ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 10ى كانوونا دويێ يا سالا 2016ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1237 |
| 1 يۆرۆيێ ئه‌ورۆپى | 1350 |
| 1 ليرێ توركى | 425 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئه‌ڤرۆ نيوز:
پشتى وه‌لاتيه‌كى ل گۆندێ “تووره‌ق” يێ نێزيك پارێزگه‌ها هه‌لێر، وه‌زاره‌تا كاروبارێن شه‌هيدان ئاگه‌هدار دكه‌ت ژ هه‌بوونا گره‌كێ ب كۆم، وه‌زاره‌تا شه‌هيدان ژى لژنه‌كێ ددانيت.
فوئاد عوسمان، ئاخفتنكه‌رێ ب ناڤێ كاروبارێن شه‌هيد و ئه‌نفالكريان ل حوكمه‌تا هه‌رێما كوردستانێ بۆ باسنيوز راگه‌هاند: پشتى پێزانين گه‌هشتين كو ل گۆرستانا گۆندێ تووره‌ق گۆره‌كێ ب كۆم يێ هه‌ى ئه‌وان ژى وه‌كو سه‌رپه‌رشتيارێن گۆێن ب كۆم و ب هه‌ڤكاريا تيمه‌كا وه‌زاره‌تێ سه‌ره‌دانێ وى جهى كر و ده‌ركه‌فت نێزيكى 30 هه‌تا 40 رووفات تێدانه و مێژوويا وان بۆ سه‌رده‌مێ به‌عسيان د ڤه‌گه‌ريت.
ئاخفتنكه‌رێ ب ناڤێ وه‌زاره‌تا شه‌هيدان گۆتژى: “ئه‌ڤ رووفاته يێن سه‌رده‌مێ سه‌رهلدانا مه‌زنا كوردستانێ نه و دبيت ل سه‌ربازگه‌ها وى ده‌مى يا هه‌ولێرێ گۆله‌بارانكربن و ل وێرێ هاتبنه ڤه‌شارتن”.
ئاماژه ب وێ چه‌ندێ كر كو ئه‌و وه‌لاتيێ پێزانين داين، ل ده‌مێ خوه بنه‌مالا وى ديده‌ڤانێن ڤێ روودانێ بوون و ل ده‌سپێكه‌كا نێزيك دێ رێكارێن قانوونى و هۆنه‌رى گرنه به‌ر بۆ ده‌رخستنا وان رووفاتان.
ئه‌ڤرۆ نيوز:
رێڤه‌به‌ريا گشتيا يا په‌روه‌ردا پارێزگه‌ها دهۆكێ ئاگه‌هداريا هه‌موو مامۆستايێن ژن دكه‌ت كو يێن حه‌ز ل سه‌ر هه‌بيت ببيته رێڤه‌به‌را په‌روه‌ردا رۆژهه‌لات ژ 11ى كانوونا دويێ هه‌تا 18ى كانوونا دويێ دێ فورمان به‌لاڤ كه‌ن و پاشان ژى ب ريێا “CV” ئێك هێته هه‌لبژارتن.
ده‌قێ ئاگه‌هداريێ:
ھەوەیێن بەرێز ئاگەھدار دکەین کو وەزارەتا پەروەردێ یا حکومەتا ھەرێما کوردستانێ رادگەھینیت کو دێ پوستێ رێڤەبەرێ رێڤەبەریا پەروەردا قەزا دھوک روژھەلات مینتە ڤالا و ھەر کەسێ بڤێت پێشکێش بکەت ب مەرجەکی ئافرەت بیت و ئەڤ مەرجێن ل خوارێ دیار ل دەف ھەبن و ب رێکا (CV) بلا قەستا رێڤەبەریا گشتی یا پەروەردا پارێزگەھا دھوکێ رێڤەبەریا خویەتی و میلاکات بکەت ھەر ژ روژا دووشەمبی رێکەفتی 11/1/2016 هه‌تا روژا دووشەمبی رێکەفتی 18/1/2016 بو وەرگرتنا فورما داخوازیێ.
مەرجێن پێشکێشکرنێ:
1. پێدڤی یە برواناما وێ ژ بکالوریوس کێمتر نەبیت.
