ئه‌ڤرۆ نیوز: ڤه‌ده‌ر ره‌شاڤایی:
د به‌یاننامه‌كێ دا رێڤه‌به‌رییا كۆچ و كۆچبه‌ران یا فنله‌ندا به‌لاڤكر كو وه‌لاتێ وان ب چ ره‌نگه‌كی په‌نابه‌رێن هه‌رێما كوردستانێ و چه‌ند ده‌ڤه‌رێن باشۆرێ كوردستانێ وه‌رناگریت.
هه‌روه‌سا دیاركرییه كو فنله‌ندا مافێ په‌نابه‌ریێ ناده‌ته وان یێن ده‌ڤه‌رێن وان ئارام و دڤێـ هه‌ر په‌نابه‌ره‌كێ ل ئیراقێ دچیته وی وه‌لاتی هه‌می به‌لگه‌یێن پێدڤی بۆ دیاركرنا ده‌ڤه‌را ژێ هاتین ڤێ هه‌بن.
ئه‌ڤرۆ نیوز: ڤه‌ده‌ر ره‌شاڤایی:
فه‌هیم عه‌بدولا سه‌رۆكێ جڤاتا پارێزگه‌ها دهۆكێ لدۆر وێ یه‌كێ كو به‌حسێ په‌یدابوونا قه‌یرانا غازێ ل هنده‌ك ناوچێن هه‌رێما كوردستانێ دهێته كرن خویاكر كو ” ل سنۆرێ دهۆكێ چ قه‌یرانه‌كا غازێ نینه و وه‌ك جاران غاز ل غاز فرۆشان هه‌یه.”
هه‌روه‌سا لدۆر سۆته‌مه‌نیێ ب شێوه‌كێ گشتی ناڤهاتی دیاركر ب دروستكرنا پارزنگه‌هه‌كێ ل پارێزگه‌ها دهۆكێ ئێدی ئاریشا سۆته‌مه‌نیێ ل دهۆكێ په‌یدا نابیته‌ڤه، و ئه‌ڤ یه‌كه ئێك ژ داخازێن جڤاتا پارێزگه‌ها دهۆكێ یه كو ئاراسته‌ی نێچیرڤان بارزانی سه‌رۆك وه‌زیرێ هه‌رێما كوردستانێ كریه.
ئه‌ڤرۆ نیۆز، سالار دۆسكى:
رێڤه‌به‌رێ په‌یوه‌ندى و راگه‌هاندنێ ل باژێرێ مه‌ككه‌ها پیرۆز دیاركر كو ژنه‌كا كورد ب ناڤێ (سه‌روه تاهر) كو خه‌لكا چه‌مچه‌مال كچه‌ك بوویه و ناڤێ كچا خوه كریه (مه‌روا).
مالك ره‌مه‌زان رێڤه‌به‌رێ په‌یوه‌ندى و راگه‌هاندنا رێڤه‌به‌ریا گشتى یا ئه‌وقاف و كارۆبارێن ئاینى ل پارێزگه‌ها دهۆكێ كو نوكه ل وه‌لاتێ سعودیێ یه، بۆ مالپه‌رێ ئه‌ڤرۆ نیۆز گۆت: ئه‌ڤ زارۆیه ل نه‌خوشخانا زارۆك بوونێ یا شاه عه‌بدولعه‌یز ژ دایك بوویه وناڤێ وێ (مه‌روا) دیسان ده‌یكا وێ سه‌روه تاهر خه‌لكا ده‌ڤه‌را گه‌رمیانه و ل چه‌مچه‌مال ئاكنجى یه، و نوكه ل وه‌لاتێ سعودیێ یه، دیسان ل دوووڤ راپورتێن ساخله‌میێ ل وه‌لاتێ سعودیێ ساخله‌میا وێ زارۆیێ ل گه‌ل دایكا وێ یا باشه، جهێ ئاماژه‌كرنێ یه ل سالا 2012 ژى ژنه‌كا كورد ل وه‌لاتێ سعودیێ زارۆیه‌ك ببوو و ئه‌ڤه دبیته دووه‌م حاله‌ت .
