ئه‌ڤرۆ نیوز:
سه‌میرا موسه‌وى ئه‌ندام په‌رله‌مانا عیراقێ مووچێ سه‌رۆك كۆمارێ عیراقێ ل دووڤ سیسته‌مێ نوى ئاشكرا كر و دیاركر كو موچێ فوئاد مه‌عسوم ژ 77 ملیون دیناران هاتیه كێمكرن بۆ 8 ملیون دیناران.
هه‌ڤده‌م موچێ حه‌یده‌ر عه‌بادى سه‌رۆك وه‌زیرێن عیراقێ بۆ كێمتر ژ 8 ملیون دیناران هاتیه كێمكرن.
ل دووڤ سیسته‌مێ نوى یێ مووچه‌ى كو دێ عیراق هه‌یڤا بهێت بجهـ ئینیت، پلێن بلند دو ملیون دینار ژێ كێم بووینه، به‌لێ پلێن نزم بلند بووینه.
ئه‌ڤرۆ نیوز، ئاراس سوبحى ره‌شاڤایى:
ئه‌ڤرۆ په‌رله‌مانێ نه‌رویج ل سه‌ر چه‌ند پرسه‌كان كومبوو كو ئێك ژ وان پرسان دانا مافێ دانا ناسناما وى وه‌لاتى ب كوردان بوو.
د كومبوونێ دا راپورته‌ك ژ ئالیێ گروپێ پشته‌ڤانیكرنا په‌نابه‌ران هاته خواندن، كو پارێزه‌ره‌كێ كورد ئه‌و راپورته خواند كو بابى وى ل نه‌رویج دژیت و ئه‌ڤه چه‌ندین ساله ناسنامه وه‌رنه‌گرتیه.
په‌رله‌مانێ نه‌رویج بریاردا كومبوون بۆ هه‌یڤا 12 بهێته پاشخستن و پرسا دانا ناسنامان ب عیراقى و كوردان بئێخنه به‌ر ده‌نگدانێ، ئه‌گه‌ر پرۆژه هاته په‌سه‌ندكرن، دێ ب هزاره‌هان عیراقى و كورد مفاى ژێ وه‌رگرن و بنه خودان ناسنامێن نه‌رویج.
تێ زانین ئه‌ڤه 16 ساله ژماره‌كا خه‌لكێ عیراقێ و كورد كو ل نه‌رویج دژین، سه‌ره‌راى كو مافێ په‌نابه‌ریێ پێ هاتیه دان، به‌لێ كێشا ناسناما وى وه‌لاتى هه‌یه و د بێ ناسنامه‌نه.
ئه‌ڤرۆ نیوز:
جەنەڕاڵ جۆزێف دانفۆرد سەرۆكێ دەستەیا ئەركانێن هێزێن هاڤپشكێن ئه‌مریكا د سه‌ره‌دانا خوه‌دا بۆ هه‌رێما كوردستانێ و كومبوونا ل گه‌ل سه‌رۆك بارزانى راگه‌هاند: پشتى پێشمه‌رگه‌ى هه‌یبه‌تا داعش شكاندى،باوه‌ریا جڤاكێ نێڤده‌وله‌تى بۆ پێشمه‌رگه‌ى زێده‌تر لێ هاتیه.
جەنەڕاڵ جۆزێف دانفۆرد سەرۆكێ دەستەیا ئەركانێن هێزێن هاڤپشكێن ئه‌مریكا ئاماژه ب وێ چه‌ندێ كر كو وه‌لاتى وى یێ پابه‌نده ب هه‌ڤپه‌یمانیا ل گه‌ل هه‌رێما كوردستانێ هه‌ى و نه‌هێلانا داعش ل ده‌ڤه‌رێ.
هه‌ڤپه‌یمانیا د ناڤبه‌را هێزێن عیراقێ و هێزێن پێشمه‌رگه‌ى و به‌رهه‌ڤیێن ئازادكرنا مووسل و پێدڤیێن سه‌ربازى یێن پێشمه‌رگه‌ى و هه‌روه‌سا ره‌وشا سووریا و ئوپه‌راسیونێن ئاسمانى ل ئاخا سووریا ئه‌و ته‌وه‌ر بوون كو د كومبوونا بارزانى و جۆزێف دانفۆرد هاتینه به‌حسكرن.
