ئەڤرۆ نیوز، بارزان مزوورى:
سەرۆکێ لژنا ساخلەمیێ ل جڤاتا نوونەرێن عیراقی بۆ ئەڤرۆ دیار کر کو فراکسیۆنا پارتی دیموکراتی کوردستان ل جڤاتا نوونەرێن عیراقێ د کۆنفرانسێ دەولەتێن ئیسلامی دا کو بڕیارە ئەڤرۆ 20/1/2016 ل جڤاتا نوونەرێن عیراقێ بھێتە گێران دێ چەندین داخوازان ژ نوونەرێن 57 دەولەتێن ئیسلامی کەت ژ وان ژی سەرا ھەرێما کوردستانێ بدەن و رەوشا پێشڤەچوونا ھەرێمێ و پێکڤەژیانێ و سەرکەڤتنێن پێشمەرگەی دژی تیرۆرستان ب چاڤێن خوە ببینن.
د. فارس بریفکانی، سەرۆکێ لژنا ساخلەمیێ ل جڤاتا نوونەرێن عیراقێ ئاشکرا کر، د کۆنفرانسێ وەلاتێن ئیسلامی دا چەندین گەنگەشە و شلۆڤە بۆ رەوشا عیراقێ دێ ھێنە کرن، دیسا عیراق دێ داخوازێ ژ وەلاتێن ئیسلامی یێن پشکدار کەت کو د گەل عیراقێ دھەڤکار بن بۆ بنبڕکرنا تیرۆرستان و ئاڤەدانکرنا وان دەڤەرێن ژ دەستێن تیرۆرستێن داعشێ دھێنە رزگارکرن و گۆت: “کۆنفرانس ھەتا رۆژا 26/1/2016 دێ یێ بەردەوام بیت و تێدا چەندین بابەت دێ ھێنە بەحسکرن و 57 وەلاتێن ئیسلامی د کۆنفرانسی دا د پیشکدارن”.
ئاماژە دا وێ چەندێ کو ئەو وەکو فراکسیۆنا پارتی ل جڤاتا نوونەرێن عیراقێ دێ داخوازێ ژ نوونەرێن وەلاتێن ئیسلامی کەت بھێنە ھەرێما کوردستانێ، دا کو ئەو پێکڤەژیانا ل کوردستانێ ھەی ب چاڤێن خوە ببینن، دیسا دێ سەرەدانا ئاواران کەن کو نوکە نێزیکی دو ملیۆنان ل ھەرێمێ ھەنە، بۆ ھندێ وەلاتێن ئیسلامی رەوشا ئاواران ب چاڤێن خوە ببینن و گۆت: “دێ داخوازێ ژ وەلاتێن ئیسلامی کەین ھاریکاریا ھەرێما کوردستانێ بکەن و پووتەکێ مەزنتر ب خزمەتێن ساخلەمیێ د ناڤ ئاواران دا بدەن، چونکو حوکمەتا عیراقێ وەکو پێدڤی ھاریکاریا ئاواران ناکەت، حوکمەتا ھەرێمی خزمەتکرنا وان ب ستۆیێ خوە ڤە گرتیە، دسەر ڤێ چەندی ژی را عیراق ھەڤکاریا ھەرێمی ناکەت، ئەڤ گازندە دێ گەھیتە ھەموو وەلاتێن ئیسلامی یێن پیشکدار د کۆنفرانسی دا، مەرەما مە ژی ئەوە، ئەو وەلات ب رێیا خوە گڤاشتنێ ل سەر حوکمەتا بەغدا دروست بکەن ھاریکاریا ئاواران بکەت”.
سەرۆکێ لژنا ساخلەمیێ ل جڤاتا نوونەرێن عیراقێ خویا ژی کر، ب بەلگە سەرکەفتنێن پێشمەرگێ قارەمان ل سەر رێکخراوا تیرۆرستی یا داعش تۆمار دکەت بۆ نوونەرێن ھەموو وەلاتێن ئیسلامی دێ ھێنە نیشادان و گۆت: “داخوازێ ژێ کەین ب ھەموو شیانێن خوە بۆ ژناڤبرنا تیرۆرستان ھەڤکاریا ھەرێمێ بکەن، دیسا ئەو زولما ل سەر دەستێن تیرۆرستان ل خەلکێ ھەرێمێ ب تایبەتی یێن سنورێ پاریزگەھا نەینەوا ھاتیە کرن دێ گەھینینە ھەموو وەلاتێن ئیسلامی، دا کو ل وەلاتێن خوە ریسوا و شەرمەزار بکەن و ل دووڤ شیانێن خوە ھەڤکاریا مە بکەن”.
ئەڤرۆ کونفرانسێ دەولەتێن ئیسلامی ل بەغدا دێ دەستپێ کەت
نيشاندان
