ئه‌ڤرۆ نيوز:

گەلەک خوارنا شریناھیان ل ھەیڤا رەمەزانا پیروز وەکو چێکرن و خوارنا (کادە، کولیجە، کونافە ) و ھەموو جورێن دیترێن شریناھیان د ماوێ فتارەکرنێ دا، کو جھێ داخێ یە چ رۆژ نابورن و سفرا مە یا ڤالا بیت ژ شریناھیان، ئەو شریناھی پتریا وان دبنە ئەگەرێ وەستیان و دامابوونا مرۆڤی ب رۆژێ و دیسان دبنە ئەگەر مرۆڤ تێھنی ببیت، و ژبەرکو گەلەک کاوری دناڤدا ھەنە، لەورا دبنە ئەگەرێ بلندکرنا رێژا شەکرێ دناڤ خوینێ دا و کومڤەبوونا روینان و قەلەوی و ل دووماھیێ ژی کومەکا نەخوشیێن کوژەک.
دگەل ڤێ چەندێ عەدەتێن خەلەتێن خوارنێ ژی گەلەک رۆلێ خۆ دڤێ ھەیڤێ دا ھەنە و ئەم ھیڤی دکەین پێکڤە پێکولێ بکەین وان نەریتان نەھێلین و بلا رەمەزان نەبیتە ئەگەرێ ب ھەروەچوونا خوارنێ.

ژبۆ ھندێ کو ل مەھا رەمەزانێ تێھنی نەبی و کارتێکرن ل ساخلەمیا تە نەھێتە کرن، پێدڤیە تو خوە ژڤان خوارن و ڤەخارنان بپارێزی:
– خوێ یا خوارنێ: خوارنا تشتێن سویر ھەلبەت پێدڤیا مە ب ئاڤێ زێدەدکەن، لەورا باشترە گەلەک خوێ نەکەینە دناڤ خوارنێ دا و خۆ ژ خوارنێن سویرکری دوور بکەین، وەکو ماسیێن سویر و موخەللا و دێ گەلەک باش بیت ئەم ئاڤا نیموکان ل جھێ خوێ ل زەرزەواتی بکەین ژبەرکو ئاڤا نیموکان خوارنێ ھەڤسەنگ دکەت.
– دەرمانک و بھارات: ئەو خوارنێن گەلەک بھارات دناڤدا مرۆڤی پال ددەن کو گەلەک ئاڤێ ڤەخوت، ژبەرکو ئەو خوارن ئاڤێ ژ گەوری و دەڤ و گەدەیا مرۆڤی دمێژن، دبنە ئەگەر ھشکاتی د لەشیدا پەیداببیت، پاشی مرۆڤ ھەست ب تێھنی بوونێ دکەت، لەورا یا باشترە ل سەر رۆژیگری خو ژێ دوور بکەت و ب تایبەت ل دەمێ پاشیڤی.
– چا و قەھوە: شیرەتان ل رۆژیگران دکەین ھندی دشیان دابیت خۆ ژ چایێ و قەھوێ دوور بکەت ژبەرکو ئەو کارێ گولچیسکان چالاک دکەن و گولچیسکان پال ددەن خۆ ژ ئاڤێ قورتال بکەن، ددووڤدا دێ بنە ئەگەر کو ئاڤ ژ لەشێ مرۆڤی کێم ببیت، نابیت ب چ رەنگەکی ئەم چایێ و قەھوێ وەکو شوونگر بۆ ئاڤێ ب کاربینین، ژبەرکو ئەو ب سروشتێ خۆ دکەلن و رۆژیگری شیان نینن گەلەکێ ژێ ڤەخوت.
– ڤەخوارنێن غازی: ئەوێن کو کاربوون دناڤدا کو دبنە ئەگەرێ وەرمینا زکی و مرۆڤ ھەست ب تێربوونێ دکەت و دبنە رێگر کو لەشێ مە مفای ژ شلەمەنیان نەبینیت، لەورا باشترە ب ئێکجاری دگەل فتارێ ڤەنەخوین.
– تیرێژا ئێکسەر یا رۆژێ:ھندی دشیاندابیت خۆ ژ تیرێژا رۆژێ دوور بکە و ژبۆ ھندێ تیشکا رۆژێ گەلەک کارتێکرنێ ل تە نەکەت و تو تێھنی نەبی.

