ئه‌ڤرۆ نیوز، ڤه‌ده‌ر ره‌شاڤایی:
جهێ هه‌ر سێ كچێن بریتانی كو به‌ری دو حه‌فتییان ل له‌نده‌ن بێ ئاگه‌هداریا دایك بابێن خوه گه‌شت كربوو توركیا و پاشی چووبونه سوریا دا بگه‌هنه داعش دیاربوو.
شڤێدی هه‌ر سێ كچێن بریتانی مێڤانێن تیرۆرستێن داعش بووینه و گه‌هشتینه ماله‌كێ ل باژێرێ ره‌قه یێ سوری پایته‌ختێ رێكخستیا تیرۆریا داعش .
ئه‌ڤ سێ كچه ئێك 16 سالییه و دو ژی 15 سالی نه و قوتابی بوون ل له‌نده‌ن و گه‌شت كربوو بۆ توركیا پاشی بێ چ رێگری ل سنورێ سوریا ده‌ربازكریه و گه‌هشتینه داعش.
ئه‌ڤرۆ نيوز:
حوكمه‌تا هه‌رێما كوردستانێ ئه‌ڤرۆ ئاشكرا كر كو وان ب رێژا 97% رێككه‌فتنا ل گه‌ل به‌غدا ل دۆر هنارتنا نه‌فتێ بجهـ ئینایه و نه‌فت ته‌سلیمى كومپانیا سومو كریه و دڤێت ئێدى به‌غدا پشكا هه‌رێمێ ژ بودجه‌ى بهنێریت.
وه‌زاره‌تا سامانێن سروشتى ئه‌ڤرۆ د مالپه‌رێ خوه‌دا به‌لاڤكريه كو هه‌رێمێ ل دووڤ بودجێ قانوونا بودجێ 2015 ، پابه‌نديا خوه ب رێككه‌فتنا ل گه‌ل به‌غدا ل دۆر هنارتنا نه‌فتێ ب رێيا كومپانيا سومو بجهـ ئينا، ئێدێ دڤێت به‌غدا بودجه و پارێ بۆ پێشمه‌رگه‌ى هاتيه دياركرن بهنێريت.
وه‌زاره‌تا سامانێن سروشتى ئاماژه ب وێ يه‌كێ دايه كو حوكمه‌تا عيراقێ كێمتر ژ 20% پشكا هه‌رێما كوردستانێ ژ بودجه‌ى بۆ هه‌يڤا 1 يا ئه‌ڤ ساله دابينكريه و چ پاره‌كێ دى بۆ هه‌يڤا شوباتێ دابين نه‌كريه.
ئه‌ڤرۆ نيوز:
د روونشتا ئه‌ڤرۆ نيڤر دا په‌رله‌مانتار په‌روا عه‌لى ل نا هولا په‌رله‌مانێ كوردستانێ گول پێشكێشى په‌رله‌مانتارێن ژن و ده‌سته‌يا سه‌رۆكاتيا په‌رله‌مان و سه‌رۆكێن فراكسيونان كر.
په‌روا عه‌لى گۆت: دوهى رۆژا جيهانيا ژنان بوو، ئه‌ڤرۆ ژى سه‌رۆكێ په‌رله‌مانى به‌حسێ قاره‌مانيا ژنا كورد كر ب تايبه‌ت ژنێن شه‌رڤان و ژنێن پێشمه‌رگه، من ژى وه‌ك په‌رله‌مانتاره‌ك دخواست بۆ وێ قاره‌مانيا ژنا كورد ب دانا گولان پێشوازيێ ل رۆژا جيهانيا ژنان بكه‌م.
ئه‌ڤرۆ نیوز، ناجی به‌ده‌ل:
ڤیان عه‌باس به‌رپرسا سه‌ندیكا رۆژنامه‌ڤانێن كوردستانێ لقێ دهۆك بو ئه‌ڤرۆ نیوز دیاركر ئه‌ڤرۆ 30 كچین چه‌له‌نگێن دبیاڤێ راگه‌هاندنێ ل ته‌ڤایا ده‌زگه‌هێن راگه‌هاندنێ ل پارێزگه‌ها دهۆكێ هاتنه خه‌لاتكرن .
ناڤبریێ ئه‌و چه‌نده ژی گوت: ب چاڤدێریا پارێزگارێ دهۆكێ ئه‌ڤ 30 كچ هاتینه خه‌لاتكرن و ل گوری چه‌ند مه‌رجه‌كێن دیاریكری ئه‌و هاتینه دیاركرن كو كه‌سێن ژیهاتی و چه‌له‌نگن .
