ئه‌ڤرۆ نيوز:

ئه‌ميندارێ گشتيێ وه‌زاره‌تا پێشمه‌رگه‌ى يا حوكمه‌تا هه‌رێما كوردستانێ ئامارا شه‌هيد و بريندار و بێ شه‌روشوونبويێن شه‌رێ داعش ئاشكه‌را دكه‌ت و رادگه‌هينيت: ژ هه‌موو هێزێن پێشمه‌رگه‌ى هزار و 258 شه‌هيد و 62 بێسه‌روشوون بوويى و حه‌فت هزار و 301 بريندار هه‌بووينه‌.

ئه‌ڤرۆ نيوز:

رۆژا چارشەمبى رێكه‌فتى 4ى چريا دويێ 2015 ل سەلاحەدین مەسعود بارزانی سەرۆکێ ھەرێما کوردستانێ پێشوازیا فەره‌يدون سنرلۆگلو وەزیرێ دەرڤەیێ تورکيا و شاندەکێ ل گەل کر.

د ھەڤدیتنێ دا وەزیرێ دەرڤەیێ توركيا ژ بۆ رەخساندنا ڤێ ھەڤدیتنێ سپاسيا سەرۆک بارزانی کر و سلاڤێن سەرۆک کۆمارێ توركيا ب سەرۆک بارزانی گه‌ھاند.

ھەروه‌سا ژبلی بالکشاندنا گرینگیدانا ھەرێما کوردستانێ وێ یەکێ راگه‌ھاند کو ب سەدەما بنگەھینێن جیرانیێ وەلاتێ وان حەز ب پێشکەفتنا ھەرێما کوردستانێ دکەت و تەکەز ل وێ یەکێ ژی کر کو توركيا پالپشتیا ئارامی و ئاساییشا ھەرێما کوردستانێ و بەرفرەھتر کرنا پەیوەندیێن ل گەل ھەرێما کوردستانێ دکەت.

د بەرامبەر دا سەرۆک بارزانی سپاسيا سەرۆک کۆمار و وەزیرێ دەرڤەیێ توركيا کر و ژ بۆ برێڤەچوونا سەرکەفتیا پرۆسەیا ھه‌لبژارتنان ل توركيا پیرۆزباھى ژی ل شاندا مێھڤان کر و ھيڤی ژی خواست کو ئەنجامێن ھه‌لبژارتنێ ببێ سەدەما کوورتربوونا ئارامی و ئاساییش و ئاشتیا ل توركيا و ده‌ڤه‌رێ و تەکەز ژی ل پێشخستنا پەیوەندیێن د ناڤبەرا ھەرێما کوردستان و وەلاتێ توركيا کر و وێ یەکێ خستەروو کو ھەر دو ئالی جیرانێن ھەڤدۆ نە و د ئێك جۆگرافیایێ دا دژین و دڤێت ب ناڤێ گەشبوون و پێشکەفتنێ دا ھەردولا کار ژ بۆ پێکانینا ئارامی و ئاساییش و ئاشتیێ بکه‌ن.

ھەر د ڤێ ھەڤدیتنێ دا د دەرباره‌ى رەوشا سیاسی و ئەمنیا ده‌ڤه‌رێ ب گشتی و سووریا و شەرێ دژی تيرۆرستان ب تایبەتی دانوستاندنا بیر و رامانان کرن و تەکەز ژی ل سەر رێ و جهێن پەیوەندیا بەردەوامیا ل سەر پێشھاتێن دووماهيێ کرن.