ئه‌ڤرۆ نيوز:

پشتی کو دەزگەھێ ھەوالگێریا ئیرانێ ھەفتیا بۆری راگەھاندی وان گرۆپەک چەکدار ل ئورمیێ ل گەل ھژمارەک چەکێن سڤک دەستەسەر کرینە کو دخواستن ھندەک چالاکیان ل دژی ھێزێن ئێمناھیێ بکەن، دوھی ژی بەرپرسەکی پاسدارێن ئیرانێ ل ئورمیێ راگەھاند کو ئەو شیاینە ل چەند مالان ل ئورمیێ و چەند باژێرێن دی یێن سەر ب ئورمیێ گەلەک چەک و تەقەمەنیان دەستەسەر بکەن و دو کەس ژی ھاتنە گرتن کو دخواستن ھندەک چالاکیێن تیرۆرستی ئەنجام بدەن و پشتی وان ھەر دو روودانان وەزارەتا ناڤخوەیی یا ئیرانێ راگەھاند زانیاریێن راست و دروست ل بەر دەستێ وان دا ھەنە کو ھندەک گرۆپێن چەکداری دخوازن رەوشا پارێزگەھا ئورمیێ تێک بدەن و ژ بەر ھندێ ژی وان بۆ ماوەیێ ھەفتیەکێ رەوشا نەئاسایی ل وێ پارێزگەھێ راگەھاندیە، و داخواز ژ وەلاتیان ژی ھاتیە کرن کو ھەر دەمەکێ ھەست ب مەترسیێ بکەن پەیوەندیێ ب ئالیێن پەیوەندیار بکەن.

سالح کوردی چاڤدێرێ سیاسی ل ئورمیێ بۆ رۆژناما ئەڤرۆ دیار کر کو پتر ژ مەھەکێ یە ل پارێزگەھا ئورمیێ ب تایبەتی ژی باژێرێن ل سەر سنۆری ئیرانێ ھێزەکا مەزن کۆم کریە و چەکێن گران ژی ل سەر سنۆری ھاتینە بجە کرن و بەرپرسێن ئیرانێ ژی دیار دکەن کو ھندەک پارتێن ئۆپۆزسیۆنا ئیرانێ دخوازن جارەکا دی رەوشا ناڤخوەیی یا ئیرانێ ئالۆز بکەن و ژ بەر ھندێ ژی وان پێرابوونێن پێدڤی ل سەر سنۆری وەرگرتینە دا کو چو ھێزەک ئالۆزیان دروست نەکەت و گۆت: (تشتێ ئەم دزانین نھا رەوشا ناڤخوەیی یا ئیرانێ گەلەک خرابە، چونکو خەلکی وەسا باوەر دکرن کو پشتی رێککەڤتنا ئیرانێ ل گەل وەلاتێ زلھێز دێ بارێ ئابووری یێ ئیرانێ گەلەک باش بیت، لێ سوپایێ پاسداران کو ل ئیرانێ کۆنترۆلا ھەموو بیاڤێن ژیانێ نھا د دەستێ وان دایە ئەو ل دژی ھندێ نە کو روحانی ل گەل ئەمریکا بگەھیتە رێککەڤتنەکێ و ژ بەر ھندێ ژی نھا پارێ ئیرانێ ل ھەمبەر دۆلاری و پارێن وەلاتێن دی رۆژ ب رۆژێ بھایێ خوە ژ دەست ددەت و وەلاتی ژ رەوشا نھا گەلەک بێزارن و ترسەکا مەزن ل سەر بەرپرسێن ئیرانێ دروست بوویە کو رەنگە خەلک جارەکا دی دەست ب خوەنیشادانان بکەن).
چاڤدێرێ سیاسی د پشکەکا دی یا ئاخڤتنا خوە دا ئەو یەک ژی نەڤەشارت کو دەمەکە ل باژێرێن وەک شنۆ، خانێ، بۆکان و مھابادێ پێشمەرگێن پارتیا دیموکرات یا کوردستانا ئیرانێ ب شەڤ دھێنە باژێری و پرۆپگاندان دکەن و وێ یەکێ ژی کاریگەریەکا گەلەک باش ل خەلکی کریە و گەلەک کەس دبێژن ھەکە جارەکا دی پارتیا دیموکرات یا کوردستانا ئیرانێ دەست ب شەرێ سەربازی بکەت دێ ب ھزاران گەنجێن کورد گەھنە وان و بەرەگیریێ ژ ئاخا خوە کەن و گۆت: (ئەڤە و گەلەک خالێن دی یێن ناڤخوەیی ژی بووینە ئەگەر کو ل ئورمیێ رەوشا نەئاسایی بھێتە راگەھاندن، د راستی دا ل ھەموو پارێزگەھێن رۆژھەلاتێ کوردستانێ رەوش نەئاسایی یە، چونکو پرانیا ھێزێن سەربازی و ئێمناھیێن ئیرانێ ل پارێزگەھێن رۆژھەلاتێ کوردستانێ ھاتینە بجە کرن و مەرەما وان ژی ئەوە کو نەھێلن پارتێن کوردی چو چالاکیەکێ بکەن و ھەروەسا دخوازن رێگریێ ل ھەر خوەنیشادانەکا کوردان بکەن و ژ بەر ھندێ ژی رەوشا رۆژھەلاتێ کوردستانێ ھەردەم نەئاسایی بوویە و خەلک ژ سیاسەتا نھا یا دەولەتێ رازی نینن).
ل ئالیێ دی رێکخراوا مافێ مرۆڤی یا رۆژھەلاتێ کوردستانێ ژی د داخۆیانیەکێ دا راگەھاند کو مەترسیا سێدارەدانێ ل سەر ٣٠ چالاکڤانێن کورد ھەیە کو نھا د زیندانێ دانە و داخواز ژ نەتەوێن ھەڤگرتی و رێکخراوێن مافێ مرۆڤی یێن جیھانی کرن کو نەھێلن ئیران وان کەسان سێدارە بدەت.

ئه‌ڤرۆ نیوز: ڤه‌ده‌ر ره‌شاڤایی:
شه‌ڤا 22 بۆ 23 یا مه‌ها یازده‌، سه‌لاحه‌دین ده‌میرتاش هه‌ڤسه‌رۆكێ هه‌ده‌پێ ژ بزاڤه‌كا كوشتنێ یا نێزیك رزگاربوو پشتی ته‌قه‌ لێ هاتیه‌ كرن لێ د سه‌رێ  جامێ ترۆمبێلا وی یا دژه‌گوللــه‌ كه‌ڤتی.
ئه‌ڤ یه‌ك ژ ئاليێ میدیا هه‌ده‌پێ ڤه‌ هاته‌ راگه‌هاندن ، هه‌ڤده‌م ده‌میرتاش د ئه‌كاونتا خوه‌ دا لسه‌ر تورا جڤاكیا تویته‌ری نڤیسیه‌ كو مرن بده‌ستێ خۆدێ یه‌.