ڤیان خانێ ئه‌و ئیكه ژی دیاركر كو ب مه‌به‌ستا 8 ئادارێ ئه‌ڤ چالاكیه هاتیه كرن كو سه‌ندیكایا رۆژنامه‌ڤانان ژنێن ئه‌ندام ژ بیرنه‌كریه و هه‌ر ده‌م خه‌مخورا وانه ئه‌ڤه ژی جوره‌كه ژ پشته‌ڤانیێ كو دناڤا كارێ خودا رژدتر و ئه‌كتیفتر بن.
هه‌ژى گوتنێ یه كو ئێكه‌تیا خوشكانى كوردستان و ئێكه‌تیا ئافره‌تان لقێ دهۆك ژى هه‌ر ئێك ژ وان جودا خه‌لات ل سه‌ر ڤان 30 كچێن رۆژنامه‌ڤان به‌لاڤكرن.
ئه‌ڤرۆ نيوز، نيوار محه‌مه‌د سه‌ليم:
راگه‌هاندنا رێڤه‌به‌ريا پۆليسێن پارێزگه‌ها دهۆكێ راگه‌هاند كو پێشى دو رۆژان كه‌سه‌كى ل تاخێ گه‌لى خوه كوشتيه و ئه‌گه‌رێن كوشتنێ ژى د ديار نينن.
رائيدێ مافپه‌روه‌ر هێمن سلێمان، به‌رپرسێ راگه‌هاندنێ ل رێڤه‌به‌ريا پۆليسێن پارێزگه‌ها دهۆكێ راگه‌هاند كو پێشى دو رۆژان زه‌لامه‌كێ 75 سالى ب ناڤێ ” ع. ح”خوه ب گوله‌كێ كوشتيه.
به‌رپرسێ راگه‌هاندنێ ل رێڤه‌به‌ريا پۆليسێن پارێزگه‌ها دهۆكێ دا زانين ژى كو هێشتا ئه‌گه‌رێن خوه‌كوشتنا ڤى كه‌سى نه‌هاتينه زانين، به‌لێ ڤه‌كۆلين د روودانێ دا يا به‌رده‌وامه.
ئەڤرۆ نیۆز، سالار دۆسکی:
عەبدوللا رێکانی ئەندامێ پەرلەمانێ کوردستانێ، بۆ مالپەرێ ئەڤرۆ نیۆز گۆت: چەندین گەنگەشە ھاتینەکرن ل سەر پرۆژێ ئینانا نوشداران ژ دەرڤە و دیسان مە بزاڤ کرینە کو ھندەک رێنما ب ڤێ مەبەستێ بھێنە دەرکرن، دیسان پرۆژێ قانوونا چاندنا ئەندامێن لەشێ مرۆڤی و گەھشتیە قوناغا پێشکەفتی.
عەبدوللا رێکانی ئەندامێ پەرلەمانێ کوردستانێ، ئەوچەندەژی گۆت: یێ کار دکەین قانوون دەرمانێن سرۆشتی رێک بێخیت و نە ھەر کەسەکێ ل مال و بێ کار بیت بیتە نوشدارێ مللی و دەرمانان چێکەت..
رێکانی گۆتژی: دێ ل ناڤاراستا ئادارا ئەڤ سالە دێ رونشتنێن بەرفرە ل گەل نوشداران و ئەڤێن ڤی کاری دکەن ھێنەکرن و گەنگەشە ل سەر بابەتی دێ ھێنەکرن.
ئەڤرۆ نیۆز، قائید میرۆ:
ئەڤرۆ فڕۆکەیێن ھەڤپەیمانان ل قەزا شەرگات، کاروانەکێ ترۆمبیلێن داعش کرە ئارمانج و د ئەنجامدا 62 ترۆمبێل ھاتینە ژناڤبرن و ھژمارەکا زۆرا چەکدارێن داعش ھاتنە کوشتن.
غەیاس سورچی، کارگێڕێ مەلبەندێ ئێکەتی نیشتیمانی کوردستان ل مووسل ب ئەڤرۆ نیۆز راگەھاند” پشتی ھێرشا ئەڤرۆ ھێزێن پێشمەرگەی بۆسەر رۆژئاڤایێ کەرکووکێ، ھێزەکا مەزنا تیرۆرستێن داعش کو ل 62 ترۆمبێلا پێکھاتبوو دخواست ل باژێڕێ مووسل بەرەف قەزا حەویجە بچن و پشتەڤانیا ھێزێن خوە بکەن لھەمبەر ھێرشا پێشمەرگەی”.