2. خزمەتا کرداری ژ ( 10 ) سالان کێمتر نەبیت دبیاڤێ پەروەردێ دا.
3. ژ روویێ ساخلەمیێ ڤە لەش ساغ وساخلەم بیت.
4. چێ جورە سزایەک ناھاتبنە ئاراستە کرن بو وێ وەکی ( بەدرەوشتی، دەستپیسی- سەختەکرن د برواناما دا و ئەو کارێن پەیوەندی ب ئەزموونان ڤە ھەبیت).
ئه‌ڤرۆ نيوز:
رێڤه‌به‌ريا كه‌شناسى و بيڤه‌له‌رزێ ل دهۆكێ راگه‌هاند كو سوبه‌هى رۆژا دوشه‌مبى رێكه‌فتى 11ى كانوونا دويێ يا 2016ێ دێ ئه‌سمان ئه‌وره‌كێ ناڤه‌ندى بيت و ل ده‌مێن دره‌نگى شه‌ڤ دێ هنده‌ك باران هوور ل ده‌ڤه‌رێن چيايى باريت.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ هاتنا فشارێن نزمێن ده‌ريا سپى يا ناڤه‌راست بۆ سه‌ر هه‌رێما كوردستانێ دهێته پێشبينيكرن ئه‌سمان ئه‌وره‌كێ ناڤه‌ندى بيت و ل ده‌مێن دره‌نگى شه‌ڤ دێ هنده‌ك باران هوور ل ده‌ڤه‌رێن چيايى باريت.
پشكا پێشبينيان دايه زايه زانين كو دێ ئاراستێ باى ژى دێ باكوورێ رۆژهه‌لات بيت ب ره‌نگه‌كى د ناڤبه‌را 5 هه‌تا 10 كم دا و هنده‌ك و ماوێ ديتنێ ژى 8 بۆ 10 كم بيت، پلێن گه‌رمێ ژى دێ د ناڤبه‌را (2 بۆ 12) پلان دا بيت.
ئه‌ڤرۆ نيوز:
شارەزایەکا ئابووری داخواز دکەت حوکمەت ل جھێ کێمکرنا مووچێن فەرمانبەران، پێدڤیە بھایێ کەلوپەلێن ناڤا بازاڕی ئەرزان بکەت و کۆنتڕۆلێ ل سەر بازاڕێن ھەرێما کوردستانێ بکەت، چونکی بێ داکەتنا بازاڕی کێمکرنا مووچەی دێ زیانێ گەھینیتە وەلاتیان.
پڕۆفیسۆرا ھاریکار مھاباد نوری شارەزایا ئابووری بۆ رۆژناما ئەڤرۆ گۆت “کێمکرنا مووچێ فەرمانبەران و بڕینا دەرمالان ناچیتە د چارچوڤێ پڕۆسا چاکسازیێ دا، بەلکو تنێ ب دبیتە کێمکرنا مووچەی، چونکی چاکسازی پێنگاڤێن بەرفرەھترن، ب دیتنا من کێمکرنا مووچێ فەرمانبەران و بڕینا دەرمالان پێنگاڤەکا شاشە، بەلکو دەستپێکێ پێدڤیە بازاڕ بھێتە کۆنتڕۆلکرن، چونکی کێمکرنا مووچێ فەرمانبەران بێی کۆنتڕۆلکرنا بازاڕی دێ کاریگەری ل سەر رەوشا وەلاتی و فەرمانبەران ھەبیت، ئەگەر بھێت و مووچە بھێتە کێمکرن ژی نابیت ب ئێک جار بھێتە کێمکرن، بەلکو پێدڤیە دگەل ئەرزانکرنا بازاڕی ھێدی ھێدی مووچە بھێنە کێمکرن”.
مھابادێ گۆت ژی “ئەڤ کێمکرنا نوکە دھێتە بەحسکرن و ل راگەھاندنێ دھێتە بەلاڤکرن، جھێ گومانێ یە، چونکی فەرە دەرمالێ باوەرنامێ و ناڤ و نیشانێن زانستی نەھێنە بڕین، ئەڤە مافێ فەرمانبەرانە زێدەھیا مووچە بۆ باوەرنامێ وەربگرن، ھندەک میزانیە و مووچێن زێدە ھەنە دڤێت بھێنە بڕین و کێمکرن، نەکو بەرۆڤاژی دەستپێکێ ل فەرمانبەرێن ئاسایی دەست پێ بکەت”.
