ئهڤرۆ:
* ڤیتامین د گرنگن بۆ لەشی، دەمێ کێم دبن پێدڤیە خوارنێن ژ ڤیتامینان پێکھاتی بخوین، ھەکە خوارن یا باش نەبیت، ل جھێ وێ دێ دەرمان ھێنە ب کارئینان ب شێوەیەکێ بەروەخت، د ھندەک دەلیڤەیێن دەگمەن دا و ژ ئەگەرێ خوارنێ رێژەیا ڤیتامینان د لەشیدا زێدە دبیت و پتریا حالەتێن ژێ پەیدادبن ئەوە ل دەمێ ب شێوێ دەرمانان دھێنە خوارن و ئەنجامێن وێ د ئالوزن:
* ڤیتامین ئەی: دبیتە ئەگەرێ گیروبوونا وەرارا زارۆیان، تەنگەزاریێن عادەیا ھەیڤانە ل دەڤ ژنان، نەدروستیا تەپکێن سۆرێن خوینێ، تەنگەزاریێن پیستی، ئێشانا سەری، عێلنجی، زەرک و ل دەڤ ژنێن دوگیان ژی دبیتە ئەگەرێ نەدروستیا کورپەلەیێ وێ.
* ڤیتامین بی ٣: گەلەک ب کارئینانا وی دبیتە ئەگەرێ تەنگەزاریێن جگەرێ.
* ڤیتامین بی ٦: دبیتە ئەگەرێ ھەودانا دەماران ئەوژی ب شێوەیەکێ گەلەک کێم رووددەت.
* ڤیتامین سی: کاردکەت بۆ ھاڤێتنا کەمیا زێدە یا ئاڤێ ب رێکا گولچیسکان، زێدەبوونا ڤی ڤیتامینی دلەشیدا دبیتە ئەگەرێ پەیدابوونا بەرکێن گولچیسکان و زەراڤێ و کالسیوم ژی د ھەستیان دا کێم دبیت.
* ڤیتامین دی: تەنگەزاریێن گولچیسکان پەیدادکەت، دلێ مرۆڤی ناچیتە خوارنێ و سەرئێشان پەیدادبیت، تەنگەزاریێن گەھان و ھەستیان پەیدادبن، مرۆڤ ھەردەم یێ د خەوە، رێژەیا کالسیومی د خوینێ دا بلند دبیت و ھەکە ل دەڤ ژنا دوگیان رێژەیا ڤی ڤیتامینی بلند بوو دێ بیتە ئەگەرێ وێ چەندێ کارتێکرن ل کورپەلەیێ وێ بھێتە کرن.
ئەڤرۆ:
ھەکە ریفراندۆمەک ل ھەرێما کوردستانێ بھێتە ئەنجامدان ل دۆر دامەزراندنا دەولەتا کوردی و مللەتێ کورد تێدا داخوازا سەرخەبوونێ بکەت، پێدڤیە ل سەر مە رێزێ ل بریارا مللەتێ کورد بگرین و دێ پێشوازیێ ل بریارا وان کەین، ژ بەر کو نوکە پەیوەندیا ھەرێما کوردستانێ ل گەل عیراقێ پەیوەندیەکا کونفیدرالی یە و ڤێ پەیوەندیا نە دروست زیان ب عیراقێ گەھاندینە (ل ناڤ عیراقێ و ل دەرڤەی عیراقێ) و ئەڤ پەیوەندیا من ئاماژە پێکری ئێک ژ ئەگەرێن کوورکرنا ئاریشان بوو نەکو چێکرنا ل ھەڤھاتنەکا سیاسی ل عیراقێ.
ب دیتنا عالیا نسەیفێ، ھەکە ریفراندۆم ل ھەرێما کوردستانێ بھێتە ئەنجامدان ل دۆر پرسا جودابوونێ ژ عیراقێ، دێ ھەمان ئەزموونا ئوسکوتلەندا دوبارە بیت دەمێ ل رۆژا ١٨ ئیلۆنا ٢٠١٤ وەلاتیێن ئوسکوتلەندا جوودابوون ژ بریتانیا رەتکری، ژ بەر کو گەلەک ژ وەلاتیێن کورد ناخوازن ژ عیراقێ جوداببن و ھندەک پارتێن کوردی ژی یێن ھەین دخوازان ھەرێما کوردستانێ دناڤ عیراقێ دا بمینیت.
