ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 10ى خزيرانا 2015ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1343 |
| 1 يۆرۆيێ ئه‌ورۆپى | 1525 |
| 1 ليرێ توركى | 490 |
ژ به‌ر كو ره‌وشا دراڤى به‌رده‌وام دهێته گوهۆڕين بۆ زانينا نووترين گۆڕانكاريان سه‌ره‌دانا مالپه‌رێ ئه‌ڤرۆ نيوز بكه.
ئه‌ڤرۆ نيوز، ئه‌ياد به‌روارى:
کۆچکا سپی رەتکر سەرۆکێ ئەمریکی باراک ئۆباما ل چارچۆڤێ ب رێڤەچوونا کۆمبوونێن کوپیتکا (جی ٧) ل ئەلمانیا، حەیدەر عەبادی سەرۆک وەزیرێن عیراقێ پشت گوە ھاڤێتبیت.
جۆش ئێرنست، پەیڤدارێ کۆچکا سپی د بەیانامەکێ دا راگەھاند، باراک ئۆباما د چارچۆڤێ وێ کارێن وێ کوپیتکێ ل ئەلمانیا، ھەموو دانوستاندن و دیدارێن رەسمی و نەرەسمی ل گەل حەیدەر عەبادی یێن ئەنجامداین.
گوت ژی” عەبادی ژلایێ ئۆبامای ڤە نەھاتیە پشت گوە ھاڤێتن، بەلکو راستەوخوە یێ ل گەل کۆمبووی”.
ئەڤ بەیانناما کۆچکا سپی یا ئەمریکی ھاتیە بەلاڤکرن، پشتی د دەزگەھێن راگەھاندنێ ل جیھانێ و تۆرێن جڤاکی ل سەر ئەنترنێتێ گرتەیەکا ڤیدیۆیی ھاتیە بەلاڤکرن و تێدا ھاتبوو دیارکرن کو دەمێ حەیدەر عەبادی سەرۆک وەزیرێن عیراقێ ل گەل (سەلمان جومەیلی) وەزیرێ پلاندانانێ ل عیراقێ، بزاڤکرن خوە نێزیکی ئۆبامای بکەن، ددەمەکی دا ئۆباما یێ مژوولبوو ب ئاخڤتنێ ل گەل سەرۆکا سندووقا دراڤی یا نێڤدەلەتی و سەرۆک وەزیرێن ئیتالیا، بەلێ ژلایێ ئۆبامای ڤە ھاتە پشت گوە ھاڤێتن.
بۆ ديتنا ڤيديۆيا بابه‌تى: ڤێره كليك بكه
ئه‌ڤرۆ نيوز:
وه‌زاره‌تا پێشمه‌رگه‌يى ل حوكمه‌تا هه‌رێما كوردستانێ راگه‌هاند كو ده‌رگه‌هێ ناڤ تۆماركرنێ ل بۆ دامه‌زراندنێ ل وان هه‌دو ليوايێن دێ نوو هێنه دامه‌زراندن هاتينه ڤه‌كرن ئه‌وێن دڤێن وه‌كو خوه‌به‌خش د وان دو ليوايان دا خزمه‌تێ بكه‌ن.
د راگه‌هاندنه‌كا رۆژنامه‌ڤانى دا، فه‌ريق جه‌بار ياوه‌ر ئه‌ميدارێ گشتيێ وه‌زاره‌تا پێشمه‌رگه‌يى و ئاخفتنكه‌رێ ب ناڤێ فه‌رمانده‌يا هێزێن پاراستنا هه‌رێمێ راگه‌هاند: رێڤه‌به‌ريا گشتيى يا كاروبارێن تاك و خۆبه‌خشان يا سه‌ر ب وه‌زاره‌تا پێشمره‌گه‌يى ڤه د ماوێ دياركرى يێ 14ى خزيرانا 2015ێ هه‌تا 14ى تيرمه‌ها 2015ێ بانگه‌شێ بۆ ڤه‌كرنا ده‌رگه‌هێ خوه‌به‌حشينێ يێ پێشمه‌رگان ل دهۆك و هه‌ولێر و كه‌ركووك و سلێمانيێ ڤه‌كه‌ت.
بۆ دامه‌زراندنا وان وه‌لاتيانه يێن حه‌ز هه‌يى ل سه‌ر ميلاكێ وه‌زاره‌تا پێشمه‌رگه‌يى ب پيشه‌يێ پێشمه‌رگه بهێته دامه‌زراندن.
