ئه‌ڤرۆ نیوز:
لیز گراند رێكخه‌را نه‌ته‌وێن یه‌كگرتى بۆ كاروبارێن مروڤى ل عیراقێ راگه‌هاند ئه‌گه‌ر هاریكاریا وان یا دارایى نه‌هێته كرن و هاریكاریێن نوو نه‌گه‌هنه وان، ئه‌و نه‌چارن زێده‌تر ژ نیڤیا هه‌ڤكار و چالاكیێن خوه ل عیراقێ ب دووماهى بینن.
د به‌یاننامه‌كێ دا، نه‌ته‌وێن یه‌كگرتى داخواز كریه 500 ملیون دولار ژ هه‌ڤكاریێن نه‌ته‌وێن یه‌كگرتى بگه‌هنه وان بۆ روى ب روونا قه‌یرانا مروڤى ل عیراقێ كو ژ ئه‌گه‌رێ شه‌رێ داعش په‌یدا بوویه.
ئه‌ڤرۆ نیۆز، قائید میرۆ
ل باژێڕێ مووسل و لبه‌ر چاڤێن خه‌لكی چه‌كدارێن تیرۆرستێن داعش پێنج گه‌نج جه‌لده دان و دوهی ژی چوار گه‌نج بدارڤه‌كربوون.
ژێده‌ره‌كێ ئاگه‌هدار ب ئه‌ڤرۆ نیۆز راگه‌هاند” گروپا تیرۆرستیا داعش ل سه‌نته‌رێ باژێڕێ مووسل پێنج گه‌نجێن باژێڕی جه‌لده‌داینه و ئه‌ف سزایه لبه‌ر چاڤێن خه‌لكی بوویه، ئه‌وژی ب تۆمه‌تا ڤێ چه‌ندێ هاتینه سزادان ;, وان پێنج گه‌نجا رهێن خوه وه‌كی پێدڤی به‌رنه‌داینه.
تێته‌زانین، دوهی ژی چه‌كدارێن داعش ل سه‌نته‌رێ باژێڕێ مووسل چوار گه‌نج بدارڤه‌كربوون ب تۆمه‌تا سیخۆڕیكرنێ و برنا زانیاریان بۆ هێزێن ئه‌منیێن عێراقێ”.
ئه‌ڤرۆ نیوز:
ئه‌ڤرۆ ئێڤارێ ئاگر به‌ربوو تانگه‌ره‌كی ل ده‌ف موه‌لیدێن كاره‌بێ ل تاخێ ماسیكێ كولانا ( دایسك) و تیمێن ئاگرڤه‌مراندنێ شیان كونترۆلی ل سه‌ر ئاگرى بكه‌ن، ژ ئالیێ خوه‌ڤه وه‌لاتیه‌ك ب ناڤێ كارزان هرورى وه‌ختێ ئاگر به‌ربوویه تانكى ڤیدیو كریه و و دیسان چه‌ند وێنه بۆ ئه‌ڤرۆ نیوز هنارتینه.
ئه‌ڤرۆ نیوز هاتیه دامه‌زراندن ب مه‌ره‌ما گه‌هاندنا په‌یامان و خزمه‌تكرنا خوانده‌ڤان و بینه‌رێن خوه، لێ ئه‌ڤرۆكه ( وه‌لاتیێ رۆژنامه‌ڤان) ژى رۆله‌كێ مه‌زن دگێریت د سه‌رئێخستن و پشته‌ڤانیكرنا هه‌ر ده‌زگه‌هه‌كێ دا، ژبه‌ر كو ئه‌و وه‌لاتیێ ئه‌ڤ ڤیدیویه گرتى، ره‌نگه هه‌تا وێنه‌گرێن ده‌زگه‌هێن راگه‌هاندنێ دگه‌هنه جهێ روودانێ ئاگر هاتبیته ڤه‌مراندن و ل چ دونیایێ چ ده‌زگه‌ه نه‌شێن په‌یامنێر ل هه‌ر كوژیه‌كێ هه‌بیت، له‌وما خوانده‌ڤانێن خوه ئاگه‌هدار دكه‌ین، هه‌ر ڤیدیویه‌ك یان وێنه‌كێ خزمه‌تا خوانده‌ڤانى ئه‌ڤرۆ نیوز بكه‌ت و ببیته تمامكه‌رێ كارێ مه و ب ده‌ست وه بكه‌ڤیت، بۆ مه بهنێرن، دێ به‌لاڤ كه‌ین.
