ئامێدیێ، رۆژهات لوقمان:
رێڤه‌به‌رێ په‌روه‌ردا قه‌ا ئامێدیێ بو ئه‌ڤرۆ نیوز دیاركر: ژبه‌ر كو ده‌ڤه‌را ئامێدیێ ده‌ڤه‌ره‌كا چیاى یه‌ و هه‌رده‌ما بو وه‌رێ زڤستانێ هه‌مو كاره‌ك ب ئالوز ده‌رباز دبن له‌ورا ئه‌و نه‌چاربوینه‌ ئه‌ڤرۆ رێكه‌فتى 28/1/2016 ل قوتابخانێن ده‌ڤه‌را ئامێدیێ بكه‌ینه‌ بهێنڤه‌دان.
ناسر محه‌مه‌د سه‌عید رێڤه‌به‌رێ په‌روه‌ردا قه‌ا ئامێدیێ گوت ژى: ب رازیبونا رێڤه‌به‌ریا گشتى یا په‌روه‌ردا دهۆك بو په‌روه‌ردا مه‌ دیاركریه‌ هه‌ر ده‌ما پێلا سه‌رمایێ هاته‌ خار و گه‌هشته‌ ئاسته‌كێ خراب دا ئه‌م ل قوتابخانێن ده‌ڤه‌رێ بكه‌ینه‌ بهێنڤه‌دان،
رێڤه‌به‌رێ په‌روه‌ردێ نه‌ڤه‌شارت ژى: ل سنورێ گشتى یێ قه‌زا ئامێدیێ (185) قوتابخانه‌ مه‌ هه‌نه‌ لێ ئه‌ڤ بهێنڤه‌دانه‌ ب تنێ دێ بو وان قوتابخانان بیت ئه‌وێن كو د قوناغێن(1 ـ 6) دخوینن دگه‌ل باخچێن زارویان چونكه‌ ئه‌ڤ قوناغه‌ د ژیه‌كێ بچویك دانه‌ و ترسا هاتنا نه‌خوه‌شیێن سه‌رمایێ درێ دایه‌ و گوت: ل هه‌مو قوتابخانێن ناڤنجى و ئاماده‌ى دێ ده‌واما فه‌رمى هێـته‌ ئه‌نجامدان و ئه‌ڤ بهێنڤه‌دانه‌ بتنێ بو وان قوناغانه‌ ئه‌وێن هاتینه‌ دیاركرن و دیسان ژى ئه‌و ماموستایێن ل ده‌وروبه‌رێن ئامێدیێ قه‌ستا قوتابخانان دكه‌ن دشێن ل ڤێ رۆژێ ده‌وامێ ل قوتابخانا نه‌كه‌ن و وه‌ك بهێنڤه‌دانه‌ك بیت بو وان قوتابخانان.

ئه‌ڤرۆ نیۆز، قائید میرۆ
رێڤه‌به‌رایه‌تیا گشتیا حه‌ج و عومرێ وه‌لاتیان ئاگه‌هدار دكه‌ت لدۆر بهایێ پلێتا فڕۆكێ بۆ گه‌شتا عومرێ كو 400 دۆلارن.
كاروان ستونی، رێڤه‌به‌رێ راگه‌هاندنا حه‌ج و عومرێ ب ئه‌ڤرۆ نیۆز راگه‌هاند” هژماره‌كا زۆرا كۆمپانیێن حه‌ج و عومرێ ناڤێن ل رێڤه‌به‌رایه‌تیا گشتیا حه‌ج و عومرێ تۆماركریه‌، كو هژمارا وان گه‌هشتیه‌ 41 كۆمپانیا و گوره‌ی پڕۆژێ هاتیه‌ پێشكه‌شكرن بهایێ پلێتا فڕۆكێ ب 400دۆلاران هاتیه‌ هژمارتن.
ستونی گۆتژی” رێڤه‌به‌رایه‌تیا گشتیا حه‌ج و عومرێ وه‌لاتیان ئاگه‌هدار دكه‌ن بهایێ پلێتا هێلا عێراقی تنێ 400 دۆلارن و هیڤیدارین ئاگه‌هداری بهایێ پلێتا بن و پێشبینی دكه‌ین ل هه‌یڤێن داهاتی گۆهۆڕین بسه‌ردا بهێت.