د ڤێ راگه‌هاندنێ دا مه‌رجێن ئاشكه‌را كرينه كو پێدڤيه هه‌بن بۆ وه‌رگرتنا خۆبه‌خشان.
1- وه‌لاتيێ هه‌رێما كوردستانێ و ده‌ڤه‌رێن كوردستانى يێن ده‌رڤه‌يى ئيدارا هه‌رێما كوردستانێ بيت.
2- ژيێ وى ژ 18 سالان كێمتر نه‌بيت و ل 30 سالان زێده‌تر نه‌بيت.
3- ره‌وشت بلند و خودان سه‌ره‌ده‌ريه‌كا باش بيت و ب چو تاوان و كه‌فتنا ده‌همه‌نپيسيێ نه‌هاتبينه سزادان.
4- مه‌رجێن له‌شى د باش بن و ساخله‌ميه‌كا باش هه‌بيت، د ئه‌زموونا نوشدارى دا سه‌ركه‌ڤيت و بلنداهيا وى ژ 165سم كێمتر نه‌بيت و كێشا وى ژ 55 كيلۆيان كێمتر نه‌بيت.
5- ب كێمى ده‌رچوويێ پۆلا شه‌شێ سه‌ره‌تايى بيت.
6- سۆزێ بده‌ت ب چو ره‌نگان كاروچالاكيێن حزبى ل ناڤ رێزێن هێزێن پێشمه‌رگه‌يێ كوردستانێ دا نه‌كه‌ت.
7- كه‌فاله‌ته‌كا قانوونى ب كۆژمێ سێ مليۆن ديناران بده‌ت كو ب كێمى بۆ ماوێ هه‌شت سالان ل ناڤ رێزێن هێزێن پێشمه‌رگێ كوردستانێ دا كار بكه‌ت.
8- هه‌ر خۆبه‌خشه‌ك تووشى هه‌ر كێشه‌كێ ببيت ل بنگه‌هێن خۆبه‌خشينێ بلا داخوازيێن خوه ئاراسته‌يى وه‌زاره‌تا پێشمه‌رگه‌يى بكه‌ت.
ئه‌و به‌لگێن پێدڤى وه‌لاتێن وه‌لاتيێن خۆبه‌خش ل گه‌ل خوه بيه‌ن ل ده‌مێ بنگه‌هێن خۆبه‌خش سه‌ر ب وه‌زاره‌تا پێشمه‌رگه‌يى ل باژێرێن دهۆك و هه‌ولێر و كه‌ركووك و سلێمانيێ ئه‌ڤێن ل خوارێ نه:
1- داخوازيا نڤيسكى يا ئه‌و كه‌سێ حه‌زا دامه‌زراندنێ هه‌يى و ئيمزا وى ژى ل سه‌ر ب ناڤێ چوارى و ناڤونيشانێن بنه‌جنهبوونێ يێن ته‌مام و ژمارا تله‌فۆنێ.
2- به‌لگه‌ناما خواندنێ يا باوه‌رپێكرى ژ لايێ قوتابخانێ و رێڤه‌به‌ريا په‌روه‌ردێ كۆپى و يا راسته‌قينه.
3- به‌لگه‌ناما بارێ شارستانى يا راسته‌قينه و كۆپى.
4- به‌لگه‌ناما ره‌گه‌زنامێ راسته‌قينه و كۆپى.
5- كارتا زانياريى يا به‌جهبوونێ راسته‌قينه و كۆپى.
6- فورما ئاهێن خوارنێ راسته‌قينه و كۆپى.
7- 12 وێنێن ره‌نگاوره‌نگ.
ئه‌ڤرۆ نيوز:
ھژمارەکا پەرستارێن نەخۆشخانا ژن و زارۆکبوونی پشتی بۆ دەمەکی کار و راھێنان ل نەخۆشخانێن ئیتالیا کری،یێ ھەول ددەن دگەل رێڤەبەریا گشتی یا ساخلەمیا پارێزگەھا دھۆکێ سیستەمێ نەخۆشخانا ژن و زارۆبوونی ل دھوکێ ب گۆھورن وسیستەمێ نەخۆشخانێن وەلاتی ئیتالیا بجە بینن، ل نەخۆشخانێن ئیتالیا سەرەرای کو رۆژێ دو ژنان ب تنێ زارۆ دبن و ل نەخۆشخانێن مە رۆژانە گەلەک ژنان زارۆ پەیدادبن، بەلێ پێدڤیە کار بھێتە کرن بۆ ھندێ کو ساخلەمیا ژنان و زارۆیان ل دەمێ زارۆبوونێ بھێتە گرەنتی کرن.