ئەڤرۆ نیوز:
یاریکەرێ ھەلبژارتیێ بەرازیل و یانا ساوپاولو یا بەرازیلی پاتو ئەلکساندرو باتو نێزیکی کرنا یاریێ بووی یە دخۆلا پریمیرلیگ یا ئینگلیزی کو چەندین یانێن ئینگلیزی حەزا کرینا ئەڤی یاریکەری ھەیە ل ڤەگوھاستنێن زفستانی دا.
راپورتێن رۆژنامەڤانی ل برێتانیا دیارکری یە ھەر ئێک ژ یانێن ئیفرتون و ویست ھام یوناید یێن ئیگلیزی حەزا ئەڤی یاریکەری ھەیە لێ ل ڤێ دووماھیێ یانەکا دی ھاتیە ل سەر ھێلێ بۆ کرینا باتوی ژ یانا ساوپاولو ئەوژی یانا لیڤەرپول رۆژنامەیێن برێتانی ئەو چەندە ژی دیارکری یە یانا لیڤەرپۆل نێزیکی ١٥ ملیون یورۆیا پێشکێشی یاریکەری کری یە بوو کرنا یاریێ ل یانا ئەوان و یاریکەر ژی حەزا خوە دیارکری یە بۆ کرنا یاریێ ل وێ یانێ.
ئەڤرۆ نیوز:
ب پشتەڤانیا نێڤدەولەتی دەستھەلاتدارێن ھەرێما کوردستانێ کار ژ بۆ بنەجھکرنا پێگەھێ دەولەتا کوردی دکەن، وەکو بەرھەڤیەک بۆ سەربخوەیا ھەرێما کوردستانێ د سالا نوو دا و دست ب کارێ نەخشەدانانا سنۆران کریە، زێدەباری ئازادکرنا وان دەڤەرێن ھێشتا ددەستێن داعشێ دا ماین کو جارەکا دی ڤەگەرینن دناڤ دەولەتا چاڤەڕێکری دا، ھەروەکی رۆژناما (العربی الجدید) ئاماژە پێ کری..
رۆژناما ناڤبری ژ زارێ ژێدەرەکی کوردی راگەھاندیە، (پرۆسا نەخشەکێشانا سنۆرێن دەولەتا کوردی نوکە دھێتە بجھئینان و تیمەکا تایبەت ب سەرپەرشتیا ئەندازیارێن بریتانی و فرەنسی و ئەمریکی، دەست ب کارێ کولانا خەندەکان بۆ دەستنیشانکرنا سنۆرێن کوردستانێ کریە، کو ھەتا نھا ب درێژاھیا پتر ژ 100 کیلۆمەتران ھەر ژ سنۆرێ قەزا خانەقین کو ب دووریا 175 کیلۆمەتران ل باشورێ بەغدایە و ھەتا ناحیا رەبیعە ل باشورێ مووسلێ 520 کیلومەتران ژ بەغدا دوورە، کو نێزیکی سنۆرێن سووریێ دبیت و ئەوخەندەکا سنۆری، ل گۆڕ ژێدەرێ کوردی، ب کووراتیا 3 مەتران و فرەھیا 3 مەتران و دێ ل بن کونترۆلا سیستەمێ چاڤدیریا ئەلکترونی دا بیت.
ژ لایەکێ دی ڤە، ئەندامێ سەرکرداتیا پارتی دیموکراتی کوردستانی (عەلی عەونی ) گۆت” ھەرێما کوردستانێ دێ ڕیفراندۆمەکا جەماوەری بۆ سەربخوەیا ھەرێما کوردستانێ د سالا 2016 ئەنجامدەت، ھەروەسا ئاماژەدا، سەرۆکێ ھەرێما کوردستانێ (مەسعود بارزانی) د کۆمبوونەکێ دا، پارتی دیموکراتی کوردستانی ب ڤی کاری راسپاردیە و پێدڤیە ل سەر حوکمەتێ رەوشێ ئارام بکەت و بەرھەڤیان بۆ ڕیفراندۆمێ بکەت”.
