ئه‌ڤرۆ نيوز:

ئەو زارۆیێن د سالا ئێکێ یا ژیێ خوە دا سەنگێ خوە یێ درۆست وەرنەگرن ئەو پتر تووشی نەخوشیێن دلی دبن ل پاشەرۆژێ و ئەڤ چەندە ژی یا دیاربوی د ڤەکولینەکێ دا کو ھاتبوو کرن ل دور کارتێکرنا خوارنا زوو دەم ل سەر نەخوشیێن دلی ل دەڤ مەزنان.
پشتی سالا ئێکێ دیاردبیت کو ئەو زارۆیێن دبن سەنگێ سروشتی دا ژدایک دبن و زوو سەنگێ خوە ڤەدگەرینن ڤە ئەو پتر د بەرھەڤن تووشی نەخوشیێن دلی ببن ل پاشەرۆژێ.
ئەنجامێن ڤەکولینێ پێشنیاز دکەن کو خوارنا دروست و تیتالێن باش یێن خوارنێ ل زاروکینیێ شیان ھەنە زارۆکی ژ نەخوشیێن دلی دوور بکەن.
ل دووڤ ڤان ئەنجامان ئەریکسون ڤان پەیڤان وەکو شیرەت پێشکێشی دایبابان دکەت” گەلەک یا گرنگە دایباب سەنگێ زارۆیێن خو ڤەگەرینن و ب تایبەت یێ وان زارۆیێن کو ل دەمێ بوونێ سەنگێ وان یێ کێم و ئەڤە تشتەکێ نورمالە، بەلێ ئاریشە ئەوە ل دەمێ کو بەردەوام سەنگێ زارۆکی زێدەدبیت و گەلەک یا گرنگە پشتی سەنگێ زارۆکی زڤری ڤە دماوێ شیردانێ دا ئێدی نەھێلن زارۆیێن وە قەلەو ببن.
ئەریکسون و تیمێ خۆ رابوون ب ڤەکولینەکێ ل سەر چوار ھزار زەلامان کو ٣٥٧ ژوان ژ ئەگەرێ نەخوشیێن دلی گیانێ خۆ ژدەست دابوو و تیمێ وان دیارکر کو ئەو زەلامێن ژبەر نەخوشیێن دلی گیانێ خۆ ژدەست داین ھەموو ئەوبوون کو ل دەمێ ژنوو ژدایک بووین سەنگێ وان گەلەک یێ کێم بوو و ھندی دایبابێن وان چاڤدێریا وان دکر لەورا قەلەو ببوون و ل دووماھیێ تووشی نەخوشیێن دلی ببوون.

ئه‌ڤرۆ نيوز:
پتریا نەخوشێن ل دھۆکێ ئیدمان ھەی ب کەرستەیێن کحولی و دەرمانێن دژی ئالوزیێ وەکو ڤالیومی و گەلەک پێکھێنەرێن دی، ھەروەسا ل مال ژی ھندەک جارا جورێن سپرەیان و بویاغان و سیکوتین و پانزین ژی دبنە ئەگەرێ ئیدمانێ، و دڤێت دەستێ خوە بۆ وان نەخوشان درێژبکەین داکو ژ ڤێ ئاریشێ قورتال بکەین و پتریا نەخوشان بەری بچنە لایێ نوشداری ئێکی فرێدکەن و تەئکید دکەن کا وان گرێدان ل گەل پۆلیسان ھەیە یان نە؟
د.یوسف عەلی یاسین، تایبەتمەندێ نەخۆشیێن دەروونی دیارکر کو پتریا نەخوشێن ل دھۆکێ ئیدمان ھەی ب کەرستەیێن کحولی و دەرمانێن دژی ئالوزیێ وەکو ڤالیومی و گەلەک پێکھێنەرێن دی و دیسان ل سەر دەرمانێ ئارتان ئەوژی دەرمانەکە بۆ نەخۆشێن بارکنسیون دھێتە ب کارئینان، ھەروەسان ھندەک دەرمانێن وەکو ترامالێ ژی ئیدمانێ چێدکەن کو بۆ ئێشانا گولچیسکا و دلی و پشتئێشانێ دھێنە ب کارئینان، ھەروەسا تریاک ژی گەلەک یێ مشەبووی کو خەلکەک ل ڤێ دووماھیێ ب کاردئینیت و ئیدمان بۆ پەیدادبیت، ھەروەسان کەرستەیێن مالژی ھندەک جارا جورێن سپرەیان و بویاغان و سیکوتین و پانزین ژی ھندەک کەس ھوی دبنێ و بەردەوام ب کاردئینن.
