NO IORG
نووترين نووچه
Facebook

363

ئەڤرۆ نیوز:

رێڤەبەریا گشتیا کەشناسیێ ل ھەرێما کوردستانێ راگەھاند کو سوبەھی دێ ئه‌سمان دێ ساهى بيت و ل هنده‌ك ده‌ڤه‌رێن چيايى دێ ئه‌ورێن بچووك هێنه‌ ديتن.

پشکا پێشبینیان ل رێڤەبەریا گشتیا کەشنایا ھەرێمێ راگەھاند کو ژ ئەنجامێ به‌رده‌واميا كارتێكرنا فشارێن باكوورێ رۆژهه‌لاتێ وه‌لاتێ توركيا بۆ ل سەر ھەرێما کوردستانێ ئەو پێشبینی دکەن کو سوبەھی رێکەفتی 2015.3.27 ئه‌سمان دێ ساهى بيت و ل هنده‌ك ده‌ڤه‌رێن چيايى دێ ئه‌ورێن بچووك هێنه‌ ديتن.

رێڤەبەریا گشتیا کەشناسیێ ل ھەرێما کوردستانێ ئاشکەرا ژی کریە کو پلا گەرماتیێ يا بلند دێ بلندتر بيت و يا نزم دێ هێته‌ خوار وەکو ھەڤبەرکری بیت ل گەل رۆژێن بەری نوکە ب رەنگەکی د ناڤبەرا 19 بۆ 8 دا.

ل دۆر پێشبینیا رێژا ھەوایی و مەودایێ دیتنێ ژی دایە زانین کو دێ ئاراستەیێ وی دێ ل باشوورێ رۆژئاڤا بیت ب رەنگەکی دێ ل سه‌رخۆ و ناڤه‌ندى بیت د ناڤبەرا 5 بۆ 15 کلم د دەمژمێرەکێ دا و ماوێ دیتنێ ژی دێ 8 بۆ 10 کلم دا بیت.

73

ئەڤرۆ:
یاریێن گەرا پێنجێ ژ قوناغا دویێ یا خولا ھەرێما کوردستانێ یا تەپا پێ بو یانێن پلا نایاب بریارە ئەڤرۆ و سوبەھی بھێنە کرن، ژ نوونەرێن پارێزگەھێ دھوک و زێرەڤانی دێ ل ناڤا یاریگەھێن خوە ھەڤرکیێ کەن و زاخۆ دێ بەر ب ھاڤینگەھا سەلاحەدین چیت.
ل یاریگەھا خوە ئەڤرۆ ل دەمژمێر ٣:٣٠ ئێڤاری تیما تەپا پێ یا یانا دھوک سەرکێشا سەرێ لیستێ دێ بزاڤێن بەردەوامی بدا ب ئەنجامێن سەرکەفتی و سەرکێشیا سەرێ لیستی دەت دەمێ مێڤانداریا یانا یا سلێمانیێ دکەت، کو د ڤێ یاریێ دا پێشبینیا وێ چەندێ دھێتە کرن یانا مێڤان ھەمی شیانا ب مەزێخیت ب خالەکێ ژ یاریگەھا دھوک دەرکەڤیت و ببیتە ئاستەنگ ل ھەمەر زنجیرا ئەنجامێن باش یێن یانا دھوک.
ھەر ئەڤرۆ ل یاریگەھا ئارارات یانا زاخۆ دێ بیتە مێڤانا خودانا یاریگەھێ و ھەردو یانە دێ شیانا تەرخان کەن ژبو باشکرنا ھەلویستێ خوە ل نیڤا لیستێ و گەشکرنا ھیڤییان بەر ب پێشیا لیستێ و دیسان ئەڤرۆ شێروانە دێ مێڤانداریا نەوروز کەت.
سوبەھی ل یاریگەھا خوە یانا زێرەڤانی یا بریندار ئەوا د گەرا بوری دا توشی خوسارەتیێ بوی کو دھاتە ھژمارتن خوسارەتیا ئێکێ ل ڤی وەرزی دێ مێڤانداریا پێشمەرگە یا سلێمانیێ کەت د بزاڤەکێ دا ڤەگەریتە رێکا سەرکەفتنا و بمینتە چاڤەرێ ئەنجامێن یاریێن ھەردو یانێن دھوک و نەوروز ژبو وێ چەندێ ب ڤەگەریتە سەرکێشا سەرێ لیستا خولێ ھەر چەندە پێشبینیا وێ چەندێ یا ھەی یانا مێڤان ئاستەنگان بو خودانا یاریگەھێ دروست بکەت د بزاڤێن وێ چەندێ دا ژ مەترسیا داکەفتنێ قورتال بیت.
ھەر دیسان یانا کەرکوک دێ مێڤانداریا یانا برایەتی کەت و ھندرین د گەل ھەولێر ل یاریگەھا یا ئێکێ.