پەرستار شرین خالد ل نەخۆشخانا ژن و زارۆبوونی دیارکر کو سیستەمێ نەخۆشخانێن ئیتالیا دگەل نەخۆشخانێن مە یێ جۆدایە و گۆت: ل نەخۆشخانێن ئیتالیا دەمێ ژنەکا دوگیان زارۆ دبیت ئامیری سکریب یێ پاقژکرنا زارۆی ھەبوو بو ھەر حالەتەکێ زارۆبوونێ ئامیرەک دھاتە بکارئینان و ھاڤێتن ئەوژی دەمێ ژنێ زارۆدبوو داننە سەر زکێ دایکێ ئێکسەر ئەو ئامیرێ سکریب دئینان و زارۆک پاقژ دکر ئەو ئاڤ وپیساتیێ پێڤە ھەموو دھاتە پاقژ کرن کو ل نەخۆشخانێن مە ئەڤ تشتە نینە، ب تنێ ئامیرەک مە یێ ھەی بو ھەموو ژنان دھێتە بکارئینان، ئەوژی دەمێ ژنێ زارۆک دبیت ئەم ل ڤێرێ رووڤیەکا وی دبرین ژ نوو د ئیننە نک ئامیرێ ھەتا داینە کاری و پاقژ دکەن رەنگە ڤی ماوەیی دا ئاڤ پیس بچیتە زکێ زارۆی، ئەم دێ ھەولدەین ئەو ئامیرە بۆ نەخۆشخانێن مە ژی بھێنە دابینکرن کو دەمێ ژنێ زارۆک دبیت دێ ئێکسەر ب ریێاوی ئامیری ھێتە پاقژکرن.
شرین خالد زێدەتر گۆتژی ل نەخۆشخانێن ئیتالیا جۆرەکێ چارچەڤا ھەبوو وەکو نایلونەکی وی چارچەڤێ ڤەبوو ئەو خۆین و پیساتیا ژنێ ھەموو دچوو وی نایلونی و نە ھاتە رێتن ب چارچەڤ و ژوورا نەخۆشخانێ و گۆت: ئەم ھژمارەکا پەرستارێن نەخۆشخانا ژن وزارۆبوونی بۆ ماوەیێ ٢١ رۆژان ماینە ل وەلاتێ ئیتالیا وچەندین سەرەدان بۆ نەخۆشخانێن وەلاتێ ناڤبری ئەنجامداینە داکو سیستەمێ نەخۆشخانێن ژن وزارۆبوونی یێ وەلاتێ ئیتالیا ل نەخۆشخانێن ژن وزارۆبوونی ل پارێزگەھا دھۆکێ بجە بینن نوکە ئەم پێڤە دمژوولین ب ریێا ورک شوپا دێ ھەموو پەرستارێن خوە فێری سیستەمی وان کەین.
ڤیان فارس، ئێک ژ وان پەرستاران بوو بۆ ماویێ ٢١ رۆژان مایە ل ئیتالیا گۆت: نەخۆشخانێن مە و وان گەلەک ژێکجۆدانە پشتی ئەم ڤەگەریاینە دھۆکێ ئەو ھزرێن مە دگەل خوە ئیناین دێ ھەولدەن ھەموویان ل نەخۆشخانێن خوە بجە بینین ھەر بگرە ژ سەرەدەریا نوشدار و پەرستار و ھەموو ستافێ نەخۆشخانێ دگەل نەخۆشی ھەتا ژنێ زارۆ دبوو و دچوو مال کو دەمێ ژنا دوگیان دھاتە نەخۆشخانێ، پەرستاریەک دھاتە تەکلیفکرن دگەل بوو ھەتا دچوو ژوورا زارۆکبوونێ دا و زارۆک دبوو و دچوو مال ورێڤەبەریا گشتیی یا ساخلەمیا دھۆکێ و رێڤەبەریا نەخۆشخانا مە ژی گەلەک دھاریکارن دگەل مە دا بۆ بجە ئینانا سیستەمێ نەخۆشخانێن وەلاتی ئیتالیا کو ل نەخۆشخانین ژن وزارۆکبوونی رۆژی ھەموو دو ژن زارۆک دبوون لی ل نەخۆشخانا مە ھندەک رۆژان ژمارەکا زور یا ژنان زارۆک دبن و پێدڤیە ھەمان سیستەم بجھبینین.