ئه‌ڤرۆ نيوز:

ل ھەیڤا رەمەزانێ مرۆڤێ رۆژیگر گەلەک ھەست ب تێھنیبوونێ دکەت و ب تایبەت ھەکە دونیا یا گەرم بیت و مرۆڤ پتری ١٦ دەمژمێران چ نەخوت و نەڤەخوت، لەشێ مرۆڤی بەردەوام دێ ئاڤێ بەرزەکەت ھەتا دبیتە وەختێ فتارێ و ل وی دەمی دێ گەلەک پێدڤی ب ئاڤێ و شلەمەنیان بیت بۆ دوبارە ڤەگەراندنا ئاڤا بەرزەبووی.
ھەر کەسەک ژ مە شیان ھەنە ھاریکاریا خۆ بکەین کو ئاڤێ د لەشێ خۆ دا ب پارێزین و ھەست ب تێھنیبوونێ نەکەین، ئەوژی ب دۆڤچوونا ھندەک رێیان داکو پتر ھەست ب تێھناتیێ نەکەین.
* ئاڤ: سەرکێشا ھەموو شلەمەنیانە و چ شلەمەنیێن دیتر جھێ ئاڤێ ناگرن، شارەزا شیرەتان ل مە دکەن کو رۆژانە دجو لیترێن ئاڤێ ڤەخوین و ب تایبەت ھەکە گەلەک خوھدان ل لەشێ مەدا پەیداببیت، باشترە ل دەمێ سەرەدەریێ دگەل ئاڤێ دکەین ب ڤی رەنگی بیت:
– نابیت ب چ رەنگەکی تو بوتلێ ئاڤێ ڤەکری بھێلی بۆ دەمەکێ درێژ، ژبەرکو ئەو بەکتریایێن دناڤ دەڤێ مە و دەوروبەرێن مە رەنگە دناڤدا چالاک ببن و ببنە ژێدەرێ نەخۆشیان.
– ھەکە تەڤیا دوبارە ئاڤێ بکەیە بوتلی، باشترە قەپاغێ وی و دەوروبەرێن قەباغی باش ب ئاڤا گەرم و سابوونێ بشووی.
– تو دشێی ھندەک تشتا ل سەر ھەر کوپەکێ ئاڤا تو ڤەدخوی زێدەبکەی وەکو نیموکا و نەعنایێ و زەنجیلی.
– ژبۆ خۆ قورتالکرنێ ژ تاما کلۆری، باشترە ئاڤێ بدانیە دناڤ ئامانەکێ بەرفرەە دا بۆ دەمێ دەمژمێرەکێ بھێلە بەری تو ڤەخوی.
* شلەمەنی ب ھەموو رەنگێن خۆڤە، ب تایبەت ڤەخوارنێن وەکو خوشاڤا و شەربەتا فێقیێ سروشتی کو خوێ دناڤدا ھەیە دروستە تو ب کاربینی، شیرەتان خۆ دوور بکەن ژ شەربەتێن دەستکرد کو ب رێکێن پیشەسازی دھێنە دروستکرن ژبەرکو گەلەک شەکر دناڤدا ھەیە و زیانێن مەزن دگەھینن ساخلەمیا مرۆڤی و ھەستداریێ پەیدادکەن.
* زەرزەوات و فێقیێ گەھشتی:دێ گەلەک باش بیت ب شەڤێ و ل دەمێ پاشیڤێ تو فێقی و زەرزەواتی بخوی، ژبەرکو گەلەک ئاڤ دناڤدا ھەیە و بۆ دەمەکێ درێژ ئەو ئاڤ دناڤ رووڤیکان دا دمینیت و مرۆڤ ھەست ب برسیبوون و تێھناتیێ ناکەت.
* گیروکرنا پاشیڤی: باشترە پاشیڤ ل وەختێ خۆ بھێتە خوارن کو ژ نیڤ شەڤ پێدابیت، داکو رۆژیگر بشێت بەرھنگاریا تێھنیبوونێ بکەت و ب تایبەت ل رۆژێن ئێکەم یێن رۆژیگرتنێ و ھندی خوارنا پاشیڤێ سڤکتر بیت ھەلبەت باشترە.