ئه‌ڤرۆنیۆز، ئه‌یاد به‌روارى
ژێده‌ره‌كی ژ به‌غدا بۆ (ئه‌ڤرۆنیۆز) دیاركر كو وه‌لاتیێن عیراقی ئه‌وێن رۆژا ئه‌ینى پشكدارى د خوه‌نیشاندانێن به‌غدا دا كری دژى گه‌نده‌لیێ، ب شێوه‌كێ به‌ربه‌لاڤ وێنێن شیره‌تكارا ئه‌لمانیا (ئه‌نگیلا مێركل) بلندكرن وسۆپاسیا هه‌لویستێن وێ به‌رامبه‌ر په‌نابه‌ران كر.
محه‌مه‌د جبورى رۆژنامه‌ڤان ژ به‌غدا بۆ ئه‌ڤرۆ نیۆز گوت” ئه‌ڤرۆ خوه‌پیشاندانێن مه‌یدانا ته‌حریر ل به‌غدا د به‌رده‌وامبوون دژی گه‌نده‌لیێ دناڤ حوكمه‌تا عیراقێ دا و د چارچۆڤێ وان خوه‌پیشاندانان دا وێنێن میركلی ژی ب به‌ربه‌لاڤی دهاتنه‌ دیتن وه‌كو سۆپاسیه‌ك بۆ هه‌لویستێ وێ”.
جبوری گوت ژی” چو وه‌لاتیێن عیراقی ل به‌غدا باوه‌ری ب چاكسازیێن سه‌رۆك وه‌زیران عه‌بادی نینه‌ و هه‌موو دره‌ون و هه‌تا نوكه‌ چو پێنگاڤێن چاكسازیێ نه‌هاتینه‌ هاڤێتن”.
ل دۆر پرسا كوچبه‌ریێ ژ به‌غدا بۆ ئورۆپا گوت” كوچكرن گه‌له‌ك یا به‌ر به‌لاڤبووى و رۆژانه‌ ب ده‌هان وه‌لاتی ب تایبه‌تی گه‌نج دچن و ئه‌ڤرۆ ب تنێ 10 گه‌نج ژ تاخێ مه‌ چوون و ئه‌م ل جاده‌یان هه‌ست دكه‌ین كو قه‌ره‌بالغ ژی وه‌كو به‌رێ نه‌مایه‌ و ئه‌ز ب خوه‌ ژی ل گه‌ل پێنج رۆژنامه‌ڤانێن دی دێ به‌ر ب ئورۆپا چین”.

ئه‌ڤرۆ نیوز، ئه‌یاد به روارى
سه‌رۆك وه‌زیرێن هه‌رێما كێبك یا كه‌نه‌دی به‌رهه‌ڤیا هه‌رێما خوه‌ بۆ پێشوازیا ب هزاران په‌نابه‌رێن سووری كر.
فیلیب كوبار سه‌رۆك وه‌زیرێن هه‌رێما كیبك یا كه‌نه‌دی بۆ ئاژانسا (فرانس پرێس) گوت” كاره‌ساته‌ ئه‌م پێدڤی ب وێنه‌كێ زارۆكه‌كێ خه‌ندقی د ده‌ریایێ دا بین هه‌تاكو وژدانا مه‌ ب لڤینیت” وه‌كو ئاماژه‌ك بۆ وێنێ وی زارۆكێ كوردێ سووری یێ خه‌لكێ كوبانی ئه‌وێ ل سه‌ر لێڤێن كنارێن توركیا خه‌ندقی و وی وێنه‌ی جیهان هه‌موو هه‌ژاندی.
هه‌رێما كیبك یا كه‌نه‌دی ل سالا 2015 ێ پێشوازی ل 640 په‌نابه‌رێن سووری یا كری و هه‌تا 24 مه‌ها ته‌باخا بۆری كه‌نه‌دا پێشوازی ل 1074 په‌نابه‌رێن سووری كربوو ژ هژمارا 10 هزار په‌نابه‌رێن سووری كو كه‌نه‌دا سۆز دای دده‌مێ سێ سالان دا وێ هژمارا په‌نابه‌ران وه‌رگریت ل دووڤ داخویانیا وه‌زاره‌تا كوچبه‌ریا كه‌نه‌دی.

ئه‌ڤرۆ نیۆز، قائید میرۆ
ژ ئه‌گه‌رێ بۆردومانا فڕۆكه‌یێن هه‌ڤپه‌یمانان ل ناحیا حه‌مام عه‌لیل یا باشوورێ مووسڵ حه‌فت چه‌كدارێن داعش هاتنه‌ كوشتن و دو ترۆمبێلژی هاتنه‌ ژناڤبرن.
ژێده‌ره‌كێ ئاگه‌هدار ب مالپه‌ڕێ ئه‌ڤرۆ نیۆز راگه‌هاند” فڕۆكه‌یێن شه‌ڕكه‌رێن هه‌ڤپه‌یمانان باره‌گایێ داعش ل گوندێ ئه‌بولسه‌یف یێ گرێدایێ ناحیا حه‌مام عه‌لیل یا باشوورێ باژێڕێ مووسڵ بۆردومانكرن و د ئه‌نجامدا حه‌فت چه‌كدارێن داعش هاتنه‌ كوشتن و دو ترۆمبێل ژی هاتینه‌ ژناڤبرن.
ژێده‌ری گۆتژی” ل چیایێ باشیك ژی هێزێن پێشمه‌رگه‌ی بنكه‌ و باره‌گاییێن تیرۆرستێن داعش ل ناڤا سه‌نته‌رێ ناحیا باشیك بۆردومانكرن و د ئه‌نجامدا هژماره‌ك چه‌كدارێن داعش برینداربووینه‌ و ترۆمبێله‌كا بارهه‌لگرژی هاتیه‌ سووتن.