عەلی عەونی ھەروەسا خوەیاکر، سەرۆک بارزانی، دکۆمبوونا سەرکرداتیا پارتی دا ل 21 کانوونا ئێکێ یا بۆری، ئەو راسپاردینە بۆ بەرھەڤیان ل دۆر ئەنجامدانا ڕیفراندۆمێ و دانوستاندنێ ل گەل پارتێن دی یێن بڤێن بھێنە دناڤ پرۆژەی دا و گوت ژی ژی کو د ھەر ڕەوشەکێ دا، پرۆسا ڕیفراندۆمی دێ ھێتە ب رێڤە برن و سەرەدانا سەرۆک بارزانی بۆ وەلاتێن ئەوروپا و ئەمریکا ئارمانج ژێ ب دەستڤەئینانا بابەتێ پشتەڤانیا سەربخوەیا ھەرێما کوردستانێ بوویە.
سەبارەت سنۆرێن دەولەتێ ژی، ڤی ئەندامێ سەرکردایەتیا پارتی گۆت” نوکە ئەم مژوولی بابەتێ سنۆراینە، دەڤەرێن ھاتینە ئازادکرن دەست ژێ ناھێتە بەردان، چونکی مە قوربانی و خووینەکا زۆر ژبۆ دایە”.
سیاسەتمەدارێن کوردان و سەرکردێن ھێزا پێشمەرگەی دبێژن، وان سنۆرێن دەولەتا کوردی بخوینێ دیارکرینە ددەمێ شەڕێ دژی تیرۆرستێن داعشێ دا، ھەر ل گۆڕ ھندەک راپۆرت و پێزانینان، ھێزا پێشمەرگەی نێزیکی 90% ژ ئاخا کوردستانێ یا کو ئەو دخوازن بھێتە سەر ب ھەرێما کوردستانێ ڤە ددەستێن پێشمەرگەی دایە و تنێ 10 % ژ ئاخا کوردستانێ ل بن کونترۆلا چەکدارێن تیرۆرستێن داعشێ دا مایە.
سەبارەت ئاستەنگێن درێیا سەربخوەیا کوردستانێ دا، عەلی عەونی دیارکر کو قەیرانا ئابۆری و شەڕێ داعشێ، زێدەبارێ گڤاشتنێن دەرەکی و ھەرێمی، بەلێ دەلیڤە یا بەرھەڤە و یا گرنگە دڤێ ڕەوشا ئالۆز دا و پێدڤیە بھێتە بکارئینان.
عەلی عەونی دبێژیت” مە باوەریەکا تمام یا ھەی کو ھندەک لایەنێن ناڤخوەیی دژی پرۆژێ سەربخوەیێ نە” و ئاماژە دا بزاڤا گۆڕان ب سەرکێشیا نەوشیروان مستەفای، جێگرێ بەرێ یێ جەلال تالەبانی، ھەروەسا خوەیاکر، بزاڤا گۆڕان پشتەڤانیا سەربخوەیێ و دەولەتا کوردی ناکەت، لەوما ئەم دێ کاری ل گەل پارتێن باوەری ب سەربخوەیا کوردستانێ ھەی کەین، ھەروەسا دەزگەھێن حوکمەتێ ژی ھاتینە راسپاردن بۆ خووشکرنا ڕەوشا گونجای یا ئەنجامدانا ڕیفراندۆمێ.
دیسا سەرکردەکێ حزبا زەحمەکێشان (سەعەد خالد) پێشبینی کرن، دانوستاندنێن ناڤخوەیی د ناڤبەرا حزب و ئالیێن کوردستانی بھێنە کرن و گوت” ئەز باوەرم سەرۆک بارزانی دێ ل گەل ھەموو حزب و ئالیێن سیاسی کۆمبیت، کو ھەموو قەیرانێن نوکە ھەین نەمینن، چونکی دەلیڤە ھەمبەری مللەتێ کورد یا دیرۆکی یە و پێدڤیە مفا ژێ بھێتە وەرگرتن و بارزانی یێ رژدە ل سەر ئێکگرتن و ئێک رێزیا مللەتێ کورد”.