ئه‌ڤرۆنیۆز، ئه‌یاد به‌رورای
دو هه‌یڤه‌ فه‌رمانبه‌رێن وه‌لاتێ سۆمالێ مووچێن خوه‌ وه‌رنه‌گرتینه‌، بودجا سالا 2015 ێ یا ڤی وه‌لاتێ ئه‌فریقی 239 ملیۆن و 900 هزار دۆلار بوون، ئه‌ڤ وه‌لاته‌ تنێ مۆزا و چێل و په‌ز و حێشتران دفرۆشیت.
محه‌مه‌د عوسمان ئیبراهیم، رۆژنامه‌ڤانه‌كێ سومالیێ ئاكنجیێ مه‌قادیشۆ یا پایته‌خت بۆ (ئه‌ڤرۆنیۆز) گوت” هه‌تا نوكه‌ فه‌رمانبه‌رێن حوكمه‌تێ ل سۆمالێ مووچێن هه‌یڤێن 11 و 12 یێن سالا 2015 ێ وه‌رنه‌گرتینه‌، ئه‌ڤ چه‌نده‌ ژی هه‌موو سالان په‌یدا دبیت، به‌لێ ئه‌ڤ ساله‌ ژ هه‌موو سالێن دێ زێده‌تر بوو و یێن بووینه‌ دو هه‌یڤ”.
محه‌مه‌دی دیاركر كو بودجا سالا 2015 ێ یا سۆمالێ 239 ملیۆن و 900 هزار دۆلار بوون و هژمارا ئاكنجیێن سۆمالێ 12 ملیۆن و 500 هزار كه‌سن و پێنج هزار فه‌رمانبه‌ر ل سۆمالێ یێن هه‌ین و مووچێ ده‌رچوویێ زانكۆیێ 700 دۆلارن ومووچێن هه‌لگرێن ماسته‌رێ و دكتورایێ گه‌له‌ك پتره‌ و یێن دبن ئاماده‌یی دا 150 دۆلاران وه‌ردگرن”.
وه‌لاتێ سۆمالێ كو ل پلا سیێ دهێت د لیستا هه‌ژارترین وه‌لاتێن جیهانێ دا، و ل دووڤ ڤی رۆژنامه‌ڤانێ سۆمالی بودجا سۆمالێ پشت به‌ستنێ ب فرۆتنا مۆزا و په‌زی و چێلان و حێشتران دكه‌ت، زێده‌باری وه‌به‌رهێنانێ د به‌نده‌ر و فرۆكخانا وێ ژلایێ هنده‌ك كۆمپانیێن بیانی ڤه‌، كو 55% داهاتیێن به‌نده‌رێ ده‌ریایی ل سۆمالێ بۆ حوكمه‌تێ یه‌ و 45% بۆ كۆمپانیا وه‌به‌رهێنه‌ر و وه‌به‌رهێنان د فرۆكخانا مه‌قادیشۆ دا 70% بۆ حوكمه‌تێ یه‌ و 30% بۆ كۆمپانیا توركی یا وه‌به‌رهێنه‌ر.زێده‌بارێ هنده‌ك هاریكاریێن دارایی ژ توركیا.

ئه‌ڤرو نیوز،بارزان مزوورى
عصمت ره‌جه‌ب،به‌رپرسێ لقا 14 ل مووسل بو مالپه‌رێ ئه‌ڤرو نیوز ئاشكرا كر فروكه‌یێن هه‌ڤپه‌یمانان به‌لاڤوك ل هنداڤا سه‌نته‌رێ مووسل به‌لاڤ كرن و د وان به‌لاڤ كان دا مزگینیا رزگاركرنا مووسل گه‌هانده‌ خه‌لكێ مووسل كو نێزیك بویه‌ و تێدا نڤیسایه‌ خو ل دویر چه‌كدارێن داعش و ترومبێل و زالگه‌هێن وان بگرن ژبه‌ركو ئه‌ڤرو وێڤه‌ به‌رده‌وام جهێن وان دهێنه‌ بوردومان كرن .