ئه‌ڤرۆ نيوز:
رێڤه‌به‌رێ گشتيێ پۆليسێن هه‌ولێر، عه‌بدولخالق ته‌لعه‌ت، ئاشكه‌را كر كو عه‌لى حه‌مه سالح رۆژا عه‌ره‌فێ، ئانكو رۆژا به‌رى جه‌ژنا قوربان، كۆمه‌كا سنێلان كۆم كربوون و 350 هزار دينار پێ دابوون دا كو كێشه‌يان ل هه‌ولێر دروست بكه‌ن، به‌لێ پۆليسێن چالاكيێن مه‌ده‌نى پلانا وى ژناڤبر.
عه‌بدولخالق ته‌لعه‌ت، زێده‌تر روونكرن بۆ حه‌فتيناما “باس” داينه سه‌ر ڤێ روودانێ و دبێژيت: “عه‌لى حه‌مه سالح رۆژا عه‌ره‌فێ ئانكو رۆژه‌كێ به‌رى جه‌ژنا قوربان، كۆمه‌كا سنێلێن هه‌ژار كۆمكربوون و 350 هزار دينار پێ دابوون دا كو كێشه‌يان ل هه‌ولێر دروست بكه‌ن، به‌لێ خۆشبه‌ختانه شيان د رێيا هێزێن پۆليسێن چالاكيێن مه‌ده‌نى دا و ب فه‌رمانا دادوه‌رى ده‌سته‌سه‌ر بكه‌ن، پشتى ڤه‌كۆلينێ ديار بوو كو عه‌لى حه‌مه سالح رۆله‌كێ سه‌ره‌كى هه‌بوو د هاندانا وان دا بۆ دروستكرنا كێشان”.
ئاماژه ب وێ چه‌ندێ ژى كر كو پشتى بابێن وان هاتينه ئاگه‌هداركرن و گازى كرن، ديار بوو كو ئه‌وان چو ئاگه‌هى ل سه‌ر بابه‌تى نه‌بوو و هيڤى ژ عه‌لى حه‌مه سالح خواست كو ده‌ست ژ زارۆيێن وان به‌رده‌ت و “پاشان ب كه‌فاله‌ت هاتينه به‌ردان”.
رێڤه‌به‌رێ پۆليسێن هه‌ولێر گۆت: “هه‌ر كه‌سه‌كێ بزاڤا تێكدانا كاودانێن ئارامێن هه‌ولێر و ته‌ناهيا وێ و ژيانا وه‌لاتيان بده‌ت دێ روو ب روو سزايێ قانوونى بيت”.
ئه‌ڤرۆ نيوز:
ئاخفتنكه‌رێ ب ناڤێ بزاڤا گۆڕان راگه‌هاند: هه‌موو بزاڤێن پارتى ژ بوو ديتنا شوونگران بۆ چار وه‌زيرێن گۆڕان ره‌تدكه‌ين و “گوهۆڕينا يوسف محه‌مه‌د هێلا سۆره”.
توفيق حه‌مه ره‌حيم، ئاخفتنكه‌رێ ب ناڤێ بزاڤا گۆڕان د داخۆيانيه‌كێ دا بۆ رووداو ته‌كست ل سه‌ر وێ چه‌ندێ ژى كر كو ئه‌وان هه‌ست ب بزاڤێن پارتى بۆ حوكمه‌ته‌كا نوو كريه كو گۆڕان پشت گوهـ ب هاڤێژيت “ئه‌ڤ جۆرێ سياسه‌تێ يێ دووره ژ هه‌موو پيڤه‌رێن قانوونى و مه‌نتقى، گۆڕان چ وه‌زير و به‌رپرسێ خوه ژبلى وه‌رگرتنا باوه‌ريێ ل په‌رله‌مانى قه‌بوول ناكه‌ت و كارێن وه‌سان بۆ پارتى ناچنه سه‌رى، چونكو وه‌زيرێن مه ب رێكه‌فتنا ئيدارى و باوه‌رى و ده‌نگێن په‌رله‌مانى ده‌ست ب كار بووينه و دڤێت ب هه‌مان رێ باوه‌رى ژێ بهێته وه‌رگرتن”.
ده‌رباره‌ى پێداگريا پارتى بۆ گوهۆڕينا يوسف محه‌مه‌د، سه‌رۆكێ په‌رله‌مانێ كوردستانێ و دانانا كه‌سه‌كى ل جهێ وى، ئاخفتنكه‌رێ گۆڕان گۆت: “ب چو ره‌نگه‌كى په‌رله‌مانه‌كى نانياسين كو سه‌رۆك ژ پشكا گۆڕان نه‌بيت و يوسف محه‌مه‌د ژى سه‌رۆك نه‌بيت، چونكو گوهۆڕينا وى هێلا سۆره”.
