ئه‌ڤرۆ نيوز، بێستير دهۆكى:

د ياريێن گه‌را ئێكێ يا خۆلا بژاره‌ دا، تيما ته‌پا پێ يا دهۆكێ پشتى نيشادانا ئاسته‌كێ ناڤنجى، وه‌كهه‌ڤ بوو ب گۆله‌كێ ل گه‌ل يانا مينا يا به‌سراوى.

کێمتر ژ حەفتیەکێ یاریکەرێ گەنج یێ یانا دھۆک وەلید سەلمان شیا تیما خوە ژ خوسارەتیەکا مسوگەر قورتال بکەت پشتی ب لێدانەکا دور ژ دەرڤەی دەڤەرا پەنەلتی ل دقیقا ٨٨ گولا وەکھەڤیی بۆ تیما خوە توماربکەت د وێ یاریێ دا ئەوا دوھی ل یاریگەھا یانا دھۆکێ ھاتیەکرن ژ چارچوڤێ یاریێن گەرا ئێکێ ژ قوناغا بژارە یا خولا عیراقێ.
دڤێ یاریێ دا تیما دھۆک ل نیڤا ئێکێ دا ل ئاستەکێ باش بوو چەند مەترسی ل سەر گولا تیما مێڤان پەیداکرن لێ ھێرشێن ھەردو تیمان بێ مفابوون، ل دەستپێکا نیڤا دوێ ب ھێرشەکا ھەڤدژ حسین عەلی واحد یاریکەرێ یانا مینا گولا ئێکێ بۆ تیما خوە تومارکر و پشتی ڤێ گولێ راھێنەرێ یانا دھۆک چەند گوھورین د پێکھاتیێ تیمێ دا کرن و ل دقیقا ٨٨ یاریکەرێ پێگوھور وەلید سەلمان گولا وەکھەڤی تومارکر و ل دقیقا ٩٣ یاریکەرێ یانا دھوک ئەحمەد جاسم دەلیڤەیا زێرین ژ دەست دا دەمێ بتنێ ل گەل گولچیێ یانا مینا مای لێ ب شێوەکێ جوان گولچیێ مینا کەرار محەمەد تەپا وی ھاڤێتە ژ دەرڤەی یاریگەھێ و یاری ب وەکھەڤیا ھەردو تیما ب دووماھی ھات.
ل دۆر ڤێ یاریێ شێروان بەشار سەروکێ یانا گارە و وەرزشڤانێ دێرین پارێزگەھێ بۆ رۆژناما ئەڤرۆ گوت: ئاستێ یاریێ نە ل وی ئاستێ بلند بوو کو جەماوەر خوشیەکێ ژی بینت و ل ئاستێ خولا بژارە بیت و ل چارێکا دووماھیا یاریێ ئاستێ ھونەری ھەتارادەکی باش بوو تایبەت ژلایێ یاریکەرێن یانا دھۆک ڤە و ئەنجامێ یاریێ و ئەنجام ل دووڤ ئاستێ یاریێ بوو .
ژلایێ خوڤە ھاریکارێ راھێنەرێ یانا مینا ئەحمەد رەحیم گوت: ھەر تیمەکا مفای ژ دەلیڤەیێن خوە نەبینت دێ ھێتە سزادان لەورا ئەم ژی ل دووماھیا یاریێ ژلایێ یاریکەرەکێ پێگوھور یێ دھۆکێ ھاتینە سزادان ژبەرکو گولەک تومارکر کو چارەسەریا وی نەبوو ل دقیقەیێن دووماھی بون و یاریکەرێن مە مفا ژ دەلیڤەیێن خوە نەدیتن.
ئاشتی موستەفا ھاریکارێ راھێنەرێ یانا دھۆک ژلایێ خوڤە گوت: مە بەری یاریێ دیارکر بوو دێ تیما مە دڤێ یاریێ دا توشی ئاریشەکێ بیت ژبەرکو بەری ڤێ یاریێ مە یاریەکا ب زحمەت کر بوو لێ یاریکەرێن مە دڤێ یاریێ دا ھەمی شیانێن خوە تەرخانکرن و ئەم ھەژی سەرکەفتنێ بووین لێ ژبەر نەبوونا جەنسی سەرکەفتن ژ دەستێ مە دەرکەفت.