ئەڤرۆ نیوز:
شیرەتکارێ جڤاتا ئاسایشا ھەرێما کوردستانێ راگەھاند: پێدڤیە پارتیا کرێکارێن کوردستانێ “پەکەکە” قەندیلی چوول بکەت چونکو ئەو ئاخا عیراقێ یە و پێدڤیە یەپەگە ژی پشتی داعش شنگال چوول بکەت کا چاوان پێشمەرگەیی کۆبانێ ب جھـ ھێلا و ڤەگەریا جھێ خوە.
مەسرۆر بارزانی شیرەتکارێ جڤاتا ئاسایشا ھەرێما کوردسشتانێ د دیدارەکێ دا ل گەل مالپەرێ ئەلمونیتر، کو بارەگایێ وی یێ سەرەکی ل واشنتۆنە، بەحس ل چەندین پرسینێن گرنگ و سەرەکی یێن ھەرێما کوردستانێ کریە.
ل دەسپێکێ بەحس ل بەرەیێن شەرێ دژی داعش دکەت و ئاماژێ ب وێ چەندێ دکەت کو بەردەوامیا سەرکەفتنێن پێشمەرگەیی، داعش بەر ب نەمانێ دبر و گۆت: “بەلێ کەفتنا ھەردو باژێرێن رومادی و تەدمور جارەکا دا ورەیا وان بلند کر.
ئەڤی مالپەری د پێشەکیا دیدارا خوە دا نڤیسیە: کورد ل باشوور و رۆژئاڤا دو ھەڤپشکێن کاریگەر یێن ھەڤپەیمانیا نێڤدەولەتی یا دژی داعشن و بزاڤێن مەزن بۆ شکەستنا داعش کرینە، بەلێ ھەڤرکیێن د ناڤبەرا ھێزێن کوردی ل سوریا و عیراق ئەو کارتێکرنا مەزنا وان ھاتیە ڤەشارتن.
مەسرۆر بارزانی بەحس ل ژمارا شەھیدێن ھێزێن پێشمەرگەیی دکەت کو ھەتا نوکە 1280 پێشمەرگە شەھید بووینە و حەفت ھزار کەس ژی بریندار بووینە و زیانێن چەکدارێن داعش ژی د ڤان روو ب رووبوونا دا گەھشتینە 11 ھزار کوشتیان.
دەربارەیی ھەبوونا پەکەکێ و یەپەگێ ژی شیرەتکارێ جڤاتا ئاسایشا ھەرێما کوردستانێ گۆت: “دڤێت پەکەکە قەندیلی چوول بکەت و یەپەگە ژی ب ڤەگەریتە جھێ خوە”.
مەسرۆر بارزانی بۆ ڤی مالپەری دبێژیت: “پەکەکە دڤێت قەندیلی چوول بکەت چونکو ئەو ئەردێ عیراقێ یە و ئێک ژ ئەگەرێن حەزا مە بۆ سەرگرتنا قووناغا ئاشتیێ ژی ئەوە و مە دڤێت ب ئاشتی ئەڤ کارە ب رێڤە بچیت”.
شیرەتکارێ جڤاتا ئاسایشا ھەرێما کوردسشتانێ گۆت: “ھەبوونا یەپەگێ و پەکەکێ ل شنگال و قەندیل مێڤانن کا چاوان پێشمەرگە ل کۆبانێ مێڤان بوو و ڤەگەریانە ڤە”.
دەربارەیی ھەلویستێ تورکیا ژی گۆت: “حوکمەتا ھەرێما کوردستانێ چاڤەرێ تشتێ مەزنتر ژ تورکیا دکر، چونکو ئەنداما ناتۆیێ و ھەڤپەیمانا شەرێ دژی داعشە. ژ بەر ھندێ دشێت ب رەنگەکێ باشتر پشکدار بیت. دەربارەیی پرسا نەرازیبوونا تورکیا ل دۆر ھەبوونا کیانەکێ سەربەخۆ ل سوریا ژی گۆت: “پێدڤیە تورکیا زێدەتر ژ داعش یا نەرەحەت بیت”.
د ڤێ دیدارێ دا، مەسرۆر بارزانی دەربارەی رەوشا عیراقێ ددەتە زانین کو عیراق یا بوویە سێ پشک ل باکوور کورد ب رێڤە دبەن و ل ناڤەراست ژی داعش و ل باشوور ژی شیعە و گۆت: “داعش د ناڤ چ ھەڤسەنگیێن سیاسی دا نینە و کورد وێ ب ھەڤسۆیا خوە قەبوول ناکەت و دێ ژ ناڤ یەت”.
مەسرۆر بارزانی تەکست ل سەر وێ چەندێ کر کو سەربەخۆیا کوردان و رێ دان ب پێدانا چەکی وەکو پێدڤیا خوە دشیان دایە ببیتە ھەڤپشکیەکا باش بۆ تێکشکاندنا داعش.
دووماھی پرسا ڤی مالپەری ژی بەحسکرن بوویە ل سەر پرسا سەرۆکاتیا ھەرێما کوردستانێ و بارزانى کارێ ھندەک لایەنێن سیاسی ژی ب “یاریەکا نەیا شرین” وەسف دکەت و ئاماژێ ب وێ چەندێ ژی دکەت کو پارتی ل گەل سازانێ یە و خودانا پتریا پەرلەمانی یە ژی بەلێ ب سازانێ سەرەدەری ل گەل بابەتان دکەت.
مەسرۆر بارزانی دبێژیت: “مخابن ھەر دەما ھەڤرکێن پارتی دەرفەتەکێ ژ بوو لێدانا پارتی دبینن، سازانا نشتیمانی ژبیر دکەن”.
مەسرۆر بارزانی: دڤێت پەکەکە قەندیلی چوول کەت
نيشاندان
