ئه‌ڤرۆ:

خوارنا تیشتێ کارێن مەژی و زانینێ باش دکەت و ھەتا نیشانێن تاقیکرنا ژی باشتر لێ دکەت، ئەو زارۆیێن تێشتێ دخون ل قوتابخانێ ھەستا وان باشترە و پلا داھێنانا وان زێدەترە و ئارامترن ژ زارۆیێن دیتر، ئەو زارۆیێن تێشتێ نەخوون، ھەردەم ھزر ل خوارنێ دکەن و ئەو دبیتە ئەگەرێ ژ دەستدانا زێدە یا شەکرێ و روینان.
ڤەکولین ئاماژە ب وێ چەندێ ددەن کو خوارنا تێشتێ کارێن مێشکی و فێربوونێ ژی باشتر لێ دکەت و ھەتا ل تاقیکرنا ژی باشتر بەرسڤ دھێنە دان. ئێک ژ ڤەکولینان دیارکریە کو خوارنا تێشتێ بۆ ھەموو ئەندامێن خێزانێ یا ب مفایە و ب تایبەت بۆ زارۆ و سنێلەیانن ژبەرکو ئەو بەردەوام د وەرارێ دانە، دشیاندایە تێشت یا سڤک بیت و ئەو کەسێن ب لەز بۆ چوونا ل سەر کارێ خوە، دشێن تشتەکێ بلەز ژی ئامادەبکەن و نوشدار شیرەتان دکەن کو تێشت ژ پرۆتینی یا پێکھاتی بیت ل گەل کەرستەیێن کاربوھیدری و نشایێ و تێشتەکا ب ڤی رەنگی رێکێ نادەت ئاستێ شەکرێ گەلەک دابەزیت بۆ دەمێ چەند دەمژمێرەکا، ھاتنە خوارا ئاستێ شەکرێ رامانا ھاتنە خوارا ھێزا کاری ددەت، ل گەل دیاربوونا ئێشانێن زکی و سەرئێشانێ.
خوارنا تێشتێ مرۆڤی پتر ھشیاردھێلیت و مروڤ پتر دشێت ھزرێن خوە بکەت و ھاریکارە بۆ چارەکرنا ئاریشەیان و بیردانکێ چالاک دکەت، ڤەکولین ئاماژە ب وێ چەندێ ددەن کو خوارنا تێشتێ کارێ مێشکی باش دکەت و پالپشتیێ بۆ فێربوونێ دکەت و ئاستێ زانستی بلند دکەت و نیشانێن برسیبوونێ و وەستیانێ کێم دکەت و تێشت پشکەکە ژ سستەمێ خوارنا ھەڤسەنگ و مەترسیا نەخوشیان کێم دکەت و دبیتە رێگر کو زارۆ ژ قوتابخانێ نەڤەرەڤیت و کارێن باشتر ل قوتابخانێ بدەستڤەدئینیت.
ئەو زارۆیێن تێشتێ دخوون ھەستەکا باشتر ھەیە و پلا داھێنانا وان باشترە و ئارامیا وان دپارێزیت و ھێزەکا باشتر ھەیە بۆ چالاکیێن لەشی و ئەو پتر د ھاریکارن کو ھەڤبەندیا وی ل گەل ھەڤالێن بھێزتر بیت.

ئەڤرۆ:
ل ڤێ دووماھیێ گەلەک خەلک قەستا کلینیکێن جوانکاریێ دکەن بۆ ئەنجامدانا کریارێن جوانکاریێ و رەنگە خەلکی ژنوو ئاگەە ژێ ھەیە کو جوانکاری زانستەکە د وارێ پزیشکیێ دا و ھەبوونا کەنالێن سەتەلایتێ یێن جودا جودا فاکتەرن بۆ ئەنجامدانا کریارێن جوانکاریێ، ھندەک بۆ دەمێن درێژ ڤەدکێشن و ھندەک ژی بۆ دەمەکێ دەستنیشانکری.