ئه‌ڤرۆ نیوز:

ل دووڤ چه‌ند ژێده‌رێن ئێمناهیێ ئه‌ڤرۆ فرقه‌كا سه‌ر ب هێزێن ئه‌مریكى ڤه‌، ل رۆژئاڤایا مووسل ئوپه‌راسیونه‌ك ل دژى داعش ئه‌نجامدایه‌ كو تێدا ب رێیا خوبه‌ردانا هه‌وایى، 9 فرۆكێن شه‌رى پشكداربووینه‌.
ئه‌ڤ ئوپه‌راسیونه‌ پشتى وان پێزانینێن هه‌والگرى هات كو بۆ دیاربووى چه‌ند سه‌ركردێن داعش ل وێ ده‌ڤه‌رێ نه‌ و د ئه‌نجامدا سێ سه‌ركردێن داعش هاتینه‌ كوشتن و ئوپه‌راسیونێ زێده‌تر ژ نیڤ ده‌مژمێرى ڤه‌كێشایه‌.

به‌روارى بالا ، زنار توڤى:
بارینا به‌فرێ و درۆستبونا جه‌مه‌دێ لسه‌ر هه‌ر تشته‌كێ ته‌ر بوویه‌ سه‌ده‌م كو قوتابیێن ده‌ڤه‌را به‌روارى بالا نه‌كارن بچنه‌ ده‌وامێ و ئه‌ڤه‌ سێ رۆژه‌ ده‌وام نه‌هاتیه‌كرن.
محه‌مه‌د سه‌لمان قوتابیه‌كێ قوتابخانا بریفكایه‌ ل گوندى هرورێ ل ده‌ڤه‌را به‌روارى بالا بو ئه‌ڤرۆ نیوز گۆت : ( ئه‌ڤه‌ سێ رۆژه‌ ئه‌م وه‌كو قوتابیێن قوتابخانا بریفكا نكارین ژبه‌ر سر و سه‌رما و جه‌مدینا عه‌ردى بچینه‌ قوتابخانێ و ئه‌ڤ یه‌ك ژى كارتێكرنێ ل خواندنا مه‌ دكه‌ت )
عه‌بدوللا هونه‌ر ئه‌و ژى قوتابیه‌كێ قوتابخانا ئاڤایه‌ ل هه‌مان ده‌ڤه‌ر بو ئه‌ڤرۆ نیوز دبێژیت : ( پله‌یێن گه‌رمایێ بوو 10 پله‌یان و پتر هاتینه‌خوارێ و ئه‌ڤ یه‌ك ژى بوویه‌ سه‌ده‌م كو هه‌مو كولان و تاخ و جاده‌ و جهێن ته‌رێن ده‌ڤه‌را به‌روارى بالا ببنه‌ جه‌مه‌د و سه‌ره‌راى كو سر و سه‌قه‌مه‌كا زور زور ژى په‌یدابوویه‌ و مروڤ نكاریت چه‌ند خوله‌كه‌كان ده‌رڤه‌ راوه‌ستیت )
زێده‌تر گۆت : ( ئه‌ڤه‌ سێ رۆژه‌ ئه‌م نكارین بچنه‌ قوتابخانێ و ئه‌گه‌ر هوسا سه‌رما یا به‌رده‌وام بیت ئه‌م نكارین بچینه‌ قوتابخانێ )
لگوره‌ى زانیاریێن ئه‌ڤرۆ نیوز سرو سه‌رما و جه‌مدینا عه‌ردى و هه‌ر تشته‌كێ ته‌ڤایا ده‌ڤه‌را به‌روارى بالا ڤه‌گرتیه‌ ب تایبه‌تى گوندێن هرور و بریفكا و بلیزانك و چه‌ند گونده‌كێن دن.

ئه‌ڤرۆ نيوز:

جڤاتا وه‌زاره‌تا په‌روه‌ردێ د كومبوونا خوه‌ يا ئه‌ڤرۆ دا، چه‌ند برياره‌ك دانژ وان، پێدانا موله‌تا خواندنا ئه‌هلى ب رێنمايێن نوى، پێداچوون ب كرێيا خواندنا قوتابخانێن ئه‌هلى و به‌رچاڤ وه‌رگرتنا ره‌وشا ئابوورى يا كوردستانێ، پێكئينانا لژنه‌يه‌كێ بۆ پێداچوونێ ب په‌يكه‌رێ رێڤه‌به‌ريێن وه‌زاره‌تا په‌روه‌ردێ، هاندانا زێده‌تر بۆ هه‌لمه‌تا نيشتمانى بۆ نووژه‌نكرنا قوتابخانان، هه‌ولدان بۆ ڤه‌ديتنا داهاتێ زێده‌تر بۆ وه‌زاره‌تا په‌روه‌ردێ.