ئەڤرۆ نيوز:

ئەندامەکێ پەرلەمانێ کوردستانێ ژ لیستا ئێکەتی نیشتمانی کوردستان بەحسێ خراببونا بارودۆخێ ناڤخوەییێ ئێکەتیێ دکەت ژبەر دووربوونا جەلال تالەبانی و ھەروەسا ئاماژێ ب وێ چەندێ دکەت، نابیت کێشە و گرفتێن ئێکەتیێ بچنە بەردەم نەوشیروان موستەفای.
سالار مەحموود ئەندامێ پەرلەمانێ کوردستانێ ل سەر لیستا ئێکەتیێ د گۆتارەکێ دا، ل دووڤ رۆژانە نیۆز دبێژیت” ل دەستپێکا دامەزراندنا ئێکەتیێ و ھەتا نوکە، جودابوونا بیرورا تێدا ھەبوو، لێ د ڤی دەمی دا و د نە ئامادەبوونا مام جەلالی دا کاریگەریەکا گەلەک خراب دێ ل د دووڤ خوەدا ئینیت”.
سالار زێدەتر دبێژیت” ئەم ھەموو دزانین جودابوونا بالێ (ریفۆرم) و چوونا دەرڤە یا وان ھەموو سەرکردە و کادرێن ئێکەتیێ، چ زیان ب ئێکەتیێ گەھاند، ھەرچەندە ژی نەوشیروان موستەفای رێزەکا تایبەت یا ھەی ل دەف ئێکەتیان، چونکی دیرۆکەکا دوور و درێژ یا ھەی و بەرپرسیارەتیا بلند ل تەنیشت مام جەلالی ھەبوو، بەلێ برنا کێشە و بەرنامێن ئێکەتیێ بۆ بەردەستێ وی ژبۆ چارەکرنا وان ب نە رەوا دبینم، ژ بەر کو ئێکەتی و گۆڕان دو حزبێن جودانە، ئێکەتیێ ژی ھێشتا ئەو شیان یێن تێدا ماین کو بشێت خوە ب خوە ئیدارە بکەت و ب خوە چارەسەریا گرفتێن خوە بکەت، لەوما ژی ماف نینە گازندە ژ نەوشیروانی بھێتە کرن بۆ پێشوازی و سەرەدانا ھەر کەسەکێ دچیتە دەف وی، بەلکو پێدڤیە دناڤ خوەدا بزڤرین بۆ دەستپێکان و گیانێ رەخنە و رەخنە ل خوە گرتن بھێتە پەیرەوکرن”.

ئەڤرۆ نیوز:
جێگرێ سکرتێرێ حزبا شیوعی یا کوردستانێ ئاشکراکر کو مەرج نینە پارتا خودان کورسی پرۆژێ وێ باشتر بیت و دبیت لایەنەکێ سیاسی دو کورسی ھەبن و پرۆژێ وێ پتر یێ وەرگرتی بیت ژلایێ پارتێن سیاسی ڤە.
د.کاوە مەحمود جێگرێ سکرتێرێ حزبا شیوعی یا کوردستانێ دداخۆیانیەکێ دا بۆ رۆژناما ئەڤرۆ، ھیڤی خواستن کومبوونێن پێنچ قۆلی بەرھەم ھەبیت ددەمەکی دا کو چەمکێ سازانا نیشتیمانی بەرفرەھترە ژ ھەر پێنچ پارتێن سیاسی و دڤێت ھەموو پارتێن سیاسی پشکداربن و ھەموو لایەن پرۆژان پێشکێش بکەن، پرۆژێن سیاسی پەیوەندی ب ھژمارا کورسیکان ڤە ل پەرلەمانی نینە، دبیت لایەنەکی پتر ژ ٢٠ کورسی ھەبن و پرۆژە ھەبیت و دبیت لایەنەکی دو کورسی ھەبن پرۆژێ وی باشتر بھێتە وەرگرتن، قەیرانا نوکە پێدڤی ب پرۆژەکی یە کو ھەموو لایەن پێکڤە بھێنە کۆمکرن، نە پرۆژەک بیت ھەڤرکی پتر بھێتە خورتکرن.
د. کاوە مەحمود ھێشتا گوت” ھەکە دڤان کاودانان دا پارتێن سیاسی ھاریکار و پشتەڤان نەبن بۆ دیتنا چارەکێ بۆ قەیرانا سیاسی، ئەڤ قەیرانە دێ کوورتر لێ ھێت و چارەنابیت، چارە ئەوە دڤێت پارتێن سیاسی خوە پتر نێزیکی ئێک بکەن و باوەریا چارەسەریێ ھەبیت دا بگەھنە ئەنجامەکی، ھەکە نە گەھشتنە چو ئەنجامان، باشترین ھەلبژارتنێن پێشوەختن”.
ب دیتنا د. کاوەی، دڤێت بریارەکا نشتیمانی یا سەربەخوە ھەمبەر کێشا سەرۆکاتیا ھەرێما کوردستانێ بھێتەدان و ھەموو بزاڤێن مە ئەو بن بگەھینە رێککەفتنەکێ و چارەسەریا کێشێ بھێتە دیتن و دوور بکەڤین ژ مایتێکرن و دەستێن دەرەکی”.