ئەڤرۆ نیوز:
ل گۆر راپۆرتەکا ئاژانسا رویتەرز یا نووچەیان ھەفتیەکە کو شاندەکێ پایەبلند یێ ئەمریکا ل روسیانە و ل گەل بەرپرسێن وی وەلاتی سەبارەت ب چارەکرنا قەیرانا سووریێ دانوستاندنان دکەن و روسیا ژی ژ شاندێ ئەمریکی دخوازیت کو ئەمریکا ل دژی مانا بەشاری نەبیت و ھەکە ئەمریکا ب وی مەرجی رازی ببیت روسیا ژی دێ ل گەل ئەمریکا ل سووریا شەرێ تیرۆرێ کەت و کار بۆ ئاڤاکرنا سیستەمەک نوو ل سووریێ کەن ب مەرجەکێ کو بەشار ژی تێدا بیت، لێ بەرپرسێن ئەمریکی ژی دیار دکەن کو دڤێت بەشار ژ دەستھەلاتێ بھێتە دوورخستن لێ سەبارەت ب شێوە و دەمێ دوورخستنێ دخوازن کو ھاریکاریا روسیا بکەن و ھندەک داخوازیێن روسیا قەبوول بکەن.
د بەردەوامیا راپۆرتێ دا ھاتیە کو پشتی ھێرشێن روسیا یێن ل سووریێ ئەمریکا دەست ب بزاڤەکا مەزن کریە کو ھاریکاریا کوردان و ھێزێن دی یێن عەرەبی و ئاشووری بکەت دا کو ئەو بشێن ل دژی داعشێ شەری بکەن و ئاڤاکرنا لەشکرێ سووریا دیموکراتیک ژی ل سەر وی بنەمایی ھاتیە ئاڤا کرن و روسیا دلخوەشە کو نھا ئەمریکا وەک جاران پشتەڤانیێ ل لەشکرێ ئازاد یێ سووریێ ناکەت و ئەو خالە ژی دێ بیتە رێخوەشکەر کو ئەمریکا و روسیا بشێن سەبارەت ب چارەکرنا قەیرانا سووریێ بگەھنە ھندەک رێککەڤتنێن نوو.
د پشکەکا دی یا راپۆرتێ دا ھاتیە دیار کرن کو بەرپرسێن ئەمریکا دبینن ب سەرپەرشتیا روسیا بەرەیەکێ دی یێ نوو و ب ھێز دروست دبیت و رەنگە گەلەک وەلاتێن عەرەبی ژی د ناڤ وی بەرەیی دا جھێ خوە بگرن و ئەمریکا ژی گەلەک دلگرانە و ژ بەر ھندێ ژی دخوازن پێداچوونەکا باش د سیاسەتا خوە دا بکەن و ھەروەسا رێگریێ ل ب ھێزبوونا پێگەھێ روسی ل رۆژھەلاتا ناڤین بکەن و ژ بەر ھندێ ژی چەندین جاران جۆن کێری وەزیرێ دەرڤە یێ ئەمریکا دیار کریە کو ئەو باش دبینن بۆ چارەکرنا قەیرانا سووریێ ل گەل روسیا کار بکەن و ھەکە روسیا ژی یا ھاریکار بیت دێ قەیرانا سووریێ ھێتە چارەکرن.
د دووماھیا راپۆرتێ دا ھاتیە دیار کرن کو نەخشێ رۆژھەلاتا ناڤین ب تەمامی دھێتە گوھۆرین و نھا ھەڤرکیەک مەزن د ناڤبەرا روسیا و ئەمریکا دا بۆ دروست کرنا ھەڤال و ھەڤپەیمانێن نوو ھەیە و ژ بەر ھندێ ژی بەرپرسێن ئەمریکی بزاڤەکا مەزن دکەن دا کو بشێن سەنگێ روسی ل دەڤەرێ لاواز کەن و ھەڤالێن نوو بۆ خوە دروست بکەن و رێککەڤتنا ل گەل ئیرانێ ژی ل سەر وی بنەمای ھاتیە کرن و ئەمریکا بزاڤەکا مەزن دکەت دا کو بشێت ئیرانێ ژ بەرەیێ روسی دوور کەت، لێ ئەو یەک کارەکێ ساناھی نابیت، چونکو ئیران و وەلاتێن دی یێن عەرەبی دخوازن مفایەکێ باش ژ ھەڤرکیێن روسیا و ئەمریکا وەربگرن.
