ئه‌ڤرۆ نيوز:
به‌رپرسێ ده‌زگه‌هێ جيهاد يێ راگه‌هاندنێ ئه‌وێ د ناڤ هێزێن حه‌شه‌د شه‌عبى دا د به‌ياننامه‌كێ دا راگه‌هاند كو ئه‌و شيانه ئێك ژ سه‌ركردێن چه‌كدارێن داعش ب ناڤێ “ئه‌بو زينه ئه‌لئه‌نسارى” بكوژن.
ئه‌بۆ زينه خه‌لكێ عيراقێ يه و ژ ئه‌نجامێن مووشه‌كه‌كێ بۆ سه‌ر باره‌گايێن چه‌كدارێن داعش ل رۆژئاڤايێ به‌غدا يا پايته‌خت هاتيه كوشتن.
ئەڤرۆ نیۆز، سالار دۆسکی:
د ناڤا چەند پەیچێن فەبیسبووکی دا، نوچێ وەغەرکرنا ھونەرمەندێ مەزنێ سترانبێژ (کەریم کابان) بەلاڤ بوویە، ھەمبەر ڤی نووچەی کورێ ھونەرمەندێ ناڤبری ھاتە دەنگ.
شوان کەریم کابان کورێ ھونەرمەندێ مەزن کەریم کابان گۆت: “ئەڤ نووچە دوورە ژ راستێ و ئەو کەسێ ئەڤ نووچە بەلاڤ کری، ب تنێ بۆ خوە چێکریە و ھونەرمەند کەریم کابان يێ ساخە و ساخلەمیا وی نوکە گەلەکا باشە”.
ئەڤرۆ:
بریارە ئەڤرۆ و سوباھی شەش یاری ژ گەرا ھەژدێ ل یاریگەھێن جودا یێن ھەرێما کوردستانێ بھێنە کرن و ھەرسێ نوونەرێن پارێزگەھێ دھۆک و زێرەڤانی و زاخۆ دێ بزاڤێ کەن سەرێ لیستەیا خولێ ڤەگەرینن دەمێ ب زەحمەترین یاریێن خولێ ئەنجامدەن ئەڤرۆ.
د ڤێ گەرێ دا یانا دھۆک خودانا رێزا دویێ ب ٣٢ خالان بەر ب ھەولێرێ چویە داکو یاریا خوە ھەمبەر یانا ھندرین بکەت ئەوا ل رێزا یازدێ ب ١٧ خالان کو د ڤێ یاریێ دا پێدڤیە یانا دھۆک سەرکەفتنێ تومار بکەت پێخەمەت بەردەوامی دان ب ھەڤرکیێن سەرێ لیستەیا خولێ.
بۆ ڤێ یاریێ راھێنەرێ یانا دھۆک حازم سالح دیارکر کو ھەمی شیانێن خوە مەزێخن سەرکەفتنێ تومار بکەن و قەرەبویا ئەوان خالان بکەین ئەوێن یاریێن بوری دا ھاتینە ژدەستدان و بۆ ڤێ یاریێ ھەمی یاریکەر بەرھەڤن و مە بزاڤ کریە چارەسەریا ئەوان خەلەتیێن یاریا بوری دا بکەین داکو دوبارە یاریەرێن تیمێ دوبارە نەکەن.
د یاریەکا دی دا یانا زێرەڤانی خودانا رێزا سیێ ب ٣٢ خالان ئەو ژی بەر ب سلێمانیێ چویە بۆ ئەنجامدانا یاریا خوە ھەمبەر سەرکێشا خولێ یانا نەوروز ب ٣٣ خالان کو دھێـە ھژمارتن زەحمەترین و خوشترین یاریێن ڤێ گەرێ ئەنجامدەن ل یاریگەھا یا دویێ کو ھەمی بزاڤێن نوونەرا پارێزگەھێ ئەون بشێن سێ خالێن ڤێ یاریێ بۆ خوە دەستڤەبینت و یانا نەوروز ژ سەرێ لیستێ بدەتە پاش، بۆ ڤێ یاریێ ژی راھێنەرێ زێرەڤانی سلێمان رەمەزان بۆ ئەڤرۆ گۆت: یاریا مە یا ڤێ گەرێ دێ ب زەحمەترین یاری بیت و پێشبینیا ھەمی ئەنجامان دھێنە کرن ژ بەر ھێزا ھەردو تیمان لەورا مە بەرھەڤیەکا باش بۆ ڤێ یاریێ کریە و تیما خوە و ھەمی خالێن لاوازی و ھێزا تیمێ شرۆڤەکریە پێخەمەت ب کێمترین زەرەر ڤێ گەرێ ب دووماھی بینن و چو کێماسی ناف تیمێ دا نینن یاریکەرێ پیشەکارێ سێلڤادوری مادرو ژی ڤەگەریایە ناف تیمێ دا کو دێ ھێزەکا دە ل ناف تیمێ دا زێدەکەن.
