ئه‌ڤرۆ نيوز:

پشتى كۆمبوونا شاندێ پارتى ديموكراتى كوردستان ل گه‌ل حزبا ديموكراتا ئاشوورى د كۆنگره‌كێ رۆژنامه‌ڤانى دا نێچيرڤان بارزانى راگه‌هاند كو ئه‌ڤا نوكه‌ پارتى ژ بوو قانوونا سه‌رۆكاتيا هه‌رێما كوردستانێ بۆ شه‌خسێ مه‌سعود بارزانى نينه‌، به‌حس ل رۆلێ بارزانى ژى دكه‌ت د شه‌رێ دژى داعش دا.

نێچيرڤان بارزانى، سه‌رۆكێ حكومه‌تا هه‌رێما كوردستانێ د كۆنگره‌كێ رۆژنامه‌ڤانى دا كو ئه‌ڤرۆ رۆژا چارشه‌مبى رێكه‌فتى 8ى تيرمه‌ها 2015ێ ئه‌نجام دا به‌حس ل وێ چه‌ندێ كر كو ئه‌و قووناغا نوكه‌ وه‌لات تێدا دبۆريت ژ هه‌موو لايان ڤه‌ پێدڤى ب دانوستاندنێ هه‌يه‌ و دڤێت ب دانوستاندنێ بهێنه‌ چاره‌كرن.

ئاماژه‌ ب وێ چه‌ندێ ژى كر كو هه‌كه‌ به‌حس ل ده‌سته‌لاتێن سه‌رۆكێ هه‌رێمێ دكه‌ن و دبێژن دزێده‌ نه‌، بلا ب دانوستاندن چاره‌ بكه‌ن و گۆت: “ئه‌و دبێژن بلا سيسته‌مێ سياسى وه‌كو يێ عيراقێ لێ بهێت و ئه‌و نه‌ سيسته‌مه‌كێ ب رێك و پێكه‌، هه‌موويان ژى ديت مالكى ب ده‌سته‌لاتێن خوه‌ چ كر”.

نێچيرڤان بارزانى گۆت: “نوكه‌ ئه‌م 1100 كيلۆمه‌تران يێ د شه‌رى دا ل گه‌ل چه‌كدارێن داعش و شه‌رێ ڤێ دووماهيێ مه‌ حه‌فت شه‌هيد دان و نوكه‌ مه‌سعود بارزانى بۆ ديتنا به‌ره‌يێن شه‌رى و روونشتن ل گه‌ل فه‌رماندێن كه‌ركووك يێ ل وى باژێرى.

جێگرێ سه‌رۆكێ پارتى به‌حسێ رۆلێ سه‌رۆكێ هه‌رێما كوردستانێ كر و گۆت: “هه‌كه‌ ماوێ ئێك سالا شه‌رێ دژى داعش به‌حس بكه‌ين بزانين ئه‌ڤى به‌رێزى كو ئه‌ڤرۆ ئه‌ڤ به‌رپرساتيه‌ ل سه‌ر ملێن وى وه‌كو سه‌رۆكێ هه‌رێما كوردستانێ چه‌ند رۆژان ل مالا خوه‌ نڤستيه‌؟ ئه‌وا ئه‌ڤرۆ سه‌رۆكێ هه‌رێما كوردستانێ دكه‌ت، به‌رپرساتيا خوه‌يه‌ وه‌كو سه‌رۆكێ هه‌رێما كوردستانێ و دڤێت يێ به‌رده‌وام ژى بيت”.

ئه‌ڤرۆ نيوز:

بریاردەرا لیژنا باژێرڤانیان ل جڤاتا پارێزگەھا دھۆکێ راگەھاند، رێژا کەسکاتیێ ل زاخۆ ب پۆینتانە، گۆمان ھەیە ١% بیت، راگەھاند باژێرڤانی و قایمقامێ نۆکە یێ زاخۆ گەلەک خەمساریێن مەزن د دەرحەقێ باژێری دا کرینە و ئاشکرا کر، ٤٧ مساتەحە ب رێیێن نە قانوونی کرین و فرۆتن پێ ھاتیەکرن.

