زەلامەکێ ٢٥ سالی کو بابێ دو زارۆیانە دلێ خوە ب رێیا رۆژناما ئەڤرۆ ڤەدکەت و دبێژیت: ئەز یێ خودان کارم و بارێ مە یێ ئابووری یێ باشە، دەمێ من خێزان پێکئینای، نە ل سەر بنەمایێ ئەڤینیێ بوو، بەلێ ئەز و ھەڤژینا خوە دگەل ئێک د بەختەوەر بووین، لێ ئەڤە سالەکە ھەڤژینا من ھاتیە گۆھوڕین و ب مخابنی ڤە بەردەوام د ناڤبەرا مە دا نەخۆشیە، ژبەر ڤێ چەندێ، ئێدی من نەڤێت بچمە مال، چونکو ل ھەڤدوو ناگەھین. ئەڤجا ھوون چ دبێژن بۆ ڤێ ئاریشێ و چ بکەم ؟
برایێ ھێژا :
یا فەرە د پێکئینانا خێزانێ دا تێگەھشتنەک دناڤبەرا ژن و مێران دا ھەبیت، دوور ژ ھەر فاکتەرەکێ دی، و ئەڤ چەندە یا دیارە د سەرکەفتنا خێزانان دا، و د بنیات دا مەرەم ژ پێکئینانا خێزانێ ئەوە کو ئەندامێن وێ ھەست ب خوشیێ بکەن، دیسا دەمێ مرۆڤی بڤێت بێھنا خوە ڤەدەت، باشترین جە، مالا مرۆڤی یە، و بەرۆڤاژی ڤێ چەندێ، ژیان دێ بیتە جەھنەم، لەوما دەمێ رەفتار و ژیان دگەھیتە ئەڤی ئاستی، باشترە راوەستیانەک ھەبیت، ھەردیسا پێدڤیە ئاریشە ژی بھێنە چارەسەرکرن، و ب دیتنا من، باشترە بەری برۆژێ پێکئینانا خێزانێ بھێتە ئاڤاکرن، ژیانا ژن و مێران ل سەر بنیاتەکێ دروست و موکم بھێتە ئاڤاکرن، و ئەڤینی ھەبیت، و ل ڤێرە رەنگە ھندەک جاران پشتی ھینگێ ژی ئەڤینی پەیدا ببیت، بەلێ ب دیتنا من و ل دیڤ ئاخفتنێن تە ژیانا ھەوە یا بەرەف ئالوزیێ دچیت، لەوما ھزرا خوە باش بکە، و خوە پتر نەئێشینە، زێدەباری کو دڤێت زارۆیێن ھەوە ھەموو دەمان ل بیرا ھەوەبن، بەری ھوون ھەر پێنگاڤەکێ پاڤێژن.

پۆ په‌يوه‌نديكرنێ ب گۆشا دلێ خوه‌ ڤه‌كه‌ په‌يوه‌نديێ ب ڤێ ژمارا تله‌فۆنێ بكه‌: 07503404123