سەیاسەتمەدار و چاڤدێرێن سیاسی یێن کوردان گرێدانەکێ د ناڤبەرا راگەھاندنا دەولەتا کوردی و ھەلوەشاندنا ڕێککەفتنا (سایکس بیکۆ) یا بەریتانی و فرەنسی دا دکەن د بۆرینا 100 سالان ل سەر ژیێ وێ ڕێککەفتنێ.
ئەڤرۆ نیوز:
ئەندامەکێ جڤاتا سەرکردایەتیا پارتی دیموکراتی کوردستان ئاشکراکر، ھەکە ل گەل لایەنێن سیاسی ل دۆر پرسا گۆھۆڕینا سەرۆکێ پەرلەمانی نەگەھشتینە چو ڕێککەفتنان، دێ کار بۆ ھەلوەشاندنا پەرلەمانی کەین و حوکمەتەکا بەروەخت بھێتە پێکئینان، ھەروەسا دیارکر، ل دەمەکێ نێزیک سەرۆک بارزانی دێ ل گەل لایەنێن سیاسی کۆمبیت.
دکتۆر ئاراس حەسۆ میرخان، ئەندامێ جڤاتا سەرکردایەتیا پارتی دیموکراتی کوردستان بۆ رۆژناما ئەڤرۆ گۆت” بڕیارە ل دەمەکێ نێزیک سەرۆک بارزانی ل گەل لایەنێن سیاسی یێن ھەرێما کوردستانێ کۆمببیت، بۆ چارەسەرکرنا ئاریشێن نوکە یێن ناڤبەرا لایەنێن سیاسی دا”.
ئاراسی زێدەتر گوت” دو ئاریشە یێن ل ھەرێما کوردستانێ ھەین و ھەردو ژ ھەڤ د جودانە، یا ئێکێ پرسا پشکداریکرنێ یە د حوکمەتا ھەرێما کوردستانێ و چاوانیا پشکداریا بزاڤا گۆڕان، یا دویێ پرسا سەرۆکایەتیا ھەرێما کوردستانێ و دیتنا چارەیەکێ یە بۆ ڤێ پرسێ کو رەھەندەکا نیشتیمانی ھەیە، ب دیتنا مە وەکو پارتی، پێدڤیە کۆمبوون بھێنەکرن و ئەو پرسێن نەتەمامکری بھێنە تەمامکرن، پێدڤیە ل سەر پرسا سەرۆکایەتیا ھەرێمێ دل گەل گۆڕان و ھەموو لایەنێن دی بگەھینە سازانێ، پرسا پشکداریا بزاڤا گۆڕان ژی د حوکمەتێ دا، پرسەکا دی یە و ئەم و گۆڕان پێکڤە د حوکمەتێ دا دسەرکەفتی نەبووین، مە ھەردویان شکەستن ئینا، یان دڤێت ڕێککەفتنەکا دی ل گەل گۆڕان بکەین، یان ژی ب وڤی ڕەنگێ بەری نوکە ئەم نەشێن پێکڤە کار بکەین، یان ژێک ڤە ببین، نوکە ئەم وەکو پارتی یێ کار ل گەل لایەنێن سیاسی دکەین کو جارەکادی پەرلەمان دەست ب کۆمبوونێن خوە بکەت و گۆھۆڕین د سەرۆکایەتیا پەرلەمانی دا بھێنەکرن و بۆ ڤێ مەرەمێ دانوستانێن مە ل گەل ئێکەتیێ و لایەنێن دی دبەردەوامن.
ڤی ئەندامێ سەرکردایەتیا پارتی خویاکر ژی” پارتی چو نیەت نینە (جەعفەر ئیبراھیم) ی بکەتە سەرۆکێ پەرلەمانی، تنێ دڤێت گۆھۆڕین د دەستەیا سەرۆکایەتیا پەرلەمانی دا بھێتەکرن، ھەردەمێ ڕێککەفتن ل گەل لایەنەکی ھاتەکرن و کەسەک بۆ سەرۆکێ پەرلەمانی ژ فڕاکسیۆنەکێ بیت تشتەکێ ئاسایی یە، بەلێ پێدڤیە یوسف مەحەمەد ب شێوەیەکێ قانوونی بھێتە لادان و دۆبارە دەستەیەکا نوو بۆ سەرۆکایەتیا پەرلەمانی بھێتە ھەلبژارتن، ھەکە ئەم گەھشتینە، دێ کارەکێ باش بیت، بەلێ ھەکە دانوستاندنێن مە ل گەل لایەنێن سیاسی بێ ئەنجامبوون و نەگەھشتینە چو ڕێککەفتنان، دێ کار ل سەر وێ چەندێ کەین 56 پەرلەمانتار دەست ژکارێ خوە بەردەن و پەرلەمان بھێتە ھەلوەشاندن و حوکمەتەکا کارپێکەر بھێتە دروستکرن ھەتا ھەلبژارتن دھێنەکرن، لایەنێن دی ژی وەکو ئێکەتیێ و حزبێن ئیسلامی ھەمان بۆچوون یا ھەی، ھەکە ئەم نەگەھشتن چو ئەنجامان، پەرلەمان بھێتە ھەلوەشاندن و حوکمەتەکا بەروەخت بھێتە پێکئینان ھەتا ھەلبژارتن دھێنەکرن.
