ئەڤرۆ:
ھەر ئێک ژ لەیلا زانا ئەنداما پەرلەمانێ تورکیا و سورەیا ئوندەر پەیڤدارێ شاندێ دانوستاندنێن ل گەل حوکمەتا تورکیا و نیلوفەر کوچ ھەڤسەرۆکا KNK دوھی ب مەرەما گەھاندنا ناما عەبدوللا ئوجەلان رێبەرێ PKK بۆ مەسعود بارزانی سەرۆکێ ھەرێما کوردستانێ و مام جەلال سکرتێرێ گشتی یێ ئێکەتیێ گەھشتنە ھەولێرێ و پشتی رادەستکرنا ناما ئوجەلان، دێ ل گەل نێچیرڤان بارزانی سەرۆکێ حوکمەتێ و پارت و ئالیێن سیاسی یێن ھەرێمێ کۆمبوونان ئەنجامدەن.
ل گۆر زانیاریێن ب دەست رۆژناما ئەڤرۆ کەفتین، ناما ئوجەلان ژ سێ خالێن سەرەکی پێک دھێت، ئەو ژی ئەنجامدانا کۆنگرێ نەتەوی و ئێکگرتنا کوردان د وارێ سەربازی و سیاسی دا دژی تیرۆرێ و سیاسەتەکا ھەڤپشک بۆ چارەکرنا پرسا کوردی ل ھەموو پشکان ھەبیت.
عەبدوللا ئوجەلان د ناما خوە دا داخواز ژ سەرۆک بارزانی کریە د وارێ دبلۆماسی دا رۆلێ خوە بۆ چارەکرنا دۆزا کوردی ل سەر ئاستێ نێڤدەولەتی بگێڕیت، ژ بەرکو رۆلەکێ باش د ڤی واری دا ھەیە، ھەروەسا ژێ خواستیە کو دەستپێشخەریێ بۆ ئەنجامدانا کۆنگرێ نەتەوەی بکەت.

ئه‌ڤرۆ:
شاندەکێ رێکخراوا healing tree international یا بەرھەمئینانا نیڤدەولەتی ل ویلایەتا ئیکگرتوویێن ئەمریکا ب ئارمانجا ھایداربوون ژ رەوشا پێشمەرگەی د ناڤ سەنگەرێ شەری دا دوھی دەمژمێر ١١ سپێدێ ٢٩/٣ سەرەدانا میحوەرێ ناوەران کر.
ئەپێ بەرپرسا رێکخراوا healing tree international یا بەرھەمئینانا نیڤدەولەتی ل ئەمریکا بۆ رۆژناما ئەڤرۆ ئاشکرا کر کو مەرەم ژ ھاتنا وان بۆ سەنگەرێن شەری ئەوە کو د ناڤ ھێزێن پێشمەرگەی دا بگەریێن و ھەڤدیتنا ل گەل وان ئەنجام بدەن داکو راستیێ بزانن کا ئەو چەک و ھاریکاری یێن ئەمریکا فرێ دکەت ب دروستی دگەھیتە پێشمەرگەی یان نە و گۆت “چونکی بۆ مە دیار بوویە کو ویلایەتێن ئیکگرتوو چەکێ باش و ھاریکاریێن باش بۆ ھێزێن پێشمەرگەی دابین کرینە، لێ ناگەھنە پێشمەرگەی”.
بەرپرسا رێکخراوا ئەمریکی ئاشکرا ژی کر بۆ وان دیار بوویە کو ل بەغدا نیڤا وان ھاریکاریان ناگەھینە پێشمەرگەی و گۆت “ئەم دێ دیفچوونێ ل دۆر ھنارتنا وی چەکی و ھاریکاریان کەین کو ب ناڤێ پێشمەرگەی بۆ بەغدا دھێتە رەوانەکرن، چونکی مە دڤێت ڤی وێنەی بگەھینە ئەمریکا کو بەغدا یا ڤێ زۆلمێ ل کوردستانێ دکەت تایبەت پێشمەرگەی”.
ناڤبریێ بەحسێ سەرەدانا خوە بۆ ناڤ رێزێن پێشمەرگەی کر و گۆت “من دەست دا چەکێ پێشمەرگەیەکی کو گولەیەکێ پێ بھاڤێم نەچوو و دەرکەت کو ئەڤ چەکە کێر ب شەرێ دوژمنی ناھێت ژبەر ژکار کەفتنا وی، دەمێ ئەم زڤرین بۆ ویلایەتێن ئیکگرتوو دێ وان تشتێن مەدیتین ب وێنە گەھینە وەلاتێ خوە، تایبەت ئەو تشتێ مە ل سەنگەرێن شەری دیتی د ناڤ ھێزێن پێشمەرگەی دا”.
ل دووماھیێ ئەپێ گۆت “مە باوەری یا ب پێشمەرگەی ھەی کو پێشمەرگە تاکە کەسە ل ڤی وەلاتی چەکدارێن تیرۆرستێن داعش بشکینیت و مە باوەری ب ھندێ ھەیە کو پێشمەرگە خودان مەزنترین شیان و ھێزە دێ شێت مللەتێ کورد ھەردەم پێش ئیخیت و ناھێلت دوژمن نێزیکی سنوورێ کوردستانێ بن” .