دلمان سندی، بریاردەرا لیژنا باژێرڤانی و خزمەتکاریێن گشتی ل جڤاتا پارێزگەھا دھۆکێ بۆ رۆژناما ئەڤرۆ دیار کر، د سالێن بۆری و نۆکە دا، باژێرڤانێ بەری نھۆ و قایمقامێ نۆکە یێ زاخۆ خەمساریێن مەزن د دەرحەقێ باژێری دا کرینە، گەلەک کارێن نەدروست ھاتینە کرن و پشتی ھینگێ ھاتینە راوەستاندن و گۆت: بۆ ئاڤ و پێ دانا کارەبێ و کێشا موەلیدان، رێژا کەسکاتیا رێک و پران و ئاڤ و سۆلینان و قایمقام بەرپرسێ ئێکێ یێ ئیداری یە، چو چارەسەریێن باش مە ل دەف نەدیتن، بھانە نینن بۆ خوە بگرن کو بێژن کارێ وان چاڤدێریکرنە، نموونە رێژا کەسکاتیێ یا خرابە، ئەرێ گەشتیار و قایمقام و جڤات و پارێزگەە پێ بەرپرس نینن، لێ ھەر ئێک کێشەیێن خوە دئێخیتە د ستویێ یێ دن دا، لەورا ژی پێشکەفتن درۆست نابیت، ل دووماھیێ ئەم ھەموو تەمامکەرێن ئێکدوینە.
د ئەڤرۆ دا، ھەکە کەمتەرخەم بن، بۆچی ھەتا نھۆ جڤاتا پارێزگەھێ گازی نەکریە وان، ناڤبری سەدەم ڤەگەراند کو دڤێت دەنگدان د ناڤ ئەندامێن جڤاتی دا ل سەر بھێتە دان، ھەتا نھۆ قایمقامێ زاخۆ و ئاکرێ نەھاتینە گازیکرن و گۆت: ھەتا نھۆ بەرپرسێن زاخۆ چو بوو دەڤەرێ نەکرینە، راستە قەیرانا دارایی یە، لێ بلا ئەم کێشەیێن خوە نەکەینە د ستوویێ پارێزگاری و جڤاتێ دا، چونکۆ ئەڤە ٢٤ سالە بەرپرس و رێڤەبەر یێ دام و دەزگەھێن حوکمەتێ برێڤە دبەن و ئەڤە بھانەیە بۆ خوە دگرن، چونکۆ دزانن حوکمەت ژی گەلەک پالپشت و پشتەڤانێ زاخۆ یە، لێ وە چو پرۆژێن پێدڤی بۆ دەڤەرێ پێشنیازێن د جھێ خوە دا نەکرینە.
پشتی بریارا سەرۆکی ل دۆر راوەستاندنا مساتەحان، بریاردەرا جڤاتێ د وێ باوەریێ دا نەبوون ھەتا نھۆ ژی کرین و فرۆتن پێ نەھێتە کرن، ل گۆرەی گۆتنێن وێ ٦٥ مساتەحە ل زاخۆ ھەبوون، لێ ٤٧ ژ وان رێیێن نەقانوونی گرتبوونە بەر، ئەو ژی ھندەکان بۆ کارەکێ ب رێیا سەرئێکێمکرنێ وەرگرتبوون، کرین و فرۆتن پێ ھاتیەکرن، ب تنێ ١٧ ژ وان دروست بوون، لێ د ماوەیێ بجھئینانێ دا پرۆژێ سەرۆکاتیا ھەرێمێ راگرتیە و گۆت: پرۆژێ تۆنێلا گەلیێ زاخۆ ژی نھا ھاتیە راوەستاندن، و ھەمزز پرۆژە ل دەڤەرێ راوەستاینە، ب تنێ ئەندەرپاسا سەرێ گۆندکی کار ل سەر دھێتە کرن، ھەروەسا دو سایدێ بۆ تۆنێلێ، کۆمپانیا ژ دەف خوە بجە دئینیت.
پێشنیاز ھاتیەکرن پرۆژێ پاقژیا باژێرێ زاخۆ ژ کۆمپانیا ئەرتۆش بھێتە ستاندن، لێ ھندەک پالدەر ل پشت ھەبوون سەر نەگرت، دلمان تەکەست کر، دووڤچوونا مە ل گەل ئەندامێن دن یێن باژێرڤانیێ پێدڤی بوو وەرگرتنا پاقژیا باژێری ژ کۆمپانیا ناڤبری بھێتەکرن، نزانین باژێرڤانیێ جھەکێ دی داخوازکربوو کو پرۆژە بگەھیتێ، ئەم دبێژین ئەو ژ دەرحەقێ زاخۆ دەرنەکەفتیە، ھەکە ل ھندەک قەزایێن دن سەرکەفتی بن، ئەم دبێژین ژ بەر بەردەوام غەدرێ ل مە دکەن، دێ غەدرێ بەردەوام ژی کەن، و باژێرڤانیا زاخۆ و یا گشتی ژی حەز دکرن پرۆژە بگەھیتە وان، کێشەیا قانوونی ئەوە د سەرئێکمکرنێ دا بۆ کەفتیە.
رێژا کەسکاتیێ ل زاخۆ ١% یە، جڤاتا پارێزگەھێ باوەری ٠% ژی پێ نینە کو کەسکاتی د ناڤ دا ھەبیت، خۆیا کر، گەشتوگوزارێ ھەر نینە، پرۆژێن نھۆ ژی کرین بۆ ھندێ بوو دا ھەیبەت و ناڤێ خوە پێ ھەبن، باخڤن و بێژن دۆرێن پرا دەلال، لێ مە گەلەک تشتێن ژ ڤێ گرنتر ھەنە، چاڤدێری ل سەر ناھێتەکرن و گۆت: کێشێن باژێرڤانیا زاخۆ سەرپیچێکرن ب پلا ئێکێ دھێت، ھەروەسا جادە، رێژا کەسکاتیێ باژێرڤانی دبێژیت ١% یە، مە باوەری نینە، کو سفر پلە ژی بیت، ئانکو ب پۆینتانە، ئەو دارۆبارێن دچینن ژی ب چاڤدێریکرنێ خەمساری تێدا دھێتە کرن.
بریاردەرا لژنا باژێرڤانیا ب دلگرانی ڤە دیار کر، وان چو پرۆژە پێشنیاز نەکرینە، ژ بەر پرۆژێن سالێن ٢٠١٣ و ٢٠١٤ ب نیڤەرۆ ماینە و گۆت: ب دەستکاربوونا مە ئەم ب سەر مالەکا وێران دا چووین، قەیران ل دووڤ قەیرانێ، ئەم ماوەیێ ھەشت ھەیڤان ماینە کارێ ئاوارەیان ڤە، ئەڤە پرۆژێن سالا ٢٠١٥ ژی کەفتنە سەر، ئەم گازندا ھندێ ژی دکەین ل باژێرڤانیان ژی غەدر ل زاخۆ دھێتەکرن، ھەکە ل دووڤ رێژا ئاکنجیبوونا خەلکی بیت ژ چو قەزایێن پارێزگەھا دھۆکێ کێمتر نینین، ھەڤبەرکرنا باژێری ژی بیت دڤێت ل دووڤ مەزنی و بچووکیا خەلکێ دەڤەرێ کێشان و پیڤان پێ بھێتە کرن.