ل دووڤ بوچوونا ڤێ ئەنداما دەولەتا قانوونێ، پرسا مادێ ١٤٠ دێ مینیت و ھەکە ھەرێما کوردستانێ ژ عیراقێ جودابیت ژی، دێ پرسا دەڤەرێن مادێ ١٤٠ بیتە پرسەکا نێڤدەولەتی د ناڤبەرا ھەردو دەولەتێن عیراقێ و کوردستانێ دا و گوت”عەرەبێن عیراقێ دێ وێ پرسێ کەنە پرسەکا نێڤدەولەتی و دێ بۆ نەتەوێن ئێکگرتی و دادگەھا دادپەروەری یا نێڤدەولەتی بلند کەن”.
ئەڤرۆ:
دەولەتا ئیرانێ ژ بۆ بێدەنگ کرنا ئۆپۆزسیۆنا ناڤخوە و کورد و بەلوچان دەست ب ھەوەکا بەرفرەە یا گرتنێ کریە و د ناڤا دو رۆژان دا ١٨٢ کەسن ب تۆمەتا کو بەرھەڤیێ بۆ سەرھلدانان دکەن دەستەسەر کریە و د ھەمان دەمێ دا ژی سنۆرێن خوە یێ ل گەل باکور و باشورێ کوردستانێ ژی مینرێژ دکەت.
حسێن عەلی چالاکڤانێ سیاسی ل رۆژھەلاتێ کوردستانێ د داخۆیانیەکی دا بۆ رۆژناما ئەڤرۆ راگەھاند کو پتر ژ دو ھەفتیانە ھێزێن سەر ب دەزگەھێ ھەوالگێریێ و پاسدارێن ئیرانێ ل ناڤ باژێر و گوندێن رۆژھەلاتێ کوردستانێ و بەلوچستانێ دەست ب ھەوەکا مەزنا گرتنێ کرینە و گۆت: (دەولەتا ئیسلامیا ئیرانێ د رەوشا نھا دا ژ ھەر دەمەکی زێدەتر ژ ئۆپۆزسیۆنا ناڤخوە و کورد و بەلوچان دترسیت و ب تۆمەتا ب ھەڤکاریا ئەمریکا و وەلاتێن ئورۆپا ئەو بەرھەڤێی بۆ سەرھلدانان دکەن، ب سەدان وەلاتیان دەستەسەر کرینە و دخوازیت گەنجان ب زۆرێ وەک سیخور بکار بینیت و گوندیان ژی ھان ددەت کو جاشاتیێ بکەن و یێن رەت ژی دکەن دھێنە گرتن و فشارێ دخیتە سەر ھندەک گوندیان ژی دا کۆ دەڤەرێن خوە بجە بھێلن و کۆچبەرێ باژێرێن ناڤەراست یێن ئیرانێ ببن). حسێنی ھەروەسا راگەھاند ژی کو حوکمەتا ئیرانێ ژ سالا ٢٠١١ ڤە ژی چ کارێ خزمەتگوزاریێ نەبریە گوندێن کوردان و رێیێن گوندێن سەر سنۆرێن باکور و باشورێ کوردستانێ ژی مینرێژ کریە و گۆت: (رۆژانە ژ بەر مینێن دەولەتێ وەلاتیێن سڤیل بریندار دبن و ژ ئەنجاما کەمینێن پاسداران ژی د ناڤا دو ھەفتیان دا ھەشت وەلاتی ھاتینە کوشتن و فشارەکا گەلەک مەزن ل سەر وەلاتیان دا دروست کریە و خەلکێ نەچار دکەن کو گوندێن خوە ڤالا بکەن و یێن ڤێ یەکێ رەت دکەن ژی نەچار دمینن کو د گەلەک دژوار دا ژیانا خوە برێڤە ببەن، ژ خوە چو کارێن خزمەتگوزاریێ ژ سالا ٢٠١١ ڤە ل گوندێن نێزیکی سنۆر نینە و ئەوە ژی رێ ل بەر ژیانا رۆژانا دگریت).
