ئەڤرۆ نیوز:
مامۆستایەکێ زانکۆیا دھۆک دیارکر کو چونکو ھەتا نوکە ناکوکی دناڤبەرا ھەرێم و بەغدا دا نەھاتینە چارەسەکرن، شەرێ داعش ژی یێ بەردەوامە ل ھەر دو وەلاتێن سوریا و عیراقێ، چو ھیڤێن بەرچاڤ ژی نین کو گەشەپێدان بکەڤیتە ئابوورێ ھەرێمێ، و دبیت ھەتا پێنچ سالێن دی حوکمەتا ھەرێما کوردستانێ یا دەینداربیت.
د.سەردار موسا شەریف مامۆستایێ کولیژا کارگێری و ئابووری ل زانکۆیا دھۆکێ بۆ بەرپەرێ بازار ل رۆژناما ئەڤرۆ گۆت: کاودانێن ھەرێمێ بەرتەنگ بووینە و ئەڤە راستیەکە دڤێت نەھێتە ڤەشارتن و حوکمەتا ھەرێما کوردستانێ ژی کەفتیە بن دەینێن گەلەک دژوار دماوێ سێ ھەتا پێنچ سالێن داھاتی دبیت حوکمەتا ھەرێما کوردستانێ بشێت ژبن ڤێ قەیرانێ دەرکەفیت.
د.سەردار موسا شەریف مامۆستا کولیژا کارگێری و ئابووری ل زانکۆیا دھۆکێ گۆت ژی: بۆ بھێزبوونا ئابوورێ ھەر وەلاتەکی جڤاک پێدڤی ب چەند فاکتەرانە، ڤێ چەندێ کاریگەریەکا مەزن ھەیە ل سەر پێگەە و بنیاتێ ئابووری، ژڤان رێژەیا بەرھەم ھێنانا ناڤخۆیی و گرێدانا کومەلگەھا وەلاتێ ب بەرھەمێن بیانی و ئاستێ بازرگانی و ئالوگوری یا ئابووری یا وەلات و جیھانا دەرڤە، ژێدەرێ سەرەکیێ داھاتێ وەلاتی فاکتەرن کو کاریگەرن بۆ ژاندن و بھێزکرنا ئابووری و داھێنان کو بریتی یە ژ ھێز مرۆڤایەتیێ یا چالاک و بەرھەم ھێنەرێن زانستیێن کاریگەر ل سەر پەرەپێدان و گەشاندنا ئابووری.
د.سەردار موسا شەریف ھێشتا ژی گۆت: ھەرێما کوردستانێ ژبەرکو یا گەنج و نوویە دبیاڤێ سیاسی و ئابووری و کەلتوری دا، ھەردەم مەترسی ل سەر تێکدانا بزاڤا ئابووری ل کوردستانێ ھەیە، چونکو ھاڤسەنگی دناڤبەرا (ئالوگوری یا بازرگانی و ئابووری) یا نافخویی و دەرڤە نینن، لەورا ئەڤە ژی ھوکارەکێ سەرەکی و ئاماژەکرنێ یە و گرنگە ل بەرچاڤ بھێتە وەرگرتن دوارێ ھەلسەنگاندنا ئابووری ل ھەرێمێ و ئابووری یا ھەرێما کوردستانێ دا، ئابووری یا ھەرێما کوردستانێ ب ئەگەرێ لاوازیا خوە ئابوورەکە ھەردەم دمەترسیێ دایە، ژبەر نەبوونا ستراتیجی یەکا نەتەوەیی کو تەرکیز و گرنگی ب بەرھەم ئینانا ناڤخویی بکەت، ھەڤدەم ئاسنکاری و پشتگریا ئاڤەدانکرنا پیشەسازی وەک بنیاتێ ل سەر خوە کار بکەت و ئاڤا بکەت و ھەر دەم ل بەر مەترسی یا لاواز بووونێ یە.
مامۆستایێ زانکۆیێ گۆت ژی: ژ سالا ٢٠٠٣ێ ھەرێما کوردستانێ بزاڤ کرینە جورە ئابوورەکێ سەربەخۆ ئاڤا بکەت، ژ بەر ھوکارێن سیاسی نەشیا ڤی کاری رابیت و سەرنەکەفت، فاکتەرێن سیاسی کاریگەریەکا بەرفرەە ھەبوو ل سەر رێگریێ و دروستبوونا ئابووری و نەشیاین پێدڤیێن نافخویی دابین بکەین ، ئەڤە ئێک ژ قەیرانێن مەزن و رێگر و بگرە ژی ھوکارێ تێکچوونا رەوشا سیاسی و جڤاکی یا ھەرێما کوردستانێ.
مامۆستای ھێشتا گۆت: پترۆل وەکی ژێدەرێن سەرەکیێن داھاتێ حوکمەتا ھەرێما کوردستانێ، کاریگەریەکا ئابووری یا جیھانی فاکتەرێن مەزن ل سەر بۆ ھایێن نەفت و گازێ بۆ ژاندنا ئابووری یان وەلاتان کو گرێدای ئێک ژێدەر بووینە.
ھەمان مامۆستا گۆت ژی: ھەبوونا شەری و ئالوزیان ل ناوچێن سنورێ ھەرێمێ ل گەل وەلاتێ سوریا و عیراق و ھەتا تورکیا، ڤێ چەندێ ژی سستیەکا مەزن خستیە سەر ئابوورێ ھەرێما کوردتانێ و عیراقێ وتورکیا ژی کو وەلاتێن سەرەکی نە دبوارێ بوژاندنا ئابووری و بازرگانی یا ھەرێما کوردستانێ، ژبلی ڤێ یەکێ ناکوکی و کیشێن سیاسی دناڤبەرا ھەرێما کوردستانێ و بەغدا دا ھوکارین سەرەکی نە کو ب شێوازێ خراب کاریگەری ل سەر لاوازی و تێکچوونا سیستەما ئابووری یا ھەرێما کوردستانێ کری یە و ژوان ژ برینا بۆدجێ کو ئێک ژ مەزنترین فاکتەرانە.