چاڤدێرێن سیاسی ژی دیار دکەن کو رەنگە سووریا ببیتە ئەگەرێ دروست بوونا شەرەکی مەزن ل دەڤەرێ و ئەو یەک دێ کاریگەریا خوە ل جیھانێ ب گشتی کەت، چونکو چەند رۆژ بەری نھا سەرۆکێ فرەنسا و گەلەک سەرکردێن دی یێن ئورۆپا ئاماژە ب مەترسیا شەرەکی وەسا مەزن کربوون و ھەروەسا سەرۆک کۆمارێ تورکیا ژی دیار کربوو کو شەرەکی مەزن ل پێشیا مە ھەیە و دڤێت ئەم ب ھەموو رەنگەکێ خوە بۆ وی شەری بەرھەڤ کەین و ئەو ھەموو داخۆیانیێن وان سەرکردان ژی ئاماژێن راستەقینە نە کو دێ شەرەکی مەزن ل دەڤەرێ روو دەت و ل گۆر پێشبینا گەلەک بسپۆرێن رۆژئاڤایی ژی قەیرانا سووریێ و شەرێ نھا ل وی وەلاتی و ناکۆکیێن زلھێزان دێ بنە ئەگەرێ شەرەکی وەسا مەزن.
ئه‌ڤرۆ نيوز:
رێڤەبەرێ پۆلیسێن قەزا تلکێف ل ناحیا ئەلقوش بۆ ئەڤرۆ ئاشکرا کر کو پشتی ئەو ژ لایێ دەزگەھێن ئێمناھیێ ڤە ھاتینە ئاگەھدارکرن کو کارگەھەکا چێکرنا مەیێ ل کومەلگەھا دوغاتا یا سەر ب ناحیا ئەلقوش ڤە مەیا سەختە چێدکەت ئێکسەر رێڤەبەرێ کارگەھێ ھاتە دەستەسەرکرن.
عەقید روکن نادر ھەرکی، رێڤەبەرێ پۆلیسێن قەزا تلکێف ل ناحیا ئەلقوش دیار کر کو ڤێ کارگەھێ ژ مێژە مۆلەتا کارکرنێ ھەیە، بەلێ رێڤەبەرێ ڤێ کارگەھێ فێلبازی ل دوکاندارێن فرۆتنا مەیێ دکرن و لسقا مەیا عەسلی د ئێخستە بوتلێن مەیا خوە یا نە عەسلی و ل دووڤ وێ لسقێ بێ کو دوکاندار بزانن مەیی د فرۆتە وان و گۆت:” نوکە رێڤەبەرێ ڤێ کارگەھێ ھاتیە دەستەسەرکرن و ل دووڤ قانوونێ دێ ھێتە سزادان.
ئەڤرۆ نیوز:
رێڤەبەرێ کاروبارێن ئێزدیان ل پارێزگەھا دھۆکێ بۆ ئەڤرۆ راگەھاند کو، بەری ھەیامەکێ بازرگانەکێ جۆھی ب ناڤێ ستێف وەسا خوە دا دیارکرن کو وی گەلەک کچ و ژن و زارۆ ژ دەستێن رێکخراوا تیرۆرستی یا داعش رزگار کرینە و گۆت: لێ پشتی مە پێداچوون لسەر ڤێ چەندێ کری وەھا دیاربوو کو چو راستی بۆ ڤێ بازرگانیێ نینە و ستێفی چو رەڤاندیێن ئێزدیان قورتال نەکرینە.
ھادی دوبانی رێڤەبەرێ کاروبارێن ئێزدیان ل پارێزگەھا دھۆکێ دیارکر کو، ئەڤی بازرگانێ جوھی بازرگانی ب کەیسا ئێزدیان دکر و گۆت: بو زانین پشتی ئەم گەھشتینە نوونەرێ وی بازرگانێ جوھی وی گوتیە مە ١٢٨ کچ و ژن و زارۆ رزگار کرینە و پشتی پێداچوونێن ھوور لسەر بابەتی ھاتینە کرن ئاشکرا بوو چو راستی بۆ نینە و چو وەلاتیێن رەڤاندی ژ دەستێن تێرورستان رزگارنەکرینە.