ئەڤرۆ:
د راپۆرتەکا شرۆڤەکاری دا کو ڤەگێر سەعدولا بۆ رۆژناما ئەڤرۆ بەرھەڤکریە ئاماژە ب وێ چەندێ کریە کو پشتی رزگارکرنا چەند دەڤەرەکێن بەرفرەە ل دەردۆرێن مووسلێ ژلایێ پێشمەرگەی ڤە، رۆژ بۆ رۆژێ بابەتێ رزگارکرنا مووسلێ د ناڤ میدیایێ دا گەرمتر دبیت و بەحسێ رۆلێ پێشمەرگەی د ئازادکرنا مووسلێ دا دھێتـە کرن ب تایبەتی ژی کو نوکە ژلایێ رۆژھەلاتێ ڤە ل چیایێ زەرتک پێشمەرگە ب تنێ 13 کیلۆمەتران ژ مووسلێ دوورە.
ب رەنگەکێ گشتی جادا کوردی ل دژی وێ چەندێ یە پێشمەرگێن کورد پشکداریێ د شەرێ ئازادکرنا مووسلێ دا بکەن و دبێژن بلا خوینا کوردان بۆ ئازادکرنا ئاخا عەرەبان نەھێتە رشتن، بەرامبەر وێ چەندێ بشار کیکی سەرۆکێ ئەنجومەنێ پارێزگەھا نەینەوا د داخویانیەکێ دا بۆ رۆژناما ئەڤرۆ دبێژیت” ب بۆچوونا من پێدڤیە پێشمەرگە پشکداریێ د شەرێ ئازادکرنا مووسلێ دا بکەن، ژ بەر کو 30% ژ خەلکێ مووسلێ کوردن و ھندی تیرۆر د ناڤ مووسلێ دا بمینیت، دێ بیتە مەترسی بۆ سەر ھەرێما کوردستانێ ژی”.
ژبلی وێ چەندێ کو پشکداری و نە پشکداریا پێشمەرگەی د شەرێ ئازادکرنا مووسلێ دا بوویە جھێ دانوستاندنێ، ھەکە ھاتوو بریارا وێ چەندێ ھاتە دان کو پێشمەرگە پشکداریێ د شەرێ مووسلێ دا بکەت، شێوازێ پشکداریا پێشمەرگەی ژی د وی شەری دا بوویە جھێ دانوستاندنێ.
ل دۆر شێوازێ پشکداریا پێشمەرگەی د شەرێ ئازادکرنا مووسلێ دا، ئەسیل نوجێفی پارێزگارێ نەینەوا بۆ رۆژناما ئەڤرۆ گۆت”مە ھەماھەنگی یا ل گەل حوکمەتا ھەرێما کوردستانێ ھەی و پێشمەرگە دێ پشکداریێ د شەرێ ئازادکرنا مووسلێ دا کەت، لێ ناچیتە د ناڤ مووسل دا، بەلکو ل دەرڤەی باژێری دێ وەکو ھێزا پشتەڤان بیت بۆ ھێزێن مووسلێ یێن کو دێ پشکداریێ د شەرێ رزگارکرنێ دا کەن”.