ناڤھاتی ھەروەسا دیار ژی کر ل باژارێرن وەک تەھران و تەبریزێ ژی ئۆپەراسیۆنێن بەرفرەە ل دژی ئالیگرێن ئۆپۆزسیۆنێ دەستپێکرینە و سوننەیان ژی ب رەنگەکی ڤەشارتی خستیە د بن کۆنترۆلەکا دژوار دا و وەلاتیێن سوننە وەک سیخورێن تورکیا و سعوودیێ دھێنە تۆمەتبار کرن و گۆت: (نھا ل ئیرانێ ب بەھانا سیخوریا ژ بۆ ئەمریکا، ئورۆپا، تورکیا و سعوودیێ ب سەدان وەلاتی د زیندانان دانە و ب تایبەت پشتی شەرێ یەمەنێ زۆرداریا ل سەر سوننەیان ب رەنگەکی گشتی زێدە بوویە و ئەوە ژی بوویە سەدەمێ بێزاریەکا مەزن د ناڤ وەلاتیان دا، ب تایبەت ژی ل تەھران، تەبریز، رۆژھلاتێ کوردستانێ و بەلوچستانێ کۆمبوونا خەلکێ وەک بەرھەڤیا سەرھلدانان دھێتە بناڤ کرن).
د دووماھیا ئاخاڤتنا خوە دا ژی حسێنی راگەھاند کو دەولەتا ئیرانێ بۆ نەرمکرنا ھەلویستێن وەلاتێن ئورۆپا و ئەمریکا دەریێن کارگەھێن ئەتۆمی بۆ ئاژانسێن نێڤدەولەتی ڤەکریە و گۆت: (ل رۆژھلاتێ کوردستان، بەلوچستان و تەھرانێ پرانیا خەلکێ ژ وێ یەکێ دترسن کو ئورۆپا و ئەمریکا ل ھەمبەر ڤێ سیاسەتا ئیرانێ چاڤێن خوە ژ کریارێن حوکمەتێ را بگرن و بێدەنگیا وەلاتێن رۆژئاڤا ل ھەمبەر بنپێکرنا مافێ مرۆڤان ژی بوویە سەدەمێ سەرەکی د دروستبوونا ترسا وەلاتیان دا و ب کریاری ژی دھێتە دیتن کو پشتی دەستپێکرنا ھەڤدیتنێن نوو یێن ل سەر بەرناما ئەتۆمی، سیاسەتا ئیرانێ د ناڤ خوە دا ژ ھەر دەمەکی زێدەتر دژوار بوویە و بێدەنگیا پارت و ئالیێن سیاسی یێن رۆژھەلاتێ کوردستانێ ژی وەسا دکەت کو خەلک ژ ئەنجامدانا چالاکیێن سیاسی بترسن و ژێ دوور کەڤن).
ئەڤرۆ:
رۆژنامەکا ئەمریکی د راپۆرتەکێ دا دیار دکەت کو شەرێ یەمەنێ شەرێ شیعە و سوننانە و نھا ل عیراقێ ژی شەرێ د ناڤبەرا ھەر دو مەزھەبان دا توندتر بوویە و ئۆپەراسیۆنا ل یەمەنێ دێ دەستێ سوننان ل عیراقێ ب ھێز کەت و ئەو دێ داخوازا راگەھاندنا ھەرێمەکا سوننە ل عیراقێ کەن و ل ئالیێ دی کوردان ژی دەمەکە کار بۆ سەربخوەیی کرینە و ب ڤی رەنگی دێ عیراق ل سەر سێ پارچان ھێتە دابەش کرن و دێ سێ دەولەتێن نوو ئاڤا بن.
رۆژناما وال ستریت جۆرنال یا ئەمریکی د راپۆرتەکێ دا دیار دکەت کو ئۆپەراسیۆنا ل یەمەنێ د راستی دا ئۆپەراسیۆنا وەلاتێن سوننی یێن عەرەبیە ل دژی ئیران و ھێزێن شیعە و ژ بەر ڤێ یەکێ ژی ئەو شەرێ نھا ل یەمەنێ برێڤە دچیت تنێ ب یەمەنێ ڤە سنۆردار نامینیت و دێ بازنا شەرێ بەرفرەھتر بیت و دێ گەھیتە سعوودیێ، عیراق و سووریێ و گەلەک وەلاتێن دی یێن عەرەبی و عیراق ئێک ژ وان وەلاتانە کو دێ کەڤیتە ژێر کاریگەریا شەرێ یەمەنێ، چونکو د راستی دا نھا ل عیراقێ شەرەکی مەزن د ناڤبەرا سوننان و شیعان دا ھەیە و بەرفرەھبوونا شەرێ ل یەمەنێ دێ پتر ژ ھەر وەلاتەکێ ناکۆکیێن مەزن ل عیراقێ دژوارتر لێ کەت.
