجوومەنێ پارێزگەھا دھۆکێ دیار کر کو د ڤێ حەفتیێ دا ئەو دێ ل سەر چەند تەوەرێن گرێدای ژیانا ئەڤرۆ یا خەلکی ڤە کۆمبن و ھەموو بزاڤ دێ ھێنەکرن کو بھا بھێنە کێمکرن.
عەبدولسەمەد تێلی، سکرتێرێ ئەنجوومەنێ پارێزگەھا دھۆکێ بۆ رۆژناما ئەڤرۆ خویا کر، سوباھی 8/2/2016 رێڤەبەریا بەرھەمێن گازێ و ئەو کۆمپانیێن پانزینا بازرگانی دئیننە دھۆکێ دێ مێھڤانێن ئەنجوومەنێ پارێزگەھێ بن و گۆت: “دێ بەحسێ ئەرزانکرنا بھایێ پانزینێ ھێتە کرن، ھەموو بزاڤ ژی دھێنە کرن ھێشتا باھیێ پانزینێ بھێتە کێمکرن”.
دەربارەی بھایێ پانزینێ ژی عەبدولسەمەد گۆت: “بەری نوکە حوکمەتێ دو پانزین ب 500 دیناران ددا ترۆمبێلێن کرێ و 700 دیناران ددا یێن تایبەتـ لێ نوکە پانزینا بازرگانی دھێتە ھەرێمێ و ھەڤریکی د ناڤبەرا وان دروست بوویە، لەو رەنگە بھایێ پانزینێ ببیتە 500 دینار یان کێمتر ژی لێ بھێت”.
ناڤھاتی ئاشکرا کر، بۆ ماوێَ چار رۆژان ل دووڤ ئێک ئەنجوومەنێ پارێزگەھا دھۆکێ دێ ل گەل لایەنێن پەیوەندیدار بۆ کێمکرنا بھایان کۆم بیت و گۆت: “مەرەما مە ئەوە ھندەک بڕیارێن ھەڤپشک و د بەرژەوەندیا وەلاتیان دا بھێنە دەرئێخستن”.