ئه‌ڤرۆ نيوز:

گەلەک ئەگەر ھەنە دبنە ئەگەرێ وێ چەندێ کو زەلام حەز ژ ژنێ بکەت و رۆژ بۆ رۆژێ ڤیانا زەلامی بۆ ژنێ مەزنتر لێ بھێـت و ب تنێ حەزێن سکسی و دلداری نینن، بەلکو گەلەک فاکتەرێن دی ژی ھەنە کو ببنە ئەگەر، مینا ژنەکا ب وی شێوەی بیت کو زەلام ھەردەم خوە جھێ گرنگیدانێ و جھێ سەر بلندیێ بیت ب وێ ژنا دبیتە ھەڤژینا وی، د ڤی واری دا شارەزایەک د جڤاکی دا دبێژیت “کریارا سکسی بۆ ھەڤژینان یا گرنگە، لێ رەوشەنبیریا سکسی د ناڤ جڤاکێ مە دا د ئاستەکێً باش دا نینە”.
ئاواز عەلی، ژنەکە ل دۆر بابەتی بۆ رۆژناما ئەڤرۆ دیار کر کچ خودان ھەستێن گەلەک نازکن و ھەمی دەمان کچێ پێـدڤی یا ب گرنگیدانا زەلامی ھەی، چونکی مەزنترین تشت د ژیانا ھەر کچەکێ دا ئەوە کو زەلامەکی بۆ خوە ببینیت و ھەردەم ئەو کچ ژلایێ زەلامێ خوە ڤە جھێ گرنگیدانێ بیت و راستە دڤێت ھەر زەلامەکی گرنیدانەکا مەزن بۆ ھەڤژینا خوە ھەبیت و گۆت “راستە گەلەک فاکتەر بۆ بەختەوەریا ھەڤژینان ھەنە، لێ کریارا جوتبوونا ھەڤژینان گرنگیەکا زۆر ھەیە”.
ژنا ناڤبری گۆت ژی “ل ڤێرە ئەز وەک ژنەک دیار دکەم و دبێژم زەلام ژی خودان کۆمەکا مافانە و مەزنترین ماف ژی ئەو چەندەیە کو ھەمی دەمان ژنێ باوەری ب زەلامی ھەبیت و زەلام ژی خودان ھەستێن مەزنە و پێدڤی یا ب گرنگیدانێ ھەی، چونکی ھەردو رەگەز تەمامکەرێن ھەڤدونە و بێ ھەردو رەگەزان بزەحمەتە ژیان دەرباز بیت، لەورا دڤێت ژنێ ژی ھەستێن مەزن بەرامبەر ھەڤژینێ خوە ھەبن، داکو زەلام ھەردەم ھەڤژینا خوە د ھەمبێزا خوە دا بھێلیت و بەختەوەر بکەت”.
عەبدولعەزیز محسن بارزانی وەک شارەزایەکێ جڤاکی ل دۆر بابەتی گۆت “ھەتا کو ژیان یا بەردەوام بیت ژیانا ھەر کەسەکی ژ مە پێـدڤی یا ب گەلەک پێکھاتان ھەی ئەو ژی پێک دھێن ژ ھەبوونا خوارن و ڤەخوارن و ھەبوونا ھەناسەکا باش، لێ ل ڤێرە تشتێ ھەری مەزن و ھەر کەسەکی پێـدڤی پێ ھەی ئەو ژی ھەبوونا رەگەزێ بەرامبەرە، ئانکو رەگەزێ نێر ھەردەم پێـدڤی یا ب رەگەزێ مێ ھەی و رەگەزێ مێ ژی چ جاران نەشێت بێ رەگەزێ نێر بژیت”.
شارەزایێ جڤاکی خویا ژی کر کو نھا ب شێوەیەکێ بەرچاڤ ھەبوونا رەوشەنبیریا سکسی د ناڤا جڤاکێن رۆژھەلاتا ناڤین و عیراقێ دا ب گشتی و د ناڤ جڤاکێ مە دا ب تایبەتی، د ئاستەکێ نزم و لاواز دایە، چونکی گەلەک ژن ھەنە پشتی شوو دکەن و پرۆسا ھەڤژینیێ پێک دئینن و نزانن دێ ب چ شێوە سەرەدەریێ دگەل ھەڤژینێن خوە کەن و چاوا خوە بۆ ھەڤژینێن خوە بەرھەڤ کەن، داکو زەلام ژی ھەردەم د ھەمبێزا وێ دا بمینیت و گۆت “فەرە بێژین ھەردەم زەلام یێ ئامادەیە ژنێ د ناڤ ھەمبێزا خوە دا بھێلیت، لێ ئەگەر ژن ب وی شێوەی بیت د چەوانیا سەرەدەریکرنێ دا دگەل ھەڤژینێ خوە بزانیت”.