د بەردەوامیا راپۆرتێ دا ھاتیە دیار کرن کو داعشێ و رێکخراوێن تیرۆرستی یێن وەک قاعیدە کو پتر ل ژێر ناڤێ مەزھەبێ سوننە چالاکیان دکەن زیانەک مەزن گەھاندنە پێگەھێ وەلاتێن سوننی و ژ بەر ڤێ یەکێ ژی نھا سعوودیە و قەتەر و وەلاتێن دی دخوازن کو د شەرێ ل یەمەمێ سەربکەڤن و ھەروەسا وان دڤێت ب پشتەڤانیا ئەمریکا و وەلاتێن رۆژئاڤا ل دژی داعشێ ژی شەری بکەن، چونکو ھەتا داعش و قاعیدە ل ژێر ناڤێ مەزھەبێ سوننە چالاکیێن تیرۆرستی بکەن د ئاستێ نێڤدەولەتی دا دێ پێگەھێ سعوودیێ و وەلاتێن دی لاواز بیت و ژ بەر ھندێ ژی شەرێ نھا ل یەمەنێ و سەرکەڤتنا بەرەیێ سوننە دێ دەستێ سوننان ل عیراقێ ژی ب ھێز کەڤیت و ئەو دێ داخوازا جودابوونێ بکەن و رەنگە داخوازا ئاڤاکرنا ھەرێمەکا سوننی بکەن.
د پشکەکا دی یا راپۆرتێ دا ھاتیە دیار کرن کو دەمەکە کوردان ناکۆکیێن مەزن ل گەل حوکمەتا ناڤەندی ھەنە و ھەتا نھا ژی حوکمەتا ناڤەندی پرسێن خوە ل گەل کوردان چارە نەکریە و بۆدجێ کوردان بریە و مووچێ فەرمانبەرێن کوردستانێ ژی نادەت و پرانیا خەلکێ ھەرێما کوردستانێ دخوازن کو ئێدی ژ عیراقێ جودا ببن و ژ بەر ھندێ ھەکە سوننە ھەرێمەکا خوە رابگەھینن دێ کورد ژی دەولەتا خوە راگەھینن و د ب ڤی رەنگی عیراقێ ھێتە پارچەکرن و کەس نەشێت رێگریێ ل پارچەبوونا عیراقێ بگریت.
د دووماھیا راپۆرتا رۆژناما ئەمریکی دا ئەو یەک ژی ھاتیە دیار کرن کو ئەمریکا و بریتانیا دەمەک درێژ بزاڤ کرن کو مۆدیلا پێکڤەژیانێ ل عیراقێ بنەجە بکەن، لێ د دەمێن بۆری دا بۆ وان ژی دۆپات بوو کو ئێدی چو بنەمایێن پێکڤەژیانێ د ناڤبەرا پێکھاتێن عیراقێ دا نەمایە و چو چارە نەماینە ژ بلی پارچەبوونا عیراقێ دا ھەر پێکھاتەک ب خوە بریارێ ل سەر چارەنڤیسێ خوە بدەت. چونکو داعشێ و سیاسەتا مالکی سەرۆک وەزیرێن بەرێ یێ عیراقێ بناغێ پێکڤەژیانێ ل عیراقێ خراب کر و ئێدی باوەریا کوردان ب حوکمەتا ناڤەندی نەمایە و ل ئالیێ دی ژ بەر وێ سیاسەتا توند یا کو حوکمەتا ناڤەندی ل ھەمبەر سوننان برێڤە بری بۆ ئەگەر کو مووسل و گەلەک دەڤەرێن دی ل عیراقێ ب ساناھی بکەڤنە دەستێ داعشێ و نھا ژی خەلکێ وان دەڤەرێن دترسن کو پشتی ژناڤچوونا داعشێ چەکدارێن شیعە کارەساتێن مەزن ل باژارێن وان ئەنجام بدەن.