ئەڤرۆ نیوز:
ل گۆر راپۆرتەکا ئاژانسا رویتەرز یا نووچەیان بریارا ١٤ ڤێ مەھێ کۆنفرانسێ چارەکرنا قەیرانا یەمەنێ ل جنێڤ برێڤە بچیت و ئیران ب چو رەنگەکێ پشکداریێ د وێ کۆنفرانسێ دا ناکەت و یەک ژ ئەگەرێن سەرەکی یێن پشکداری نەکرنا ئیرانێ د وی کۆنفرانسی ژی بۆ سیاسەتا سعوودیێ ڤەدگەریت کو ب ھەموو رەنگەکێ بزاڤ کرن ئەمریکا و وەلاتێن ئوروپا رازی بن ئیران پشکداریێ نەکەت و ئەو یەک ژی دێ دربەکا گەلەک مەزن بیت بۆ ئیرانێ.
ل ئالیێ دی خالد بحاح سەرۆک وەزیرێن یەمەنێ د پرێس کۆنفرانسەکێ ل وەلاتێ سعوودیێ راگەھاند کو ئەز سۆپاسیا ھەلویستێ سعوودیێ و وەلاتێن دی یێن عەرەبی دکەم کو پشتەڤانی ل گەلێ یەمەنێ کرن و نەھێلان ئیران ب رێیا حوسیان وەلاتێ مە وێران بکەت و گۆت: (کۆنفرانسێ جنێڤ بۆ پاشەرۆژا یەمەنێ گرنگە، چونکو یەک ژ ئارمانجا کۆنفرانسی ئەوە دا کو نەتەوێن ھەڤگرتی ب رەنگەکێ فەرمی پشتەڤانیا خوە بۆ حوکمەتا ھەلبژارتی یا یەمەنێ دیار بکەت و داخواز ژ کۆدەتاچیان بھێتە کرن کو دەستان ژ مال و مولکێ دەولەتێ بەردەن و چەکێن خوە رادەست بکەن، ژ بەر ھندێ ژی کۆنفرانسێ یەمەن د راستیا خوە دا رێزگرتنە بۆ ئیرادا گەلێ مە و سعوودیێ رۆلەک مەزن بۆ ھندێ گێرا).
سەرۆک وەزیرێن یەمەنێ سەبارەت ب رۆلێ ئیرانێ د کۆنفرانسێ جنێڤ ژی دیار کر کو ئیران یەک ژ ئالیێن شەری یە ل یەمەنێ و ب رەنگەکێ ئاشکرا پشتەڤانیێ ل حوسیان دکەت، د راستیا خوە دا ئیران بوویە ئەگەرێ مرنا ب ھزاران وەلاتیێن مە و ئیران ب سیاسەتا خوە یا خەلەت بوو ئەگەر وەلاتێ مە وێران بیت و گۆت: (یەک ژ ئەگەرێ گیربوونا گێرانا کۆنفرانسێ جنێڤ ژی بۆ ھندێ ڤەگەریت کو مە بەری نھا دیار کربوو نابیت ب چو رەنگەکێ ئیران پشکداریێ د وی کۆنفرانسی دا بکەت، نھا ئەو یەک ژ ئالیێ لیژنا ھەماھەنگیێ ڤە ھاتیە قەبوول کرن و ئەوە ژی پێنگاڤەکا گرنگە دا کو دەستھەلاتا خەلکی بۆ خەلکی بھێتە ڤەگەراندن و دڤێت کۆدەتاچی ژی بھێنە سزا دان).
چاڤدێرێن سیاسی دیار دکەن کو کۆنفرانسێ جنێڤ بۆ چارەکرنا قەیرانا یەمەنێ ب پشتەڤانیا ئەمریکا و ئوروپا و وەلاتێن عەرەبی برێڤە دچیت، چونکو سعوودیێ ھندەک داخوازیێن ئەمریکا سەبارەت ب رۆژھەلاتا ناڤین قەبوول کریە و ژ بەر ھندێ ژی ئەمریکا سیاسەتا خوە ل ھەمبەر سعوودیێ گوھۆری و وێ یەکێ کاریگەریا خوە ل یەمەنێ ژی کریە و ئەگەرێ گیربوونا کۆنفرانسێ جنێڤ ژی بۆ ھندێ ڤەدگەریت کو سعوودیێ دخوازیت ل کۆنفرانسێ جنێڤ بریارا ٢٢١٦ بجە بینیت کو ل گۆر وێ بریارێ دڤێت حوسێ بێی مەرج دەستان ژ چەکی بەردەن و بزاڤێ بکەن ب رێیێن سیاسی داخوازا مافێ خوە بکەن و ھەکە ئەو یەک بھێتە کرن دێ دربەکا گەلەک مەزن بیت ل دژی حوسی و ئیرانێ و ئەو یەک د ھەمان دەمی دا سەرکەڤتنەکا گەلەک مەزنە بۆ سعوودیێ و ھەڤپەیمانێن وێ کو دەمەکە ل دژی حوسیان ل یەمەنێ شەری دکەن.