ئه‌ڤرۆ نیوز:

سه‌رۆك بارزانى ئه‌ڤرۆ د پێشوازیا وه‌زیرێ ده‌رڤه‌ یێ لوكسومبورگ راگه‌هاند: گه‌لێ كوردستانێ خودان كولتوورێ پێكڤه‌ژیانێ و لێبوورینێ یه‌ و ب چ ره‌نگه‌كێ نابیته‌ پشكه‌ك ژ ململانێیا تائیفى یا ل ده‌ڤه‌رێ په‌یدابووى.

هه‌ڤده‌م ژان ئاسڵ بۆرن وه‌زیرێ ده‌رڤه‌ و كاروبارێن ئێكه‌تیا ئوروپا یا لوگزەمبۆرگ راگه‌هاند كو د ناڤ ولاتێن ئوروپا دا مه‌یله‌كا زور یێ هه‌ى بۆ هاریكاریكرنا هه‌رێما كوردستانێ ژ ئالیێ سه‌ربازى و هاریكاریێن مروڤى و وه‌لاتێ وى ژى د پشته‌ڤانیكرنا هه‌رێما كوردستانێ دا دێ یێ به‌رده‌وام بیت.

ئه‌ڤرۆ نیوز:

جڤاتا ئاسایشا هه‌رێما كوردستانێ د راگه‌هاندنه‌كێ دا، كوشتنا (زیاد سلیم محمد علی الكوردی) پشتراستكر كو ل ناڤ داعش ل تاخه‌كێ ناڤ باژێرێ مووسل هاتینه‌ كوشتن.
ل دووڤ راگه‌هاندنا جڤاتا ئاسایشا هه‌رێما كوردستانێ شڤێدى ل ده‌مژمێر 12 و نیڤ ل (ساحل الایمن) ل تاخێ (ثوره‌) یا باژێرێ مووسل و ل نێزیك مزگه‌فتا (حـافـظ) د پرۆسه‌كا هه‌والگیری دا زیاد سلیم یێ به‌رنیاس ب (زیاد الكردی) و (منصور) ب فرۆكێن هه‌ڤپه‌یمانان هاتیه‌ كوشتن.
پشتى داگیركرنا مووسل ژ ئالیێ داعش ڤه‌ ب (زیاد الكردی) چه‌ندین پۆست ل ناڤ داعش وه‌رگرتینه‌ و ب ده‌هان وه‌لاتیێن كورد و وه‌لاتیێن دى ل سه‌ر ده‌ستى وى هاتینه‌ كوشتن.