ئه‌ڤرۆ:
ئەو شوفێرێن کو پێشەیا تەکسیان دکەن گازندا وێ یەکێ دکەن کو ل پارێزگەھا دھۆکێ ھەموو کەس دکارن ببنە خودان تەکسی و دەلیڤا کارکرنێ بۆ وان نەھێلایە و دخوازن یاسایەک ھەبیت بۆ ھاژووتنا تەکسیێ و مافێن وان تێدا بھێنە پاراستن. رێڤەبەریا ڤەگوھاستنا دھۆکێ ژی دیار کر کو 90% ژ وان کەسێن کارێ تەکسیێ دکەن مووچە خورن.
شوفێرەکێ تەکسیێ ب ناڤێ ئیسماعیل عەبدوللا دیار کر، ئەو ژ بلی کارێ تەکسیێ چو کارێن دن ناکەت و گۆت: (پری دھۆکێ تەکسی بوون و رۆژ بۆ رۆژێ ژی ھەر یێن د زێدەبوونێ دا و ئەڤ یەکە ژی بوویە سەدەم کارێ مە نەمینیت، ژ بەر کو ھەچیێ بیت تەکسیەک کری و د ناڤا دھۆکێ دا ھاتن و چوون کر و بۆ پتریا وان ژی نەخەمە کار ھەبیت یان نە، ژ بەر کو ماموستایە یان فەرمانبەرە، مووچێ خوە وەردگریت).
زێدەتر گۆت: (مە چەندین جاران داخوازی ب رێیا نوونەرێن خوە گەھاندینە جھێن شولەژێ کو دەستووریێ نەدەنە ھەموو کەسان ب تایبەتی خودان مووچە و کاران، بەلێ چو دیار نینە و رۆژ بۆ رۆژێ خراپترە و ئەز ھندەک شوفێرێن تەکسیان دنیاسم تەکسیێ دھاژوون، بەلێ دا بھایێ پانزینا خوە بدەستڤە بینیت و ئەم ژی سپێدێ ھەتا ئێڤاری ب ھڤیا تەکسیێ نە و ب کوتەکی 40-50 ھزار دیناران ب دەستخوڤە دئینین ئەو ژی نیڤەک بۆ پانزینێ یە).
خودان تەکسیەکێ دی کو نەڤیا ناڤێ خوە بێژیت دیار کر کو ئەو ل گەل کارێ تەکسیێ د ھەمان دەم دا ماموستایە و گۆت: (ھەر چەند دو ھەیڤا جارەکێ مووچە یێ دھێت و مووچە ژی ب راستی بۆ ئەڤرۆیا کوردستانێ گەلەک کێمە و تێرا ھەموو تشتان ناکەت، ژ بەر کو ئەز کرێدارم و 200 دولاران ددەمە کرێ و مووچە ژی نینە و ئەگەر مووچە بەردەوامی بھێنەدان و موچەیێن مە باش بن، ئەم ب خوە ڤی کاری ناکەین).
خوشەڤی ئوسمان، رێڤەبەرێ ڤەگوھاستنا پارێزگەھا دھۆکێ بۆ ئەڤرۆ گۆت: (ھەر کەسەکێ کارێ تەکسیێ بکەت ئەم کارتەکێ ددەینێ کو ھەتا نھا دناڤخوەیا دھۆکیێدا مە کارت داینە 9600 تەکسیان و ل دەرڤەیی دھۆکێ ژی ٥٥٠ تەکسیان و ژ بلی ئەڤانە چو کەسەکێ دی ماف نینە کارێ تەکسیێ بکەت و ئەگەر ئێکێ ڤیا کارێ تەکسیێ بکەت دڤێت قەستا مە بکەت دا کو کارتەکێ بدەینێ).
رێڤەبەرێ ڤەگوھاستنا دھۆکێ زێدەتر گۆت: (ھەر شوفێرەکێ مە کارت دایێ کارێ خوە ب درۆستی نەکر مە پێرابوونێن یاسایی ھەنە ژ وان ژی حەفتیەکێ دێ ژ کاری ھێتە دوورکرن).
ل دور چاوانیا وەرگرتنا شوفێرێن تەکسیان خوشەڤی ئوسمان گۆت: (ھەر شوفێرەکێ ل دەڤ مە کارتێ وەربگریت دڤێت تەکسیا وی مودیل 2010 بۆ سەری بیت و ئاکنجیێ دھۆکێ بیت و سۆزنامەکێ ل ھوبا یاسایی بنڤیسیت کو ژبلی کارێ تەکسیێ چو کارێن دی نەکەت و ھەموو مامەلەیێن تەکسیێ ل سەر ناڤی َوی بن و ھندەک رسوماتان بدانیت و کارکرن ژی ب تیروپشکە بۆ وان تەکسیێن ل ھێلان کاردکەن، بەلێ ب مخابنی ڤە ب رێژەیا 90% ژ شۆفێر تەکسیێن پارێزگەھا دھۆکێ خودان کار و مووچەنە و سۆزنامەیێن وەرنەگرتنا مووچان و نەبوونا چو کارێن دی ژی ل سەر خوە دنڤیسن و چو دووڤچوون نینن ل سەر ڤێ یەکێ).
عیسا سلێمان نسری، سەرۆکێ ئێکەتیا سەندیکایێن کرێکارێن کورستانێ لقێ دھۆکێ دیار کر، ھەر شوفێرەکێ خودان مووچەبیت و کارێ تەکسیێ بکەت کارێ وی نابیتە پێشە و گۆت: (ب چو رەنگان نابیت فەرمانبەر و خودان مووچە تەکسیێ بھاژوون ب تایبەتی ئەو کەسانێن مووچەیێن وان بلند و دڤێت پەرلەمان ب ئەرکێ خوە رابیت و یاسایەکێ دەربێخیت بۆ نەدانا دەستووریا شوفێریێ بۆ وان کەسانێن تەکسیێ دھاژوون و کارەکێ دی دبەرا بکەن).
رائیدێ مافپەروەر ئازاد تاھا بەرپرسێ راگەھاندنا ھاتن و چوونا دھۆکێ ل دور ژمارا تەکسیان بۆ ئەڤرۆ گۆت: (ل سەرانسەرێ پارێزگەھا دھۆکێ نێزیکێ 16 ھزار 800 ترومبێلێن کرێ ھەنە و رێژەکا زێدە ژ وان تەکسی نە و ژ وان ژی نێزیکێ 500 ژ جۆرێ کوستەر و مینی پاسن و کارێ وان ئەوە نەفەر و رێڤینکان دئینن و دبەن بەرامبەر وەرگرتنا کریەکێ).