ئەڤرۆ نیوز:
پشتی ھەلبژارتنێن تورکیا دەزگەھێن راگەھاندنا رۆژھەلاتا ناڤین بەحسێ گرنگیا ھەلبژارتنان و گوھۆرینێن ل تورکیا کرن و راگەھاندن کو ئەنجامێ ھەلبژارتنان نیشا دا کو ئێدی ل تورکیا کورد بووینە کارتەکا ب ھێز و ئەردۆگان ژی نەشێت ب تنێ چ سیستەما کو خواست بجە بکەت و خەلکێ تورکیا سنۆرەک بۆ زێدەگاڤیێن ئەردۆگانی دانا.
رۆژناما قودس عەرەبی یا کو ل لەندەنێ دەردکەڤیت د راپۆرتەکێ دا دیار کر کو ل ھەلبژارتنێن تورکیا پارتیا ئەردۆگانی بوو پارتا ئێکێ، لێ ئەو یەک د ھەمان دەمی دا شکەستنەکا مەزن بۆ ئاکپارتیێ بوو، چونکو ئەردۆگان نەشێت نھا سیستەمێ سەرۆکاتیێ بجە بکەت و کورد ژێ ئێدی ل تورکیا بوونە ھێزەکا مەزن و دێ ل پەرلەمانی نوونەراتیا خوە بکەن و ئێدی دەستھەلاتا تورکیا نەشێت وەک جاران سەرەدەریێ ل گەل کوردان بکەت.
د بەردەوامیا راپۆرتێ دا ھاتیە دیار کرن کو ئەنجامێ ھەلبژارتنێن تورکیا دێ کاریگەریا خوە ل سەر وەلاتێن دی یێن عەرەبی ژی ھەبیت، چونکو ئەردۆگانی ھاریکاریا گەلەک بزاڤ و گرۆپێن عەرەبی دکر و دیارە خەلکێ تورکیا سنۆرەک بۆ ئەردۆگانی و پارتا وی دانان و ژ بەر ھندێ پشتی ڤان ھەلبژارتنان دێ گەلەک تشت ل تورکیا ھێنە گوھۆرین و وەک خوە نامینن.
رۆژناما ئیسرائیل یاھوم یا ئیسرائیلێ کو وەک رۆژنامەکا نێزیکی سەرۆک وەزیرێن وی وەلاتی بنیامین نەتانیاھۆ دھێتە نیاسین د راپۆرتەکێ دا دیار کر کو خەلکێ تورکیا دربەکا مەزن ل ئەردۆگانی و خەیالێن وی دا، یا یەکێ خەلکێ تورکیا گۆتە ئەردۆگانی تو نەشێی ل گۆر دلێ خوە وەلاتێ مە برێڤە ببەی و ژ بەر ھندێ ژی پارتا ئەردۆگانی نھا نەشێت ب تنێ حوکمەتێ ئاڤا بکەت، خالا دی کورد چوونە پەرلەمانی و بوونە کارتەکا ب ھێز و نھا ئەردۆگان نەشێت وەک جارا دژبەریا کوردان بکەت، ھەتا نھا ئەردۆگان و پارتیا وی پێدڤی کوردانن و ژ بەر ھندێ ژی ئەردۆگان نەچارە نێرینێن خوە ل ھەمبەر کوردان ب گوھۆریت.