ل دۆر پەیوەندیێن پارتی و ئێکەتیێ، دکتۆر ئاراس حەسۆ میرخان دیارکر” پەیوەندیێن مە ل گەل ئێکەتیێ دباشن و دانوستاندنێن د ناڤبەرا مە دا ل سەر وێ چەندێ نە کو جارەکادی ل گەل ئێکەتیێ و لایەنێن دی حوکمەتەکێ بێی گۆڕان پێکبینین، بڕیارە پارتی ل گەل ئێکەتیێ کۆمبیت و ل گەل ئێکگرتوو لایەنێن دیژی دێ مە کۆمبوون ھەبن، ئەڤە ژبلی کۆمبوونا سەرۆک بارزانی ل گەل لایەنێن دی”.
سەبارەت پشکداریا بزاڤا گۆڕان د کۆمبوونا ل گەل سەرۆک بارزانی دا، گۆت” ئەم دوژمنێن ئێک نینین، دبیت پێکڤە رۆنین ل سەروان پرسێن گرێداین پڕۆسا سیاسی ھەتا بگەھینە ڕێککەفتنێ ژی، بەلێ د بابەتێ دەستھەلاتێ دا، ئەم یێن گەھشتینە وێ باوەریێ کو نەشێن ب ڤێ میکانیزمێ پێکڤە کار بکەین، ھەکە پێکڤە روونین و ب گەھینە ڕێککەفتنەکا دی، ئەو تشتەکێ دی یە، بەلێ باوەرناکەم ب ڤی شێوەیێ ھەی ل گەل گۆڕان کاربکەین”.
ئەڤرۆ نيوز:
سەرۆکێ لژنا پیشەسازی و سامانێن سروشتی ل ئەنجوومەنێ پارێزگەھا دھۆکێ بۆ ئەڤرۆ دیار کر کو بازرگان بەردەوام یێ پانزینێ ژ سنوورێ ئیرانێ دئیننە پارێزگەھا دھۆکێ، لەو ئەم پێشبینی دکەین د رۆژێن بھێن لترا پانزینێ ل دھۆکێ ژی ببیتە (500) دینار.
عەبدولسەمەد تێلی، سەرۆکێ لژنا پیشەسازی و سامانێن سروشتی ل ئەنجوومەنێ پارێزگەھا دھۆکێ ئاشکرا کر، نوکە رێژەکا زۆر یا پانزینا بازرگانی بەردەوام ب رێیا سنووری یا ھەرێمێ و ئیرانێ دھێتە ناڤ ھەرێمێ و خواستا وەلاتیان ژی ل سەر کێمبوویە، نوکە د ناڤبەرا مە و پارێزگەھا سلێمانیێ دا 50 دینار جوداھی ھەیە، چونکو ل دھۆکێ نوکە پانزینا بازرگانی ب (600) دینارانە، رەنگە ئەو 50 دینارە ژی کریا ڤەگوھاستنێ بیت و گۆت: “نوکە سێ کۆمپانی پانزینا بازرگانی دئیننە دھۆکێ و پانزینا دھێت کوالێتیا وێ یا باشە و چ جوداھی ل گەل یاحکومی نینن و پشکنین بۆ دھێنە کرن”.