هه‌ر چه‌نده ئه‌ڤرۆ نیوز ژى ب وێنه ڤه ئه‌ڤ ده‌نگوباسه به‌لاڤ كریه، به‌لێ دووباره دبێژن، ئه‌ڤرۆ نیوز هه‌ر وێنه‌كێ وه‌لاتیه‌كێ یێ خزمه‌تا كارێ مه بكه‌ت، دێ به‌لاڤ كه‌ت.
لینكێ بابه‌تى ئه‌ڤرۆ نیوز ل دۆر ڤێ روودانێ به‌لاڤ كرى
ڤيديۆ:
ئه‌ڤرۆ نیۆز، قائید میرۆ
په‌رله‌مانتاره‌كێ كورد ئاماژه ب وێ چه‌ندێ دكه‌ت، ل گوره‌ی پابه‌ندبوونا هه‌رێما كوردستانێ و ئه‌ف سیسته‌مێ حه‌یده‌ر عه‌بادی بودجێ هه‌رێمێ دیار دكه‌ت، پێشبینی دكه‌م بۆ هه‌یڤا بۆری به‌غدا نێزیكی 700 ملیار دیناران بده‌ته كوردستانێ.
ئه‌مین به‌كر، په‌رله‌مانتارێ كورد ل به‌غدا ب ئه‌ڤرۆ نیۆز راگه‌هاند” ل گوره‌ی سیسته‌مێ حه‌یده‌ر عه‌بادی سه‌رۆك وه‌زیرێن عێراقێ بۆ هنارتنا بودجێ هه‌رێما كوردستانێ دانای، دێ بودجێ هه‌یڤا بۆری ژ فرۆتنا پترۆلێ هێته كۆمكرن و پشتی ده‌ركرنا نه‌فه‌قادێن سیادی كو 30%یه، دێ پشكا هه‌رێمێ 17%ێ هێته دیاركرن، پشتی دیاركرنێ ژی دێ پێگیریا هه‌رێمێ ب هنارتنا پترۆلێ بكه‌نه پیڤه‌ر، بۆنموونه هه‌یڤا چوار، 84% هه‌رێم پابه‌ندبوویه و نه‌شیایه 100% پابه‌ندبیت ل گوره‌ی ئه‌و پترۆلا راده‌ستی سۆمۆكری”.
ئه‌مینی گۆتژی” گوره‌ی هنارتنا پترۆلا هه‌رێمێ بۆ هه‌یڤا پێنج دێ عێراق نێزیكی 700 ملیار دیناران ده‌ته هه‌رێما كوردستانێ، ئه‌وژی ب مه‌رجه‌كی ئه‌گه‌ر وه‌كی هه‌یڤا بۆری 10%ێ یا قه‌ڕێ بانكا بازرگانی نه‌بڕیت، پێشبینی دهێته‌كرن د كۆمبوونا سێشه‌مبیێ ئیمزا بۆ هنارتنا بودجێ هه‌رێمێ بهێته‌كرن”.
ئه‌ڤرۆ نیوز:
نێچیرڤان بارزانى سه‌رۆكێ حكومه‌تا هه‌رێما كوردستانێ ئه‌ڤرۆ ل گه‌ل پاریزگه‌ر و رێڤه‌به‌ر و به‌رپرسێن یه‌كه‌یێن ئیدارى و دام و ده‌زگه‌هێن حكومى ل سنورێ پارێزگه‌ها دهۆك كومبوو.
به‌رهه‌ڤبوویان كێشه و ئالوزیێن هه‌مبه‌ر خزمه‌تگوزاریێن پارێزگه‌هێ ب تایبه‌ت د بیاڤێ پێدڤیێن كه‌رتێ خزمه‌تگوزاریێن ئاڤ و كاره‌ب و ته‌ندروستى و په‌روه‌رده و باژێرڤانى و خوارن و رێك و پران بۆ نێچیرڤان بارزانى سه‌رۆكێ حكومه‌تا هه‌رێما كوردستانێ به‌رچاڤ كرن و دیسان به‌حسێ وێ بارگرانیێ كرن یا كو كه‌تیه سه‌ر ملێ دام و ده‌زگه‌هێن كارگێرى و خزمه‌تكارى یێن پارێزگه‌ها دهۆك ژبه‌ر شه‌رێ دژى داعش و هاتنا ئاواران، ژ ئالیێ خوڤه نێچیرڤان بارزانى سه‌رۆكێ حكومه‌تا هه‌رێما كوردستانێ سوپاسیا خوه و حكومه‌تا هه‌رێمێ بۆ وى كار و خزمه‌تكاریان دووپات كر كو دام و ده‌زگه‌هێن پارێزگه‌هێ پێشكێشى ئاواره و په‌نابه‌ران كرین و رژدى ل سه‌ر وێ یه‌كێ كر و حكومه‌تا هه‌رێمێ دێ هه‌موو بزاڤان كه‌ت خزمه‌تگوزاریێن پێدڤى پێشكێشى وه‌لاتى و ئاواره و په‌نابه‌ران و دام و ده‌زگه‌هێن حكومى بكه‌ت.