د بەردەوامیا راپۆرتا رۆژناما ئیسرائیلێ دا ھاتیە دیار کرن کو خەلکێ تورکیا ب ڤان ھەلبژارتنان ب رەنگەکێ ئاشکرا دژبەریا خوە ل ھەمبەر سیستەمێ سەرۆکاتیێ ل تورکیا دیار کرن، چونکو بۆ خەلکێ تورکیا ئاشکرا بوو کو مەرەما ئەردۆگانی ژ ئاڤاکرنا سیستەمێ سەرۆکاتیێ ئەو بوو کو وی دخواست وەک سۆلتانێن ئۆسمانیان سەرەدەریێ ل گەل خەلکێ بکەت و ئاڤاکرنا کۆچکێ سپی یا کو پتر ژ ھزار ژوورێن خوە ھەنە ژی نیەتا راست یا ئەردۆگانی بۆ خەلکێ تورکیا ئاشکرا کربوو و وان خالان ھەموویێ کاریگەریا خوە ل خەلکێ تورکیا کر و ئەنجامێ ھەلبژارتنان ژی نیشا ددەت کو ئەردۆگان تووشی شکەستنەکا مەزن ھاتیە و دڤێت پێداچوونەکا مەزن د سیاسەتا خوە دا بکەت و ل گۆر خەیالێن ھزار سالێن بۆری نەژیت.
دەزگەھێن راگەھاندنا ئیرانێ ژی دیار کرن کو خەیالێن ئەردۆگانی بۆ سیستەمێ سەرۆکاتیێ و گوھۆرینا دستوورێ وی وەلاتی ژناڤ چوون و خەلکێ تورکیا ب رێیا ھەلبژارتنێن ڤێ دووماھیێ بۆ ئەردۆگانی دیار کرن کو وان دکتاتور نەڤێن و ئەو نەشێت ل گۆر دلێ خوە وەلاتەکێ برێڤە ببەت و ژ بەر ھندێ ژی د ھەلبژارتنان دا کورد سەرکەڤتن و ئەردۆگان و پارتیا وی تووشی شکەستنەکا مەزن ھاتن و ئەردۆگان نھا نەچارە داخوازیێن ھندەک پارتێن دی قەبوول بکەت دا کو بشێت حوکمەتا نوو ب رێیا داوود ئوگلۆیی ئاڤا بکەت.
دەزگەھێن راگەھاندنا وەلاتێ قەتەرێ ژی دیار کرن کو سەرەرای ھندێ دەنگێ ئاکپارتیێ کێم بووینە لێ دیسان سەرکەڤتیێن ھەلبژارتنێ ئاکپارتیە و پرانیا خەلکێ تورکیا پشتەڤانیێ ل سیاسەتا وێ پارتیێ دکەن و ژ بلی کوردان ھەر دو پارتیێن دی ل تورکیا نەشیاینە دەنگێ خوە زێدە بکەن و ژ بۆ ئاڤاکرنا کابینا نوو یا حوکمەتێ ژی چو ژ بلی ئاکپارتیێ نەشێت حوکمەتێ ئاڤا بکەت.
رۆژناما مستەقبەل یا لوبنانێ ژی د راپۆرتەکێ دا دیار کر کو سەرکەڤتنا ئاکپارتیێ نیشا ددەت کو خەلکێ تورکیا دخوازن ل سەر بنەمایێ کەلتوری یێ ئۆسمانیان بژین ئاکپارتی دیسان شیا سەرکەڤیت و ئەو یەک ژی نیشا ددەت باوەریا خەلکێ تورکیا ب چو پارتەکا دی ژ بلی ئاکپارتیێ ناھێت.
ئه‌ڤرو نیوز،بارزان مزوورى
رائید به‌درخان حه‌جى ژ هێزێن پێشمه‌رگه‌یێن، فه‌وجا 3 ژ لیوا 12 ل میحوه‌رێ شه‌نگال بو مالپه‌رێ ئه‌ڤرو نیوز ئاشكرا كر كو ئه‌ڤرو ده‌مژمێر 9:30 خوله‌ك شه‌ڤ 9/6/2015 چه‌كدارێن تیرورستێن داعش مژیلى به‌رهه‌ڤ كرنا هێرشه‌كێ بون بو سه‌ر هێزێن پێشمه‌رگه‌ى، به‌لێ فروكه‌یێن هه‌ڤپه‌یمانان سێ جهێن وان یێن سه‌ره‌كى، ئانكو جهێ به‌رهه‌ڤى لێ دكر بوردومان كرن وهه‌رسێ جهێن وان ئاگر لێ بلند كر و زیانێن مه‌زن ب وان كه‌فتن و لدوڤ زانیاریێن ده‌ستپێكێ گه‌له‌ك چه‌كدار هاتینه كوشتن و چه‌كێ وان هاتیه تێك شكاندن .
ناڤبرى دیار كر كو ل شه‌ڤا بورى ژى هێرشه‌كا وان هاته تێك شكاندن ژلایێ فروكه‌یێن هه‌ڤپه‌یمانان ڤه .
نيشاندان