ھادی دوبانی خویا ژی کر، بتنێ ناڤێن ١٨ کەسان لگەل وی بازرگانی بوون ژ وانا ژی ھەموو ب ریێا نڤیسینگەھا کاروبارێن رەڤاندیان ل دھۆکێ یێن ھاتینە رزگار کرن و وی بازرگانێ جوھی چو رۆل د رزگارکرنا واندا ژی نەبوویە و گۆت: بتنی وی بازرگانی ھندەک وینەیێن دگەل رەڤاندیان گرتین و کوژمەکێ پارەی یێ کیمە یێ دایە ھندەک رەڤاندیان و ئەو پسولێن وی بازرگانی بۆ خەلکی چێدکرن ژی ھەموو ب زمانی ئینگلیزی بوون و خەلکی ژی ئەو ھزر نەدکر کو چو راستی بۆ نینە و وی بازرگانی د پسولێن خوەدا دیارکریە کو وی ئەو ژن و کچ یێن رزگار کرین و کوژمەکێ پارەی د پسولێن خوە دا نڤیسیە ب بەھانەیا وێ چەندێ کو وی ئەو کوژمێ پارەی یێ ل رزگارکرنا وان مەزاختی.
دوبانی گۆتژی: داخوازێ دکەین پێداچوونەکا ھوورتر لسەر وی بازرگانێ جوھی بھێتە کرن و رێگری لێ بھێتە کرن ھەتا ئەو بازرگان نەھێت و بەلگەناما ئاشکرا نەکەت کا وی چو ھەیە چونکی نابیت فێل ل رەڤاندیان بھێتە کرن.
ھادی دوبانی ئەو چەندە ژی دا زانین، ئەو بازرگانێ بازرگانیێ ب کەیسا رەڤاندیێن ئێزدیان دکەت ھەلبەت چەندین رێکخراو و کەساتیێن دی ژی ھەنە بڤێ چەندێ رادبن و پێدڤیە کەیسا رەڤاندیان بتنی د دەستی جھەکێ دا بیت نە ھەر ئێکی ھەبیت بیژت من ھندەک کچ و ژن یێن رزگار کرین بتنێ دا پارەکێ ب دەستخوەڤە بینیت و گۆت: نوکە ل دھۆکێ نڤیسینگەھەکا تایبەت بۆ رەڤاندیان یا ھاتیە ڤەکرن و پێدڤیە کەیسا رەڤاندیان ھەموو ب رێیا ڤێ نڤیسینگەھێ بیت و ئەوێن دیتر رێک پێ نەھێتە دان.
رێڤەبەرێ کاروبارێن ئێزدیان ل پارێزگەھا دھۆکێ ئاماژە بڤێ چەندێ ژی کر، ھەر کەسەکێ ئەم دگەل ب ئاخڤن دبیژت من دوسەد یان سێ سەد کچ و ژن یێن ژ دەستێن رێکخراوا تیرورستی یا داعش رزگار کرینە و گۆت: لێ ئەم دبیژین شەش ھزار وەلاتی یێن ھاتینە رەڤاندن ژلایێ تیرورستان ڤە ھەکە ئەڤ ژمارا بازرگان و کەساتیی و رێکخراوا دبێژن مە یێن رزگار کرین وەسا دیار دبیت چو کەس د دەستێ تیرورستان دا نەماینە، لێ ئەو بخوە ھێشتا گەلەک رەڤاندی یێن ماینە د دەستێن تیرورستانداو ئەو ژمارێن دھێنە گۆتن فلان بازرگانی یان رێکخراوێ ھندەک کەس یێن رزگارکرین نە دروستن.
ئەڤرۆ نیوز، رەزوان رۆژبەیانی:
د روودانەکێ دا ل ناڤ سەنتەرێ قەزا بەردەرەش پێنج کەش ب دژواری بریندار بوون و بۆ نەخۆشخانا تەنگاڤیا یا ئاکرێ ھاتنە ڤەگوھاستن.
کۆمسیەر حازم محەمەد ژ راگەھاندنا ھاتنوچوونا قەزا بەردەرەش بۆ ئەڤرۆ نیوز گۆت: “شەڤا ١٩ ل سەر ٢٠ی چریا ئێکێ یا ٢٠١٥ێ و ل دەمژمێر ٧:٤٥ ل ناڤ سەنتەرێ قەزا بەردەرەش ل نێزیک چواریانا پارکا شار دو ترۆمبێلان لێکدا ژ جۆری تویوتا پیک ئاپ و کیا دو تەن و د ئەنجام دا زەلامەک و چار ئافرەت ب دژواری بریندار بوون و بۆ نەخۆشخانا تەنگاڤیا یا ئاکرێ ھاتنە ڤەگوھاستن”.
کۆمسیەرێ ھاتنوچوونێ ئاماژە ب وێ چەندێ ژی کر کو ئەگەرێ روودانێ ب لەز ھاژووتنا ترۆمبێلێ بوو کو کونترۆل ل سەر ترۆمبێلێ نەکریە و روودان پەیدا بوویە.
نيشاندان