ئه‌ڤرۆ نیوز: ڤه‌ده‌ر ره‌شاڤایی:
به‌رپرسێ لقا پێنجا پارتی دیموكراتى كوردستان ل به‌غدا ئاشكرا كر كو ئه‌و به‌رهه‌ڤییان دكه‌ن بۆ دانانا په‌یكه‌ره‌كێ سه‌ركردێ كورد مه‌لا موسته‌فا بارزانی ل باژێرێ به‌غدا .
(محه‌مه‌دئه‌مین ده‌لۆ) به‌رپرسێ لقا پێنجا پارتی دیموكراتى كوردستان ل به‌غدا گۆت: “ژ ئالیێ په‌یكه‌رساز (داخل مه‌نده‌لاوی) خه‌لكێ باژێرێ مه‌نجه‌لی ئه‌و په‌یكه‌ر ب خوه‌به‌خش هاتییه چێكرن و پێشكێشی لقا پێنج هاتییه كرن.”
ناڤهاتی گۆت ژی وان لبه‌ره پشتی جه‌ژنا قۆربانی ئه‌ڤ په‌یكه‌ره د رێوره‌سمه‌كا ژ هه‌ژی دا بهێته دانان.
ئه‌ڤرۆنیوز، مه‌حمود نهێلى:
د روودانه‌كا ئاگر به‌ربوونێ دا ل گوندێن كوانێ و دێرێ یێن سه‌ر ب قه‌زا ئامێدیێ ڤه پتر ژ 5 دونه‌مێن ئه‌ردى و دارستانێ دهێنه سوتن كو تێدا ره‌زێن باهیڤان هه‌بوون و زیان گه‌هشتینه وه‌لاتیان.
نقیب ئه‌نه‌س ئه‌حمه‌د به‌رپرسێ بنگه‌هێ به‌ره‌ڤانیا باژێرى ل ئامێدیێ بۆ ئه‌ڤرۆ دیاركر، كو ئه‌و هاتینه ئاگه‌هدار كرن ل سه‌ر روودانه‌كا ئاگر به‌ربوونێ ل گوندێ كوانێ و ئاشكێ دێرێ ل دانگا ئامێدیێ و ئێكسه‌ر تیمێن وانا گه‌هشتینه جهێ بوویه‌رێ و گۆت: ( د وێ ئاگر به‌ربوونێ دا پتر ژ 5 دونه‌مێن ئه‌ردى هاتینه سوتن كو تێدا دارستان و ره‌زێن باهیڤان ژى هه‌بوون).
ناڤبرى خویاكر، ژ بۆ كونترولكرنا ڤى ئاگرى ژبلى پولیسێن بنگه‌هێ وان و هه‌روه‌سا پولیسێن دارستانێ و وه‌لاتیان و خه‌لكێ ده‌ڤه‌رێ ژى به‌شدارى كر.
دڤێ روودانێ دا زیانێن مالى گه‌هشتینه وه‌لاتیان و دوورێن 100 بنێن دارێن باهیڤێ و چه‌ندین دار به‌رى و دارێن مازین و گه‌له‌ك جورێن دیترێن داران هه‌بوونه.
ده‌رباره‌ى ئه‌گه‌رێ روودانێ ژى نقیب ئه‌نه‌س دیاركر تا نها ئه‌گه‌رێن روودانێ دیار نه‌بووینه لێ ل گور زانیاریێن ده‌سپێكى ئه‌و ئاگر نه به ئه‌نقه‌ست دروست بوویه و دووڤچوون یا به‌رده‌وامه.
ئه‌ڤرۆ نیۆز، قائید میرۆ:
تیرۆرستێن داعش ل قه‌زا حه‌وێجه 20 مامۆستایێن ئایینی ده‌سته‌سه‌ركرن و به‌ره‌ڤ جهه‌كێ نه‌دیار برینه.
ئیسماعیل حه‌مه‌د، به‌رپرسێ لیژنا ناوچا قه‌راج یا پارتی دیموكراتی كوردستان ب ئه‌ڤرۆ نیۆز راگه‌هاند ” ئه‌ڤرۆ چه‌كدارێن تیرۆرستێن داعش ل قه‌زا حه‌وێجه یا سه‌ر ب پارێزگه‌ها كه‌ركووكێ 20 گۆتار خوین و مامۆستایێن ئاینی ل سه‌نته‌رێ قه‌زا حه‌وێجه و گوندێن ده‌وروبه‌رێ قه‌زایێ ده‌سته‌سه‌ركرینه.