د یاریەکا دی یا ھەمان گەر دا یانا زاخۆ ل ناف جەماوەرێ خوە ل یاریگەھا دەلال دێ مێڤانداریا یانا پێشمەرگە یا ھەولێر کەت کو دھێتە نیاسین بھێزترین تیما قوناغا دویێ یا خولێ ھەردو تیم چارێ و پێنجێ دھێن ب جوداھیا خالەکێ لەورا دھێتە پێشبینی کرن یانا زاخۆ زەحمەتەکا مەزن بینت داکو بشێت سەرکەفتنێ تومار بکەن و جوداھی ناڤبەرا خوە و ھەڤرکا خوە ل سەر رێزا چارێ ب گەھینتە چار خالان.
ژ یاریێن دی یێن ڤێ گەرێ ھەولێر دێ ل یاریگەھا خوە ل گەل کەرکووک کەت و برایەتی و شێروانە ل یاریگەھا یا ئێکێ ھێتە کرن و سلێمانی دێ ل یاریگەھا خوە مێڤانداریا ئارارات کەت.
ئەڤرۆ نیوز:
رێڤەبەریا گشتیا کەشناسیێ ل ھەرێما کوردستانێ راگەھاند کو سوبەھی ئه‌سمان دێ ساهى يێ نيڤ ئه‌ورى بيت و ل گه‌ل ده‌ليڤا هاتنا هنده‌ك چپكێن بارانێ ل ده‌ڤه‌رێن جودا.
پشکا پێشبینیان ل رێڤەبەریا گشتیا کەشنایا ھەرێمێ راگەھاند کو ژ ئەنجامێ به‌رده‌واميا فشارێن نزمێن ده‌ريا سۆر بۆ ل سەر ھەرێما کوردستانێ ئەو پێشبینی دکەن کو سوبەھی رێکەفتی 2015.4.3 ئه‌سمان دێ ساهى يێ نيڤ ئه‌ورى بيت و ل گه‌ل ده‌ليڤا هاتنا هنده‌ك چپكێن بارانێ ل ده‌ڤه‌رێن جودا.
رێڤەبەریا گشتیا کەشناسیێ ل ھەرێما کوردستانێ ئاشکەرا ژی کریە کو پلا گەرماتیێ دێ هێته خوار وه‌كو هه‌ڤبه‌ركى ل گه‌ل رۆژێن به‌رى نوكه ب رەنگەکی د ناڤبەرا 20 بۆ 10 دا.
ل دۆر پێشبینیا رێژا ھەوایی و مەودایێ دیتنێ ژی دایە زانین کو دێ ئاراستەیێ وی دێ ل باشوورێ رۆژئاڤا بیت ب رەنگەکی دێ ل سه‌رخۆ بیت د ناڤبەرا 5 بۆ 10 کلم د دەمژمێرەکێ دا و ماوێ دیتنێ ژی دێ 8 بۆ 10 کلم دا بیت.
ئه‌ڤرۆ:
بەرپرسێ پەیوەندی و راگەھاندنا پۆلیسێن پارێزگەھا دھۆکێ بۆ رۆژناما ئەڤرۆ دیار کر کو دوھی ١-٤-٢٠١٥ ل دەڤەرا شێخان نەفەرەکی پێنج چەقو ل شوفێرەکێ تەکسیێ داینە و ترۆمبێلا وی رەڤاندیە.
رائیدێ مافپەروەر ھێمن سلێمان بەرپرسێ پەیوەندی و راگەھاندنا پۆلیسێن پارێزگەھا دھۆکێ دیار کر کو پۆلیسێن نەخۆشخانا شێخان ھاتنە ھایدارکرن کو کەسەکێ بریندار گەھشتیە نەخۆشخانا شێخان و پشتی لێکۆلین ل گەل ھاتیەکرن وەسا دیار بوو کو ئەو شوفێرێ تەکسیێ بوویە و نەفەرێ وی پێنج چەقو لێداینە و ترۆمبێلا وی بریە.