ئه‌ڤرۆ نیۆز، قائید میرۆ
شوفێرێ تایبه‌تێ قازیێ ویلایه‌تا دیجله یا داعش ژلایێ هژماره‌كا چه‌كدارێن نه‌نیاس هاته كوشتن .
غه‌یاس سورچی، په‌یڤدارێ مه‌لبه‌ندێ نه‌ینه‌وایێ ئێكه‌تی نیشتیمانی كوردستان ب ئه‌ڤرۆ نیۆز راگه‌هاند” ل ناحیا گه‌یاره‌یا سه‌ر ب پارێزگه‌ها نه‌ینه‌وا هژماره‌ك چه‌كدارێن نه‌نیاس هێرشكریه سه‌ر تیرۆرسته‌كێ داعش و پشتی دایه به‌ر ده‌ستڕێژا گولله‌یان ئه‌ف تیرۆرست هاتیه كوشتن”.
سورچی گۆتژی” تیرۆرستێ هاتیه كوشتن شوفێرێ تایبه‌تێ قازیێ ویلایه‌تا دیجله‌یه یا سه‌ر ب گروپا تیرۆرستیا داعش بوو و چه‌كدارژی به‌ره‌ف جهه‌كێ نه‌دیار ره‌ڤینه”.
ئه‌ڤرۆ نيوز:
ئه‌ڤرۆ رۆژا پێنجشه‌مبى رێكه‌فتى 4ى خزيرانا 2015ێ ئه‌زموونێن ويزارى ل سه‌ر ئاستێ ئاماده‌يى و بنه‌ره‌تى بهێنه ئه‌نجام دان و ل سه‌رانسه‌رى هه‌رێما كوردستانێ دێ 149 هزار و 409 قوتابى دێ پشكداريێ تێدا كه‌ن و ل دهۆك ژى 43 هزار و 983 قوتابى پشكدار بن.
ئه‌حمه‌د عه‌بدولا زۆبێر، به‌رپرسێ راگه‌هاندنا رێڤه‌به‌ريا گشتيا په‌روه‌ردا پارێزگه‌ها دهۆكێ راگه‌هاند كو ئه‌ڤرۆ ئه‌زموونێن ويزارى ل سه‌ر ئاستێ هه‌رێما كوردستانێ بهێنه كرن و ل دهۆك ژى هه‌موو دێ د ئێك ده‌م دا هێنه كرن و گيرۆبوونا ده‌وامێ چو كارتێكرن ل ئه‌زموونان نه‌كريه.
زێده‌تر گۆت: “ل پارێزگه‌ها دهۆكێ بڕياره 23 هزار و 102 قوتابى ل سه‌ر ئاستێ زانستى و 20 هزار و 392 وێژه‌يى پشكداريێ تێدا بكه‌ن و ل سه‌ر 743 بنگه‌هان هاتينه به‌لاڤكرن”.
دا زانين ژى كو قوتابيێن پيشه‌يى ژى دێ 437 قوتابى پشكدار بن و ل سه‌ر 14 بنگه‌هان هاتينه به‌لاڤكرن و بنه‌ره‌ت ژى 39 هزار قوتابى دێ پشكدار بن و ل سه‌ر 552 بنگه‌هان هاتينه به‌لاڤكرن و گۆت: “قوتابيێن ده‌ره‌كى ژى دێ 613 قوتابيان مفا ژ بڕيارێ وه‌رگرتيه و دێ پشكدار بن”
ل سه‌رانسه‌رى هه‌رێما كوردستانێ بڕياره 73 هزار و 757 قوتابيێن زانستى، 55 هزار و 564 قوتابيێن ئه‌ده‌بى و 20 هزار و 88 قوتابيێن پيشه‌يى پشكدارى ئه‌زموونان بن.
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 4ى خزيرانا 2015ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1335 |
| 1 يۆرۆيێ ئه‌ورۆپى | 1480 |
| 1 ليرێ توركى | 500 |
ژ به‌ر كو ره‌وشا دراڤى به‌رده‌وام دهێته گوهۆڕين بۆ زانينا نووترين گۆڕانكاريان سه‌ره‌دانا مالپه‌رێ ئه‌ڤرۆ نيوز بكه.
نيشاندان