غەیاسی گۆتژی” پشتی ئەف ھێزا مەزنا تیرۆرستێن داعش گەھشتیە نێزیک قەزا شەرگات، ژلایێ فڕۆکەیێن ھەڤپەیمانان ھاتنە بوردۆمانکرن و د ئەنجامدا، ھەر 62 ترۆمبێلێن تژی چەکدار ھاتنە ژناڤبرن و چەکدارێن ناڤا ترۆمبێلانداژی ھژمارەکا کێم رزگاربوون و یێن دیژی ھاتنە کوشتن.
ئه‌ڤرۆ نيوز:
د تاوانه‌كێ دا كو جادا عيراقى گه‌له‌ك به‌حس لێ دكه‌ت ميليشياتێن حه‌شه‌د شه‌عبى سه‌رێ شڤانه‌كێ په‌زى بڕيه ل گوندێ جه‌لام ل نێزيك تكريت و ب ڤيديۆ وێنه كريه و ئه‌و وێنه ل ئه‌نترنێتێ به‌لاڤ كريه، به‌رپرسه‌كێ عيراقى ژى ته‌كستێ ل سه‌ر راستيا وێ ڤيديۆيێ دكه‌ت و دبێژيت: “ئه‌ڤه تاوانه‌كا شه‌رمينه و دێ زيانێ گه‌هينيته ئۆپه‌راسيۆنێن رزگاركرنا ده‌ڤه‌رێن مايين”.
ب گۆره‌يى ڤيديۆيه‌كێ كو ئه‌ڤرۆ ل ئه‌كاونتێن “عصائب اهل الحق” به‌لاڤ بوويه و سه‌ر ب حه‌شه‌د شه‌عبى نه، هژماره‌كا چه‌كدارا ب جلكێن له‌شكرى ده‌ردكه‌ڤن و ل دۆر زه‌لامه‌كى دزڤرن كو نێزيكى 40 ساليێ يه، دژداشه‌كێ عه‌ره‌بى يێ ل به‌ر، بێ ره‌حم لێ دده‌ن و خوين ژ لاشێ وى دهێت، كه‌سه‌ك ژى دهێت و سه‌رێ وى دبريت و ل ده‌مێ برينا سه‌رى ژى هاوار هاوارا وى يه، كه‌سانێن ده‌وروبه‌رێن وى ژى ئاخفتنێن كرێت دبێژنێ و هيتافاتان دده‌ن.
ب گۆره‌يى زانياريان قوربانى شڤانێ په‌زێ ئێك ژ سه‌رۆك عه‌شيرێن شه‌مه‌ر بوويه ل گوندێ جه‌لام يێ سه‌ر ب باژێركێ عوجه نێزيكى تكريت ب ناڤێ ئه‌بۆ عومه‌ر شه‌مه‌رى و خێزانداره و شه‌ش زارۆ هه‌نه و بچووكترين زارۆ ژى يێ شير خوره دژيێ دو هه‌يڤيێ دا.
حسێن فه‌زلى ئه‌ندامێ لژنا هه‌ڤكاريا ئه‌منى ل پارێزگه‌ها تكريت د داخۆيانيه‌كێ دا ته‌كست ل سه‌ر راست و دروستيا وێ ڤيديۆيێ كر و گۆت: “مخابن ئه‌وێن ئه‌و كار كرين سه‌ر ب حه‌شه‌د شه‌عبى نه، به‌لێ ره‌فتاره‌كا تاكه كه‌سى يه”.
وه‌داعه عه‌بۆد ئێك ژ رووسپيێن عه‌شيره‌تێن تكريته بۆ ده‌زگه‌هێن راگه‌هاندنێ راگه‌هاند: “ئه‌ڤه جارا ئێكێ نينه حه‌شه‌د شه‌عبى كاره‌كێ ژ ڤى ره‌نگى بكه‌ت، به‌لكو ئه‌ڤه هێرشا وان ده‌سپێكرى هه‌تا نوكه وه‌كو داعش ره‌فتارێ دكه‌ن و سه‌رێ خه‌لكى ژى دبڕن”.
نيشاندان