ئه‌ڤرۆ نيوز، نيوار محه‌مه‌د سه‌ليم:

به‌رپرسێ راگه‌هاندنێ ل رێڤه‌به‌ريا گشتيا ساخله‌ميێ ل پارێزگه‌ها دهۆكێ راگه‌هاند كو هژمارا وان بريندارێن ته‌قينێن حه‌سه‌كێ ئيناينه‌ دهۆكێ بوونه‌ حه‌فت كه‌س.

حه‌مزه‌ ره‌زيكى به‌رپرسێ راگه‌هاندنێ ل رێڤه‌به‌ريا گشتيا ساخله‌ميا پارێزگه‌ها دهۆكێ بۆ ئه‌ڤرۆ نيوز راگه‌هاند كو حه‌فت كه‌س ژ بريندارێن كريارێن تيرۆرستى يێن داعش يێن شه‌ڤا نه‌ورۆزێ بۆ نه‌خۆشخانێن دهۆكێ هاتينه‌ ره‌وانكرن

زێده‌تر گۆت: “سێ زارۆنه‌ و چار ژى گه‌نجن و نشته‌رگه‌رى بۆ سێ ژ وان هاتيه‌ كرن و ئێك ژى هاتينه‌ ره‌وانه‌كرن بۆ نه‌خۆشخانا سۆتن و جوانكاريێ ل پارێزگه‌ها دهۆكێ و يێن دژى ل نه‌خۆشخانا ته‌نگاڤيان دهێنه‌ چاره‌سه‌ركرن”.

پێشتر ژى راگه‌هاند بوو كو ل سه‌ر داخوازا سه‌رۆكاتيا هه‌رێما كوردستانێ، رێڤه‌به‌ريا گشتيا ساخله‌ميێ ل پارێزگه‌ها دهۆكێ سێ ته‌نێن ده‌رمانان ژى بۆ نه‌خۆشخانێن وى باژێرى هنارتينه‌ بۆ ده‌رمانكرنا برينداران”.

ژ ئه‌نجامێ دو ته‌قينێن خوه‌ كوژى ب ترۆمبێلێن تى ئێن تى كرى بۆ سه‌ر جهێن ئاهه‌نگێن نه‌ورۆزێ يێن ته‌ڤده‌م و ئه‌نه‌كه‌سێ ل باژێرێ حه‌سه‌كێ ل شه‌ڤا 20\3\2015، 45 كه‌س هاتنه‌ كوشتن و 130 كه‌س ژى بريندار بوون، وه‌كو ئامارێن ئاسايشا جزيرێ راگه‌هاندى.

پشتى ئه‌ڤان په‌قينان ئێكسه‌ر ب رێيا راديۆ و پێگه‌هێن خوه‌ يێن فه‌رمى، چه‌كدارێن تيرۆرستێن داعش به‌رپرساتيا خوه‌ ژ ڤێ كريارا تيرۆرستى دابوو دياركرن.