ئەڤرۆ:

شوکریا شێخانی ئەنداما لژنا پەروەردە و خواندنا بلند ل پەرلەمانێ کوردستانێ بۆ باس دیارکر کو نوکە ھزار کۆرسیێن تواناسازی یێن قوتابیێن ھەرێمێ د ڤالانە و کەس ل جھێ وان نەھاتیە دانان.
گۆت ژی چار ھزار و ٢٠٠ قوتابیێن ماستەر و دکتۆرایێ ناڤێ وان ل بەرنامێ تواناسازی دەرکەفتیە، ھەتانوکە سێ ھزار و ٢٠٠ قوتابی ھاتینە رەوانە کرن، ژ وان ژی سێ سەد و ٢٠ قوتابیان شکەستن یا ئینایی و سەرکەفتی نەبووینە، ب ڤەگەریانا وان قوتابیێن سەرنەکەفتی ھزار کۆرسیێن بەرنامێ تواناسازی ب ڤالا ماینە و کەسێ دیتر ل جھێ وان نەھاتیە رەوانە کرن.
شوکریا شێخانی ئەو ژی ئاشکرا کر کو ژ ھەیڤا نەە یا سالا بۆری چو پارە بۆ قوتابیێن تواناسازی نەھاتیە خەرج کرن، لەورا ھندەک قوتابیان ل قووناغێن دووماھیێ و ژ بەر بێ پارەیێ نەچاربووینە خواندنا خوە ھێلایە، یان ژ زانکۆیێن وان ھاتینە دەرخستن.
وێ ئەنداما لژنا پەروەردە و خواندنا بلند ئاماژە دا وێ چەندێ ژی کو شکەستنا بەرنامێ تواناسازی دێ کاریگەریەکا خراب ل سەر ناڤودەنگێ ھەرێما کوردستانێ ھەبیت لەورا لژنا پەروەردە و خواندنا بلند دێ وەزیرێن پەیوەندیدار گازی کەتە پەرلەمانی.
شوکریا شێخانی ھەروەسا ئاشکرا کر کو ژ بودجا سالێن ٢٠١٠، ٢٠١١، ٢٠١٢، ٢٠١٣ یا ھەرێما کوردستانێ کۆژمێ ٤٠٠ ملیۆن دۆلار بۆ بەرنامێ تواناسازی ھاتینە تەرخان کرن، بەلێ چو سندۆق بۆ بەرنامەی نەبوون، لەورا نزانن چەند پارە ژ وی ھاتیە خەرج کرن و چەند ژێ مایە، کو ھەتا نوکە ب تنێ ئەوێن دڤی بەرنامەی دا چووینە ژ دەرڤە بخوینن ٢٠% خواندنا خوە ب دووماھی ئینایە و ڤەگەریاینە کوردستانێ.
وەزیرێ خواندنا بلند ل حوکمەتا ھەرێما کوردستانێ د. یوسف گۆران دیارکر کو ب تنێ لایەنێ کارگێریێ بەرنامێ تواناسازی ل سەر وەزارەتا خواندنا بلندە و خەرج کرنا پاران ل سەر وەزارەتا دارایی و جڤاتا وەزیرانە، گۆت ژی کێشا خەرج نەکرنا پاران ژی ژ بەر قەیرانا داراییە کو د شیان دانینە مووچێ فەرمانبەران ل دەمێ خوە دا بھێتە دان.
ئەو ژی ئاشکرا کر کو وەزارەتا خواندنا بلند و ڤەکۆلینێن زانستی ل ھەرێمێ بریار دایە پێداچوونێ د بەرنامێ تواناسازی دا بکەت.
بەرنامێ تواناسازی یێ حوکمەتا ھەرێما کوردستانێ یە و ل دووڤ ڤی بەرنامەی قوتابیێن ھەرێمێ بۆ تمامکرنا خواندنا ماستەر و دکتۆرایێ ل سەر حسابا حوکمەتێ دچنە دەرڤەی وەلاتی دخوینن.