خودانێ تەکسیێ بۆ رۆژناما ئەڤرۆ دیار کر کو سپێدی ئەو کەس ھاتیە دەف وی و بازار ل گەل کریە کو بگەھینیتە کۆمەلگەھا چڕەی، چونکی خێزانا وی ل وێرێ یە دێ ئینتە دھۆکێ و گۆت “ئەم ل سەر بازاری پێک ھاتین و ب رێکەتین و دەمێ گەھشتینە کۆمەلگەھا مەھەتێ رێیەکا ئاخێ ھەبوو گۆت ل ڤێ رێ ھەرە خێزانا من یا ل ڤی گوندی و نێزیکی ١٠٠ مەترا ژ رێیا سەرەکی دوور کەتین چەقویەک ئینادەر و ئەز دانامە بەر چەقویان، من ژی چەقویەک د ترۆمبێلێ دا ھەبوو دەستێ من گەھشتێ من ژی چەقویەک لێدا و وی ئەز د ترۆمبێلێ دا ھاڤێتم و ترۆمبێلا من بر و من ھای ژ خوە نەبوو ھەتا ئەز گەھشتیمە نەخۆشخانا شێخان یا گشتی”.
رائیدێ مافپەروەر ھێمن سلێمان خویا ژی کر کو ئەو کەسێ نەفەر پشتی بریندار بووی ب ترۆمبێلا شوفێری چوویە نەخۆشخانا کۆمەلگەھا چڕەی و ل وێرێ ب ترۆمبێل ڤە ژلایێ پۆلیسێن کۆمەلگەھا چڕەی ڤە ھاتە دەستەسەرکرن و ھەر دو ژبەر گرانیا برینێن وان بۆ نەخۆشخانا تەنگاڤیان ل دھۆکێ ھاتینە رەوانەکرن و گۆت “دۆز یا ل بنگەھێ پۆلیسێن نەخۆشخانا شێخان ھاتیە تۆمارکرن و لێکۆلین ل گەل وان ھەردویان یا بەردەوامە”.
ھەژی گۆتنێ یە ئەو کەسێ چەقو ل شوفێرێ تەکسیێ دای ناڤێ وی “ر، ق، ج” ئاکنجیێ باژێرێ دھۆکێ یە و بەری نھا مالا وی ل کۆمەلگەھا چڕەی بوو و شوفێرێ تەکسیێ ب ناڤێ “و، ج، خ” ئانکجیێ باژێرێ دھۆکێ یە ل تاخێ بەرۆشکێ .
ئه‌ڤرۆ:
پارێزگەرێ دھۆکێ فەرھاد ئەترووشی دوھی ١-٤-٢٠١٥ سەرپەرشتیا کۆمبوونا لژنا پرۆژێ نەخشێ سەنتەرێ باژێرێ دھۆکێ کر, د کۆمبوونێ دا رێڤەبەرێ نەخشەدانانا ئاڤاھیان ل پارێزگەھا دھۆکێ دیارکر کو وان ب ھەفکاریا باژێرڤانیا دھۆکێ و کۆمپانیەکا ئیتالی گەلەک گەنگەشە ل سەر ڤی نەخشەی کریە ھەتا گەھەشتیە ڤێ قووناغێ.
رێڤەبەرێ نەخشەدانانا ئاڤاھیان ل پارێزگەھا دھۆکێ ئەندازیار کوردو ئیحسان د داخویانیەکێ دیارکر کو پشتی نەخشە ھاتیە ئیمزا کرن ئەو خەلکی ل ھیڤیا پەسەندکرنا ڤی نەخشەی و دەستیریا ئاڤاکرنێ پێ نەدھاتە دان نوکە دشێن داخوازیا دەستیریێ بکەن، ل دووڤ رینمایێن ڤی نەخشەی دەستیری بۆ ھیتە دان.
ئەندازیار کوردو ئیحسان گۆت ژی ئەڤ نەخشە دێ سەروبەرێ باژێری باشتر لێ کەت و باشتر ھێتە رێکخستن ھەم وەکو رەنگێن ئاڤاھی و کەرەستێن ئاڤاکرنێ و ھژمارا نھومان، کو بەری نوکە ئەڤ رینمایە نەبوون خەلکێ ب کەیفا خوە بوو، بەلێ ژ نوکە وێڤە دێ ھێنە رێکخستن کو پتر ھەڤکاری ل سروشتێ باژێری ل گەل ھەڤدو ھەبیت ژ لایێ رەنگا و ھژمارا نھوما و کەرەستێن ئاڤاھیان ڤە و ھەر تاخەک بھێتە ریکخستن، دیسا رێکخستنا پێدڤیێن خزمەتگوزاری ل گەلەک تاخ و پارک و پارکێن گشتی نەبوون دیسا چەند رێڤەریەک ل ناڤ باژێری بوون جە بۆ ھاتیە دەست نیشان کرن بھێنە ڤەگوھاستن بۆ جھێن دی و جھێن وان بووینە جھێن خزمەتگوزاری، رێ و جادە گەلەک ھاتینە بەرفرەە کرن و رێکخستن، ھەروەسا د نەخشەی دا گەلەک تاخێن کەڤن یێن باژێری ھاتینە پاراستن کو بەری نوکە ژ بەر نەبوونا رینمایان دھاتنە تێک دان ژ نوکە پێڤە دێ ھێنە پاراستن.