ئیسماعیلی گۆت ژی” چه‌كدارێن داعش پشتی ئه‌ف 20 مه‌لایه ده‌سته‌سه‌ركرین به‌ره‌ڤ جهه‌كێ نه‌دیار ره‌ڤاندینه و ئه‌گه‌رێ ده‌سته‌سه‌ركرنا ئه‌ڤان مامۆستایێن ئاینی بۆڤێ چه‌ندێ ڤه‌دگه‌ڕیت دانپێدان ب كار و به‌رنامه‌یێن داعش نه‌كریه .
ئه‌ڤرۆ نیۆز، قائید میرۆ:
ئه‌ڤرۆ 20 ئیلۆنێ پڕۆسه‌یا ده‌نگدانێ بۆ هه‌لبژاتنا سه‌رۆك و جێگرێ سه‌رۆكێ ئه‌كادیمیا كوردی بڕێڤه‌چوو، تێدا عه‌بدولفه‌تاح بۆتانی وه‌ك سه‌رۆكێ ئه‌كادیمیا كوردی هاته هه‌لبژارتن.
خسرۆ ئیسماعیل، به‌رپرسێ راگه‌هاندنا ئه‌كادیمیا كوردی ب ئه‌ڤرۆ نیۆز راگه‌هاند” پشتی دكتۆر نۆری تاله‌بانی سه‌رۆكێ ئه‌كادیمیا كوردی ده‌ست ژكارێ خوه به‌ردای، ئه‌ڤرۆ جڤاتا ئه‌كادیمیا كوردی د پڕۆسه‌یه‌كا نهێنی دا سه‌رۆك و جێگرێ سه‌رۆكی بۆ ئه‌كادیمیا كوردی هه‌لبژارتن.
ئه‌ڤرۆنیۆز، سالار دۆسكى:
په‌یمانگه‌هه‌كا كومپیوته‌رىیا ئه‌هلى ل دهۆكێ ئاشكراكر كو ژبه‌ر كاودانێن نوكه یێن كوردستان تێدا دبۆیت، قستێن قوتابیان درێژكرن، پتر ئاسنكارى بۆ قوتابیان كرن.
فه‌رید محمود عه‌بدولا رێڤه‌به‌رێ په‌یمانگه‌ها گاره یا كومپیوته‌رى یا ئه‌هلى ل دهۆكێ بۆ مالپه‌رێ ئه‌ڤرۆ نیۆز ئاشكراكر كو جڤاتا په‌یمانگه‌هێ كومبوونه‌ك ئه‌نجام دایه و كاودانێن نوكه كوردستان تێدا دبۆریت ل به‌رچاڤ وه‌رگرتینه له‌وما قستێن قوتابیان ژ دو قستان كرینه سێ قست و هه‌ر جار 600 هزار دینار ئانكو سال ملیۆنه‌ك و 800 هزار دینار.
رێڤه‌به‌رێ په‌یمانگه‌هێ گۆت ژى: هه‌ر قوتابیه‌كێ ئه‌هو ژى پێ چ نه‌بیت دشێت سه‌ردانا كارگێریێ بكه‌ت و دێ پتر هاریكارى بۆ هێته‌كرن و هه‌تا شه‌ش قستان ژى دشێن هاریكاریا قوتابیێن خوه بكه‌ین.
فه‌رید هێشتا گۆت: رێژه‌كا مه‌زن یا قوتابیان حه‌ز هه‌یه بێنه په‌یمانگه‌هێ و ئه‌ڤ ساله 150 قوتابى وه‌رگرتینه و ئه‌ڤ كاره پێخه‌مه‌ت قوتابیان و كاودانێن ئه‌ڤرۆیێن كوردستانێ هاتیه‌كرن.
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 20ى ئيلۆنا 2015ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1236 |
| 1 يۆرۆيێ ئه‌ورۆپى | 1395 |
| 1 ليرێ توركى | 410 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
نيشاندان