ل دۆر وێ چەندێ کا بۆچی پێشمەرگە نەچیتە د ناڤ مووسلێ دا، ئەسیل نوجێفی دبێژیت”ھەتا کو چو حەساسیەت پەیدا نەبن و داعش ژی وەکو شەرەکێ تایفی، یان نەتەوەیی بۆ خوە بکار نەئینیت”.
ژ لایێ خوە ڤە پەرلەمانتارێ کورد ل پەرلەمانێ عیراقێ بەختیار شاوەیس بۆ خەندان دبێژیت “بەری دەستپێکرنا پرۆسا رزگارکرنا مووسلێ، پێدڤیە حوکمەتا کوردستانێ بۆ پشکداری پێکرنا ھێزا پێشمەرگەی د وی شەری دا، رێککەفتنێ ل گەل بەغدا بکەت و لایەنێ سیێ ژی کو پێدڤیە لایەنەکێ نێڤدەولەتی بیت ئامادە بیت د وێ رێککەفتنێ دا”.
ژ لایەکێ دی ڤە، پەرلەمانتارا کورد ل پەرلەمانێ عیراقێ سۆزان بەکر دبێژیت”ھەتا مادێ 140ێ ژ دستوورێ عیراقێ نەھێتە بجھئینان و ناسناما کوردستانی ب ھندەک دەڤەران نەھێتە دان و پێشمەرگە ژلایێ بەغدا ڤە نەھێتە پرچەککرن، پێشمەرگە پشکداریێ د شەرێ ئازادکرنا مووسلێ دا ناکەت”.
پارێزگارێ نەینەوا دبێژیت ئەو ناخوازن ھێزێن حەشد شەعبی یێن شیعی پشکداریێ د شەرێ ئازادکرنا مووسلێ دا بکەن و ھێزێن مووسل ب خوە ژی کو ئەڤە چەند ھەیڤەکە راھێنان دکەن نەشێن ب تنێ مووسلێ رزگار بکەن، لەوما رەنگە پێدڤی ب ھێزەکا دی یا دەرڤەی پارێزگەھێ بن و گەلەک سیاسەتمەدارێن سوننی یێن مووسلێ ھاتنا لەشکرێ ئەمریکی بۆ رزگارکرنا وی باژێری ب چارەسەریێن گەلەک باش دبینن، لێ حوکمەتا عیراقێ کو شیعە سەرۆکاتیا وێ دکەن، قەبوول ناکەن ب رەنگەکێ فەرمی داخواز ژ ئەمریکا بھێتە کرن بۆ پشکداریێ د رزگارکرنا مووسلێ دا، لەوما رەنگە ل دووماھیێ ل سەر دو دلیا کوردان ڕا پێشمەرگە ھەر پشکداریێ د ئازادکرنا مووسلێ دا بکەت و بشار کیکی دبێژیت”ھەکە ھێزێن ھەڤپەیمانان داخوازێ ژ حوکمەتا ھەرێما کوردستانێ بکەن کو پێشمەرگە د شەرێ مووسلێ دا پشکدار بیت، باوەر ناکەم حوکمەتا کوردستانێ وێ داخوازێ رەت بکەن”.