ئهڤرو نیوز،بارزان مزوورى
كچهكا كوردا روژههلاتا كوردستانێ دخوازيت وهك شاجوانا ئهنترنێتێ بهشدارى د رێوهرهسمێن ههلبژارتنا شاجوانا گراند یا نیڤدهولهتى بكه ت كو بریاره ئهڤ ساله مهها 10 ل تایلةند برێڤهبچیت .
لهیلا چوپانى ژیێ وێ 23 ساله خهلكا باژێرێ مهاباده ل روژههلاتا كوردستانێ نها ل ستوكهولم پایتهختێ سوید دژیت ل دوبهى كارێ فاشیون دكر بریار یا دایى بناڤێ كوردستانێ بهشدارى دڤێ رێورهسمێ بكهت
ئهڤرۆ نیوز،زنار توڤى:
سایتێ (فیوچهر تیڤى) یێ لبنانى دیاركریه كو پیشهیێ بهرێ یێ ڤان هونهرمهندێن ناڤدارێن عهرهب بهرى ببنه هونهرمهندێن ناڤدار ئهڤهبوو،وهك كازم ساهر كو د زاروكاتیا خودا ئایسكریم فروتینه و ئهو بخو دبێژیت:ههوار كرن و بازار پهیدا كرن بو ئایسكریمێ ئهگهرهكێ بهێز بوو،بو دهنگێ وى یێ نوكه و دبێژیت:نهچار بوو بدهنگێ بلند و بهێز ههوار بكهت تا بكرا بو ئایسكریما خو رابكێشیت و ژێ بكرن،د ماوێ خواندنا زانكویێ دا كازم ساهر ل خواندنگهههكا مویسلێ ماموستایێ موزیكێ بوو،پشتى هنگێ هاته ناڤ جیهانا هونهرى.
ههیفا وههبى سترانبێژا لوبنانى د سهردهمێ سنێلهیى یا خودا ل كوگهههكا فروشتنا زێر و زیڤى دا كاركریه،د ژیێ 16 سالیێ دا پشتى بهشدارى كرى د كێبركا شاه جوانا باشورێ لبنانێ،ناڤ و دهنگیا خوه دهرێخست و بهرى ببیته هونهرمهند وهك نمایشكهرا جل و بهرگا كاركریه،چهندین كارێن ریكلامكرنێ بو كهل و پهلان ژى كرینه. سرین عهبدلنور د زاروكاتیا خودا دڤیا ببیته نوژدار یان برین پێچ و خهونا وێ نههاته جهـ،بهلێ ب ئهگهرێ هێزا دهنگێ وێ دژیێ 13 سالیێ دا د ئاههنگهكێ دا دهست ب سترانگوتنێ كر و ل سهردهستێ نهسر مهحروسى یێ دهرهێنهر بو دیارترین هونهرمهندا سهردهمێ خو.
راغب عهلامهیێ لبنانى بهرى نوكه دگهل خزمێ خو ل عێراقێ دبوارێ چاككرنا موبهریده و ئامیرێن ساركرنێدا كاركریه،لێ پشتى هنگێ بو هونهرمهندهكێ ناڤدار،ههروهسا وائیل كهفورى د ژیێ 16 سالیدا ل سهر تراشخانهكا زهلامان كاركریه و بهرى دهست ب كارێ هونهرى بكهت،لبهر بوو سهر تراشخانهیهكا مهزن ڤهكهت، بهلێ پشتى ل بهرنامێ(ستودیو الفن) سهركهفتن بدهست ڤه ئیناى دهست ژ سهرتراشینێ بهردا. تامر حوسنى ژى بهرى ب ناڤ و دهنگ ببیت،گولاڤ و عهتر فروتینه و ههروهسا ل پایزینخانهیهكێ ژى كاركریه.
ئهڤرۆ، رێوار مزیرى:
رێڤهبهریا گشتى یا رهوشهنبیرى و هونهرى ل دهۆكێ، رێڤهبهریا هونهرێ شانۆیێ ل دهۆكێ، دێ مێهڤانداریا شاندهكێ وهلاتێ سۆیسرا كهت بۆ پێشكێشكرنا شانۆگهریا چیرۆكا بژاره و خهمگین (رومیۆ و جۆلێت) ل رۆژێن 1-2-3/4/2015 ل دهمژمێر 5 ئێڤارى ل هۆلا چالاكیێن قوتابخانا ل دهۆكێ و ل رۆژێن 5-6/4/2015 ل دهمژمێر 3 ئێڤارى ل كهمپا دۆمیز یا پهنابهرێن رۆژئاڤا.