ئه‌ڤرۆ نيوز:

ئه‌ڤرۆ روونشتنه‌كا دى يا ئاسايى يا په‌رله‌مانێ كوردستانێ ل دۆر په‌يره‌وێ ناڤخۆ ده‌سپێكر و ژ به‌ر هه‌ڤركيا په‌رله‌مانتاران روونشتن هاته‌ راگرتن.

ب گۆره‌يى ئه‌و پێزانينێن ل به‌ر ده‌ستێ ئه‌ڤرۆ نيوز، هه‌ڤركيا په‌رله‌مانتاران ل سه‌ر ئاستێ فراكسيۆنان نينه‌ و په‌رله‌مانتارێن ناڤ هه‌موو فراكسيۆنان يێن د ناڤ دا و يێن بووينه‌ دو به‌ره‌.

هه‌ر ب گۆره‌يى وان پێزانينێن ئه‌ڤرۆ نيوز هنده‌ك ژ په‌رله‌مانتاران دخوازن ژماره‌كا په‌رله‌مانتاران د ناڤ په‌يره‌وى دا بهێنه‌ ده‌ستنيشانكرن يێن ده‌ڤه‌رێن كوردستانى يێن ده‌رڤه‌يى ئيدارا هه‌رێمێ و هنده‌كێن دى ژى دخوازن كو ئه‌ڤ پرسه‌ د قانوونا هه‌لبژارتنان دا بهێته‌ ئێكلاكرن.

ئەڤرۆ نيوز:
پەیڤدارێ وەزارەتا پەروەردێ ل حوکمەتا ھەرێما کوردستانێ دیار کر کو ئەو قوتابیێن پۆلا 12 ئامادەیی یێن دەرچووین و تێکرایێ وان یێ کێم بیت، دشێن سالا بھێت ئەزموونان دوبارە ئەنجام بدەن، ئەگەر نمرێن باش ئینان دێ بۆ ھێنە ھژمارتن بەروڤاژی ھەر نمرێن دەستپێکێ دێ بۆ ھێنە ھژمارتن.
فاتح مەولەوی زادە، پەیڤدارێ وەزارەتا پەروەردێ ل حوکمەتا ھەرێما کوردستانێ ڕاگەھاند، سالا بۆری وەزارەتا پەروەردێ بڕیارەک دەرخستبوو کو ھەر قوتابیەکێ پۆلا 12 ئامادەیی تێکرایێ کێم ب دەست خوەڤە ئینابیت، دشێت ئەزموونان دوبارە ئەنجام بدەت، ئەگەر نمرێن باش ئینان دێ بۆ ھێنە ھژمارتن بەروڤاژی ھەکەر ھەر نمرێن کێم ئینان دێ نمرێن دەستپێکێ بۆ ھێنە ھژمارتن و بۆ مالپەرێ فەرمیێ پارتی دیموکراتی کوردستان گۆت: “بۆ ئەڤ سالە ژی ئەڤ بڕیارە ب ھەمان شێوێ سالا بۆری دێ یا بەردەوام بیت”.
ئاماژە ب وێ چەندێ ژی کر، مەرەم ژ ڤێ بڕیارێ ئەوە، دلیڤە ب قوتابی بھێتە دان کو پتر خوە ب وەستینیت و تێکرایەکێ باشتر ب دەستخوە ڤە بینیت، دا کو شانسەکێ باشتر ھەبیت کو ل زانکۆ و پەیمانگەھان بھێتە وەرگرتن.
پەیڤدارێ وەزارەتا پەروەردێ خویا ژی کر، ل دووڤ وێ بڕیارێ ئەو قوتابیێ بڤێت دوبارە ئەزموونان بکەت، دڤێت ئەزموونێن دەرەکی ئەنجام بدەت و نەشێت ل قوتابخانێ دەوامێ بکەت.

ئه‌ڤرۆ نيوز:

بڕياره‌ ئه‌ڤرۆ ل به‌رى نڤيرۆ كۆمبووما مه‌كته‌با سياسى يا پارتى ديموكراتى كوردستان بۆ دانوستاندنێ ل سه‌ر پرۆژێ چار پارتێن سياسى ده‌سپێبكه‌ت.

ب گۆره‌يى پرۆژێ هه‌ر چار پارتێن سياسى “گۆڕان، ئێكه‌تى، يه‌كگرتوو و كۆمه‌ل” پێدڤيه‌ يان سه‌رۆكێ هه‌رێما كوردستانێ ژ لايێ په‌رله‌مانى ڤه‌ بهێته‌ هه‌لبژارتن ب ده‌سته‌لاتێن وى يان ژى سه‌رۆك ژ لايێ وه‌لاتيان ڤه‌ بهێته‌ هه‌لبژارتن و يێ بێ ده‌سته‌لات بيت.