ئه‌ڤرۆ نيوز:

وه‌زاره‌تا دارايى و ئابوورى ل حوكمه‌تا هه‌رێما كوردستانێ ژڤانێ دانا مووچێ مامۆستايان ديار كر و راگه‌هاند كو دێ د بزاڤێن خوه‌ دا د به‌ردام بن بۆ دابينكرنا مووچێن هه‌موو فه‌رمانبه‌رێن هه‌رێمێ.

د راگه‌هاندنه‌كێ دا، رێڤه‌به‌ريا راگه‌هاندن و په‌يوه‌نديان ل وه‌زاره‌تا دارايى و ئابوورى يا حوكمه‌تا هه‌رێما كوردستانێ كو وێنه‌ك ب ده‌ست ئه‌ڤرۆ نيوز كه‌فتيه‌، تێدا هاتيه‌: “د سه‌ر وێ چه‌ندێ كو رۆژا شه‌مبى رێكه‌فتى 28ى ئادارا 2015ێ بهێنڤه‌دانه‌، به‌لێ ئه‌و دێ مووچێ وه‌زاره‌تا په‌روه‌ردێ به‌لاڤ كه‌ن”.

ئه‌ڤرو نیوز، بارزان مزوورى

ئه‌فسه‌ره‌ك ژ هێزێن پێشمه‌رگه‌ى ل میحوه‌رێ ناوه‌ران بو مالپه‌رى ئه‌ڤرو نیوز دیار كر كو ئه‌ڤرو مه‌غره‌ب پشتى روژئاڤایێ و دنیا تارى بووى، چه‌كدارێن تیرورستێن داعش پلانه‌ك دارێشت بو كو هێرشێ بكه‌نه‌ سه‌ر هێزێن پێشمه‌رگه‌یێ ل میحوه‌رێ ناوه‌ران و چه‌كدارێن خو ل ناڤ گوندێ خورسه‌بات و بایبوختێ كوم كربون، به‌لێ به‌رى هێرشێ بكه‌ن ئه‌ڤ شه‌ڤ ل ده‌مژمێر 9:30 خوله‌ك فروكه‌یێن پلانا وان ژناڤبر و نه‌هێلا پلانا خو بجهبینن و زیانێن مه‌زن یێن گیانى و مادى ب وان كه‌فتن.
ناڤبرى دیار كر كو پێزانین دروست نه‌گه‌هشتینه‌مه‌ كا چه‌ند ژ داعش هاتینه‌ كوشتن به‌س لدوڤ زانیاریێن ده‌ست پێكێ گه‌له‌ك ته‌رمێن وان كه‌فتینه‌ .

ئه‌ڤرۆ نیۆز، قائید میرۆ
فه‌رمانده‌كێ پێشمه‌رگه‌ی ئاماژه‌ ب وێ چه‌ندێ دكه‌ت، ئه‌ڤ شه‌ڤه‌ هێزێن پێشمه‌رگه‌ی ل میحوه‌رێ گوێڕ بزاڤه‌كا تیرۆرستێن داعش ژ ناڤ بر و هژماره‌ك چه‌كدارێن داعش هاتینه‌ كوشتن و برینداركرن.

پیرۆ ره‌شید مزیری، فه‌رماندێ پێشمه‌رگه‌ی ل میحوه‌رێ گوێڕ ب ئه‌ڤرۆ نیۆز راگه‌هاند: ئه‌ڤ شه‌ڤه‌ تیرۆرستێن داعش ل سنورێ گوندێ سولتان عه‌بدولا، به‌ره‌ف سه‌نگه‌رێن پێشمه‌رگه‌ی پێشڤه‌چوون كربوو، بزاڤێن وێ چه‌ندێ دكر، كریاره‌كا تیرۆرستی ب رێیا ترۆمبێله‌كێ ئه‌نجام بده‌ن.
پیرۆی گۆتژی” ژلایێ هێزێن پێشمه‌رگه‌ ب چه‌كێ سڤك و گران ڤه‌ ته‌قه‌ ل وێ ترۆمبێلا تیرۆرستێن داعش هاته‌كرن و ل گوره‌ی زانیاریێن گه‌هشتینه‌ به‌رده‌ستێ مه‌، زیانێن مه‌زن گه‌هشتینه‌ چه‌كدارێن داعش و كوشتی و بریندار ژی هه‌نه‌، به‌لێ هێشتا هژمارا قوربانیێن دوژمنی ناهێته‌ زانین و هێزێن پێشمه‌رگه‌ی دبه‌رهه‌ڤن بۆ به‌رسڤدانا هه‌ر هێرشه‌كا تیرۆرستێن داعش.