مهیسهر عوبهید رێڤهبهرێ رێڤهبهریا هونهرێ شانۆیێ ل دهۆكێ بۆ ئهڤرۆ دیار كر: كو مهرهما وان ژ مێهڤانكرنا ڤى شاندێ سۆیسرى ئهو بوویه كو روویهكێ نوو یێ شانۆیێ ل دهۆكێ بدهنه نیشاندان و شانۆگهرین بیانى مێهڤان بكهن و شانۆگهرین دهۆكێ ژى بهرهب وهلاتێن بیانى ڤه ببهن و وێ چهندێ دیار بكهن كو ژیان ل كوردستانێ یا ئارامه، و گۆت: دگهل ڤان رۆژانێن شانۆیێ شاندێ شانۆكارێن سۆیسرى دێ دو ورك شۆپان بۆ قوتابیێن پهیمانگهها هونهرێن جوان ل دهۆكێ گێرین و دێ تیپا دهۆك یا هونهرێ مللى چهند كهڤالان پێشكێشكهت و شاندێ ناڤبرى ژى چهندین مۆزیكژهن یێن ل گهل ههین ژ بۆ وێ چهندێ كو كلتۆرێن مه لێك بهێنه گوهۆرین، و سهرهرایى ڤێ چهندى مه رۆژهك تهرخان كریه كو سهرهدانا چهندین جهێن كهلتۆرى و گهشتیاریێن دهۆكێ بكهین.
ئهڤرۆ نیوز: ڤهدهر رهشاڤایی:
سهرۆكێ ئوپهراسیونێن ههڤپشك جێگرێ ئهفسهرێ دهریایی یێ ئوسترالی دهیڤد جونستۆن سهرجهمێ ژمارا كوشتیێن داعش یێن د هێرشێن ئاسمانیێن ههڤپهیمانیا دژی داعش دا ل ئیراقێ هاتیه كوشتن راگههاند.
ل كانبیێرا پایتهختێ ئوسترالیا جونستون گۆت: ئوسترالیا سهركهفتنهكا مهزن ئینایه ل دژی داعش، و ههتا نها نێزیكی 9 هزار و 500 چهكدارێن گرۆپیا تیرۆرستیا داعش ل ئیراقێ هاتینه كوشتن ژ ئالیێ هێرشێن ئاسمانیێن ههڤپهیمانان ڤه.
ناڤهاتی دیاركر ژی كو ئهو گرنگیێ نادهنه ههژمارتنا كهلهخا، لێ ئهڤ یهكه هوشدارییه بۆ وان یێن دڤێن بگههنه داعش دا ئهنجامێن كوژهك یێن ڤێ بزاڤا خوه ببینن.
ئهڤرۆ نیۆز: ڤهدهر رهشاڤایی:
د ههڤپهیڤینهكێ دا دهیڤد كامیرۆن سهرۆك وهزیرێن بریتانیا بۆ ئێكهم جار وێ راستیێ ئاشكرا دكهت كو ناڤدارا ئهمریكی كیم كارداشیان و ئهو ب خوینێ دگههنه ئێك و مرۆڤێت ئێكن.
دهمێ پرسیار ژ سهرۆك وهزیرێن بریتانیا هاتیه كرن كا ئهو تهماشای بهرنامێ كیم كارداشیان دكهت كامیرۆن گۆت: نه، و ئهز نزانم بۆچی خهلك تهماشه دكهت، چ تشتێ سهرهنج راكێش تێدا نینه، لێ تو دزانی ئهم مرۆڤێ ئێكین و دارا خێزانا مه ئێكه و بهری 13 بابكالان خێزانێن مه ئێك بوون، ئهم برهنگهكی پسمام و دوتمامین.”
كامیرۆن و كارداشیان ئێك بابكال ههیه كو ئهو ژی سر ولیام سپێنسهره و ل سالا 1555 ژیایه، ههروهسا كامیرۆن كو ژ بنهمالهكا زهنگینه د خێزانێ را دگههیته شاهژنا بریتانیا ژی.
دبهرسڤا وێ پرسیارێ دا كا وی دڤێت بدیتنا مرۆڤا خوه شاد بیت، كامیرۆن گۆت: دێ خۆش شول بیت، سوپاس.”
نيشاندان