ئه‌ڤرۆ نيوز:

پتریا خەلکی ل گەل وێ بوچوونێ نە کو ئەو زارۆیێن نوو دبن ھەست ب ئێشانێ ناکەن، و ھەتا ھەکە جھەکێ لەشێ وان ب ئێشیت ژی وان پێدڤی ب دەرمانێن ئێشکێمکرنێ یێن نوشداران نینە، ئەرێ ئەڤ بۆچوونە یا راستە؟
ھەلبەت یا راست نینە، زارۆ ژی وەکو مەزنان ھەست ب ئێشانێ دکەن و ھەر گوھۆرینەکا ل دەوروبەرێن وان رووبدەت، ئەوژی ھەست پێدکەن، ئەم ھەمی ژی دزانین کو ئێشان ئێک ژ گرنگترین ئەگەرێن سەرەدانا مرۆڤی یە بۆ نوشداری، چونکو ئەوێ ھەست ب ئێشانێ دکەت، دڤێت بزانیت ئەگەرێ ئێشانێ چیە، ھندەک نەخوشیێن مەزن ژی ھەنە، بەلێ چ ئێشانێ ل دەڤ مرۆڤی پەیداناکەن و نەخوش ھەست پێ ناکەن و ناچنە ل دەڤ نوشداران ژی، بەلێ ھەکە ئێشان ل گەل وان نەخوشیا ھەبا، نەخوشی زوو داھێتە دەستنیشانکرن و رەنگە ژیانا وی ژ مرنێ ھاتبا قورتالکرن.
بەری چەند رۆژان مە سەرەدانا پشکا چاڤدێریا زارۆیێن نوو دبن کر و ل وێرێ مرۆڤ دزانیت کا ئەو زارۆ چەند ھەست ب ئێشانێ دکەن، بەلێ ھندەک جاران وان دەلیڤە نینە بکەنە گری، ژبەرکو گەلەک سوندە د گەوریا واندا ھەنە، بەلێ ھەکە خوین ژێ دھێتە کێشان ژنوو مرۆڤ دێ وانیت ئەو چەند ھەست ب ئێشانێ دکەن و لێدانێن دلێ وان چەند ل سەر ئامیرەی ب زێدەیی دھێنە تومارکرن و فشارا وانژی بلنددبیت، ئەڤە نیشانێن ئێشانێ نە، وەسان نینە وەکو ئەم دبێژین ب تنێ زارۆ ژ برسێ و ترسێ دکەتە گری، بەلکو گەلەک ئەگەر بۆ گریا زارۆیان ھەنە.
ئەڤجا پێدڤیە ل سەر مە ئەم درەوان ل زارۆیان نەکەین و بزانین کو ئەوژی ھەر ل رۆژێن ئێکێ یێن ژیانا خۆ ھەست ب ئێشانێ دکەن و ھەتا ھەکە ئێشانا وان یا کێم ژی بیت ل پاشەرۆژێ ئەو ئێشان ل گەل وان دمینیت و دێ ل دەلیڤەکێ گەریێت کو ھەستا ئێشانا خۆ دەرببریت و نابیت ئەم بابەتێ ئێشانا زارۆیان پشت گوە پاڤێژین.

ئەڤرۆ نیوز:
ل نەخۆشخانا ھیڤی یا زارۆیان 27 زەحمەتترین نشتەگەریێن جوانکاریێ ھاتنە کرن، گەلەک ژ نەساخان ژیێ وان گەھشتبوو 18 سال و 21 سال ژی و رەنگە بێ ئارامیەک ل دەڤ وان پەیدابوو، و بەری نوکە بێ ھیڤی ببوون ژ چارەسەریێ، نوشدار دیاردکەن ھەر دو ھزار زارۆیێن نوو دھێنە سەر دونیایێ ئیک ژوانا تووشی ئاریشێن جوانکاریێ دبیت.