ئەڤرۆ:
ئۆجەلان ل گەل شاندنا نامەیان بۆ سەرۆکێ ھەرێما کوردستانێ، سکرتێرێ ئێکەتیی نیشتمانی کوردستان و سەرۆکێ حوکمەتا ھەرێما کوردستانێ نامەیەک ژی بۆ قەندیلێ شاندیە و ھەروەسا ژ ئالیێ حوکمەتا تورکیا ڤە ژی نامەیەک تایبەت بۆ دەستەیا سەرۆکاتیا KCK ھاتیە شاندن و لەیلا زانا و سڕی سورەیا ئۆندەر ناما حوکمەتێ گەھاندینە قەندیلێ و دھێتە چاڤەرێکرن قەندیل ژی ب رێیا نامەکی بەرسڤا حوکمەتێ بدەت.
شاندێ پارتا دیمۆکراسیا گەلان HDP نە ب تنێ بۆ سەرۆک و سەرکردەیێن ھەرێما کوردستانێ ناما عەبدوللا ئۆجەلان سەرۆکێ PKK ئیناینە بەلکو دو نامێن تایبەت ژی بۆ قەندیلێ ئیناینە و یەک ژ وان ژ ئالیێ ئۆجەلان و یا دی ژی ژ ئالیێ حوکمەتا تورکیا ڤە ھاتیە نڤیساندن.
ل دووڤ زانیاریێن کو کەڤتنە دەستێ رۆژناما ئەڤرۆ د ناما ئۆجەلانی دا ژ سەرکردەیێن KCK ھاتیە خواستن کو ھەتا ھەفتێ حزیرانێ واتە ھەتا دەمێ ئەنجامدانا ھەلبژارتنێن پەرلەمانێ تورکیا ل دژی حوکمەتێ داخۆیانیێن توند نەدەنە رایا گشتی و د ناڤا خوە دا قۆناغا ھەلبژارتنان و ھەردو ئەگەرێن ئەنجامێن ھەلبژارتنان ژی ژ نھا ڤە گەنگەشە بکەن و سیاسەتا خوە بۆ ھەردو ئەنجامان ژی ئامادە بکەن.
ئۆجەلان د پشکەکا دی یا ناما خوە دا ژی داخواز ژ سەرکردەیێن KCK دکەت کو بەرھەڤیێن مەزن بۆ شەرێ ل دژی داعشێ بکەن و ھەکە پێدڤی کر ل گەل ھێزێن نێڤدەولەتی و یێن کوردستانی ھەڤپەیمانیان دروست بکەن و ھێزا ل رۆژئاڤا بگەھیننە ئاستا ھەری بلند، دیسان ل دووڤ زانیاریان حوکمەتا تورکیا ژی د ناما خوە دا داخواز ژ قەندیلێ دکەت کو رۆژا سازکرنا کۆنگرێ و دەست بەردانا ژ چەکی ئاشکرا بکەت و بۆ سەرکەڤتنا قۆناغا ئاشتیێ دژاتیا حوکمەتێ نەکەن و داخۆیانیێن ل دژی سیستەمێ سەرۆکاتیێ نەدەن، د پشکەکا دی یا نامێ دا ژی قەندیلێ دلنیا دکەن کو ئەو دێ پێنگاڤێن پێدڤی بۆ سەرخستنا قۆناغا ئاشتیێ ب ھاڤێژن لێ دڤێت ھندەک سەبرێ بکەن و چاڤەرێی ئەنجامدانا ھەلبژارتنان بمینن و دیار ژی کرینە ئەو د بجھکرنا ١٠ خالێن کو ئۆجەلان داخواز کرینە رژدن.
