ئه‌ڤرۆ نيوز:

پشتێ پشککێشانا خولا عیراقێ و زاخۆ کەڤتیە دکومەکا بزەحمەت دا بەرامبەر شورتە، جەویە، ھەولیری، سیناعە، حدود، مێنا، کەربەلا، نەجەف و بەغداد و پشتی روودانێن ل دەمێ ڤەکرنا یاریگەھا زاخۆ یانێڤدەولەتی ھاتینە پێش و ئێکەتیا تەپا پێ یا عیراقێ بریار دای جەماوەر پێنج یاریا ل یاریگەھی ئامادە نەبیت شارەزا و کەسانێن پسپور ڤێ سزای ب توند دبینن و دێ بیتە جھێ مەترسی چونکو کومەکا بزەحمەتە زاخۆ کەفتیە تێدا.
ل دەستپێکێ دکتور محەمەد سەعید سەروکێ ئێکەتیا تەپا پێ ل پارێزگەھا دھوکێ دبێژیت: بێ گومان سزادانا زاخۆ بڤێ شیوەی غەدرەکا مەزنە، چونکە مەرەم ژ سزادانێ ئەوە تو شاشیەکێ دروست بکەی و ئێکەتیا عیراقێ لێنێرینەکا نوی بکەت د بریارا خوە دا و ژلایەکێ دووڤە، ب تایبەت کو سەروکێ ڤێ ئێکەتیێ کوردە فەرە ڤێ چەندێ ل بەر چاڤ وەگریت و دادپەروەریێ ب چەسپینت و ھەمی شیانا دێ مەزێخین سزایێ ل سەر یانێ بھێتە کێمکرن.
ژلایێ خوە سەروکێ یانا دھوکێ بژار ئێسماعیل دبێژیت: سزایەکی توندە ل سەر یانی و جەماوەری و فەرە
کارگیریا یانا زاخۆ دووڤچونا بابەتی بکەت و سوزنامەکێ بدەنە ئێکەتیا عیراقێ کو ئەف رفتارە دوبارە نەبن و وەکو یانا دھوکێ دێ پشتەڤانیا داخوازێت وان کەین بۆ راکرنا سزای چونکە ئەم ھەردو یانێن ئێک پاریزگەھێ نە وداخازێ ژ کارگێریا یانێ دکەم بریکا کومبونا رەوشەنبیریا وەرزشی لدف جەماوەری پەیدا بکەن.
حسێن سالح جێگرێ سەروکێ یانا زاخۆ ل دۆر ڤێ بابەتێ دبێژیت: نوکە نەشێن جو داخازیا ژ ئێکەتیا عیراقێ بکەین چونکە سەروکێ ئێکەتیا تەپا پێ ل عیراقی سوز دایە مە پشتی بورینا دو یاریا ژ دەستپێکرنا خولا عیراقێ ئەف داخازیە بھێتە کرن داکو سزای ل سەر یانا زاخۆ گیم بکەن.
ل دووماھیێ شروڤەکارەکێ یاریا تەپا پێ ل زاخۆ عەبدولرەحمان سوبحی دبێژیت: نابیت یانا زاخۆ خوە بھێلتە ب ھیڤیا پەیوەندیەکا تەلەفونێ ڤە دگەل سەروکێ ئێکەتیا عیراقێ، چونکو لاوازیا یانا زاخۆ دبەرژەوەندا یانا ھەولیرێ دایە باوەرناکەم سەروکێ ئێکەتیێ بزاڤێ بکەت سزای گیم بکەت و پێدڤیە نڤێسارەکێ بدەتە ڤێ ئێکەتیێ.

ئەڤرۆ:
یانا ئەشبیلیا دێ کەڤیتە ھەمبەر ئاستەنگا ئێکێ ل ڤی وەرزی و ل گەل وەلاتیا خوە بەرشەلونە ئەڤ شەڤە ل دەمژمێر ٩:٤٥ دەقیقە د یاریا کاسا سوپەرا ئوروپی دا ل یاریگەھا بوریس بایشادزە دینامو ئارینا ل تبلیسی پایتەختێ جورجیا.
یانا بەرشەلونە ئەوا ل دووماھیا وەرزێ بوری ناسناڤێن خول و کاسێن ئسپانیا و قارەمانیا ئوروپا برین دێ بزاڤێ کەت دەستکەفتا وەرزێ ٢٠٠٩ ل سەر دەمێ راھێنەر گواردیولای دوبارە بکەت ل گەل ب دەستڤەبرنا ناسناڤێ قارەمانیا کاسا سوپەرا ئوروپی بو جارا پێنجێ و وەکھەڤی نمرا یانا میلان یا ئیتالی بیت و دیسان بەردەوامیێ ب دەتە دەستکەفتان و دووڤدا بەر ب ناسناڤێ کاسا سوپەرا ئوروپی بچیت ل گەل ھەڤرکا خوە یانا ئەتلەتیکو بلباو و گەھشتن ب کاسا یانێن جیھانێ ئەوا دێ ل ئەف سالە ھێتە کرن.
