ئەڤرۆ نیوز،زنار تۆڤى:
ل ڤان رۆژێن بۆرى فرۆكێن توركى چه‌ندین جهـ و گوندێن سنورێ قه‌زا ئامێدیێ و ده‌ڤه‌را به‌ورارى بالا ب دژوارى بۆمبه‌بارانكرن و زیانێن ماددى یێن مه‌زن گه‌هاندنه‌ خه‌لكى و گه‌له‌ك زه‌ڤى و ره‌زێن خه‌لكێ و دارستان و چه‌روانێ په‌زى هاتنه‌ سۆتن،هه‌روه‌سا گه‌له‌ك بۆمبه‌ ل نێزیك ئاقار و زه‌ڤیێن خه‌لكى كه‌فتینه‌ و خه‌لك وه‌سا دده‌نه‌ خویاكرن،كو ترسا وان ژ هندێ هه‌یه‌ كو مادده‌یێ وان بۆمبه‌یان كارتێكرنه‌كا خراب و مه‌ترسى ل سه‌ر ژیانا وان بكه‌ن.
سه‌ركه‌فت عومه‌ر وه‌لاتیه‌كێ ده‌ڤه‌را به‌روارى بالایه‌ بۆ ئه‌ڤرۆ نیوز دبێژیت:ده‌مێ فرۆكه‌یان بوردۆمانى ڤێ ده‌ڤه‌رێ كرى و بۆمبه‌ هاڤێژتین،گه‌له‌ك ژ وان بۆمبه‌یان نێزیكى گوندان كه‌فتینه‌ و هه‌روه‌سا ل چه‌ندین جهان ژى بۆمبه‌ ب ناڤا ئاقارى و زه‌ڤى و ره‌زان كه‌فتینه‌ و زیانێن مه‌زن گه‌هاندینه‌ خه‌لكى،چونكى ده‌مێ ئه‌و بۆمبه‌ دپه‌قین بێهنه‌كا پیس و نه‌خوش ژێ دهات و دبیت مادده‌یێ وان بۆمبان مه‌ترسى ل سه‌ر ژیانا مرۆڤان هه‌بیت و كارتێكرنێن خراب ل سه‌ر ژیانا خه‌لكێ مه‌ دروست بكه‌ت.
ناڤهاتى هه‌روه‌سا گۆت ژى: یا گرنگه‌ كو ڤه‌دیتن ژلایێ حووكمه‌تێ بۆ وان جهان بهێته‌كرن یێن كو ئه‌و بۆمبه‌ ڤێكه‌فتین،ژ پێخه‌مه‌ت ژیانا وه‌لاتیان بهێته‌ پاراستن و چ ئێشێن مه‌ترسى ژێ په‌یدا نه‌بن،ژبه‌ركو وه‌كو دیار ل هنده‌ك جهان مێشێن هنگڤینى ژ ئه‌گه‌رێ وان بۆمبه‌یان مرینه‌ و گه‌له‌ك زیان گه‌هشتینێ.
ژلایێ خوه‌ڤه‌ مه‌هدى حوسێن وه‌لاتیه‌كێ دی یه‌ دبێژیت:مه‌ مه‌ترسیا هندێ هه‌یه‌ كو ل گه‌له‌ك جهان بۆمبه‌ ب ره‌ز و زه‌ڤیان كه‌فتینه‌ و باریت و ئه‌و ماددێ دناڤا وان بۆمبه‌یان دا هه‌مى ل سه‌ر فێقى به‌لاڤ بوویه‌، دبیت ماددێ وان بۆمبه‌یان یێ مه‌ترسیدار بیت بۆ مرۆڤى،له‌ورا زوو ب زوو مرۆڤ نه‌وێریت ئه‌و جهێن گه‌له‌ك نێزیكى بۆمبه‌یان فێقیێ وان بخۆت،ژبه‌ر پاراستنا ژیانا خوه‌ و دیاركر ژى:له‌ورا یا فه‌ره‌ جهێن شوله‌ژێ و حووكمه‌تا هه‌رێمێ ب زووترین ده‌م خه‌مێ ژڤى بابه‌تى بخۆن و فێقیێ وان جهێن بۆمبه‌ ڤێكه‌فتین ببه‌نه‌ تاقیگه‌هان و تاقیبكه‌ن،كانێ مه‌ترسى لسه‌ر ژیانا مرۆڤان هه‌یه‌،یان نه‌،ژپێخه‌مه‌ت پاراستنا گیانێ وه‌لاتیان ژ هه‌ر ئێش و نه‌خوشیه‌كا مه‌ترسیدار.