774

ئه‌ڤرۆ نیۆز ، سالار دۆسكى:
رێڤه‌به‌رێ كۆمپانیا گشتى یا دروستكرنا دانو دكاكان ل پارێزگه‌ها دهۆكێ، دیاركر كو سالانه‌ بتنێ ئار بۆ 10 هه‌یڤا دهێته‌ دابه‌شكرن ئانكو 35 رۆژان جاره‌كێ دێ هێته‌ به‌لاڤكرن و ل سالا 2014 ئه‌ڤ بریاره‌ هاتیه‌ بجهئینان.
نه‌جم عه‌بدوللا یوسف، رێڤه‌به‌رێ كۆمپانیا گشتى یا دروستكرنا دانو دكاكان ل پارێزگه‌ها دهۆكێ هێشتا بۆ مالپه‌رێ ئه‌ڤرۆ نیۆز گۆت: ل 2015 ژى هه‌ر هه‌مان سیسته‌م دێ هێته‌ بجهئینان، نوكه‌ ئارێ هه‌یڤا چارێ دهێته‌ به‌لاڤه‌كرن، مه‌ پێدڤى ب 15 هزار و 615 ته‌نێن ئارینه‌، هه‌ر خه‌لكێ ئاواره‌ژى وه‌ك خه‌لكێ كوردستانێ هه‌مان پشك وه‌ردگریت.
گۆتژى: نوكه‌ ئار و ئه‌رزاق ل ده‌ڤه‌رێن نوو رزگاركرى یێ دهێته‌ به‌لاڤه‌كرن ژ ره‌بیعه‌ هه‌تا دگه‌هیته‌ مه‌هه‌تێ، ژ نوو دێ ده‌ست ب پارێزگه‌ها دهۆكێ هێته‌كرن.

696

ئه‌ڤرۆ نیوز:
پولیسێن توركیا رۆژا دوشه‌مبى شیان دو كه‌سێن جورجى بگرن كو دخواستن كچه‌كێ ب رێیا چانته‌كا گه‌شتكرنێ ده‌رباز بكه‌ن.
فه‌رمانبه‌رێن گومركێ، كه‌سێ ئه‌و چانته‌ هلگرتى نه‌چار كرن كو چانتا خوه‌ ڤه‌كه‌ت پشتى دیتى ڤه‌لڤینێن وى یێ تشته‌كێ دبێژن، پشتى جانته‌ ڤه‌كرى كچه‌كا 22 سالى تێدا دیتن.
ڤێ كچى گوته‌ پولیسان: ئه‌ز یا نه‌چاربووم ب ڤێ رێكێ خوه‌ ڤه‌شێرم، ژبه‌ر كو ناهێلن ئه‌ز بهێمه‌ توركیا ژبه‌ر كو به‌رى نوكه‌ من تاوانه‌ك ل توركیا كربوو.

ئه‌ڤرۆ نیۆز:

شیرتكارێ مه‌كته‌با سیاسى یا پارتى دیموكراتى كوردستان، بۆ مالپه‌رێ ئه‌ڤرۆ نیۆز گۆت: بۆ مێژوویێ دبێژم، جارا ئێكێ ژى دا جه‌نابێ سه‌رۆكى رازینه‌بوویه‌ ب درێژكرنا ماوێ سه‌رۆكاتیێ، لێ پشتى گه‌له‌ك داخازی ژێ هاتیه‌ كرن و بۆ پاراستنا ئێك رێزییا ناڤ مالا كوردى، جه‌نابێ سه‌رۆكى خوه‌ بێده‌نك كر و ئه‌و بریار هێلا بێى كو ئیمزا بكه‌ت، وه‌ك قانوون و رێسا هاته‌ هه‌ژمارتن كو په‌سه‌ندكریه‌.
عارف روشدى هێشتا گۆت: نوكه‌ ب بۆچوونا من پێدڤى یه‌، شێوازه‌كێ قانوونى بهێته‌ ڤه‌دیتن، ژ پێخه‌مه‌ت چاره‌سه‌ركرنا ڤێ ئاریشێ، مانا جه‌نابێ كاك مه‌سعود بارزانى دڤان كاودانان دا وه‌ك سه‌رۆكێ هه‌رێما كوردستانێ دخزمه‌تا گه‌ل و وه‌لاتى دایه‌، چونكو شیانێن مه‌زن یێن هه‌ین و جهێ باوه‌ریا نافخوه‌یێ كوردستانێ و ده‌ردوران و جیهانێ یه‌، له‌ورا یاساناس و په‌رله‌مانێ كوردستانێ، ته‌ڤایا هێزێت سیاسى و كومه‌لایه‌تى داخوازكرینه‌ هاریكاربن دڤێ قوناغێدا.

website security
WP Facebook Auto Publish Powered By : XYZScripts.com