بو ب دەستڤە ھاتنا ڤێ ئارمانج و ھیڤیا بەرشەلونە ئەرکێ راھێنەرێ وێ لویس ئێنریکی یێ ب ساناھی نابیت چونکو ل دەستپێکا وەرزێ نوو یە و دێ کار ل سەر خو جھکرنا پێکھاتی ھێتە کرن و دیسان کارتێکرنا ل یانێ ھاتیە کرن ب ئەگەرا بێ باربونا وێ ژ ئیمزاکرنا ھەڤبەستان ژبەر سەرپێچیا وێ و ئیمزاکرنا ھەڤبەستا یاریکەرێن نەگەھشتینە ژیێ یاسای و زێدەتر ل ھەمبەر وەلاتیا خوە ئەوا بو جارا دویێ یە ل دووڤ ئێک دبیتە قارەمانا خولا ئوروپا یورپا لیگا.
بو ڤێ یاریێ یاریکەرێ یانا بەرشەلونە نیمار یێ ٢٣ سالی پشکدار نابیت و دیسان د کاسا سوپەرا ئسپانی ژی دا ب ئەگەرا توشبونا وی ب نەخوشیەکا ڤایروسی و دبیت ل شوونا وی راھێنەر ئێنریکی پشتبەستێ ل سەر پێدرو رودرێگزی بکەت ئەوێ بەربژار بھێتە ڤەگوھاستن بو یانا مانچستەر یونایتد یا ئێنگلیزی و ب رەخ یاریکەرێن ئوروگوای لویس سوارێز و یێ ئەرژەنتینی لیونێل میسی ڤە یاریێ بکەت و ئەف یاریە دێ یا جیاوازبیت بو یاریکەرێ ھێر ناڤینا یانا بەرشەلونە ئیڤان راکیتیچ ئەوێ دێ ھەڤرکیا یانا خوە یا بەرێ کەت و ل دور ڤێ چەندێ ڤی یاریکەر دیارکر ئەو دێ ھەمی شیانا مەزێخیت داکو سەرکەفتنێ تومار بکەن و بەردەوامیێ ب دەنە دەستکەفتان و دێ یا دلخوشکەر بیت و بیتە ھاندەرەکێ ب ھێز بو یانێ وەرزێ نوو ب برنا دەستکەفتەکێ دەستپێبکەن.
ل ھەمبەر ئەف یاریە دێ تاقیکرنەکا گرنگ بیت بو راھێنەرێ یانا ئەشبیلیا ئونای ئیمری چونکو گوھورینێن مەزن ل ناڤا پێکھاتیێ تیمێ کرینە و یاریکەرێن نوو ئیناینە کو ھژمارا وان دگەھیتە نەە یاریکەران ژ وانا تەکێ ئوکرانی یێ خودان شیان یفگین کونوبلیانکا زێدەباری چەند یاریکەرێن دی یێن خودان شیان، لێ ل ھێلا بەرەڤانیێ دێ ئاریشە ل ناڤا پێکھاتیێ ڤی راھێنەری ھەبن چونکو نەشێت پشتبەستنێ بێخیتە سەر نیکو باریخا و گومان یا ھەی کو ژلایێ ھێزا لەشی ڤەیاریکەرێ نوو یێ فرەنسی عادل رامی ئەوێ ژ میلان ھاتیە ڤەگوھاستن یێ بەرھەڤ بیت.
دھێتە زانین بو جارا شەشێ یە یانێن ئسپانی د حەفت وەرزێن دووماھیێ دا ھەڤرکیێ ل سەر ڤی ناسناڤی دکەن و دێ بیتە جارا دوازدێ ڤی ناسناڤی دبن ژ ٤٠ یاریێن ھاتینە کرن و لسەرێ لیستێ دھێت ل بەرھیا یانێن ئیتالی ئەوا نەە جاران ناسناڤ برین و یێن ئێنگلیزی حەفت جاران.
ئەڤە دێ بیتە جارا سیێ دو یانێن ئسپانی ھەڤرکیا ڤی ناسناڤی ل گەلێک دکەن پشتی ل ٢٠٠٦ شەبیلیا ب سەرکەفتی ل سەر بەرشەلونە و ل ٢٠١٤ ئەشبیلیا خوسارەت بووی ل گەل ریال مەدرید و دیسان بو جارا نەھێ یە بەرشەلونە بەرشەلونە دگەھیتە ھەڤرکیا ڤی ناسناڤە بەرامبەر حەفت جاران میلان یا ئیتالی و پێنج جاران لێڤەرپول یا ئێنگلیزی و چار جاران بایرن میونخ یا ئەلمانی.