ئەڤرۆ نیوز:
ھەکە زارۆیەک چەند یێ زیرەک بیت، ب تنێ زارۆیێ مامۆستایەکی ل ھەمان پۆل بیت، دڤێت زارۆیێ مامۆستایی سەرکەفتیێ ئێکێ بیت و چەند زارۆیێن مامۆستا ھەبن ھەموو ل دووڤ ئێک دھێن ژ نوو رێ بۆ زارۆیێن دی دھێتە دان، د ڤێ دووڤچوونێ دا مامۆستا و سەرپەرشتیارێن پەروەردێ دانپێدانێ دکەن ئەڤ دیاردە ھەیە.
مامۆستا سەلیم ئیبراھیم، مامۆستایێ زمانێ ئنگلیزی ل قوتابخانا بەھدینان بۆ ئەڤرۆ دیار کر، دەمێ ھاتیمە ڤەگۆھاستن بۆ قوتابخانا بەھدینان ل سالا 2006، کۆرێ من ل پۆلا چارێ بوو ل ھەمان قوتابخانە، ھەتا من ل پۆلا شەشێ ژ وێ قوتابخانێ دەرباز بووی، چو مامۆستایەکی نەزانی ئەو کورێ منە، چونکو ئەز دبینم دێ بیتە جوداھی و ھەکە من کۆرێ خوە دانا سەرکەفتیێ ئێکێ، وی دەمی دێ مافێ کەسەکێ دی خوم.
ھەمان مامۆستا گۆت: دبینم زارۆیێن ماموستایا نە ھەموو، بەلێ پا 90%سەرکەفتیێن ئێکێ نە ل وێ قوتابخانا دایک یان بابێ وان لێ، دبینم زارۆیێ مامۆستای کارتێکرنێ ل مامۆستایێن دی ژی دکەت، دەمێ دھێتە د کارگێریێ ڤە ل دەف بابێ خوە یان دایکا خوە یا ماموستا.
عیسام عوبێد سەرپەرشتیارێ پەروەردەیی ل پەروەردا قەزا سێمێلێ ل دۆر بابەتی گۆت: ھندەک مامۆستا ھەنە، ئەوێن زاڕۆیێن وان ل قوتابخانێن وان، نەخاسمە ل پۆلێن دەستپێکێ، دەمێ ئەنجامێن دووماھیا وەرزی بەلاڤ دکن، نمرێن زێدە ددەنە زاڕۆیێن خوە دا ببنە یێن ئێکێ ل سەر پۆلێن خوە، ئەڤە ژی نێزیکە ببتە دیاردە و کارتێکرنەکا خراب ل دەروونێن قوتابیێن دی یێن زیرەک دکەت. ب راستی گەلەک جاران گازندە ژ کەس و کار و سەمیانێن ھندەک قوتابیان گەھشتینە مە، کو غەدر ل زارۆیێن وان بوویە.
سەرپەرشتیارێ پەروەردەی ھێشتا گۆت: بۆ نەھێلان ئان کێمکرنا ڤێ دیاردەیێ، پێدڤیە مامۆستا خوە دووربکەن ژ ڤێ رەفتارا کرێت و ھەموو قوتابیان وەک زاڕۆیێن خوە ب ھەژمێرن و جودایێ د ناڤبەرا وان دا نەکەن، ھەروەسا دڤێت رێڤەبەرێ قوتابخانێ ژی گەلەک ھشیاری ڤان حالەتان ببت و ئەو دێ ژ ھەر کەسەکی دی باشتر شێت ڤێ دیاردێ ل قوتابخانەیا خوە بنبڕبکەت.
زێدەتر گۆت: ھەر کەسێ گازندەک ل سەر رەفتارەکا وەکی ڤێ ھەبیت، بلا پەیوەندیێ ب رێڤەبەرێ قوتابخانێ بکەت و ھەکە وی چو بۆ نەکر، دشێت وەک سکالا ئان ژی ب ھەر شێوەیەکی ھەبیت، پەیوەندیێ ب رێڤەبەرێ پەروەردەیا وێ قەزایێ بکەت و گازندا خوە بگەھینیت، چونکو رێڤەبەریا پەروەردێ پێزانینێن تەمام ل سەر ھەموو حالەتێن ژ ڤی جۆری نینن و پێدڤیە سەمیانێن قوتابیان پتر ھاریکار ببن و پەیوەندیێن وان دگەل قوتابخانە و پەروەردەیێ بەردەوام و موکۆمتر بن.
وەھبی یونس تێلی سەرۆکێ لقێ دھۆک یێ ئێکەتیا ماموستایێن کوردستانێ ل دۆر بابەتی گۆت: ل گەل ڤێ دیاردێ نینین مامۆستا جوداھیێ بێخیتە د ناڤبەرا زارۆیێن خوە و زارۆیێن دی و نمرا بدەتە زارۆیێن خوە دا بکەتە سەرکەفتیێن ئێکێ و دویێ و مامۆستایێ ڤی کار دکەت ئەم ناھەژمێرین مامۆستا، لێ دبینم کێم مامۆستا ھەبم ب ڤی رەنگی و ھەکە ھەبن ژی رێڤەرێ قوتابخانێ دشێت وی مامۆستای نەدانیتە وی کەرتێ تاقیکرنێ.
پەروین مەجید ئەنداما لژنا پەروەردێ ل جڤاتا پارێزگەھا دھۆکێ ل دور بابەتی گۆت: ئەڤ چەندە ھەیە، لێ نەبوویە دیاردە و نموونێن دەرخستنا زارۆیێن خوە ل سەر کیستێ ئێکێ دی ھەنە ل قوتابخانان لێ نەبوویە دیارەدە و مامۆستا ھەنە کەیفا وی ب وی زارۆکی دھێت یێ ژ زارۆیێ وی زیرەکتر د پولێ دا.
پەروینێ گۆت ژی: ئەڤە تشتەکێ گەلەک شاشە، گونەھا وی زارۆی چیە دایک یان بابێ وی نە مامۆستا بیت، ھەکە کی ڤی کاری بکەت دڤێت مامۆستا ڤی کاری نەکەت و خوە مەزنتر بیت ژ ڤێ چەندێ، چونکو مامۆستا یێ جڤاکەکی ئاڤا دکەت.