ل ئالیێ دی دوران کالکان ئەندامێ کۆنسەیا سەرۆکاتیا KCK ژی راگەھاند کو ئالیێ کوردی ژ ئیمرالی ھەتا HDP بۆ سەرخستنا قۆناغا ئاشتیێ گەلەک فیداکاری کرینە و ئەو وەک KCK ژی ئامادەنە داخوازێن سەرۆکێ خوە بجە بکەن و گۆت: (سۆزێن کو حوکمەتا تورکیا ب رێیا نوونەرێن خوە داینە ئوجەلانی ھەتا نھا بجە نەکرینە و سەرۆک کۆمار و جێگرێ سەرۆکێ حوکمەتا تورکیا ب داخۆیانیێن خوە یێن توند ئالۆزی د قۆناغا ئاشتیێ دا دروست دکەن و ھەر ئاخڤتن و بزاڤێن وان ل دژی قۆناغا ئاشتیێ نە و ئەو پتر ژ ھەیڤەکێ یە سۆزا دەستپێکرنا دانوستاندنان داینە لێ ئەو ژی ھەتا نھا بێی ئنجام مایە و دڤێت حوکمەتا تورکیا خوە زەلال بکەت و د دەستپێکێ دا سۆزێ کو دایە بجە بکەت و پاشی ژ مە داخوازا چەک دانینێ بکەت).
جەنگیز چاندار رۆژنامەڤان و زانایێ سیاسەتا تورکیا و رۆژھەلاتا ناڤین ژی د دەربارێ قۆناغا ئاشتیێ دا راگەھاند کو حوکمەتا تورکیا قۆناغا ئاشتیێ بۆ سەرکەڤتنا د ھەلبژارتنێن پەرلەمانێ دا بکار دھینیت و گۆت: (دلسۆزیا حوکمەتێ دێ پشتی ھەلبژارتنان دەرکەڤیتە ھۆلێ و ل دووڤ رەوشا نھا و داخۆیانیێن سەرۆک کۆمار و بەرپرسێن حوکمەتێ ھەتا ئەنجامدانا ھەلبژارتنان ئەز چاڤەرێی چو پێنگاڤەکی ژ ئالیێ حوکمەتێ ناکەم و ئالیێ کوردی ژی د رەوشا نھا یا رۆژھەلاتا ناڤین نە بەرھەڤە دەستان ژ چەکی بەردەت).
ئه‌ڤرۆ نیوز:
ئیلهامى ئیشك كو ل میدیا توركیا ب “باڵکجی” یێ به‌رنیاسه، ئێكه ژ گرنگترین ئه‌و ناڤێن كو د ناڤبه‌را ئیمرالى و ده‌وله‌تا توركى نێڤبه‌رى كرى، ئاماژه ب وێ یه‌كێ دكه‌ت كو ئوپه‌راسیونا كونترۆلكرنا مووسل ل دووماهیا هه‌یڤا 4 دێ هێته ئه‌نجامدان، و توركیا ب چالاكانه دێ پشكداریێ تێدا كه‌ت .
ئیلهامى ئیشك ئاماژه ب وێ یه‌كێ دكه‌ت كو پێشمه‌رگه و گه‌ریلایێن په‌كه‌كێ و هێزێن سوونى دێ پشكداریێ د ڤى شه‌رى دا كه‌ن.
ئه‌ڤرۆ نیۆز، قائید میرۆ
ئه‌ڤرۆ ژ ئه‌گه‌رێ په‌قینا TNT داعش ل میحوه‌رێ گوێڕ چوار پێشمه‌رگه‌یێن كوردستانێ برینداربوون و فه‌رمانده‌كێ پێشمه‌رگه‌ی ژی دبێژیت ره‌وشا برینداران یا باشه.
رائید پیرۆ ره‌شید، فه‌رماندێ پێشمه‌رگه‌ی ل میحوه‌رێ گوێڕ ب ئه‌ڤرۆ نیۆز راگه‌هاند” ئه‌ڤرۆ پشتی ترۆمبێله‌كا هێزێن پێشمه‌رگه‌ی چوویه ناڤا گوندێ تلڕیم ل میحوه‌رێ گوێڕ، TNT پێڤه په‌قی و د ئه‌نجامدا چوار پێشمه‌رگه برینداربوون.
رائید پیرۆی گۆتژی” ره‌وشا بریندارێن پێشمه‌رگه‌ی یا باشه و تنێ برینا ئێك ژوان یا گرانه، به‌لێ نوكه داعش ل ده‌ڤه‌رێ زۆر لاوازبوویه و شیانێن هێرشكرنێ نه‌ماینه ل سنورێ مه‌خموور و گوێڕ تنێ جار جار ته‌قه‌یێن دوور ل هێزێن پێشمه‌رگه‌ی دكه‌ن.
نيشاندان