ئەڤرۆ نیوز:

ل دەڤەرا مەندەلی و ل پتریا دەڤەرێن کوردستانی یێن دەوروبەرێ قەزا خانەقین ھژمارەکا مەزن یا وەلاتیێن کورد ب فەرمی یێن بوینە حەشد شەعبی و نوکە کوردان ھێزەکا دو ھزار کەسی دناڤ حەشد شەعبی دا یا ھەی و فەرماندێ وێ ژی کوردە، بەرپرسەکێ پارتی ژی دبێژیت، ھەرکوردەکێ ببیتە حەشد شەعبی جاشە و مەترسیا وان ل سەر کوردستانێ یا مەزنترە ژ داعشێ.
شێخ جەعفەر مستەفا، بەرپرسێ لقا پازدە یا پارتی دیموکراتی کوردستان ل خانەقین بۆ رۆژناما ئەڤرۆ گۆت” ل دەڤەرا مەندەلی، کو دەڤەرەکا کوردی یە و سەر ب قەزا خانەقینێ ڤەیە، ھژمارەکا وەلاتیێن کورد پەیوەندی ب ملیشیێن شیعی یا کری و بەری نوکە ژی و ل دەستپێکا ھاتنا حەشد شەعبی، کورد دگەھشتنە ناڤ رێزێن وان، بەری دەمەکی ل ناحیا مەندەلی ب شێوەکێ فەرمی حەشد شەعبی بارەگایێ خوە ڤەکر و پۆلیسێن دەڤەرێ ھاتنە ڤەکێشان و چەکدارێن میلیشیێن شیعی چوونە جھێن وان، ل دەڤەرێن دی ژی کورد بووینە حەشد شەعبی، بەلێ بەری چەندەکێ فەرماندەکێ کورد ب ناڤێ (لوقمان) کو پلەیا عەقید ھەبوو چویە دناڤ رێزێن حەشد شەعبی دا و یێ بوویە فەرماندێ ھێزێ، ئەو فەرماندێ کورد خەلکێ گەرمیانە و دو ھزار چەکدار یێن ھەین، کو ژ نەتەوێن کورد و عەرەب و تورکمان پێکھاتینە و گورەی پێشبینیێن مە ٥٠٠ چەکدارێن حەشد شەعبی ل وێ دەڤەرێ کوردن”.
بەرپرسێ لقا پارتی ل خانەقینێ گوت ژی” گەلەک ئەگەرێن ھەین بۆ چوونا کوردان دناڤ رێزێن حەشد شەعبی دا، بەلێ رەوشا ئابووری کاریگەریەکا مەزن یا ھەی و خەلک ژ ھەموو حزبێن کوردی یێن چووینە دنا حەشد شەعبی دا، خەلکێ پارتی و ئێکەتی و بێلایەن و ھەموو حزب و تەخان تێدانە و نوکە حەشد شەعبی نە، مرۆڤ راستیێ ژی بێژیت میلیشیێن شیعی پارەکێ مەزن ددەنە چەکدارێن خوە و خەلکێ مەژی ژبەر ژیانا خوە نەچارن کارەکی بکەن”.
ناڤبری ئاشکراکر ژی” مە بزاڤێن مەزن یێن کرین کو خەلک پەیوەندیێ ب حەشد شەعبی نەکەت، چونکی ئەڤە کارەکێ مەترسیە بۆ سەر دەڤەرێ و کوردان، دیسا کارەکێ نەقانوونی یە ل دەڤەرێن مادێ ١٤٠ دھێتەکرن، چوونا ڤی خەلکی گەلەک ژ داعشێ خراپترە، بۆچوونامە وەکی پارتی ئەوە، ھەرکەسەکێ کورد بچیتە دناڤ رێزێن حەشد شەعبی دا، ئەم ب جاش ھژمار دکەین”.
شێخ جەعفەری دیارکر” ئەو فەرماندێ کورد یێ ب ناڤێ عەقید لوقمان، بەرپرسیاریەکا مەزن یا دناڤ حەشد شەعبی دا یا ھەی و دەڤەرێن خانەقین و کفری و ھەتا قەرەتەپە و حەمرین یێن دبن کۆنتڕۆلا وی دا و فەرە وەزارەتا پێشمەرگە ھەلویستێ خوە دیار بکەت، باشە ئەو ب فەرمانا کێ ڤی کاری دکەت، ژ بەر کو بەری نوکە گوتبوو ئەز ب فەرمانا ئیدارا گەرمیان چوویمە دناڤ حەشد شەعبی دا، ھەکە بھێت و پرس ب ئیدارا گەرمیان ھاتبیتە کرن، بێگومان ئێکەتیا نیشتیمانی و بزاڤا گۆڕان بەرپرسن، چونکی ئیدارا گەرمیان یا ل بن دەستھەلاتا واناندا و دڤێت ئێکلا بکەن و ھەکە ئیدارا گەرمیان چو فەرمان نەکربن، بلا بەرسڤا وی فەرماندەی بدەن، ھەکە پرس ب ئیدارا گەرمیان ھاتیەکرن، دیسان بلا داخوانیەکێ بدەن، ئەو پرسە یا گرنگە و نابیت ھەر کەسەک خوە لێ بێدەنگ بکەت، چونکی ھەر کەسەکێ ئەڤ فەرماندێ کورد ھنارتبیت، بۆ جاشایەتیێ یێ ھنارتی و قەزایەک و چەند ناحیەکێن کوردی یێن داینە حەشد شەعبی، پارڤەکرنا ئاخا کوردستانێ دبن ئەمرێ کەسێ دا نینە”.