دیارکر ژی کو نەخوشێن مخدراتان نەوێرن قەستا نوشداران بکەن، چونکو ژلایێ قانوونی ڤی گەلەک دووڤچۆن یا ل سەر ھەی و د ترسن نەکو نوشداران دەست ل گەل لایەنێن قانوونی ھەبیت و گۆت: چو راستی بۆ ڤێ چەندێ نینە و ئەم کارێ خوە دکەین وەکو ئەو کەس نەخوشەکە و پێدڤی ب ھاریکاریێ ھەیە داکو وی کاری ئەنجام نەدەت، ھەروەسان گەلەک کارتێکرنێن جڤاکی و کاری ل سەر دبن و من نەخوشەک ھەبوو دھاتە کلینیکێ داکو بشێت ژ ئیدمانێ قورتال ببیت، بەلێ دەمێ وی داخوازا راپۆرتێ ژ من کری خواست ئەز بەحسێ وێ چەندێ نەکەم، چونکو دا ژ کاری ھێتە دوورخستن، دڤێت ئەم دەستێ خوە بۆ وان نەخوشان درێژبکەین داکو ژ ڤێ ئاریشێ قورتال بکەین و پتریا نەخوشان بەری بھێنە دەڤ مە ئێکی فرێدکەن و تەئکید دکەن کا مە گرێدان ل گەل پۆلیسان ھەیە یان نە و پاشی دھێنە دەڤ مە.
د.یوسف عەلی دیارکر ژی کو دناڤ جڤاکێ مەدا چ ئامار و داتایێن ھووربین ل سەر ب کارئینانا وان نینن و بۆ چارەسەریێ، پێدڤیە دەرمانێن نەخۆشیێن دەروونی بێی نوشداری نەھێنە ب کارئینان داکو ئیدمان بۆ پەیدانەبیت و گۆت: مخابن گەلەک دەرمان ل دووڤ رێکێن زانستی ناھێنە ب کارئینان و ھندەک نەخوش ژ ئەنجامێ ئیدمانێ بووینە ئەگەرێ وێ چەندێ زیانێن مادی بگەھنە نەخوشی.
دەربارەی چارەسەریێ ژی دیارکر کو چارەسەری دەستپێدکەت ژ وی کەسی کا چەند حەز دکەن چارەسەرببن و گەلەک نەخۆش قەستا کلینیکا و نەخوشخانەیان دکەن داکو دەرمانی وەربگرن نەکو دا چارەسەرببن، و ئێکەم خال د چارەسەریێ دا پێدڤیە نەخوشی ئیرادە بۆ گوھۆرینێ ھەبیت داکو سەربکەڤیت، دیسان پێدڤیە ل گەل ئیدمانێ ئاریشەیێن دەروونی و جڤاکی ژی بھێنە چارەسەرکرن و گۆتژی: ئەو کەسێ ل دەستپێکێ کەرستەی ب کاردئینیت ھزر ناکەت کو ئەو دێ بۆ وی بیتە ئاریشە و ب شێوەیەکێ نورمال ب کاردئینیت، پێدڤیە چارەسەرکارێ دەروونی باشی و خرابیێن کەرستەی دیاربکەت و پاشی دەست ب گوھۆرینێ بکەت، لەورا ئەڤێ چەندێ پێدڤی ب پلانەکێ ھەیە و نەخوش یێ قایل بیت ل سەر پلانێ، گەلەک جارا نەخوش یێ ل نەخوشخانێ رازاندی و پشتی دەرکەفتی یێ باشبوو، جارەکا دی یێ ڤەگەریایەڤە و ئەوان پتر پێدڤی ب ھاریکاریێ ھەیە.
ھەروەسا دیارکر کو چارەسەرکرنا ئیدمانی دو رێک یێن ھەین و یا ئێکێ ئەوە دەرمان ب ئێکجاری ل نەخوشی بھێتە برین و یا دیتر ھەکە ئەو نەشیا دەرمانی ببریت پێدڤیە ھندەک دەرمانێن دی بدەیێ کو شوونگرێن وی کەرستەی بن کو زیانا وان کێمتربیت و گۆت: ھەتا نوکە ل ھەرێما کوردستانێ چ سەنتەرێن تایبەتمەند بۆ چارەسەریا ئیدمانێ نینن و پێدڤیە ھزر تێدا بھێتە کرن و وەک گرۆپ چارەسەری بھێتە کرن.