شاندەکێ نوشدارێن ئەلمانی سەرا پارێزگەھا دھۆکێ دا، پرۆڤیسور ئێمان کوتکسی نوشداری جوانکاریا زارۆیان دیارکر کو ئەو ل ھەموو جیھانێ دگەرینن بۆ ئەنجامدانا نشتەگەریێن جوانکاریی یێن دەگمەن و ب زەحمەت بۆ زارۆیان کو ھەر ئاریشەکا جوانکاریێ ل دێمێن وان ھەبن ئەو چارەسەر دکەن و گۆت: ئەم شیابن بھێنە ھەرێما کوردستانێ و ب تایبەتی ژی پارێزگەھا دھۆکێ بۆ ئێکەمین جار و مە کۆمەکا نشتەگەریان ئەنجام دان و ھەموو ژی ب رێژا 100% سەرکەڤتن ئینان.
د. قادر محەمەد سالح، تایبەتمەندێ نشتەگەریێن زارۆیان و رێڤەبەرێ سەنتەرێ نشتەرگەریێن زارۆیان، دیارکر کو 27 نشتەگەری ھاتنەکرن و گۆت: ئەڤ نشتەگەرییە دھێنە ھژمارتن زەحمەتترین جۆرێن نشتەگەریان و پتریا وان زارۆیان بێ ھیڤی ببوون و ئەڤە دەمەکێ درێژ بوو ل چارەسەریێ دگەریان، لێ شاندێ نوشدارێن ئەلمانی شارەزایی ھەبوون و ھەموو زارۆ چارەسەر کرن.
د. قادر دیارکر ژی ئەو زارۆیێن ھاتینە نشتەرگەریکرن، ھندەک خەلکێ دھۆکێ بوون و ھندەک ژی یێن سوران بوون زێدەباری ھندەک زارۆیێن ل کەمپیێن ئاوارا ئاکنجی، و گۆت: زێدەتر 120 نەساخان ھاتبوونە پشکنینکرن و ناڤێن وان ھاتینە تۆمارکرن بۆ سالا بھێت ل ھەیڤا شەش دێ شاندێ نوشدارێن ئەلمانی جارەکا دی سەرا دھۆکێ دەن بۆ ئەنجامدانا نشتەگەریێن جوانکاریێ ب تایبەتی ئەو حالەتیێن دگمەن.
رێڤەبەرێ سەنتەرێ نشتەرگەریێن زارۆیان دیارکر ژی، پلان ھاتیە دانان ل سالا بھێت 50 نشتەگەریێن دی یێن ب زەحمەت بھێنە کرن کو بەری نوکە چو جاران نەھاتینە کرن ل سەرانسەری عیراقێ و گۆت: ئەو دێ ئیکەمین جار بیت ل دھۆکێ دھێنە کرن و گۆتژی: شاندەکێ ب تنێ یێ نوشداران نەشێت وان زارۆیان چارەسەر بکەت بەلکو، شاندەک دھێت جۆرەکی نشتەگەریێ دکەت و شاندێ دی دێ تەمامکە ت کو حەفت نوشدارێن تایبەتمەند پێکڤە کاردکەن و ئەڤ سالە ئەڤە سێ شاندێن نوشداران بۆ ئەنجامدانا نشتەگەریێن جوانکاریی یێن دەگمەن قەستا دھۆکێ کرن.
د. قادر خۆیاکر ژی کو ھەر دو ھزار کەسان ئیک تووشی نەخۆشیێن دەگمەن دبیت و ل ڤان ھەیڤێن بۆری دۆرین 480 زارۆیان یێن ھاتینە دیتن کو ئاریشێن جوانکاریێ ھەنە، ژوانا ژی ھەتا نوکە 130 یێن ھاتینە نشتەرگەریکرن و گۆت: ب ھاتنا ڤان شاندان ژی تیمێن نەخۆشخانێ ژی فێری تشتێن نوو دبن، چونکو زانستێ نوشداری بەردەوام دپێشڤەچوونێ دایە.
د. قادر تایبەتمەندێ نشتەگەریا زارۆیان دیارکر کو شاندێ نوشدارێن ئەلمانی ئامیرێن پێدڤی دگەل خوە نە ئینابوون لەورا گەلەک نەساخان مان و گۆت: ئەڤ شاندێ نوشداران یێ تایبەتمەند بوو ب نشتەگەریێن جوانکاریێ بۆ وان کەسێن دەڤ ولێڤێن وان ڤەکری و پەحنیا دەڤێ وان نە یا دروست، بۆ جارا ئێکێ نوشدارێن ئەلمانی سەرا دھۆکێ ددەن و ڤان جۆرە نشتەگەریان دکەن