ھەمبەر رەوشا کارەبێ ژی و دابینکرنا گازوایلێ بۆ وێستگەھێن بەرھەمئینانا کارەبێ، عەبدولسەمەد گۆت: “وێستگەھێن بەرھەمئینانا کارەبێ ل سەرانسەری ھەرێما کوردستانێ ب گازوایلێ کاردکەن و رێژەکا زۆر یا گازوایلا ئەڤان وێستگەھان ژ دەرڤە دھێت، حوکمەتێ ژی نوکە ئەو شیان نەماینە پارێ ڤێ گازوایلێ دابین بکەت، دیسا شیانێن بەرھەمئینانا وێ گازوایلێ ل ناڤخوە ژی نینن”.
دا زانین کو نوکە حوکمەتێ ھندەک وێستگەھێن گازوایلێ ڤەگوھاستینە سەر غازێ و گۆت: “دڤێت د پاشەرۆژێ دا وێستگەە بۆ سەر غازێ بھێنە ڤەگوھاستن، چونکو نیڤا پارێ نوکە لێ ناچیت و کارەبا وێ ژی دێ یا باشتر بیت و بۆ ژینگەھێ ژی باشترە”.
ئەڤرۆ نیوز:
قایمقامێ قەزا شنگالێ بۆ ئەڤرۆ ئاشکرا کر کو بڕیارە کۆنفرانسێ ئێکێ یێ دەڤەرێن وێرانکری ئەڤرۆ 10/1/2016 ل پایتەختێ ھەرێما کوردستانێ دەست ب کارێن خوە بکەت و گۆت: “د ڤی کۆنفرانسی دا خەلکێ دەڤەرا شنگالێ دێ بێدەنگیا حوکمەتا عیراقێ ھەمبەر شنگالێ دیارکەت و داخوازێ ژ حوکمەتا ھەرێما کوردستانێ کەن پارێزگەھبوونا شنگالێ بھێتە ڕاگەھاندن و ب سەر عیراقێ ڤە نەمینیت”.
مەحما خەلیل، قایمقامێ قەزا شنگالێ دیار کر، مەرەما وان ژ گێرانا ڤی کۆنفرانسی ئەوە، پێدڤیێن دەڤەرێن وێرانکری بھێنە بەرچاڤکرن، چونکو خەلکێ دەڤەرا شنگالێ چەندین جاران داخوازا ھاریکاریێ ژ حوکمەتا عیراقێ کریە، بەلێ ھەتا نوکە چو داخوازیێن وان ب جە نەئیناینە و گۆت: “ھەر سێ پارێزگەھێن وێرانکری یێن عیراقێ (سەلاحەدین، ئەنبار، نەینەوا) و نوونەرێن ھەموو دام و دەزگەھێن حکومی دێ د کۆنفرانسی دا ئامادە بن و دێ دانوستاندن ژ لایێ وان ڤە ل دۆر ئاڤەدانکرن و خزمەتێن پێدڤی بۆ دەڤەرێن وێرانکری ھێتەکرن”.
خویا ژی کر، ئەو ژ نوکە وێڤە د وێ باوەرێ دا نینن کو حوکمەتا عیراقێ کارەکی بۆ قەزا شنگالێ بکەت، چونکو دەمێ کارەساتا شنگالێ روودای و ھەتا نوکە پەرلەمانێ عیراقێ ئیدانا کارەساتا شنگالێ نەکریە و گۆت: “د ڤی کۆنفرانسی دا ئەو دەردەسەری یا ب سەر خەلکێ دەڤەرا شنگالێ دا ھاتی ھەموو دێ ھێتە دیارکرن، دیسا داخواز ژ پەرلەمان و حوکمەتا عیراقێ ھێتە کرن کو ژ نوکە وێڤە ل سەر کارەساتا شنگالێ بێدەگ نەمینیت و داخواز ژ حوکمەتا ھەرێما کوردستانێ ژی ھێتەکرن کو پارێزگەھبوونا قەزا شنگالێ ڕابگەھینیت و ئیدی شنگال ب سەر عیراقێ ڤە نەمینیت و داخواز ھێتەکرن کو کارێن باشتر بۆ رزگارکرنا کچ و ژن و زارۆیێن رەڤاندنی یێن ھەتا نوکە ماینە د ناڤ دەستێن تیرۆرستان دا بھێنە کرن”.
نيشاندان
