ئەڤرۆ نیوز:
ئالان ھوزان ئوسێ یاریکەرێ کورد ژدایکبوویێ باژێرەێ دوناستیک یێ ئوکرانی ئەوێ ل سالا 2001 ھاتیە سەر دونیایێ و دەمێ ژیێ وی دبیتە 7 سال پەیوەندیێ ب ئەکادیمیا شاختار دوناستیک دکەت ل وەلاتێ ئوکرانیا و ژ سەرجەمێ 135 یاریکەران ژلایێ راھێنەرێن ھولەندی دھێتە ھەلبژارتن، ھەتا نوکە یێ بەردەوامە ل وێ ئەکادیمیێ و ژلایێ چەندین یانێن مەزن یێن ئوروپا ڤە یێ داخازکریە ژ وان یانا بەرشەلونا قارەمان ئسپانیا و ئوروپا.
لدور ڤێ یەکێ بابێ ئالانی ھوزان ئوسێ تایبەت بۆ رۆژناما ئەڤرۆ گوت: ئەم خەلکێ کوردستانا رۆژئاڤا ینە و گوندێ توربە سپیێ لێ ئاکنجیێت ئوکرانیا ینە و ئالان ل باژێرێ دوناستیک ژدایکبوویە و من ھزر کر ببەمە ئەکادیمیا وی وەلاتی لەورا لدەسپێکێ د تاقیکرنان دا بەری ھەشت سالان ژ سەرجەمێ 135 یاریکەران ئالان وەکو باشترینێ وان ھاتە ھەلبژارتن و ھەتا نوکە یێ بەردەوامە ل گەل تیما خوە .
زێدەتر بابێ ئالانی دیارکر کو ئالانی ھەتا نوکە چەندین ناسناڤ ل گەل تیما خوە برینە و دووماھی ناسناڤ لڤی وەرزی بریە کاسا ئوکرانیا ل سەر کیستێ دینامو کیێڤ و وەکو باشترین یاریکەرێ قارەمانیێ ھاتە دەستنیشانکرن.
لدور دەستکەفتێن تاکە کەسی یێن بابێ وی گوت: ئالان چەندین وەرزا لدووڤ ئێک بوویە باشترین یاریکەر ل ئوکرانیا لسەر ئاستێ ژیێ خوە، ھەروەسا ل ئوروپا ژی بوویە باشترین یاریکەر لەورا ژی راھێنەرێن ئەلمانی و ھولەندی ئالانی وەسف دکەن ب چیڤانووکا ئیتالی پاولو مالدینی.
زێدەتر ناڤبری لدوور ھەڤبەستێن بو ئالانی ھاتین گوت: چەند یانێن مەزن یێن ئوروپا داخوازا گرێدانا ھەڤبەستێ ل گەل کریە ژ وان یانا بەرشەلوونا یا ئسپانی و یانێن مەزن یێن ئنگلیزی و ئەلمانی لێ ھەتا بێھنڤەدانا ھاڤینێ دەستپێبکەت دێ بریارێ لسەر ھەڤبەستەکێ دەین.
ژلایێ خوڤە یاریکەر ئالان ھوزان ئوسێ بۆ رۆژناما ئەڤرۆ گوت: گەلەکێ پێخوش و سەربلندم ب ناسناما خوە یا کوردایەتیێ و ل وەلاتێ ئوکرانیا ژی ھەر دبێژم نەژاد کوردم و سەربلندم و سوپاسیا بابێ خوە دکەم کو ھەر دەم ھاریکاربوویە ل گەل من و کوژمێن مەزن یێن پارەی ل من مەزاخیتنە ھەتا گەھاندیمە ڤی ئاستی بھیڤی مە بشێم ژنوکە وێڤە ئەز خزمەتا وی بکەم .
ئالانی لدور پاشەرۆژا خوە گوت: ھیڤیا منە خوە ل گەل پێکھاتیێ یانا بەرشەلونا ببینم و خەونا ھەر یاریکەرەکی یە، لێ ھەتا نوکە من بریارا خوە یا دووماھیێ نەدایە کا دێ لکیش یانێ ھەڤبەستا خوە ئیمزا کەم، لێ نوکە باشترین دەمە کو بھێمە ڤەگوھاستن بو یانەکا مەزنا ئوروپی دا بشێم زێدەتر شیانێن خوە پێش بێخم.
لدور یانە و ھەلبژارتیێ کوردستانێ ئالانی گوت: نە شێم یاریێ بو یانێن کوردستانێ بکەم ژبەر گرێدای ھەڤبەستا یانا خومە لێ یێ ئامادەمە ھەر دەمێ داخوازا یاریکرنێ بو ھەلبژارتیێ کوردستانێ ژ من ھاتەکرن دێ بێ دو دلی رازیبم و خزمەتا کوردستانێ کەم .
ھەژیە بێژین ئالان ھوزان یێ ژدایک بوویێ 2001 یاریێ ل ھێلا بەرەڤانیێ دکەت و ب پاولو مالدینی دھێتە وەسفکرن، کاپتنێ تیما شاختار دوناستیک یا ئوکرانیە لسەر ئاستێ تازە پێگەھشتیان و یانا بەرشەلوونا ب فەرمی ل سایتێ خوە بەلاڤکریە کو گرنگیێ ب شیانێن ئالانی ددەن و گروڤە بو ڤێ چەندێ رۆژنامێن ئوکرانی و عەرەبی ئەڤ چەندە دووپات کریە.