د. تەلال رەشید شنگالی، نوشدارێ شارەزایێ پیستی بۆ رۆژنامەیا ئەڤرۆ دیارکر ئەو کریارێن ب رێکا دانانا دەرزیک و تیشکا لێزەرێ ئەنجام ددەن، ھەموو بێی نشتەرگەری دھێنە ئەنجامدان و دیارکر ژی کو پتریا جوانکاریێن نوکە خەلک حەز ژێ دکەن، جوانکاریێن لێڤ و روو و راکرنا پنی و قورمچینا دێمی نە و ھندەک جوانکاری بۆ دەمێ سالەکێ دمینن و ھندەک ژی بۆ دەمێ پتر ژ پێنج سالان دمینن و ھندەک ژی ب شێوەیەکێ بەردەوام دمینن، بەلێ پتریا خەلکی حەزدکەن جوانکاریێن دومکورت ئەنجام بدەن و رەنگە ئەڤەژی بۆ وێ چەندێ بیت کو ل دەمەکێ نێزیک جوانکاری ببیتە مودێل و خەلک گەلەک کریارێن نشتەرگەری د ماوەیەکێ کورت دا ئەنجام بدەن.
د.تەلال دیارکر ژی کو بەری نوکە رەنگە ئەڤ کریارە ب رێکا ھندەک ملحەم و کریمان ھەبووینە، بەلێ ژبەرکو ملحەم و کریمان دەمەکێ درێژ ژبۆ دڤیا ھەتا مفا ل نەخوشی کربایە، و دبیت ژی نەخۆشی گەلەک مفا و کار ژ رێنمایێن وان نەدکر لەورا ب زەحمەت بوو ھەتا خو ئامادە دکر و ئەڤەژی د بو ئەگەر نەخوشی دەم نەبوو خۆ بەرھەڤ بکەت و مفا ژێ نەددیت.
ھەروەسان گوتژی بۆ ئەنجامدانا ڤان کریاران ھندەک نەخوش پێدڤی ب پتر روونشتنەکێ یان دەرزیکەکێ دبن و ئەو ل سەر بڕیارا نوشدارێ چارەسەر دمینیت. لەورا پێدڤیە نەخوش پێگیریێ ب رێنمایێن نوشداری بکەت و نوشدار ژی بۆ وی دیاربکەت کا چ جورێ جوانکاریێ یە و چ سەربارک دێ ژێ پەیدابن. چونکو نوکە گەلەک نەخوش ھزر دکەن ب رونشتنەکێ یان ب دەرزیکەکێ دێ ھەموو جھێ وی بڤێت ھێتە گوھارتن و ئەڤ ھزرە یا شاشە و دبیت ئەم داخوازێ ژ نەخوشی بکەین بۆ دو ھەتا سێ جاران ژی بھێت.
دەربارەی سەربارکان ژی، د.تەلال گۆت: ئەو جھێ ئەم دەرزیکا بۆ ددانین، رەنگە بۆ دەمەکێ کێم شین ببن یان ب وەرمن و پشتی دەمەکێ کێم دێ ڤەگەرنەڤە بۆ سروشتێ خۆ یێ بەرێ. و سەرکەفتنا کریارا جوانکاریێ ئەوە کو دەوروبەرێن وی دزانن تشتەک یێ روودای بەلێ نزانن کا ئەو تشت چاوا ھاتیە گوھۆرین و پەیدابوویە و دبیت ئەو ھزر بکەن تشتەک سروشتی پەیدابوویە.
نوشدارێ شارەزایێ پیستی گوت: ھەکە دەرزیکا بوتوکس ھاتە دانان ب خەلەتی ژ جھێ خۆ بوری، رەنگە کرێتیەکێ ل دووڤ خۆ بھێلیت، لەورا نوشداری خواست کو نەخوش ژلایێ نوشدارێن تایبەتمەند ب ڤان کریاران ڤە ئەنجام بدەن و دکتور ژی بەری ھینگی ھندەک پسیاران ل دۆر چەند نەخوشیان ژێ بکەت.
ژلایەکێ دیڤە دکتوری گوت: دبیت گەلەک کەس ھەبن پێدڤی ب کریارێن جوانکاریێ نەبن، و دبیت کەسەک بھێت و حەز بکەت تشتەکی بۆ بکەین، بەلێ دەمێ ئەم بەرێخودانێ لێ دکەین دێ دیاربیت نە یێ پێدڤی یە، لەورا نابیت کریارێن جوانکاریێ ل دووڤ حەزا نەخوشی بھێنە کرن و باشترە پشتی نوشدار بۆ نەخوشی شێوازێ کریارێ دیاردکەت، نەخوش ژی ھزرێن خۆ بکەت بەری بریارا خۆ بدەت.