ئەڤرۆ نیوز:
ھەڤسەرۆکێ PYD راگەھاند کو د قۆناغا یەکەم یا کۆمبوونێن جنێڤێ دا ئەو نەھاتنە ڤەخواندن لێ د قۆناغێن دی دا دڤێت ئەو پشکدار بن ژ بەر کو ل قادا شەری ب تنێ ھێزێن کوردی و دۆستێن وان ھەنە و ل سەر مێزا دانوستاندنان ژی مافێ کوردایە ل بەری ھەموو ئالیەکی ئامادە بن و گۆت: (مافێ مەیە د چارەکرنا قەیرانا سووریێ دا خوەدان گۆتن بین و مافێن گەلێ خوە بپارێزین ھەکە نە ئەمێ ئەنجامێن جنێڤێ رەت کەین و ل رۆژئاڤا بجە ناکەین).
سالح موسلیم ھەڤسەرۆکێ پارتا یەکیتیا دیمۆکراتیک (PYD) د داخویانیەکی دا راگەھاند کو مخابن د کۆمبوونێن پشکا یەکەم یا جنێڤێ دا ئەم وەک ئالیێ کوردی بەرھەڤ نابین و سۆزێن ھاتنە دایین نەھاتنە بجە کرن و گۆت: (بەری دەستپێکرنا گەنگەشەیێن بۆ چارەکرنا قەیرانا ل سووریێ ھەم نوونەرێ نەتەوێن یەکگرتی دی میستورا و ھەم ژی وەزیرێ دەرڤە یێ روسیا سۆز دابوونە مە کو شاندەکێ رۆژئاڤا ب پشکداریا ھەڤسەرۆکێن تەڤدەمێ، PYD، نوونەرێن کانتۆنان و جڤاتا سووریێ یا دیمۆکراتیک د کۆمبوونێن جنێڤێ دا ئامادە بن لێ مخابن سۆزا خوە بجە نەئینان و بۆ مە گۆتن کو د قۆناغێن دی یێن کۆمبوونان دا دێ شاندێ مە یێ رۆژئاڤا ژی ئامادە ببیت).
سالح موسلیم ھەروەسا راگەھاند کو ھەم ل باشور و ھەم ژی رۆژئاڤا ھێزێن کوردی د بەرەیێ شەری دانە و بەرخوەدانێ ل دژی تیرۆرستان دکەن و د شکەستنا تیرۆرستان دا رۆلێ ھێزێن کوردی رۆلەکێ ھەری مەزن و ب رومەتە و گۆت: (چاوا دبیت و کێ قەبوول دکەت کو ئەو ل مەیدانا شەری بن و بەرخوەدانێ بکەن و کەسێن دوور ژ شەری و بەرخوەدانێ ل سەر مێزا دانوستاندنان و خوەدان ئاخاڤتن بن، ئەم ب چو رەنگەکێ بێی ئیرادە و گۆتنێن خوە چو بریارەکا جنێڤێ قەبوول ناکەین و ل رۆژئاڤا ژی بریارێن وان ناھێنە بجھکرن، ژ بەر کو مە ب خوینا لاو و کچێن کوردان ئاخا کوردستانێ ژ داگیرکەریا تیرۆرستان رزگار کریە و ژ ھەر کەسی زێدەتر مافێ مەیە ئەم د چارەنڤیس و دیارکرنا پاشەرۆژا سووریێ و رۆژئاڤا دا جیە بگرین و خوەدان ئاخڤتن بین).
ھەڤسەرۆکێ PYD د پشکەکا دی یا ئاخڤتنا خوە دا ژی راگەھاند کو تورکیا نە خوەدان ھێزەکا وەسا مەزنە کو ل ھەمبەر بریارێن ئەمریکا و روسیا راوەستیت و پشکداریا وان یا د کۆمبوونێن جنێڤێ دا ئاستەنگ بکەت و گۆت: (دەمێ من ل گەل ستیفان دی میستورا نوونەرێ تایبەت یێ UN بۆ پرسگرێکا سووریێ ھەڤدیتن کری من ژێ پرسی، گەلۆ تورکیا ئەو ھندە ب ھێزە کو پشکداریا مە ئاستەنگ بکەت؟ دی میستورای بۆ من راگەھاند کو ل سەر ڤیتۆیا تورکیا نوونەرێن رۆژئاڤا نەھاتنە ڤەخواندن بەلکو وی بۆ قۆناغا یەکێ یا کۆمبوونان وەسا باش دیتیە کو نونەرێن رۆژئاڤا ئامادە نەبن و ئاشکرا ژی کر کو دێ د قۆناغێن دی یێن کۆمبوونێن بۆ چارەکرنا قەیرانێن سووریێ دا نوونەرێن رۆژئاڤا ژی پشکداریێ کەن. من ل جنێڤێ ھەم ژ دی میستورا و ھەم ژی ژ نوونەرێن ئەمریکا روسیا را گۆت کو ھەکە ئەم بھێنە پاشگوە خستن ب چو رەنگەکی بریارێن جنێڤێ ل رۆژئاڤا ناھێنە بجھکرن و وان ژی سۆز دانە مە کو ئەم نەھێنە پاشگوە خستن).
ل سەر رەوشا رۆژئاڤایێ کوردستانێ و ئۆپەراسیۆنێن ھێزێن کوردی بۆ ئازادکرنا جەرابلوسێ، مینبیج و عەزازێ ژی راگەھاند کو ھێزێن وان و ھێزێن سووریا یا دیمۆکراتیک پێکڤە رەوشا ئۆپەراسیۆنان د شۆپینن و ھەر دەمێ بەرھەڤیێن وان تەمام بوون دێ قۆناغا رزگارکرنا جەرابلوس، مینبیج و عەزازێ ھێتە دەستپێکرن و گۆت: (شەرێ نھا کو ل بەرەیێ مینبیجێ ل گەل داعشێ و ل بەرەیێ عەزازێ ژی ل گەل ئەل نوسرا، ئەحرار ئەل شام و سوپایێ ئیسلامی دھێتە کرن زێدەتر شەرێ خوە پاراستنێیە و ھەتا نھا ئۆپەراسیۆنا ئازادکرنا وان دەڤەران ب تەمامی نەھاتیە دەستپێ کرن لێ ھەر دەمێ بەرھەڤیێن ھێزێن مە تەمام بوون دێ ئۆپەراسیۆنا ئازادکرنێ ھێتە دەستپێکرن).
د داویا ئاخڤتنا خوە دا ژی سالح موسلیم ھەڤسەرۆکێ PYD راگەھاند ژی کو ژ ھەر دەمی زێدەتر پێدڤیا ھێزێن کوردی د ڤێ قۆناغێ دا ب یەکگرتنێ ھەیە و گۆت: (بۆ بەرژەوەندیێن مەزنێن کورد و کوردستانێ ئەم ئامادەینە ل گەل ھەر ئالیەکی کوردی پێکڤە کار بکەین و ئەم دخوازین ھەردەم ھەرێما باشورێ کوردستانێ پشتەڤانێ مە بیت و پەیوەندیێن مە د ھەر واری دا باش بن و د ئاستێن بلند دا بن).